1. Kwesakana na byaamba Kolose 2:4, 8, Satana uba byepi pa kuba’mba avulañanye milanguluko yetu?

SATANA ukeba’mba tuleke kutemwa Yehoba. Pa kuba’mba obe bino, uvulañanya milanguluko yetu ne kwitulengela kulanguluka byonka byo akeba’mba tulangulukenga. Wingijisha bintu byo twatemwa pa kwitujimbaika kuba’mba tumulondelenga.—Tangai Kolose 2:4, 8.

2-3. (a) Mambo ka o twafwainwa kutelako muchima ku lujimuno lwanembwa pa Kolose 2:8? (b) Tusakwisamba pa ka mu uno mutwe?

² Nanchi tuji mu kizumba kikatampe kya kwitutwala mungi kwi Satana nyi? Ee. Vulukai kuba’mba Paulo kechi wanembejile bantu babula kwitabila lujimuno luji pa Kolose 2:8 ne. Wanembejile bena Kilishitu bashingilwe na mupashi wazhila. (Kolo. 1:2, 5) Bano bena Kilishitu bajinga mu kizumba, ne atweba lelo jino tuji mu kizumba kikatampe. (1 Ko. 10:12) Mambo ka? Mambo a kuba’mba Satana uji pano pa ntanda, kabiji ubena kwingila na ngovu kujimbaika bakalume ba Lesa ba kishinka. (Lum. 12:9, 12, 17) Kunungapo, tubena kwikala mu kimye bantu babi ne ba bujimbijimbi kyo babena ‘kutaminakotu.’—2 Timo. 3:1, 13.

³ Mu uno mutwe, tusakufunda pe Satana byo engijisha “buntemwa maana” pa kuvulañanya milanguluko yetu. Tusakwisamba ne pa “bya bujimuku” nangwa’mba “milanguluko yatama” isatu ya kwa Satana. (Efi. 6:11; tubyambo twa munshi.) Kabiji mu mutwe walondelapo, tukafunda byo twakonsha kufumyamo milanguluko yatama ya kwa Satana. Patanshi, twayai twisambe  pe Satana byo atwajile bena Isalela mungi saka batwela kala mu Ntanda ya Mulaye.

4-6. Kwesakana na byaamba Mpitulukilo ya mu Mizhilo 11:10-15, ñanyi mashinda a katataka a kujiminamo kajo bena Isalela o bafwainwe kufunda byo baikelenga mu Ntanda ya Mulaye?

⁴ Satana wajimbaikile bena Isalela kupopwela bankishi. Waubile byepi bino? Wayukile’mba bakebelenga kajo, onkao mambo, waingijishe kino kuba’mba bobe kyo akebelenga. Bena Isalela byo batwelele mu Ntanda ya Mulaye, bafwainwe kufunda mashinda a katataka a kujiminamo kajo. Bena Isalela byo bajinga mu Ijipita, mema a mu mukola wa Nile o atekezhanga mu majimi abo. Pano bino, mu Ntanda ya Mulaye kechi mwajinga mukola watekezhanga majimi ne, bino mvula ne kime byo byatekezhanga bijimwa. (Tangai Mpitulukilo ya mu Mizhilo 11:10-15; Isa. 18:4, 5) Onkao mambo, bena Isalela bafunjile mashinda a katataka a kujiminamo. Kechi kyapelele kufunda ano mashinda ne, mambo bavula bayukile bya bunjimi bafwijile mu kiselebwa.

⁵ Yehoba wabuujile bantu banji amba bwikalo bwabo bwapimpulwa. Kabiji wibapele ne lujimuno lwamwekelenga nobe kechi lwakwatankene na bya bunjimi ne. Wibajimwineko’mba: “Jimukai kuchina’mba michima yenu yakajimbaikwa ne kuya mungi ne kupopwela balesa bangi ne kwibalambila.” (Mpitu. 11:16, 17) Mambo ka Yehoba o ebajimwijileko pa kupopwela balesa ba bubela byo aambilenga pa kufunda mashinda a katataka a bya bunjimi?

⁶ Yehoba wayukile’mba bena Isalela bakesekwa kimye kyo bakafundanga mashinda a bunjimi ku bantu bebazhokolokele bapopwelanga balesa ba bubela. Bantu bebazhokolokele bayukile bingi bunjimi kukila bena Isalela, kabiji bantu ba Lesa bafwainwe kufunjilako bya  bunjimi, pano bino, kino kyakonsheshe kwibabika mu kizumba. Bano banjimi bena Kenana bapopwelanga Baela kabiji balondelanga mafunjisho a buno bupopweshi bwa bubela. Balangulukanga’mba Baela ye mwine mwina jiulu kabiji amba ye wanokeshanga mvula. Yehoba kechi wakebelenga’mba bantu banji balondelenga bino bintu bya bubela byaitabijilemo bena Kenana ne. Pano bino, bena Isalela batendekele kupopwela Baela. (Bala. 25:3, 5; Mito. 2:13; 1 Mfu. 18:18) Pano twayai tumone Satana byo aubile pa kuba’mba akwate bena Isalela buzha.

7. Ñanyi lweseko lwapichilemo bena Isalela byo batwelele mu Ntanda ya Mulaye?

⁷ Kintu kitanshi Satana kyo aingijishe ke muchima wa kukeba mvula ya kutekezha kajo. Pa mwaka pa mwaka, kutendeka ku mpelo ya ñondo wa April kufika mu September, mu Ntanda ya Mulaye kechi mwanokanga mvula wabaya ne. Pa kuba’mba bena Isalela bekale na kajo ka kuja, baketekelangatu mvula watendekanga kunoka mu October. Onkao mambo, Satana wajimbaikile bena Isalela amba pa kuba’mba bekale bwikalo bwawama bafwainwe kulondela byubilo bya bantu bebazhokolokele bapopwelanga balesa bangi. Bantu bebazhokolokele baitabijile’mba kyajingatu bulongo kulondela bisho bimo pa kuba’mba balesa babo banokeshe mvula. Bena Isalela babujile lwitabilo mwi Yehoba baitabijile’mba jino jo jishinda ja kupwishishamo kyashi, onkao mambo, nabo batendekele kulondela bisho bya bantu bapopwelenga lesa wa bubela, Baela.

8. Ñanyi kintu kya bubiji Satana kyo aingijishe ku bena Isalela? Lumbululai.

⁸ Satana waingijishe kintu kya bubiji kwesekelamo bena Isalela. Kino kintu ke muchima wa kukeba kuba bulalelale. Bantu bebazhokolokele bapopwelanga balesa babo kupichila mu kuba byubilo bya bunya. Jino jishinda ja kupopwelamo javwangilemo kwikala na bapite ba ku nzubo ya Lesa, banabakazhi ne banabalume. Bantu bapopwelanga balesa ba bubela bamonanga kuba bulalelale ne byubilo bikwabo bya bunya amba byajingatu bulongo. (Mpitu. 23:17, 18; 1 Mfu. 14:24) Bano bantu baitabijile’mba bino bisho byalengelanga balesa babo kulengela mushiji kumenesha kajo kavula. Bena Isalela bavula batendekele kulondela bino bisho bya bulalelale kabiji bibalengejile kutendeka kupopwela balesa ba bubela. Kino kibena kumweshatu patoka kuba’mba Satana wibakwachile buzha.

9. Kwesakana na byaamba Hoseya 2:16, 17, Satana walengejile byepi bena Isalela kuvulama Yehoba?

⁹ Satana waingijishe kintu kya busatu pa kweseka bena Isalela. Wapofwile michima ya bena Isalela kuba’mba babule kuyuka Yehoba. Mu moba a ngauzhi Yelemiya, Yehoba waambile’mba bangauzhi ba bubela balengejile bantu banji kuvulama jizhina janji na “mambo a Baela.” (Yele. 23:27) Kyamweka bantu ba Lesa balekele kwingijisha jizhina ja Yehoba ne kutendeka kwingijisha jizhina ja Baela, jilumbulula’mba “Mwine” nangwa’mba “Nkambo.” Kino kyalengejile bena Isalela kukankalwa kuyuka lupusano luji pe Yehoba ne Baela, ne kwibalengela kuvwanga bupopweshi bwa Yehoba ne bwa Baela.—Tangai Hoseya 2:16, 17 ne tubyambo twa munshi.

10. Ñanyi mashinda a bujimbijimbi Satana o engijisha lelo jino?

¹⁰ Ne lelo jino, Satana wingijisha mashinda antutu amo. Uba bino kupichila mu kulengela bantu kwikala na muchima wa kukebesha bintu bya mu bwikalo, kuba bulalelale ne kulengela bantu kubula kuyuka Yehoba. Twayai  twisambe pe Satana byo alengela bantu kubula kuyuka Yehoba.

11. Satana walengela byepi bantu kukankalwa kuyuka Yehoba?

¹¹ Satana ulengela bantu kubula kuyuka Yehoba. Batumwa ba kwa Yesu byo bafwile, bamo betelanga’mba bena Kilishitu batendekele kusampanya mafunjisho a bubela. (Byu. 20:29, 30; 2 Tesa. 2:3) Bano bansatuki batendekele kulengela bantu kuvulama Lesa wa kine. Bafumishemo jizhina ja Lesa mu ma Baibolo abo ne kupingizhamo kyambo kya “Nkambo.” Na mambo a kino, balengejile bantu batanganga Baibolo kubula kumona lupusano luji pe Yehoba ne “bankambo” bakwabo batongolwa mu Binembelo. (1 Ko. 8:5) Batendekele kwingijisha kyambo kyonka kya “Nkambo” pa kwamba pe Yehoba ne Yesu. Kino kyalengejile bantu kukankalwa kuyuka lupusano luji pe Yehoba ne Mwananji. (Yoa. 17:3) Kino kyo kyalengejile’mba kwikale lufunjisho lwa balesa basatu, kintu kyabula kutongolwapo mu Mambo a Lesa. Na Mambo a kino, bantu bavula balanguluka’mba kyakatazha kuyuka Lesa. Pano bino, buno ke bubela bwafitatu bwii.—Byu. 17:27.

12. Bupopweshi bwa bubela butundaika ñanyi lufunjisho, kabiji ñanyi bintu byafumamo byatongolwa pa Loma 1:28-31?

¹² Satana utundaika bantu kutemwa byubilo bya bulalelale. Mu kimye kya bena Isalela, Satana waingijishe bupopweshi bwa bubela kutundaikilamo bulalelale. Ne lelo jino, byobyo oba. Bupopweshi bwa bubela bwaswisha bulalelale kabiji bamona’mba kuba bulalelale kechi mambo ne. Kyafumamo, bantu bavula bamba’mba bengijila Lesa baleka kulondela mafunde a Lesa akanya kuba bulalelale. Mutumwa Paulo walumbulwile mu nkalata yanji yo anembejile bena Loma bintu byatama byafuminemo mu kutundaika bulalelale. (Tangai Loma 1:28-31.) Pa “bintu byabula kufwainwa” paji ne bulalelale, kubikapotu ne kwilaala kwa banabalume nangwa banabakazhi bonka bonka. (Loma 1:24-27, 32; Lum. 2:20) Kyanema bingi kuba’mba atweba tulondelenga mafunjisho a mu Baibolo.

13. Ñanyi jishinda jikwabo ja bujimbijimbi jingijisha Satana?

¹³ Satana utundaika bantu kutemwa bintu bya mu bwikalo. Tukeba kufunda mingilo yakonsha kwitukwasha kukebela bisemi byetu ne atweba bene bya mu bwikalo. (1 Timo. 5:8) Tufunda  ino mingilo kupichila mu kuya ku sukulu ne kutako muchima. Pano bino, twafwainwa kujimuka. Mu byalo byavula, baana ba sukulu bafunda bintu byakonsha kwibakwasha mu bwikalo, pano bino, bafunda ne maana a ba pano pa ntanda. Baana ba sukulu bebafunjisha’mba kafwako Lesa ne kulengulula Baibolo. Kabiji bebafunjisha ne kuba’mba bilengwa byaishilekotu bine. (Loma 1:21-23) Ano mafunjisho apusana bingi na maana a Lesa.—1 Ko. 1:19-21; 3:18-20.

14. Ñanyi bintu bifuma mu kutemwa maana a ba pano pa ntanda?

¹⁴ Bantu bafunda maana a ba pano pa ntanda balengulula mizhilo ya Yehoba yaoloka. Kuba bino kechi kumwesha bipangwa bya mupashi wa Lesa ne, bino kumwesha “mingilo ya mubiji.” (Nga. 5:19-23) Kino kyubilo kilengela bantu kwitota ne kwilundumika, kabiji kyafumamo bantu “betemwatu abo bene.” (2 Timo. 3:2-4) Bino byubilo byapusana bingi na bukimote ne muchima wa kwipelula bantu ba Lesa ye bebatundaika kwikala nanji. (2 Sam. 22:28) Bena Kilishitu bamo baya ku masukulu akatampe baleka kulanguluka milanguluko ya Lesa ne kutendeka kulanguluka milanguluko ya bantu ba pano pa ntanda. Twayai twisambe pa kimo kyatama kyakonsha kufumamo inge twalengulula luno lujimuno.

15-16. Mubena kufunjilako ka ku byapichilemo nyenga umo?

¹⁵ Nyenga waingila mwingilo wa kimye kyonse pa myaka kukila pa 15, waambile’mba: “Natanganga ne kumvwa bintu byatama bifumamo mu kufunda kufika palepa, bino nalengululanga luno lujimuno. Nalangulukanga’mba luno lujimuno kechi lwankunza ne.” Ñanyi makatazho o apichilemo? Washimikizha’mba: “Natayanga kimye kyabaya na kufunda sukulu  kya kuba kechi naikalangapo na kimye kyabaya kya kulomba kwi Yehoba, kwisamba na bakwetu bya mu Baibolo byonka byonaubanga kala ne. Kabiji nakokanga bingi kyakuba kechi naikalangapo na kimye kya kunengezha kupwila ne. Namwene kuba’mba kufunda kufika palepa kwaonawinenga bulunda bwami ne Yehoba. Onkao mambo, nafuukwilepo kuleka sukulu.”

¹⁶ Kufunda kufika palepa kwalengejile uno nyenga kwikala na milanguluko ya mutundu ka? Waambile’mba: “Ñumvwa ne bumvu pa kulumbulula kuba’mba kufunda kufika palepa kwandengejile kutatu muchima pa bintu byatama byuba bantu, kikatakata balongo ne banyenga. Papichile kimye kyabaya bingi pa kuba’mba mfumyemo ino milanguluko. Byo napichilemo byamfunjisha bizumba biji mu kulengulula lujimuno lufuma kwi Shetu wa mwiulu lo apana kupichila mu jibumba janji. Yehoba wangyukile bulongo kukila byo neyukile amiwa mwine. Nanchi inge naumvwijile lujimuno!”

17. (a) Twafwainwa kufuukulapo kuba byepi? (b) Tukafunda pa ka mu mutwe walondelapo?

¹⁷ Mwafwainwa kujimuka kuchiina kuba’mba muntu nangwa umo wimukwata buzha “na buntemwa maana ne bujimbijimbi” buji mu ino ntanda ya kwa Satana. Twajijilai kwizhikijila ku bujimuku bwa kwa Satana. (1 Ko. 3:18; 2 Ko. 2:11) Kange muswishe Satana kwimulengela kulubako Yehoba ne kutendeka kumupopwela aye ne. Kookelainga mafunde a Yehoba awama. Kabiji kange muswishe Satana kwimujimbaika ne kwimulengela kulengulula lujimuno lwa Yehoba ne. Pano mwafwainwa kuba byepi inge mwamona’mba mulanguluka byonka bilanguluka bantu ba mu ino ntanda? Mutwe walondelapo ukamwesha Mambo a Lesa byo akonsha kwitukwasha kufumyamo milanguluko yabula kufwainwa ne byubilo byatama.—2 Ko. 10:4, 5.