Nanchi mwatanga magazini a katataka a Kyamba Kya Usopa nyi? Monai inge mwakonsha kukumbula ano mepuzho:

Bakulumpe mu kipwilo ne bakalama ba mwanzo bafwainwa kuba byepi inge batambula mikambizho kufuma ku jibumba ja Lesa?

Bafwainwa kukookela. Bakonsha kwishikisha’mba: ‘Nanchi ntundaika balongo ne banyenga kwikala ba kishinka kwi Lesa nyi? Nanchi nkookela mikambizho ifuma ku balongo betutangijila nyi?’—w16.11, ji. 11.

Ñanyi kimye bena Kilishitu kyo baikele bazha mu Babilona?

Bena Kilishitu ba kine baikele bazha mu Babilona kimyetu kyafwile batumwa bapeleleko. Jibumba ja bantangi ba bupopweshi jatatwile kulengwa. Chechi wakwatankene na kafulumende mu kutundaika bwina Kilishitu bwa bansatuki kabiji kechi bateleko muchima ku byaambilenga kajibumba kacheche ka bena Kilishitu kajinga nobe wichi ne. Mu myaka ya kunangijila ku 1914 bashingwa batendekele kufuma mu Babilona Mukatampe.—w16.11, ma. 23-25.

Mambo ka mwingilo waingijile Lefèvre d’Étaples o anemena?

Mu myaka ya mu ma 1520, Lefèvre watuntulwile Baibolo mu mulaka wa Kifulenchi pa kuba’mba bantu bavula bamutangenga. Jishinda jalumbulwijilemo Lefèvre mashimikila a mu Baibolo jakwashishe Martin Luther ne bantuntuluzhi ba Baibolo bakwabo, nabiji William Tyndale ne John Calvin.—wp16.6, ma. 10-12.

Ñanyi lupusano luji pa “kuta muchima ku bintu bya buntunshi” ne “kuta muchima ku bintu bya mupashi”? (Loma 8:6)

Muntu uta muchima ku bintu bya buntunshi utatu muchima pa bisakasaka mubiji wanji wa bumbulwa kulumbuluka, kabiji kimye kyonse wambatu pa bintu bya mu bwikalo ne kukizhamo kwibinemeka. Pakuba muntu uta muchima ku bintu bya mupashi ukebesha kuba bintu bikeba Lesa; uno muntu uswisha mupashi wazhila kumutangijilanga kimye kyonse. Kuta muchima ku bintu bya buntunshi kuleta lufu, pakuba kuta muchima ku bintu bya mupashi kuleta bumi ne mutende.—w16.12, ma. 15-17.

Ñanyi mashinda amo akonsha kwimukwasha kukepeshako bijikila?

Kuta muchima pa bintu byanemesha, kubula kukizhamo kwakamwa pa bintu, kwikalangapo na kimye kya kukookoloka, kwikala na muchima wa lusekelo, kukaya makayo akosesha mubiji kimye kyonse ne kulaala kimye kyabaya.—w16.12, ma. 22-23.

‘Enoka bamuvilwile pa kuba’mba abule kumona lufu.’ (Hebe. 11:5) Bamuvilwile byepi?

Lesa wafwainwa wavilwile Enoka byo amulengejile wakupukilwa mu tulo ne kufwa kwa kubula aye mwine kuyuka’mba ubena kufwa.—wp17.1, ma. 12-13.

Mambo ka kwipelula o kwanemena?

Muntu wipelula wiyuka bulongo byo aji kabiji uyuka ne kuba’mba kuji bintu bimo byo akonsha kubula kuba nangwa byo babula kumuswisha kuba. Kwipelula kwavwangamo muntu kunemeka bakwabo ne kubula kulanguluka’mba wanema kukila bakwabo nangwa’mba mingilo yo engila yanema kukila ingila bakwabo.—w17.01, ji. 18.

Ñanyi kishiino kimwesha’mba Lesa watangijilanga jibumba jitangijila mu myaka kitota kitanshi byonkatu byo abena kutangijila Jibumba Jitangijila lelo jino?

Mupashi wazhila wakwashishe Jibumba Jitangijila kumvwisha bishinka bya mu Binembelo. Batangijilanga mwingilo wa kusapwila na bukwasho bwa bamalaika, kabiji balondelanga lutangijilo lwa Mambo a Lesa. Ne lelo jino byo byo kiji.—w17.02, ma. 26-28.

Ñanyi bintu bitulengela kumona bukuzhi amba bupe bwanema?

Kuji bintu bina bilengela: Mwine wapaine bukuzhi, ene mambo o ebupaine, bintu byavwangiwemo, ne lukatazho lo bwapwisha. Twafwainwa kulangulukanga pa bino bintu kyo byanemena.—wp17.02, ma. 4-6.

Nanchi mwina Kilishitu wakonsha kupimpulako byo afuukwilepo kala kuba nyi?

Kyanema kufuukula bintu bulongo. Pano bino, kwikala bimye byo twafwainwa kulangulukapo jibiji pa byo twafuukwilepo. Lesa byo amwene kuba’mba bena Ninevwa balapila, wapimpwile byo afuukwilepo kuba. Kimo kimye, kyakonsha kuwama kulangulukapo jibiji pa byo twafuukwilepo kala, kikatakata inge bintu byaaluka.—w17.03, ma. 16-17.

Mambo ka miyebe o yatamina?

Kwamba byatama pa bakwetu kwakonsha kulengela lukatazho kubaya. Umvwe twalubankanya nangwa ne, kwamba byatama pa bakwetu kwakonsha kulengela lukatazho kubaya.—w17.04, ji. 21.