1. Ñanyi lujimuno mutumwa Paulo lo anembejile bena Kilishitu bashingilwe?

MUTUMWA PAULO wapaine lujimuno lwa kuba’mba, “Kilekai.” Kuleka kuba ka? Waambile’mba: “Kilekai kulondela bintu bya buno bwikalo.” (Loma 12:2) Abino byambo Paulo wibinembejile bena Kilishitu batanshi. Pano mambo ka o apanyijile luno lujimuno ku banabalume ne banabakazhi bepaine kwi Lesa kabiji bashingilwe na mupashi wazhila?—Loma 1:7.

2-3. Satana wingijisha ñanyi mashinda pa kuba’mba etufumye kwi Yehoba, bino twakosha kuba byepi pa kuba’mba ‘tukundula bintu byakosa’ byajimba mizhazhi mwi atweba?

² Paulo waakaminwe mambo bena Kilishitu bamo bebavulañenye na ndangulukilo yatama ne na maana a bantu ba pano pa ntanda afuma kwi Satana. (Efi. 4:17-19) Kino kyakonsha kwitumwekela ne atweba. Na mambo a kuba’mba Satana ukebesha’mba tufume kwi Yehoba, wingijisha mashinda apusana-pusana pa kwitujimbaika. Inge kya kuba tukeba kutumbalala, wakonsha kwingijisha kyonkakyo pa kwitufumya kwi Yehoba. Kabiji wakonsha ne kwingijisha bintu bikwabo nabiji byo tufunda ku nzubo, ku sukulu ne bantu bo twikala nabo kwitulengela kutendeka kulanguluka byonka byo alanguluka.

³ Nanchi kyapela ‘kukundula bintu byakosa’ byajimba mizhazhi mu michima yetu nyi? (2 Ko. 10:4) Monai Paulo byo ebakumbwile. Waambile’mba: “Mambo tubena kufumyapo milanguluko yatama ya bantu ne bintu byonse bilengela bantu kubula kuyuka Lesa, kabiji tubena kushinda milanguluko yonse  yatama kuba’mba ikookele Kilishitu.” (2 Ko. 10:5) Ibyo, Yehoba wakonsha kwitukwasha kushinda milanguluko yatama. Byonkatu muchi byo akonsha kufwomona bulembe, ne Mambo a Lesa nao akonsha kwitukwasha kufumyamo milanguluko yakonsha kwitulengela kwikala na maana a mu ino ntanda ya kwa Satana.

4. Ñanyi lupimpu lo twaubile kimye kyo twafunjile bukine?

⁴ Langulukai pa lupimpu lo mwaubile kimye kyo mwafunjiletu bukine buji mu Mambo a Lesa ne kufuukulapo kwingijila Yehoba. Atweba bamo pa kuba’mba tutendeke kwingijila Yehoba, twasankijilepo byubilo byatama. (1 Ko. 6:9-11) Tusanchila bingi Yehoba pa kwitukwasha kuleka byubilo byatama.

5. Ñanyi bintu bibiji byo twafwainwa kuba byatongolwa pa Loma 12:2?

⁵ Nangwa byonkabyo, kechi twafwainwa kulanguluka’mba pano kyapwa kechi twafwainwa kutwajijila na kupimpula byubilo byetu ne. Nangwa kya kuba twaleka kuba bubi bo twaubanga saka tukyangye kubatizhiwa, pano bino, twafwainwa kutwajijila kwingila na ngovu kuchinuzhuka bintu byakonsha kwitulengela kubwela ku byubilo byetu bya kala. Twakonsha kuba byepi kino? Paulo wakumbwile’mba: “Kilekai kulondela bintu bya buno bwikalo, bino mwalulukenga kupichila mu kupimpulanga milanguluko yenu.” (Loma 12:2) Onkao mambo, twafwainwa kuba bintu bibiji. Kitanshi, twafwainwa kuleka “kulondela bintu” bya mu ino ntanda. Kya bubiji, twafwainwa ‘kwalulukanga’ kupichila mu kupimpula milanguluko yetu.

6. Ñanyi kintu kyo twakonsha kufunjilako ku byambo bya kwa Yesu biji pa Mateo 12:43-45?

⁶ Kwaluka kwaambilengapo Paulo kwavwangamo byavula kechi kwalukatu mu mwekelo ne. Kwavwangamo bwikalo bwetu bonse. (Monai ka kitenguluzha ka kuba’mba “ Nanchi Twaaluka kya Kine Nyi, Inyi  Kwibepekezhatu?”) Twafwainwa kupimpulanga milanguluko yetu, ko kuba’mba bumuntu bwetu bwa mukachi, byo tulanguluka ne byo twatemwa. Onkao mambo, atweba bonse twafwainwa kwishikisha’mba, ‘Nanchi lupimpu lo mbena kuba lwa kumweshatu bantu amba nemwina Kilishitu nyi, inyi mbena kupimpula bumuntu bwami bwa mukachi?’ Mu byambo byanji byanembwa pa Mateo 12:43-45, Yesu walumbulwile byo twafwainwa kuba. (Tangai) Bino byambo bisolola kino kishinka kyanema: Kechi twafwainwa kupelelatu pa kuleka kulanguluka byatama ne; bino, twafwainwa kupingizhamo milanguluko ya Lesa.

7. Twakonsha kuba byepi pa kuba’mba tupimpule bumuntu bwetu bwa mukachi?

⁷ Nanchi kyakonsheka kupimpula milanguluko yetu nangwa bumuntu bwetu bwa mukachi nyi? Mambo a Lesa akumbula’mba: “Mwafwainwa kutwajijila kulengwa ke bapya mu michima yenu, ne kuvwala bumuntu bupya bwalengelwe monka mwayila kyaswa muchima wa Lesa mu bololoke ne mu bukishinka bwa kine.” (Efi. 4:23, 24) Kya kine, twakonsha kupimpula bumuntu bwetu bwa mukachi, pano bino, kechi kyapela ne. Kechi twafwainwa kupelelatu pa kuleka bya kusakasaka ne byubilo byatama ne. Twafwainwa kupimpula ‘michima yetu.’ Kino kyavwangamo kuleka bintu bimo byo twatemwa, miteeto yatama ne byubilo bimo. Twafwainwa kutwajijila kwingila na ngovu pa kuba’mba tube bino.

8-9. Kyamwekejile mulongo umo kimwesha byepi amba kyanema kupimpula bumuntu bwetu bwa mukachi?

⁸ Twayai twisambe pa mulongo umo watemenwe kulwa. Byo alekele kutoma malwa ne kulwa, wafikijilemo kubatizhiwa, kabiji kino kyashimwine bukamonyi mu nyaunda mo aikalanga. Bino byo papichiletu moba acheche kufuma kimye kyo abatizhiwe, juba jimo bufuku waesekelwe. Muntu wapendelwe waishile pa nzubo yanji na kukeba kuba’mba balwe. Patanshi uno mulongo wakaine kulwa. Bino uno muntu byo aambile mwenga pa jizhina ja Yehoba, mulongo wazhingijile bingi kya kuba wakankelwe kwikanya. Walupukile mu nzubo ne kumupuma. Ki ka kyalengejile? Nangwa kya kuba byo afunjilenga mu Baibolo byamukwashishe kuleka kulwa, bino kechi wapimpwile muchima wanji ne. Mu jishinda jikwabo, kechi wapimpwile bumuntu bwanji bwa mukachi ne.

⁹ Pano bino, uno mulongo kechi walekele kupimpula ne. (Maana 24:16) Na bukwasho bwa bakulumpe mu kipwilo watwajijile kupimpula byubilo byanji. Kabiji mu kuya kwa kimye wafikijilemo kwikala mukulumpe mu kipwilo. Juba jimo mabanga pa Nzubo ya Bufumu, wapichile mu lweseko lwipasha na lo apichilemo myaka ya kunyuma. Mwanamulume wapendelwe wakebelenga kupuma mukulumpe mu kipwilo umo. Uno mulongo waubile byepi? Wipelwile ne kwisamba na uno mwanamulume wapendelwe saka atekanya ne kufwomona bukaji bwanji ne kumutwala ku nzubo. Ki ka kyakwashishe uno mulongo kuba bino? Wapimpwile bumuntu bwanji bwa mukachi. Waikele muntu wa mutende kabiji wipelula. Kino kyaletele lutotelo kwi Yehoba.

10. Twafwainwa kuba byepi pa kuba’mba tupimpule bumuntu bwetu bwa mukachi?

¹⁰ Luno lupimpu kechi lubiwatu mu juba jimo nangwa kwiishilatu lwine ne. Twafwainwa kwingila na ngovu pa myaka yavula. (2 Pe. 1:5) Luno lupimpu kechi lubiwa na mambo a kuba’mba twaingijila Yehoba pa myaka yavula ne. Twafwainwa kwingilanga na ngovu pa kuba’mba tupimpule bumuntu bwetu bwa mukachi. Kuji bintu byakonsha kwitukwasha kuba bino. Twayai twisambeko bimo.

11. Lulombelo lwitukwasha byepi kupimpula bumuntu bwetu bwa mukachi?

¹¹ Kintu kitanshi kyanema kyo twafwainwa kuba ke kulomba. Twafwainwa kulombanga byonka byalombele nyimbi wa masalamo amba: “Anweba Lesa, lengai mwi amiwa muchima watoka, kabiji bikai mwi amiwa milanguluko ipya, yashikimana.” (Sala. 51:10) Twafwainwa kuswa kuba’mba tukebewa kupimpula bumuntu bwetu bwa mukachi ne kulomba bukwasho bwa Yehoba. Twakonsha kushiinwa byepi kuba’mba Yehoba uketukwasha kupimpula byubilo byetu? Kuyuka mulaye Yehoba ye alayile bena Isalela bakosele michima mu moba a kwa Ezikyo kwakonsha kwitutundaika bingi. Waambile’mba: “Nkebapa muchima wakosa nobe jibwe ne bulume bwami bukengilanga mwi abo . . . ne kwibapa muchima wakooka, [ko kuba’mba, muntu uta muchima ku lutangijilo lwa Lesa].” (Ezi. 11:19; tubyambo twa munshi.) Yehoba waswile kukwasha bena Isalela kupimpula byubilo byabo, kabiji ne lelo jino waswila jimo kwitukwasha.

12-13. (a) Kwesakana na byaamba Salamo 119:59, ñanyi bintu byo twafwainwa kulangulukangapo? (b) Ñanyi mepuzho o mwafwainwa kwiipuzha anweba bene?

¹² Kintu kya bubiji kyanema kyo twafwainwa kuba ke kulanguluka-languluka. Byo tutanga Mambo a Lesa pa juba pa juba, twafwainwa kwikalangapo na kimye kya kulanguluka-languluka pa bintu byo twatanga pa kuba’mba tuyuke byubilo byo twafwainwa kupimpula. (Tangai Salamo 119:59; Hebe. 4:12; Yako. 1:25) Twafwainwa kuyuka miteeto yakonsha kwitulengela kutemwa maana a ba pano pa ntanda. Twafwainwa kuswa kuba’mba kuji mumo mo tubula kwingila bulongo ne kuwamishako byubilo byetu.

¹³ Mwakonsha kwiipuzha anweba bene amba: ‘Nanchi mu muchima wami muji kichima nangwa lunkumbwa nyi?’ (1 Pe. 2:1) ‘Nanchi netota na mambo a kyalo nangwa mpunzha ko mfuma, kufunda nangwa na mambo a mali o nji nao nyi?’ (Maana 16:5) ‘Abya ndengulula bantu babula bintu byo nji nabyo nangwa baji na kikoba kyapusanako na kyami nyi?’ (Yako. 2:2-4) ‘Nanchi natemwa bintu biji mu ino ntanda ya kwa Satana nyi?’ (1 Yoa. 2:15-17) ‘Nanchi natemwa bya kisangajimbwe bitundaika bulalelale ne bukapondo nyi?’ (Sala. 97:10; 101:3; Amo. 5:15) Mikumbu ya ano mepuzho yakonsha kwimukwasha kuyuka mo mwakonsha kuwamishako. Kupichila mu kushinda milanguluko yatama, tukatokesha Shetu wa mwiulu ku muchima.—Sala. 19:14.

14. Mambo ka o kyanemena kusala balunda bawama?

¹⁴ Kintu kya busatu kyanema kyo twafwainwa kuba ke kusala balunda bawama. Nangwa twayuka nangwa kechi twayuka ne, balunda netu betulengela kwikala na byubilo byawama nangwa byatama. (Maana 13:20) Pa nkito nangwa pa sukulu, tutanwa na bantu bakonsha kubula kwitukwasha kulangulukanga milanguluko ya Lesa. Pano bino, twakonsha kutaana bantu bawama kupwanañana nabo mu kipwilo. Pa kupwila, po po tutundaikilwa “kwitemwa atwe bene na bene ne kuba mingilo yawama.”—Hebe. 10:24, 25.

15-16. Satana uba byepi pa kuba’mba avulañanye milanguluko yetu?

¹⁵ Yukai kuba’mba Satana ukebesha bingi kuvulañanya milanguluko yetu. Wingijisha mafunjisho apusana-pusana kuba’mba avulañanye bukine bo twafunda mu Mambo a Lesa.

¹⁶ Satana watwajijila kwipuzha bwipuzho buntutu bumo bonka bo aipwizhepo Evwa mu bujimi bwa Edena amba: “Nanchi Lesa kine  wimwambijile’mba . . . ?” (Nte. 3:1) Mu ino ntanda iji mu bulume bwa kwa Satana, javula tumvwa mepuzho nabiji a kuba’mba: ‘Nanchi Lesa kine wakanya masongola a banabalume nangwa banabakazhi bonka bonka nyi? Nanchi Lesa kine kechi ukeba’mba tusekelelenga Kiminshiminshi ne moba a kusemwa nenyi? Nanchi Lesa kine ukeba’mba mukanenga kwimubika mashi nyi? Nanchi Lesa wa butemwe kine wimukanya kupwanañana na balongo benu bo bapanga mu kipwilo nyi?’

17. Twafwainwa kuba byepi inge bantu bamo baipuzha mepuzho pa bintu byo twaitabilamo, kabiji Kolose 2:6, 7 waamba’mba ñanyi bintu bikafumamo?

¹⁷ Twafwainwa kushiinwa mu bintu byo twaitabilamo. Umvwe twakankalwa kutaana mikumbu ya ano mepuzho anema, twakonsha kutendeka kuzhinauka inge bintu byo twaitabilamo bya kine nangwa ne. Luno luzhinauko lwakonsha kuvulañanya milanguluko yetu ne konauna lwitabilo lwetu. Pano twakonsha kuba byepi? Mambo a Lesa etukambizha kupimpula milanguluko yetu pa kuba’mba tuyuke kyaswa muchima wa Lesa akya “kyawama, kyalumbuluka kabiji kimutokesha ku muchima.” (Loma 12:2) Umvwe ketufunde Mambo a Lesa pa juba pa juba, tukashiinwa na bukine bo twafunda mu Baibolo. Twakonsha kushiinwa kuba’mba mizhilo ya Yehoba yaoloka. Byonkatu kichi kyajimba mizhazhi panshi byo kikosa, ne atweba tukajimba mizhazhi ne “kukoselamo mu lwitabilo.”—Tangai Kolose 2:6, 7.

18. Ki ka kiketuzhikijila ku byubilo byatama biji mu ntanda ya kwa Satana?

¹⁸ Kafwako muntu mukwabo wakonsha kukosesha lwitabilo lwenu ne. Onkao mambo, twajijilai kulengwa ke bapya mu michima yenu. Lombainga kimye kyonse ne kusashijila Yehoba kuba’mba emupe mupashi wazhila. Languluka-langulukainga pa bintu byo mufunda ne kuyuka biji milanguluko yenu. Salai balunda bawama; pwanañanainga na bantu bakemukwasha kupimpula milanguluko yenu. Umvwe ke mube bino, mukakonsha kwizhikijila ku byubilo byatama biji mu ntanda ya kwa Satana, kabiji mukafumyamo “milanguluko yatama ya bantu ne bintu byonse bilengela bantu kubula kuyuka Lesa.”—2 Ko. 10:5.