1, 2. (a) Ñanyi bintu bisatu byanema bitupa Yehoba? (b) Tusakwisamba pa ka mu uno mutwe?

YEHOBA ye Mwine wakilamo kunonka. Byonsetu biji mwiulu ne pano pa ntanda byanji. (1 Moba 29:11, 12) Byo aji Shetu upana bya bupe byonse, upana bya buneme ku bonse bayuka buwame bwa byobyo bintu. Tumusanchila bingi Yehoba pa kwitupa nsabo yanema yavwangamo (1) Bufumu bwa Lesa, (2) mwingilo wetu ukapulusha bantu, ne (3) bukine bwanema buji mu Mambo anji. Pano bino, inge twabula kujimuka twakonsha kuleka kunemeka bino bintu ne kwibilengulula. Pa kuba’mba tutwajijile kunemeka bino bintu, twafwainwa kwibingijishanga bulongo ne kutwajijila kwibitemwa. Yesu waambile’mba: “Konka kuji nsabo yenu, ne michima yenu nayo ko ko ikekala.”—Luka 12:34.

² Twayai twisambe pa byo twakonsha kuba pa kuba’mba tutwajijile kutemwa ne kunemeka Bufumu, mwingilo wa kusapwila, ne bukine. Byo tusakwisambanga, mulangulukenga pa byo mwakonsha kubayisha butemwe bo mwatemwa ino nsabo ya mwiulu.

3. Mupoteshi wa mu kishimpi kya kwa Yesu waubile byepi pa kuba’mba apote mangalite ufwa mali avula? (Monai kipikichala kitanshi.)

³ Tangai Mateo 13:45, 46. Yesu waambile kishimpi kya  mupoteshi wayile na kukeba bamangalite. Uno mupoteshi wapotanga ne kupotolwesha bamangalite bavula bingi pa myaka yavula. Bino juba jimo wataaine mangalite wawamine bingi kya kuba waumvwine bingi bulongo. Bino pa kubatu’mba apote uno mangalite, wafwainwe kupotesha bintu byonse byo ajinga nabyo. Twamona kuba’mba mupoteshi wanemekele bingi uno mangalite.

4. Inge twatemwa Bufumu bwa Lesa byonka mupoteshi byo atemenwe mangalite, tukoba ka?

⁴ Tufunjilako ka ku kino kishimpi? Bukine bwa Bufumu bwa Lesa buji nobe uno mangalite ufwa mali avula. Inge twatemwa Bufumu byonka mupoteshi byo atemenwe mangalite, tukasha bintu byonse byo twatemwa pa kuba’mba twikale bangikazhi ba mu Bufumu. (Tangai Mako 10:28-30.) Twayai tumone bantu babiji byo baubile kino.

5. Zakyasa wamwesheshe byepi amba wakebeshe Bufumu bwa Lesa?

⁵ Zakyasa wajinga mukulumpe wa basonkeshi, kabiji wajinga nonshi na mambo a kutambula mali mu lunkanankana. (Luka 19:1-9) Bino uno muntu wajinga na byubilo byatama byo aumvwine Yesu na kusapwila pa Bufumu, wafikenejiletu kuyuka buneme bwa Bufumu kabiji ponkapotu waubilepo kimo. Waambile’mba: “Talai! Nkambo, kichika kya nsabo yami nsakwiipana ku bayanji, kabiji kyonse kyo natambwile ku muntu mu lunkanankana, nsakumubikilapo ne bikwabo bina.” Wasankijilepo bunonshi bo aikele nabo na mambo a bujimbijimbi kabiji wikilekele kukebesha bintu byavula.

6. Ñanyi lupimpu lwaubile Rose pa kuba’mba akekale ngikazhi mu Bufumu bwa Lesa, kabiji mambo ka o aubijile bino?

⁶ Pa myaka icheche yapitapo, kimye mwanamukazhi umo ye tusakutela’mba Rose kyo aumvwine byambo bya Bufumu, wakebelenga kutwela mu masongola na mwanamukazhi mukwabo. Rose wajinga mukulumpe mu kipamo kyalwishishenga kuba’mba bantu banemekenga luusa lwa bantu besongola banamulume na banamulume bakwabo ne banabakazhi na banabakazhi bakwabo. Pano bino, Rose byo afunjile Baibolo, wayukile buneme bwa bukine bwaamba pa Bufumu bwa Lesa. Kabiji wafuukwilepo kuba’mba wafwainwa kupimpula byubilo byanji. (1 Ko. 6:9, 10) Byo afunjile byamulengejile kusankilapo kifulo kyo ajingapo kabiji wapwishishe bulunda na mwanamukazhi mukwabo ye akebelenga kutwela nanji mu masongola. Rose wabatizhiwe mu 2009, kabiji mwaka walondejilepo watatwile bupainiya bwa kimye kyonse. Butemwe bo atemwa Yehoba ne Bufumu bwanji bwabaya bingi kukila bintu byonse bisakasaka muchima wanji.—Mako 12:29, 30.

7. Twakonsha kuba byepi pa kuba’mba tutwajijile kutemwa Bufumu bwa Lesa na muchima yense?

⁷ Atweba bavula twapimpula byubilo byetu pa kuba’mba tukekale bangikazhi ba kishinka ba mu Bufumu bwa Lesa. (Loma 12:2) Nangwa byonkabyo, twafwainwa kutwajijila na kupimpula byubilo byetu. Twafwainwa kwikala balaba ne kujimuka mambo kuji bintu byakonsha kongola michima yetu, nabiji bunonshi ne byubilo bya bulalelale. (Maana 4:23; Mat. 5:27-29) Kuji kintu kikwabo kyanema bingi kitupa Yehoba kyafwainwa kwitukwasha kutwajijila kutemwa Bufumu bwa Lesa na muchima yense.

8. (a) Mambo ka mutumwa Paulo o aambijile pa mwingilo wetu wa kusapwila amba “kya buneme mu bipe bya buchimba”? (b) Paulo wamwesheshe byepi amba wanemekele mwingilo wa kusapwila?

⁸ Vulukainga kuba’mba Yesu witupa mwingilo wa kusapwila ne kufunjisha mambo awama a Bufumu bwa Lesa. (Mat. 28:19, 20) Mutumwa Paulo wayukile buneme bwa mwingilo wa kusapwila. Walumbulwile mwingilo wa kusapwila pa lulayañano lupya amba “kya buneme mu bipe bya buchimba.” (2 Ko. 4:7; 1 Timo. 1:12)  Nangwa kya kuba twi bambulwa kulumbuluka kabiji tuji nobe bipe bya buchimba, bino mambo awama o tusapwila aji nobe kya buneme kiketulengela atweba ne boba betumvwa kwikala na bumi bwa myaka ne myaka. Kuyuka kino kishinka ko kwalengejile Paulo kwamba’mba: “Nguba bintu byonse na mambo a mambo awama, pa kuba’mba neasapwile ku bantu.” (1 Ko. 9:23) Kutemwa mwingilo wa kusapwila kwalengejile Paulo kwingila na ngovu mwingilo wa kufunjisha bantu kwikala baana ba bwanga. (Tangai Loma 1:14, 15; 2 Timoti 4:2.) Kabiji kyo kyamukwashishe kuchinchika lumanamo. (1 Tesa. 2:2) Twakonsha kumwesha byepi byo twatemwa mwingilo wa kusapwila?

9. Mu ñanyi mashinda mo tumweshesha’mba twanemeka mwingilo wa kusapwila?

⁹ Jishinda jimo Paulo jo amwesheshemo amba wanemekele mwingilo ke kumonapo mashinda apusana pusana a kusapwilamo ku bantu. Byonka byaingijile batumwa ne bena Kilishitu batanshi, ne atweba tusapwila busapwishi bwa kushukilwa, kusapwila kutaanwa bantu bavula ne ku nzubo ku nzubo. (Byu. 5:42; 20:20) Kwesakana na biji bwikalo bwetu, tumonapo mashinda akwabo a kwingijilamo pakatampe mwingilo wetu, kampe kwingilako bupainiya bwa kukwasha nangwa bwa kimye kyonse. Kabiji twakonsha kufunda mulaka mukwabo, kuvilukila ku mpunzha ikwabo monka mu kyalo kyetu, nangwa kuya ku kyalo kingi.—Byu. 16:9, 10.

10. Irene bamupesheshe byepi pa kwingilako pakatampe mwingilo wa kusapwila?

¹⁰ Akilangulukai pa byaubile nyenga muzhike wa ku United States aye Irene. Wakebeshe bingi kusapwila ku bantu bafumine ku Russia. Byo atendekele kuba bino mu 1993, kwajingatu jibumba ja basapwishi 20 baingijishanga mulaka wa kina Russia mu muzhi wa New York. Irene waingijile na ngovu pa myaka 20 kusapwila bantu bamba uno mulaka. Waambile’mba: “Ne lunotu kechi nayukisha mulaka wa kina Russia ne.” Pano bino, Yehoba wamupesheshe bingi Irene ne bakwabo pa kwingila na ngovu uno mwingilo. Lelo jino, mu muzhi wa New York muji bipwilo bitanu na kimo bingijisha mulaka wa kina Russia. Pa bantu bo afunjishanga Baibolo, bantu 15 babatizhiwe. Bamo bengijila pa Betele, bakwabo bapainiya, kabiji bakwabo bakulumpe mu kipwilo. Irene waambile’mba, “Inge nalanguluka pa bikonkwanyi bikwabo byo nakonsheshe kwibikila, kechi mmona’mba kujipo kikonkwanyi kikwabo kyakonsheshe kundetela lusekelo ne.” Kya kine, Irene wanemeka bingi mwingilo wanji!

11. Ñanyi bintu byawama bifumamo mu kutwajijila kusapwila nangwa kya kuba betumanyika?

¹¹ Umvwe twanemeka mwingilo wetu wa kusapwila, nangwatu betumanyike tukatwajijila kusapwila byonka byaubile mutumwa Paulo. (Byu. 14:19-22) Kufuma mu 1930 kufika mu 1944, balongo mu United States bebamanyikile bingi. Pano bino, byonka  byaubile Paulo, batwajijile kuchinchika ne kusapwila. Pa kuba’mba batambule luusa lwa kusapwila, balongo bapichile mu bije byavula bingi. Mu 1943, Mulongo Nathan H. Knorr, pa kwamba pa Kije Kikatampe kya Mambo mu U.S.A. byo kibachibijile bulongo mambo waambile’mba: “Twashinda na mambo a kwibikako kwenu. Umvwe basapwishi kechi batwajijile kusapwila ne, inge kechi kwajinga ano mambo mu Kije Kikatampe ne; bino tubena kubinga na mambo mu bije na mambo a kuba’mba anweba basapwishi ko kuba’mba balongo mwaya ntanda yonse mubena kwibikako kusapwila kwa kubula kuleka. Bantu ba Nkambo babena kubinga mu bije bya mambo na mambo a kuchinchika kwabo.” Kabiji balongo mu byalo bikwabo nabo babena kubinga na mambo. Umvwe twatemwa mwingilo wa kusapwila kechi tukaleka kumwingila na mambo a lumanamo ne.

12. Mwafwainwa kwingilanga byepi mwingilo wa kusapwila?

¹² Umvwe tumona mwingilo wa kusapwila amba yo nsabo yanema yafuma kwi Yehoba, kechi tukatatu muchima pa “kubala kimye” ne. Bino tukengilanga papelela bulume bwetu “kushimuna bulongo mambo awama.” (Byu. 20:24; 2 Timo. 4:5) Ñanyi bintu byo twafwainwa kufunjisha bantu? Twayai twisambe pa kya buneme kikwabo kyafuma kwi Lesa.

13, 14. Ñanyi ‘butala mwa kulamina bya buneme’ bwaambilepo Yesu pa Mateo 13:52, kabiji twakonsha kwibuyuzha byepi?

¹³ Kya buneme kikwabo kitupa Lesa ke bukine bo etusolwela. Yehoba ye Lesa wa bukine. (2 Sam. 7:28; Sala. 31:5) Byo aji Shetu upana bintu byawama, usolwela bukine bantu bamwakamwa. Kufumatu kimye kitanshi kyo twaumvwine bukine, twatwajijila kufunda byavula mu Mambo anji, Baibolo, mu mabuku alumbulula Baibolo, pa kushonkena, kubuñana, ne pa kupwila kwa kipwilo. Pa myaka yapitapo na kufunda bukine, twaikala nobe butala bwaambilepo Yesu ‘mo balamina bya buneme,’ ko kuba’mba bukine bo twafunjile kala ne bo twafunda katataka. (Tangai Mateo 13:52.) Yehoba uketukwasha kuyuzha ‘butala bwetu mo tulamina bya buneme’ umvwe ketukebekebe bukine nobe bya buneme byafyamika. (Tangai Byambo bya Maana 2:4-7.) Tuba byepi kino?

¹⁴ Twafwainwa kwikala na mutanchi wawama wa lufunjisho lwa pa bunke ne kukebakeba bishinka mu Mambo a Lesa ne mu mabuku etu alumbulula Baibolo. Kuba bino kuketukwasha kutuluka bukine bo twabujile kuyuka kala. (Yosh. 1:8, 9; Sala. 1:2, 3) Kyamba kya Usopa kitanshi kyanembelwe mu July 1879, kyaambile’mba: “Bukine buji nobe jiluba jicheche jawama jamena mungye, kabiji javimbilwa mu nsono yafwainwa kwijilengela kubula kukoma bulongo. Pa kubatu’mba mwijimone, mwafwainwa kukenkenta bulongo. . . . Kabiji inge mukeba kwijisenda mwafwainwa kubandama ne kwijiyokola. Bino kechi kyawama kwikalatu na jiluba jimo ja bukine ne. . . . Mwafwainwa kufunjilapo ne bukine bukwabo.” Twafwainwa kwingila na ngovu kuyuzha butala bwetu na bukine bwa Lesa.

15. Mambo ka o twafwainwa kwambila pa bukine bumo amba bwa “kala,” kabiji ñanyi bukine bumo bo mwanemeka bingi?

¹⁵ Twafunjile bukine bumo bwanema bingi byo twatendekele kupwanañana na bantu ba Lesa. Buno bukine twakonsha kwibulumbulula’mba bwa “kala,” mambo twibuyukile kimye kitanshi kyo twaikele bena Kilishitu. Ñanyi bintu byavwangwamo mu buno bukine? Twafunjile kuba’mba Yehoba ye Mulenga wetu kabiji ye witupa bumi, ne kuba’mba ukeba bantu kwikala bulongo. Kabiji twafunjile kuba’mba Lesa wapaine kitapisho kya bukuzhi bwa Mwananji kuba’mba etupokolole ku bundengamambo ne lufu. Twafunjile ne kuba’mba Bufumu bwanji bukafumyapo buyanji ne kuba’mba tuji na luketekelo  lwa kwikala myaka ne myaka mu mutende ne lusekelo mu bukalama bwa Bufumu bwanji.—Yoa. 3:16; Lum. 4:11; 21:3, 4.

16. Twafwainwa kuba byepi inge twatambwila lupimpu lwa ndumbulwilo ya bukine?

¹⁶ Ndumbulwilo yetu ya bungauzhi bwa mu Baibolo nangwa Binembelo bimo yakonsha kupimpulwa pa kupitapo kimye. Inge kwaikala luno lupimpu, twafwainwa kumonapo kimye kya kupitulukamo bulongo ne kulanguluka langulukapo. (Byu. 17:11; 1 Timo. 4:15) Twafwainwa kumvwisha byonse byavwangwamo mu lupimpu lonse lubiwa pa kuba’mba tuyuke lupusano luji pa ndumbulwilo ya kala ne ya katataka. Inge ke tube bino, tukalama bulongo bukine bwa katataka mu butala bwetu mo twalamina bya buneme. Mambo ka o kyanemena kuba bino?

17, 18. Mupashi wazhila wakonsha kwitukwasha byepi?

¹⁷ Yesu wafunjishe’mba mupashi wa Lesa wakonsha kwituvululamo bintu byo twafunjile kala. (Yoa. 14:25, 26) Kino kyakonsha kwitukwasha byepi byo tuji bafunjishi ba mambo awama? Akilangulukai pa byapichilemo mulongo wa jizhina ja Peter. Wajinga na myaka 19 mu 1970 kabiji popo ayiletu na kwingijila pa Betele mu Britain. Byo asapwijilenga ku nzubo ku nzubo, wataaine mwanamulume wajinga na myaka pakachi ka 40 ne 60. Peter waipwizhe uno mwanamulume inge kya kuba wakebelenga kumvwisha byamba Baibolo. Uno mwanamulume wakuminye ne kukumbula’mba wajinga labi wa Bayudea kabiji waikalanga pa nzubo ya balabi. Pa kuba’mba eseke Peter, uno labi waipwizhe’mba, “Obewa mwanyike, buku wa Danyela bamunembele mu ñanyi mulaka?” Peter wakumbwile’mba: “Lubaji lumo lwanembelwe mu Kialamaiki.” Peter uvuluka’mba,: “Uno labi wakuminye bingi pa kumvwa mukumbu wami, bino amiwa nakijilemo kukumya. Kechi nayukile kwafumine mukumbu ne. Byo nabwelele ku nzubo ne kukebakeba mu magazini a kunyuma a Kyamba kya Usopa ne Labainga!, nataaine kibaaba kyalumbulwile kuba’mba buku wa Danyela bamunembele mu Kialamaiki.” (Da. 2:4, tubyambo twa munshi.) Kya kine, mupashi wazhila wakonsha kwituvululamo bintu byo twatangile kala ne kwibilama mu butala bwetu bwa bya buneme.—Luka 12:11, 12; 21:13-15.

¹⁸ Inge twanemeka maana afuma kwi Yehoba, muchima wetu uketutundaika kuyuzha butala bwetu bwa bya buneme na bukine bo twafunjile kala ne bo twafunda katataka. Inge twatwajijila kutemwa maana a Yehoba ne kwianemeka, tukekala bafunjishi bafunjisha bulongo.

19. Mambo ka o twafwainwa kuzhikijila bya buneme bitupa Lesa?

¹⁹ Satana ne ntanda yanji batwajijila kukeba mashinda a konawinamo lwitabilo lwetu mu bya buneme bitupa Lesa byo twafunda mu uno mutwe. Atweba bonse twakonsha kufwamo mu tukose twanji. Twakonsha kongolwa na kukeba makito a peulu, kukeba kwikala bwikalo bwa kwitobwela, nangwa kukeba kwimwesha na bya bunonshi byo tuji nabyo. Mutumwa Yoano wituvululamo amba ino ntanda ibena kupita ne bya kusakasaka bijipo. (1 Yoa. 2:15-17) Onkao mambo, twafwainwa kwibikako kuzhikijila butemwe bo twatemwa bya buneme bitupa Lesa ne kutwajijila kwibinemeka.

20. Mwafuukulapo kutwajijila kuba byepi na bya buneme bimupa Lesa?

²⁰ Chinuzhukainga bintu byonse byakonsha kwimulengela kuleka kutemwa Bufumu bwa Lesa na muchima yense. Twajijilai kusapwila na mukoyo, ne kunemeka mwingilo ukapulusha bantu. Kabiji twajijilai kukebakeba bukine pe Lesa. Umvwe mwatwajijila na kuba bino, mukabika “nsabo ibula kupwa mwiulu, bangivi mo babula kutwela ne tunzumbulu mo tubula konauna. Mambo konka kuji nsabo yenu, ne michima yenu nayo ko ko ikekala.”—Luka 12:33, 34.