Tumbijikainga Bumfumu bwa Yehoba!
“Anweba Yehoba Lesa wetu, mwafwainwa kutambula lukumo ne buneme ne bulume, mambo yenu mwalengele bintu byonse.”—LUM. 4:11.
NYIMBO: 112, 133
1, 2. Atweba bonse twafwainwa kushiinwa’mba ka? (Monai kipikichala kitanshi.)
BYONKA byo twafunjile mu mutwe wafumako, Diabola wamba’mba Yehoba kechi kalama wawama ne, kabiji amba bantu bakonsha kwikala bingi bulongo inge kebelame abo bene. Nanchi byaambile Satana bya kine nyi? Fwanyikizhai byo kyakonsha kwikala umvwe kya kuba aba bonse bakeba kwilama bene baikalanga myaka ne myaka. Nanchi bakonsha kwikala bulongo kwa kubula Lesa nyi? Nga anweba mwakonsha kwikala ba lusekelo inge bemupele luusa lwa kwilama ne kwikala myaka ne myaka nyi?
2 Kafwako wakonsha kwimukumbwilako ano mepuzho ne. Muntu yense wafwainwa kulangulukapo bulongo. Inge twalangulukapo, kishinka kyo tutaana ke kya kuba’mba Lesa ye wafwainwa kwitulama. Bukalama bwanji bwawama kukila bukalama bwa bantu, kabiji twafwainwa kwibutundaika. Baibolo witukwasha kuyuka kino kishinka. Akimonai byaamba Binembelo pa ene mambo Yehoba o aikela na luusa lwa kulama bilengwa byonse.
YEHOBA UJI NA LUUSA LWA KULAMA BILENGWA BYONSE
3. Mambo ka Yehoba o aikela na luusa lwa kulama bilengwa byonse?
3 Yehoba uji na luusa lwa kulama bilengwa byonse mambo ye Lesa wa bulume bonse kabiji ye Mulenga. (1 Moba 29:11; Byu. 4:24) Mu kimwesho kiji pa Lumwekesho 4:11, ba 144,000 bakalamanga ne Kilishitu mwiulu bamba’mba: “Anweba Yehoba Lesa wetu, mwafwainwa kutambula lukumo ne buneme ne bulume, mambo yenu mwalengele bintu byonse kabiji na mambo a kyaswa muchima wenu, byaikeleko ne kulengwa.” Na mambo a kuba Yehoba ye walengele bintu byonse, ye uji na luusa lwa kulama bilengwa byonse.
4. Mambo ka kusatukila Lesa o kumweshesha’mba kechi tubena kwingijisha bulongo luusa lwa kwifuukwila bintu ne?
4 Satana kafwako kyo alengele ne. Onkao mambo, kechi ujipo na luusa lwa kulama bilengwa ne. Aye ne bantu batanshi babiji belundumikile bingi byo basatukijile bumfumu bwa Yehoba. (Yele. 10:23) Lesa wibalengele na luusa lwa kwisajila bintu, onkao mambo, bakonsheshe kusalapo kwilama abo bene. Bino nanchi kino kyalumbulula’mba bajinga na luusa lwa kukana bumfumu bwa Lesa nyi? Ine. Bantu basala bintu pa juba pa juba mambo baji na luusa lwa kwifuukwila bintu. Pano bino, kino kechi kyalumbulula’mba baji na luusa lwa kusatukila Mulenga wabo wibapele bumi ne. Kusatukila Yehoba ke kubula kwingijisha bulongo luusa lwa kwifuukwila bintu. Atweba bantu Yehoba witulengele’mba tumukookelenga.
5. Mambo ka o twashiinwa’mba byonse bifuukula Lesa byaoloka?
5 Kuji kintu kikwabo kimwesha’mba Yehoba ye uji na luusa lwa kulama bilengwa byonse. Aye wingijisha bulongo luusa lwanji kwesakana na bunchibamambo bwanji bwaoloka. Waamba’mba: “Amiwa yami Yehoba uji na butemwe bubula kwaluka, ne bunchibamambo bwaoloka kabiji umwesha bololoke mu ntanda, mambo amiwa mmwena lusekelo mu bino bintu.” (Yele. 9:24) Yehoba kechi wingijisha mizhilo ya bantu bambulwa kulumbuluka pa kuchiba mambo ne. Uchiba mambo monka mo aolokela mambo aye mwine waoloka, kabiji mizhilo yo apele bantu yaimena pa bololoke bwanji. Twayuka’mba mizhilo yanji, mafunde anji, ne byonse byo afuukula byaoloka mambo “bololoke ne bunchibamambo bwaoloka kyo kitendekesho kya jitanda [janji].” (Sala. 89:14; 119:128) Nangwa kya kuba Satana ulengulula bumfumu bwa Yehoba, aye wakankalwa kuleta bunchibamambo bwaoloka mu ntanda.
6. Mambo ka Yehoba o aikela na luusa lwa kulama ntanda?
6 Kunungapo, Yehoba ye uji na luusa lwa kulama mambo uji na maana ne milangwe ikebewa pa kulama bilengwa byonse. Akilangulukai pa kino: Lesa wapele Mwananji bulume bwa kubuka bikola byakankelwe kubuka badokotala. (Mat. 4:23, 24; Mako 5:25-29) Nangwa kya kuba byaubile Yesu ke bya kukumya kwi atweba bantu, bino kwi Yehoba kechi bya kukumya ne. Aye wayuka byo twalengwa kabiji uji na bulume bwa kwitubuka. Uji ne na bulume bwa kusangula bafu ne kukanya bya malwa biponakotu bine.
7. Maana a Yehoba akila byepi maana a bantu bonse ba mu ntanda ya kwa Satana?
7 Bantu mu ino ntanda iji mu bulume bwa kwa Satana bakikeba mashinda a kupwishishamo malwañano pakachi ka byalo. Yehoba ye yenkatu uji na maana a kuleta mutende pano pa ntanda ponse. (Isa. 2:3, 4; 54:13) Inge ketufunde pa maana a Yehoba ne milangwe yanji, tumvwatu byonka byaumvwine mutumwa Paulo, kimye kyo anembele na lutangijilo lwa mupashi amba: “Byo bwavulapo bunonshi bwa Lesa, ne maana ne byo ayuka! Bunchibamambo bwanji byo bwakatazhapo kwibuyuka ne mashinda anji byo akatazhapo kwialondalonda!” —Loma 11:33.
YEHOBA YE KALAMA WAWAMA
8. Ki ka kimusangajika pa jishinda jawama Yehoba jo alaminamo bilengwa byanji?
8 Kununga pa kumwesha’mba Yehoba ye uji na luusa lwa kulama, Baibolo wamwesha ne ene mambo bukalama bwanji o bwawamina kukila bukalama bwa bantu bonse. Kishinka kimo ke kya kuba’mba bukalama bwanji bwaimena pa butemwe. Kitutekenesha bingi inge twamona byo alama bulongo bilengwa byanji. Ke Lesa “wa lusa ne kifyele, ubanda kuzhingila, wavula butemwe bubula kwaluka ne bukine.” (Lupu. 34:6) Lesa wanemeka bingi bantu banji. Wituta muchima kukila ne byo twita muchima atweba bene. Kupusanako na byaambile Diabola, Yehoba ubila bintu byawama bapopweshi banji ba kishinka. Watumine Mwananji kuba’mba etukwashe kwikala na luketekelo lwa bumi bwa myaka ne myaka.—Tangai Salamo 84:11; Loma 8:32.
9. Twayuka byepi amba Lesa wituta muchima pa muntu pa muntu?
9 Yehoba wata bingi muchima bantu banji bonse. Kabiji wituta ne muchima atweba bonse pa muntu pa muntu. Akilangulukaitu pa byamwekele pa myaka 300 Yehoba yo aingijishenga mitonyi kutangijila bena Isalela ne kwibakwasha kushinda balwanyi babo. Pa kyokya kimye kyakatezhe, Yehoba kechi wavulamine mingilo ya mwanamukazhi umo wabujile mwina Isalela aye Luta ne. Mambo Luta wipaine kwikala mupopweshi wa Lesa. Yehoba wapesheshe Luta ne kumupa mwanamulume wa kumusongola ne kwikala na mwana. Kechi kyapelejiletu ponkapo ne. Luta byo akasangulwa, ukomvwa bulongo pa kuyuka’mba mwananji wa mulume wajinga mu ndonda ya kisemi mwasemekejilwe Mesiasa. Kabiji ukekala na lusekelo pa kuyuka kuba’mba jishimikila ja bwikalo bwanji janembelwe mu Baibolo, mu buku utelwa pa jizhina janji.—Luta 4:13; Mat. 1:5, 16.
10. Mambo ka o twakonsha kwambila’mba Yehoba kechi kalama wakanama nangwa washinta ne?
10 Yehoba kechi kalama wakanama nangwa washinta ne. Pakuba bonse bamukookela bekala bakasuluka kabiji ba lusekelo. (2 Ko. 3:17) Davida waambile pe Lesa amba: “Mu kyenyi [kya Lesa] muji lukumo ne munema; bulume ne lusekelo biji mu mpunzha mo ekala.” (1 Moba 16:7, 27) Kabiji nyimbi wa masalamo aye Etana wanembele’mba: “Bo bene ba lusekelo bayuka kwimba. Benda mu kyeya kya mu kilungi kyenu, anweba Yehoba. Kimye kyonse basangalela mu jizhina jenu, kabiji batumbalala na mambo a bololoke bwenu.”—Sala. 89:15, 16.
11. Twakonsha kushiinwa byepi amba bukalama bwa Yehoba bwawama kukila bukalama bwa bantu bonse?
11 Kulanguluka pa buwame bwa Yehoba kimye kyonse kwakonsha kwitukwasha kushiinwa’mba bukalama bwanji bwawama. Kitulengela kumvwatu byonka byaumvwine nyimbi wa masalamo, waambile’mba: “Kwikala juba jimo mu bipango byenu kwawama kukila kwikala myaka kiumbi ku mpunzha ingi!” (Sala. 84:10) Yehoba ye Mulenga wetu witutemwa. Onkao mambo, wayuka byo tukeba pa kuba’mba twikale ba lusekelo, kabiji witupa bino bintu. Tumwenamo bingi mu bintu byonse byo etukambizha kuba, kabiji bituletela lusekelo, nangwatu inge byamweka kukatazha kwi atweba bantu kwibyuba.—Tangai Isaya 48:17.
12. Mambo ka o tutumbijikila bumfumu bwa Yehoba?
12 Baibolo umwesha’mba Bukalama bwa kwa Kilishitu bwa Myaka Kiumbi byo bukapwa, bantu bamo bakasatukila bumfumu bwa Yehoba. (Lum. 20:7, 8) Ki ka kikebalengela kuba bino? Diabola byo bakamukasulula mu kaleya, ukakeba kongola bantu, kabiji kyamweka ukengijisha bya kusakasaka bya mibiji, byonka byo oba kimye kyonse. Kampe ukajimbaika bantu kulanguluka’mba bakonsha kwikala myaka ne myaka kwa kubula kukookela Yehoba. Atweba twayuka’mba buno ke bubela. Bino bwipuzho ke buno: Nanchi tukomvwina buno bubela nyi? Inge twatemwa Yehoba na mambo a kushiinwa’mba wawama kabiji ye uji na luusa lwa kulama bilengwa byonse, kechi tukomvwina buno bubela ne. Kechi tukakeba kwikala bwikalo bwa kubula kutangijilwa na Yehoba ne, mambo ye uji na luusa lwa kwitulama kabiji witutemwa.
TUMBIJIKAINGA BUMFUMU BWA YEHOBA MU BUKISHINKA
13. Mu ñanyi jishinda jikwabo mo tumweshesha’mba tutumbijika Yehoba?
13 Twafwainwa kutumbijika bumfumu bwa Yehoba na muchima yense. Byonka byo twamona, ye uji na luusa lwa kulama, kabiji bukalama bwanji bwawama. Twakonsha kutumbijika bumfumu bwa Yehoba kupichila mu kumwingijila mu bukishinka. Jishinda jikwabo mo twakonsha kutumbijikila Yehoba ke kuba bintu byo akeba. Inge ketube bintu Yehoba byo akeba’mba tubenga, tukamwesha’mba twamutemwa kabiji tukeba kutumbijika bukalama bwanji.—Tangai Efisesa 5:1, 2.
14. Mitwe ya bisemi ne bakulumpe mu bipwilo bakonsha kulondela byepi Yehoba?
14 Baibolo witufunjisha’mba Yehoba ulama bilengwa byanji mu butemwe. Onkao mambo, mitwe ya bisemi ne bakulumpe mu bipwilo batemwa bumfumu bwa Lesa kechi bafwainwa kwikala bakanama, uba nobe bamfumu ne. Pakuba bafwainwa kulondelanga Yehoba. Paulo walondelanga Lesa ne Yesu. (1 Ko. 11:1) Paulo kechi wakanjikizhanga bantu nangwa kwibalengesha bumvu pa kuba’mba bobe bintu byo akebanga ne. Pakuba, aye wibasashijilanga ne kwibafika pa muchima. (Loma 12:1; Efi. 4:1; File. 8-10) Mu jino jishinda, Paulo walondelanga byuba Yehoba. Abino byo bafwainwa kuba bonse batemwa Yehoba kabiji bakeba kumutumbijika.
15. Kukookela bantu Lesa bo atongola kwitutangijila kumwesha byepi amba tubena kukookela bumfumu bwa Yehoba?
15 Mambo ka o twafwainwa kukookela boba Lesa bo atongola kwitutangijila? Inge ketwibanemeke ne kwibakookela, tumwesha’mba tubena kukookela bumfumu bwa Yehoba. Nangwatu inge kechi twatemwa byo bafuukulapo ne, nangwa kechi twaumvwisha bulongo mo byatala ne, twafwainwa kutwajijila kukookela buntangi bwa Lesa. Kupusanako na bantu ba mu ntanda babula lukookelo, atweba tukookela bumfumu bwa Yehoba. (Efi. 5:22, 23; 6:1-3; Hebe. 13:17) Tumwenamo mu kuba bino, mambo Lesa ukeba’mba twikalenga bulongo.
16. Bantu bakeba kutumbijika bumfumu bwa Lesa bafuukula byepi bintu?
16 Bintu byo tufuukulapo mu bwikalo bwetu nabyo bimwesha’mba tutumbijika bumfumu bwa Lesa. Yehoba kechi wabikako mutanchi wa mizhilo ya kulondela mu bintutu byonse byo twakonsha kupitamo mu bwikalo ne. Pakuba witutangijila ne kwitufunjisha byo alangulukapo pa bintu. Lesa kechi wanemba mutanchi wa bivwalo byafwainwa kuvwala bena Kilishitu ne. Pano bino, ukeba’mba tuvwalenga bivwalo bya mushingi kabiji byafwainwa kuvwala bena Kilishitu. (1 Timo. 2:9, 10) Kabiji kechi ukeba’mba bintu byo tufuukulapo bituntwishenga bakwetu ne. (1 Ko. 10:31-33) Inge ketufuukule bintu kwesakana na bikeba Yehoba, kechi byo tukebatu atweba bene ne, tumwesha’mba tubena kutumbijika bumfumu bwanji.
Tumbijikainga bumfumu bwa Lesa pa kufuukula bya kuba ne bya kwikala mu kisemi (Monai mafuka 16-18)
17, 18. Mu ñanyi mashinda bantu baji mu masongola mo bakonsha kutumbijikila bumfumu bwa Yehoba?
17 Nga bena Kilishitu baji mu masongola bakonsha kumwesha byepi amba batumbijika bumfumu bwa Yehoba? Ba mulume ne mukazhi bakonsha kulefulwa inge kebapite mu makatazho, nangwa inge masongola abo kechi awama kwesakana na mo balangulukijilenga’mba byo akekala ne. Bakonsha kuba byepi? Akilangulukai pe Yehoba byo aubile na bena Isalela. Waambile’mba wajinga nobe mwatawabo. (Isa. 54:5; 62:4) Bulunda bwajinga pakachi ka Yehoba ne bena Isalela bwajinga nobe ‘masongola’ aji mu lukatazho. Pano bino, Yehoba kechi wafikenejiletu kwibakana ne. Watwajijile kwibomvwina lusa ne kufikizha mulaye wanji ye ebalayile. (Tangai Salamo 106:43-45.) Kino kitulengela kutemwa bingi Yehoba.
18 Ba mulume ne mukazhi batemwa Yehoba balondela mashinda anji a kubilamo bintu. Nangwatu inge baikala na makatazho, kechi bafuukulapo kwikana saka pabula mambo a mu Binembelo a kwikainapo ne. Bayuka kuba’mba Yehoba ye wibasambakanya kabiji ukeba’mba batwajijile kwikala mubiji umo. Mambo o baswisha mu Binembelo a kwikainapo ke bulalelale. (Mat. 19:5, 6, 9) Inge bena Kilishitu kebebikeko kukosesha masongola abo, bamwesha’mba babena kutumbijika bumfumu bwa Yehoba.
19. Twafwainwa kuba byepi inge twalubankanya ne kukankalwa kutumbijika Lesa?
19 Bimye bimo tufichisha Yehoba ku muchima na mambo a bumbulwa kulumbuluka. Yehoba wayuka kino, o ene mambo o etupela bupe bwa bukuzhi bwa Kilishitu. Onkao mambo, inge twalubankanya, twafwainwa kulomba lulekelo lwa mambo kwi Yehoba. (1 Yoa. 2:1, 2) Kechi twafwainwa kutwajijila kwizhachisha ne, bino twafwainwa kufunjilako ku byo tulubankanya. Inge twatwajijila kufwenya kwipi ne Yehoba, uketulekelako mambo ne kwitukosesha, kabiji tukayuka bya kuba na makatazho akeya kulutwe.—Sala. 103:3.
20. Mambo ka o twafwainwa kutumbijikila bumfumu bwa Yehoba lonka luno?
20 Mu ntanda ipya, bilengwa byonse bikakookelanga bumfumu bwa Yehoba ne kufunda mashinda anji aoloka. (Isa. 11:9) Atweba tubena kufunda mashinda anji aoloka lonka luno. Kabiji katatakatu Lesa akabingishe bumfumu bwanji. Kino kyo kimye kya kwikala ba kishinka, kwingijila Lesa ne kulondela mashinda anji. Kuba bino kumwesha’mba tubena kutumbijika bumfumu bwa Yehoba.
