1, 2. (a) Ñanyi mambo akatampe akunza bantu bonse? (b) Kuyuka buneme bwa kubingisha bumfumu bwa Lesa kwitukwasha byepi?

BANTU bavula lelo jino banemeka bingi mali. Batatu muchima pa kwikala na bunonshi ne bintu byavula. Bakwabo nabo banemeka bingi kwikala na kisemi, bwikalo bwawama nangwa kufikizha byonse byo bakeba mu bwikalo.

² Pano bino, mambo akatampe akunza bantu bonse ke kubingisha bumfumu bwa Yehoba. Twafwainwa kwibikako pa kuba’mba tubule kuvulama ano mambo. Ki ka kyakonsha kwitulengela kuvulama ano mambo? Twakonsha kupayankana na mingilo ya pa juba pa juba kya kuba twalubako ene mambo o kyanemena kubingisha bumfumu bwa Lesa. Nangwa makatazho a mu bwikalo akonsha kwitulengela kulubako kine kintu kyanemesha. Pano bino, inge twayukisha bulongo buneme bwa kubingisha bumfumu bwa Yehoba, kiketukwasha kuyuka bya kuchinchika makatazho a mu bwikalo. Kabiji kitukwasha kufwenya kwipi ne Yehoba.

3. Ñanyi bubela bwaambile Satana pa bukalama bwa Lesa?

³ Satana Diabola wazhinaukile bumfumu bwa Yehoba. Waambile’mba  Lesa kechi kalama wawama ne, kabiji amba ufya bintu byawama ku bilengwa byanji. Diabola waambile’mba bantu bakonsha kwikala na lusekelo inge kebelame abo bene. (Nte. 3:1-5) Satana wanungilepo ne kuba’mba kafwako muntu wakonsha kwikala wa kishinka kwi Lesa ne, mambo muntu yense inge wapita mu makatazho, wakonsha kukana bukalama bwa Yehoba. (Yoba 2:4, 5) Na mambo a buno bubela bwa kwa Diabola, Yehoba waswisha kimye kyabaya kupitapo pa kuba’mba bantu bemwene abo bene kishinka kya kuba’mba kechi bakonsha kwilama abo bene ne.

4. Mambo ka o kyanemena kubingisha bumfumu bwa Yehoba?

⁴ Yehoba wayuka kuba’mba byonse byaambile Diabola bya bubela. Pano mambo ka Lesa o aswishisha kimye kyabaya kwa kubula kupwisha ano mambo? Mambo ano mambo avwangamo bantu bonse pa ntanda ne bamalaika mwiulu. (Tangai Salamo 83:18.) Kino kyanema mambo bantu batanshi bakaine bukalama bwa Yehoba, kabiji ne bantu bavula kufuma kyokya kimye byo byo babena kuba. Kino kyakonsha kulengela bamo kulanguluka’mba kampe byaambile Diabola bya kine. Kabiji inge bantu ne bamalaika babula kuyuka bulongo kishinka, kechi kukekalapo mutende ne lukwatankano pakachi ka byalo, mitundu ya bantu, ne bisemi ne. Bino bumfumu bwa Yehoba byo bukabinga, bilengwa byonse bikakookelanga bukalama bwanji myaka ne myaka. Kabiji bilengwa byonse bikekala mu mutende.—Efi. 1:9, 10.

5. Twakonsha kutumbijika byepi bumfumu bwa Yehoba?

⁵ Lesa ukabingisha bumfumu bwanji, pakuba bukalama bwa kwa Satana ne bwa bantu bukakankalwa kabiji bakebufumyapo. Lesa ukalama mu bololoke kupichila mu Bufumu bwa Bumesiasa, kabiji bantu ba lukookelo bakamwesha kuba’mba bantu bakonsha kwikala ba kishinka kwi Lesa ne kukookela bukalama bwanji. (Isa. 45:23, 24) Nanchi mukeba kwikala pa bano bantu ba lukookelo batwajijila kutumbijika bumfumu bwa Yehoba nyi? Twayuka’mba byo byo mukeba. Pa kuba’mba twikale bantu ba lukookelo, twafwainwa kuta muchima pa kine kintu kyanemesha ne kuyuka ene mambo o kyanemena.

6. Kubingisha bumfumu bwa Yehoba kwanema kukila ka?

⁶ Byonka byo twaambapo kala, kubingisha bumfumu bwa Yehoba o mambo akatampe akunza bantu bonse. Kyanema bingi kukila lusekelo lo tukeba kwikala nalo. Nanchi kino kyalumbulula’mba lupulukilo lwetu kechi lwanema nenyi? Nanchi Yehoba kechi wituta muchima nenyi? Ine, kechi byo kilumbulula ne. Mambo ka?

7, 8. Bantu ba lukookelo bakamwenamo byepi mu kubingisha bumfumu bwa Lesa?

⁷ Yehoba watemwa bingi bantu kabiji wibanemeka. O ene mambo o atumijile ne Mwananji kwiya na kwitufwila pa kuba’mba tukapuluke ne kwikala myaka ne myaka. (Yoa. 3:16; 1 Yoa. 4:9) Umvwe Yehoba wakankelwe kufikizha milaye yanji, Diabola wakonsha kwingijisha kino kwamba’mba Lesa wa bubela kabiji kechi kalama wawama ne, mambo ufya bintu byawama ku bantu banji. Kabiji bantu ba myendeleko bakonsha ne kukilamo kwamba’mba: “Nanchi mulaye wa kwikalapo kwanji, uji pi? Mambo kufumatu kimye bashakulu betu kyo balaajile mu lufu, kafwako kintu nangwa kimo kyapimpulwa ne, bintu byonse bijitu byonka byo byajinga kufumatu ku ntendekelo ya kulengwa kwa bintu.” (2 Pe. 3:3, 4) Onkao mambo, Yehoba ukamona kuba’mba kubingisha bumfumu bwanji kwavwangamo ne lupulukilo lwa bantu bonse bamukookela. (Tangai Isaya 55:10, 11.) Kunungapo, bumfumu bwa Yehoba bwaimena pa butemwe. Onkao mambo,  twashiinwa’mba watemwa bakalume banji ba kishinka, wibanemeka kabiji ukebalamanga bulongo.—Lupu. 34:6.

⁸ Byo twaswa kuba’mba kubingisha bumfumu bwa Yehoba kwanema kukila lupulukilo lwetu, kechi kyalumbulula’mba twalengulula lupulukilo lwetu nangwa’mba Lesa witulengulula ne. Pakuba kimweshatu kuba’mba twayuka kine kintu kyanemesha. Kuyuka kino kwitukwasha kuta muchima pa mambo akatampe ne kutumbijika bukalama bwa Yehoba bwaoloka.

9. Satana wabepele’mba ka pe Yoba? (Monai kipikichala kitanshi.)

⁹ Twakonsha kufunda byavula pa bumfumu bwa Yehoba mu buku wa Yoba. Uno ke buku umo pa mabuku atanshi kunembwa mu Baibolo, kabiji witubuula Satana byo aambile’mba Yoba wakonsha kukana Lesa inge wapita mu makatazho akatampe. Satana wakebelenga’mba Lesa aletele Yoba makatazho. Lesa wakaine kuba bino, bino waswishishe Satana kweseka Yoba. Wamwambijile’mba: “Bintu byonse byo aji nabyo biji mu maboko obe.” (Tangai Yoba 1:7-12.) Mu kimye kichechetu, bakalume ba kwa Yoba bafwile, bintu byanji byonse byaonaikile, ne baana banji bonse jikumi bafwile. Satana waletele ano makatazho mu bujimuku, pa kuba’mba kimweke nobe Lesa ye ubena kumanyika Yoba. (Yoba 1:13-19) Kyalondejilepo, Satana waletejile Yoba kikola kyatama bingi. (Yoba 2:7) Kununga pa ano malwa apichilengamo Yoba, mwinakwanji ne balunda nanji basatu bamwambijile byambo byatama bya kumunena.—Yoba 2:9; 3:11; 16:2.

10. (a) Yoba wamwesheshe byepi bukishinka bwanji kwi Lesa? (b) Ñanyi kintu kyo alubankenye?

¹⁰ Ki ka kyafuminemo? Kyamwekeshetu patoka’mba Satana wa bubela. Yoba wakaine kusatukila Lesa. (Yoba 27:5) Bino pa kakimye kacheche, Yoba walubileko kintu kyanemesha. Watele muchima pa kwibingisha aye mwine ne kukeba kuba’mba Lesa amubuule ene mambo o amanamijilenga. (Yoba 7:20; 13:24) Inge twalanguluka pa byapichilemo Yoba, twakonsha kumona nobe kechi watamishe pa kwipuzha bino ne. Pano bino, Lesa wamwene kuba’mba Yoba wafwainwa kupimpulako ndangulukilo yanji. Yehoba wamukwashishe byepi?

11, 12. Yehoba wakwashishe byepi Yoba, kabiji Yoba waubilepo byepi pa luno lujimuno?

¹¹ Lesa wabuujile Yoba byambo byanembwa mu buku wa Yoba, kutendekela mu kitango 38 kufika ku 41. Pano bino, mu bino byambo byonse, Lesa kechi wabuujile Yoba kwine kwafuminenga makatazho ne. Kine kintu Yehoba kyo akebelenga kechi kubuula Yoba ene mambo o amanamijilenga uba nobe Lesa wakebelanga kwibingisha ne. Bino Yehoba wakebelenga kukwasha  Yoba kuyuka kuba’mba kechi waesakana na Lesa ne. Kabiji wakwashishe Yoba kumona kuba’mba kwajinga mambo akatampe o afwainwe kutapo muchima. (Tangai Yoba 38:18-21.) Kino kyakwashishe Yoba kwikala na ndangulukilo yawama.

¹² Yehoba byo akajipijile Yoba saka abena kupita mu bya malwa, nanchi kyalumbulula’mba kechi uji na lusa nenyi? Ine. Nangwatu Yoba kechi walangulukilepo bino ne. Yoba waumvwine byamubuujile Yehoba. Waambile’mba: ‘Nalengulula byambo byo naambile, kabiji nalapila saka nepukula mu maloba ne mu buto.’ Kino kimwesha kuba’mba Yoba wakookejile byamujimwineko Yehoba. (Yoba 42:1-6) Patanshi, nsongwalume Elihu naye wafunjileko Yoba kuba’mba ekale na ndangulukilo yawama. (Yoba 32:5-10) Yoba byo akookejile lujimuno lwa Lesa ne kupimpula ndangulukilo yanji, Yehoba wamutakaikile pa meso a balunda nanji pa kutwajijila kwikala wa kishinka nangwa kya kuba wapichilenga mu makatazho.—Yoba 42:7, 8.

13. Yoba watwajijile kumwenamo byepi mu lujimuno lwa Yehoba kyapwile makatazho anji?

¹³ Yoba watwajijile kumwenamo mu lujimuno lwa Yehoba nangwatu kimye kyapwile makatazho anji. Mu ñanyi jishinda? Nangwa kya kuba “Yehoba wapesheshe bwikalo bwa kwa Yoba bwapeleleko kukila butanshi,” bino kino kechi kyalumbulula’mba bintu byonse byaikele bulongo mu juba jimotu ne. Baibolo waamba’mba mu kuya kwa kimye, Yoba “wasemene ne baana bakwabo ba balume batanu na babiji ne baana ba bakazhi bakwabo basatu.” (Yoba 42:12-14) Kwa kubula nangwa kuzhinaukatu ne, Yoba watonganga bingi baana banji bo baipayile kwi Satana. Kabiji wafwainwa wavulukanga malwa o apichilemo. Nangwa kya kuba wayukile kwafumine meseko, bino bimye bimo wafwainwa wishikishanga ene mambo Lesa o amuswishishe kumanama byobya. Mu byonse byo alangulukangapo, wafwainwa wavulukanga byamufunjileko Lesa. Kino kyamutekeneshanga ne kumukwasha kuta muchima pa kintu kyanemesha.—Sala. 94:19, tubyambo twa munshi.

14. Twakonsha kufunjilako ka ku byapichilemo Yoba?

¹⁴ Jishimikila ja kwa Yoba jakonsha kwitukwasha kwikala na ndangulukilo yawama ne kwitutekenesha. Mambo bino byonse Yehoba wibinembele’mba “tufunjileko, kuba’mba mu kuchinchika kwetu ne mu lutekenesho lwa mu Binembelo twikale na luketekelo.” (Loma 15:4) Ñanyi bintu byo tufunjilako? Kitanshi: Kechi twafwainwa kutesha bingi muchima pa bibena kumweka mu bwikalo bwetu kya kuba twalubako ne kine kintu kyanemesha kya kubingisha bumfumu bwa Yehoba ne. Kabiji twafwainwa kutumbijika bumfumu bwa Yehoba kupichila mu kutwajijila kwikala ba kishinka nangwatu mu meseko, byonka byaubile Yoba.

15. Kwikala ba kishinka mu makatazho kwitukwasha byepi?

 ¹⁵ Kwikala ba kishinka kwitutekenesha byepi? Kwitutekenesha mambo kwitukwasha kuta muchima pa bintu byawama bifumamo mu kuchinchika makatazho. Makatazho kechi alumbulula’mba Yehoba wituzhingijila ne, pakuba etukwasha kumwesha’mba tubena kutumbijika bumfumu bwanji. (Maana 27:11) Kuchinchika “kwitulengela kwitabilwa kwi Lesa” ne kwikala na luketekelo lwakosa. (Tangai Loma 5:3-5.) Kabiji jishimikila ja kwa Yoba jimwesha’mba “Yehoba ye wa kifyele ne lusa.” (Yako. 5:11) Na mambo a kino, twashiinwa’mba uketupesha ne kupesha bonse bakookela bumfumu bwanji. Kuyuka kino kwitukwasha ‘kuchinchika saka twatekanya mu bintu byonse ne kwikala na lusekelo.’—Kolo. 1:11.

16. Mambo ka o twafwainwa kuvulukilanga buneme bwa kutumbijika bumfumu bwa Yehoba?

¹⁶ Ibyo, kechi kyapeela kuta muchima pa kubingisha bumfumu bwa Yehoba ne. Makatazho akonsha kwitukookesha bingi. Nangwatu makatazho acheche akonsha kwitupezha maana inge ketwialangulukepotu kimye kyonse. Onkao mambo, twafwainwa kwivululangamo kimye kyonse pa buneme bwa kutumbijika bumfumu bwa Lesa inge tubena kupita mu makatazho.

17. Kupayankana mu mingilo ya Yehoba kwitukwasha byepi kutwajijila kuta muchima pa mambo akatampe?

¹⁷ Kupayankana mu mingilo ya Yehoba kwitukwasha kutwajijila kuta muchima pa mambo akatampe. Kamonyi wa Yehoba umo wa jizhina ja Renee wakolelwe kikola kilengela mashi kubula kwenda bulongo, kabiji wajinga na misongo ibula kupwa ne kansa. Byo ajinga mu kipatela, wasapwilanga ku bamanase, ku bantu bakwabo bakolwa, ne ku bantu baiyanga na kumupempula. Mu kipatela kimo mo aikele milungu ibiji ne kichika, wasapwijile maola 80. Ne byo ajingatu pepi kufwa, Renee watwajijile kuta muchima pa kutumbijika bumfumu bwa Yehoba. Kino kyakepesheko bijikila byo ajinga nabyo.

18. Nyenga umo wamwene byepi buwame bufumamo mu kutumbijika bumfumu bwa Yehoba?

¹⁸ Twafwainwa kuta muchima pa bumfumu bwa Yehoba nangwatu mu bintu bikwabo bya mu bwikalo bwetu bwa pa juba pa juba. Nyenga wa jizhina ja Jennifer waikele moba asatu pa kibanza kya ndeke na kupembelela ndeke ya kuya kwabo. Madeke onse ayilenga kwabo beakainye kutumbuka. Pa kupitapo kimye, wakookele na mambo a kwikala bunke. Nangwa byonkabyo, kechi watendekele kwilangulusha ne, pakuba walombele Yehoba kumukwasha kusapwila bantu bakwabo bapembelejilenga ndeke. Ki ka kyamwekele? Wasapwijile bantu bavula ne kwibapa mabuku avula. Waambile’mba, “Yehoba wampesheshe bingi ne kumpa bulume bwa kutumbijika jizhina janji mu kimye kyakatazha.” Kine, watele muchima pa kintu kyanemesha.

19. Bantu ba Yehoba bafwainwa kutwajijila kuba ka?

¹⁹ Kuyuka buneme bwa kutumbijika bumfumu bwa Yehoba kupusanyako bupopweshi bwa kine na bwa bubela. Kufumatu ne kala, bantu ba Lesa batumbijika bumfumu bwanji. Ne atweba bapopweshi ba kine byo byo twafwainwa kutwajijila kuba.

20. Yehoba umvwa byepi pa kumona byo mutumbijika bumfumu bwanji?

²⁰ Yukai kuba’mba Yehoba wimusanchila bingi pa mingilo yonse yo mwingila ya kutumbijika bumfumu bwanji ne byo muchinchika makatazho ne kumwingijila mu bukishinka. (Sala. 18:25) Mutwe walondelapo ukalumbulula ene mambo o twafwainwa kutumbijikila bumfumu bwa Yehoba na muchima yense, ne byo twakonsha kuba bino.