1. Ñanyi bintu bitulengela kwikala na lusekelo?

KITULETELA bingi lusekelo pa kumvwa masawakya a kuvujilako kwa bantu ba Yehoba. Mwaka wapwa bantu bo twafunjishenga Baibolo bakijile 10 milyonyi. Kino kibena kumwesha’mba bantu ba Lesa babena kumwesha kyeya. Kabiji akilangulukai pa bantu bavula batainwe ku Kivuluko. Bafwainwa bafunjile pa butemwe Lesa bo amwesheshe pa kupana Mwananji kwikala bukuzhi.—1 Yoa. 4:9.

2, 3. (a) Ñanyi lukatazho lwakonsha kwitulengela kubula kusama “nobe byeya”? (b) Tusakwisamba pa ka mu uno mutwe?

² Bantu ba Yehoba mwaya ntanda yonse bamba milaka yapusana pusana. Pano bino, kino kechi kitulengela kukankalwa kutumbijika Shetu Yehoba saka twakwatankana ne. (Lum. 7:9) Nangwa kya kuba milaka yo twamba yapusana kabiji twikala ku mapunzha apusana pusana, twakonsha kusama “nobe byeya pano pa ntanda.”—Fili. 2:15.

³ Kuvujilako kwa bantu ba Lesa, lukwatankano lwa bena Kilishitu ne byo twibikako kwikala balaba ne kukenkenta, byonse bileta lukumo kwi Yehoba. Mu uno mutwe, tusakwisamba pa byo twakonsha  kusamisha kyeya mu ino mbaji isatu.—Tangai Mateo 5:14-16.

4, 5. (a) Kununga pa kwingila mwingilo wa kusapwila, ñanyi bintu bikwabo byo twakonsha kuba pa kuba’mba kyeya kyetu kimweke? (b) Ñanyi bintu byawama bifumamo mu kumwesha bantu kifyele? (Monai kipikichala kitanshi.)

⁴ Mu Kyamba kya Usopa kya June 1, 1925, pa mutwe wa kuba’mba, “Kyeya mu Mfishi,” mwajinga byambo bya kuba’mba: “Kafwako muntu wakonsha kutwajijila kwikala wa kishinka kwi Nkambo mu buno bwikalo ne . . . kanatu wipana mwine kumwesha kyeya.” Kabiji uno mutwe walumbulwile’mba: “Muntu wakonsha kuba bino kupichila mu kusapwila mambo awama ku bantu pano pa ntanda, ne kumwesha byubilo byawama.” Jishinda jimo jo twakonsha kumwesheshamo kyeya ke kusapwila mambo awama ne kufunjisha bantu kwikala baana ba bwanga. (Mat. 28:19, 20) Kabiji twakonsha kutumbijika Yehoba kupichila mu kwikala na byubilo byawama. Bakinkalankulo ne bantu bapita mu jishinda bamona byubilo byetu. Kumwemwesela ne kwibemuna na lusekelo kulumbulula byo tuji ne Lesa ye tupopwela byo aji.

⁵ Yesu wabuujile baana banji ba bwanga amba: “Umvwe mwatwela mu nzubo, imunai mwina nzubo.” (Mat. 10:12) Mu mapunzha mwasapwilanga Yesu ne batumwa, bantu bavula batambwilanga benyi mu mazubo abo. Kino kechi kyubiwa mu mapunzha avula lelo jino ne. Pano bino, kumwesha lusekelo bantu bo mwataana pa nzubo ne kwibabuula kyo mwaendela kwakonsha kwibalengela kukasuluka. Kumwemwesela jo jishinda jawama bingi ja kutendekelamo mwisambo na mwina nzubo. Jino jishinda jingila bingi bulongo ku balongo ne banyenga inge babena kusapwila kwingijisha twa kutanchikapo mabuku. Umvwe mubena kwingilako uno mwingilo, mwakonsha kutaana’mba bantu baswa kuteleka ku mambo awama inge mwibemuna ne kwibamwesha lusekelo. Kino kibalengela kwitusolomoka ne kutolapo mabuku etu. Kumwesha kifyele kwakonsha kwimukwasha kusapwila mambo awama ku bantu.

6. Bamulume ne mukazhi bakikulumpe baubile byepi pa kuba’mba bengileko pakatampe mwingilo wa kusapwila?

⁶ Ba mulume ne mukazhi bakikulumpe bekala ku England bakolwakolwa kabiji kino kibalengela kubula kusapwila kimye kyabaya. Bafuukwilepo kusamisha kyeya kyabo kupichila mu kusapwila pangye ya nzubo yabo. Batanchika mabuku etu alumbulula Baibolo pa tebulu pa kimye kiya bansemi na kusenda baana babo pa sukulu uji pepi. Kukeba kuyuka bintu kulengela bavula kutambula buku wa kuba’mba, Young People Ask—Answers That Work, Volyumu 1 ne 2, ne mabuloshuwa. Nyenga painiya wa kimye kyonse uji mu kipwilo kyabo, wiya na kusapwila nabo. Na mambo a kuba’mba uno nyenga ne bano ba mulume ne mukazhi bamwesha bantu lusekelo, balengejile nsemi umo kuswa kufunda Baibolo.

7. Ki ka kyakonsha kwimukwasha kusapwila bantu bavilukila mu mpunzha yenu?

⁷ Mu myaka ya kulutwe kuno, mu byalo byavula mwanyemena babipuluka bavula. Mwakonsha kuba byepi pa kuba’mba mukwashe bano bantu kuyuka Yehoba ne kyaswa muchima wanji? Kitanshi, mwakonsha kufunda bya kwimuna bantu baiya mu mpunzha yenu mu milaka yo bamba. JW Language app ke kingijisho kyakonsha kwimukwasha kuba bino. Kunungapo, mwakonsha kufundako byambo bimo bya mu milaka yabo pa kuba’mba mwibasapwile mambo awama. Mwakonsha ne kwibabuula biji pa keyala wetu wa jw.org ne kwibamwesha mavidyo ajipo ne mabuku mu milaka yabo.—Mpitu. 10:19.

8, 9. (a) Ñanyi mikambizho yo tutambwila pa kupwila kwa mukachi ka mulungu? (b) Bansemi bakonsha kukwasha byepi baana babo bya kukumbulapo pa kupwila?

⁸ Yehoba witunengezhezha Kupwila kwa Bwikalo ne Mwingilo pa kuba’mba twingilenga bulongo  mwingilo wa kusapwila. Mikambizho yo tutambwila pa kuno kupwila itukwasha kuyuka bya kubwela ku bantu bakeba kufunda bukine ne bya kufunjisha bantu Baibolo.

⁹ Aba beya kimye kitanshi ku kupwila bakumya pa kutaana kuba’mba ne banyike bakumbulapo. Anweba bansemi funjishainga baana benu kumweshanga kyeya kupichila mu kukumbulapo mu byambo byabo. Mikumbu yabo ipi kabiji ya kufuma panshi ya muchima yakonsha kulenga baiya na kupwila kimye kitanshi kukeba kufunda bukine.—1 Ko. 14:25.

10. Kupopwela kwa kisemi kwakonsha kutundaika byepi lukwatankano mu kisemi?

¹⁰ Jishinda jikwabo jo twakonsha kumwesheshamo kyeya ke kukwatankana mu kisemi ne mu kipwilo. Jishinda jimo bansemi jo bakonsha kubilamo bino ke kwikalanga na Kupopwela kwa Kisemi kimye kyonse. Mu bisemi byavula banengezha kutamba JW Broadcasting pa ñondo jimo. Inge bapwisha kutamba, besamba pa bishinka byo bamwenamo ne bya kwibingijisha mu bwikalo. Bintu byakonsha kukwasha mwana wa mucheche byapusana na byakonsha kukwasha yewa wakoma. Onkao mambo, ikalainga na mutanchi wawama wa kupopwela kwa kisemi pa kuba’mba yense mu kisemi amwenemo.—Sala. 148:12, 13.

11-13. Bonse bakonsha kutundaika byepi lukwatankano mu kipwilo ne kukwasha bakwabo kumwesha kyeya?

¹¹ Banyike bakonsha kutundaika byepi lukwatankano mu kipwilo ne kukwasha bakwabo kusamisha kyeya? Inge mwi bena Kilishitu banyike, mwakonsha kumwesha byepi byo mwata muchima bakulumpe? Mwakonsha kwibepuzha kwimubuula byo bapitamo pa myaka yavula yo baingila mwingilo wa Lesa. Kuyuka byo bapitamo mu mwingilo wa Lesa kwakonsha kukosesha lwitabilo lwenu ne kwimutundaika anweba ne abo kulengela kyeya kya bukine kumweka. Kabiji atweba bonse twafwainwa kutambwilanga boba beya na kupwila pa Nzubo ya Bufumu. Umvwe kemube bino mukatundaika lukwatankano kabiji kyakonsha kulengela benyi nabo kutendeka kumwesha kyeya. Mwakonsha kuba bino kupichila mu kwimuna benyi na lusekelo, kampe ne kwibakebela pa kwikala. Buulai ne bakwenu kuba’mba bebayuke, ne kwibalengela kukasuluka.

¹² Bakulumpe ne bankwasho mu kipwilo batangijila kupwila kwa kuya mu mwingilo bakonsha kukwasha balongo ne banyenga bakoma kwingila bulongo mwingilo wa kusapwila. Nanchi baji na nyaunda yawama kwingijilamo nyi? Bimye  bimo, mwakonsha kwibabanya na balongo nangwa banyenga bakipeela kuba’mba bebakwashengako pa kusapwila. Kabiji mwafwainwa kulangulukilako boba bakolwakolwa bakankalwa kwingila pakatampe mu mwingilo. Kya kine, kulangulukilako bakwenu kwakonsha kukwasha banyike ne bakulumpe, babanda mu lwitabilo ne ba katataka bonse kusapwila mambo awama na mukoyo.—Levi 19:32.

¹³ Nyimbi wa masalamo waambile’mba: “Byo kyawamapo ne byo kitutokela ku muchima balongo kwikala pamo saka bakwatankana!” (Tangai Salamo 133:1, 2.) Kukwatankana kwakwashishe bena Isalela kwitundaika bene na bene byo bapopwelanga Yehoba. Luno lukwatankano lwajinga nobe manyi awama anunkila bulongo o baitulwilanga bena Levi. Mambo ka a kubujila kwikala na byubilo byawama ne kutundaika lukwatankano pakachi ka balongo ne banyenga yenu? Umvwe byo byo mubena kuba, mwafwainwa kutwajijila. Nanchi mwakonsha ‘kubaisha butemwe bwenu’ ne kutwajijila kukwatankana na bakwenu nyi?—2 Ko. 6:11-13, tubyambo twa munshi.

14. Mwakonsha kumwesha byepi kyeya kyenu mu kimasamasa?

¹⁴ Mwakonsha kusamisha byepi kyeya kya bukine bwa mu Baibolo mu kimasamasa mo mwikala? Byambo byenu ne byubilo byenu byawama byakonsha kulengela bantu kwiya mu bukine. Iipuzhai anweba bene amba: ‘Bantu mu kimasamasa bammona byepi? Nanchi pa nzubo pami paji butooto kabiji pashimuna bukamonyi mu kimasamasa nyi? Nanchi nkwasha bantu nyi?’ Inge mubena kwisamba na Bakamonyi bakwenu, mwakonsha kwibepuzha pa lusa lo bamwesha bantu ne byubilo byawama byo bikwasha balongo babo, bantu mu kimasamasa, bantu bo bengila nabo, nangwa bo bafunda nabo sukulu. Bakonsha kwimushimikizha bintu byawama bingi byo bamwenamo.—Efi. 5:9.

15. Mambo ka kulaba ne kukenketa o kwanemena?

¹⁵ Twafwainwa kutesha muchima pa byubilo byetu byo tubena kumwesha kyeya kyetu ku bantu bonse. “Labainga ne kukenkenta.” (Mat. 24:42; 25:13; 26:41) Inge ketulanguluke’mba “malwa akatampe” akiji kwalepa, kabiji kechi akeya mu kimye kyetu ne, kyakonsha kwitulengela kubula kutako muchima ku mwingilo wa kusapwila. (Mat. 24:21) Kyeya kyetu kechi kikasamanga mu kimasamasa ne, pakuba kikashishipela kabiji kyakonsha ne kuzhima.

16, 17. Mwakonsha kuba byepi pa kuba’mba mutwajijile kulaba ne kukenkenta?

¹⁶ Bintu byo bibena kuya na kutaminako, atweba bonse twafwainwa kulabanga ne kukenkenta. Yehoba ukaleta mpelo pa kimye kyanji kyafwainwa. Kechi twafwainwa kuzhinauka kino ne. (Mat. 24:42-44) Onkao mambo, twafwainwa kutekanya ne kutwajijila kulaba ne kukenkenta. Tangainga Mambo a Lesa pa juba pa juba ne kulomba kimye kyonse. (1 Pe. 4:7) Funjilaiko byavula ku balongo ne banyenga bataana lusekelo mu kutwajijila kulaba ne kukenkenta ne kumwesha kyeya kyabo. Mulongo umo ye twakonsha kufunjilako ke yewa washimikizha mwapita bwikalo bwanji mu kibaaba kya kuba’mba “Nakwata ku Mukangyo wa Muyudea pa Myaka 70” mu Kyamba kya Usopa kya April 15, 2012, mapa 18-21.

¹⁷ Tai muchima pa kwingila mingilo yawama ne kupwanañana na bantu baji na byubilo byawama. Kuba bino kukemuletela lusekelo lukatampe, kabiji kechi mukamona ne bibena kwenda kimye ne. (Efi. 5:16) Myaka 100 yapitapo, balongo betu bapayankene mu mwingilo wa Lesa, kabiji baingijile bintu bikatampe. Lelo jino tubena kwingila byakilapo na lutangijilo lwa Yehoba. Kyeya kyetu kibena kusama kukila ne byo twaketekejilenga.

18, 19. Bakulumpe mu kipwilo bakonsha kwitukwasha byepi kutwajijila kulaba ne kukenkenta? Shimikizhai kyamwekele.

 ¹⁸ Kikosesha bingi lwitabilo lwetu kuyuka kuba’mba bumbulwa kulumbuluka bwetu kechi bwitulengela kubula kwingijila Yehoba mu jishinda jawama ne. Pano bino, mwafwainwa kunemeka lunengezho lwa Yehoba lwa kutongola “bantu kwikala bya bupe,” ko kuba’mba bakulumpe mu kipwilo. (Tangai Efisesa 4:8, 11, 12.) Inge mukulumpe mu kipwilo wimufwakesha, mwafwainwa kutako muchima ku byo akemubuula ne kulondela lujimuno lwanji.

¹⁹ Bakulumpe mu kipwilo babiji ku England bayile ku ba mulume ne mukazhi bebechile kuba’mba bebakwashe. Mukazhi wamwenenga’mba wasongolwa ku mwanamulume wabula kukosa mu lwitabilo. Bamwatawanji baswile kuba’mba kechi bayukile kufunjisha ne, kabiji kechi banengezhanga kupopwela kwa kisemi ne. Bakulumpe mu kipwilo batundaikile bano ba mulume ne mukazhi kulanguluka pa byubilo bya kwa Yesu. Watele muchima baana ba bwanga ne kwibakwasha. Bakulumpe batundaikile mwanamulume kulondela byaubanga Yesu. Kabiji batundaikile mukazhi kwikala watekanya. Kabiji bakulumpe mu kipwilo babuujileko bano ba mulume ne mukazhi mashinda amo a kwingijisha pa kuba’mba bengijilenga pamo kunengezha kupopwela kwa kisemi pamo na baana babo babiji. (Efi. 5:21-29) Byo papichile kimye, bano bakulumpe mu kipwilo batakaikile uno mwanamulume pa kwibikako kwanji. Bamutundaikile kwibikishako ne kuketekela mupashi wazhila kumukwasha kwikala mutwe wa kisemi wawama. Butemwe bo bebamwesheshe ne bukwasho bo bebapele bwalengejile kino kisemi kusamisha kyeya.

20. Ñanyi bintu byawama bikafumamo inge kyeya kyenu kyamweka ku bantu bonse?

²⁰ Nyimbi wa masalamo waimbile’mba: “Bo bene ba lusekelo aba bakamwa Yehoba, bonka benda mu mashinda anji.” (Sala. 128:1) Umvwe kyeya kyenu ke kimweke ku bantu bonse kupichila mu kwitako bantu kwiya na kwingijila Lesa, kwikala na byubilo bitundaika lukwatankano, ne kutwajijila kulaba ne kukenkenta, mukekala na lusekelo lukatampe. Bantu bakamona byubilo byenu byawama kabiji bakonsha kutundaikwa kutumbijika Shetu wa mwiulu.—Mat. 5:16.