KYAMBA KYA USOPA—KYA KUFUNDAMO Kapyantoto 2018
Mu kino kyamba muji mitwe ya kufunda kutendeka pa 6 August kufika pa 2 September, 2018.
“Bufumu Bwami Kechi bwa Pano pa Ntanda Ne”
Byaubile Yesu na milukuchi ya bumulwila ntanda, bitufunjisha kumonanga byepi bya bumulwila ntanda ne byubilo bya bantu?
Twafwainwa Kukwatankana Byonkatu Yehoba ne Yesu byo Bakwatankana
Mwakonsha kutundaika byepi lukwatankano pakachi ka bantu ba Lesa lelo jino?
Inge Bamubijile Bibusa kwi Lesa
Byapichilemo mfumu wa Yuda aye Lehoboma byakonsha kwitukwasha kuyuka bintu Lesa byo akeba’mba tubenga.
Funjishainga Jiwi Jenu ja mu Muchima na Mizhilo ne Mafunde a Lesa
Lesa witupa jiwi ja mu muchima, bino twafwainwa kumona kuba’mba jibena kwitutangijila bulongo.
“Kyeya Kyenu Kimweke” Kuba’mba Mutumbijikenga Yehoba
Kuji bintu byavula bikebewa byakila pa kusapwila mambo awama.
JISHIMIKILA JA BWIKALO
Lesa Wantekeneshe mu Makatazho Ami Onse
Ba Edward Bazely baji na makatazho mu kisemi, kukanya kupwila, balefulwa, ne bijikila.
Buwame Buji mu Kwimuna Bantu
Lwimu lwanema bingi
Mukivuluka Nyi?
Nanchi mwatanga magazini a katataka a Kyamba Kya Usopa nyi?