MUTWE WA KUFUNDA 25
Ketekelai mwi Yehoba Inge Mubena Kupita mu Makatazho
‘Amiwa nji na bulanda bukatampe.’—1 SAM. 1:15.
LWIMBO 30 Tata, Lesa Wami Kabiji Mulunda Nami
BIJI MU UNO MUTWE *
1. Mambo ka o twafwainwa kumvwina lujimuno lwa kwa Yesu?
MU BUNGAUZHI bwanji bwaamba pa moba a kupelako, Yesu waambile amba: “Jimukai kuchina’mba michima yenu yakanemenwa na mambo a . . . bijikila bya mu buno bwikalo [nangwa’mba “bijikila bya mwakumwena bya mu bwikalo; kwakamwa na bintu bikebewa pa juba pa juba,” nwtsty tubyambo twa munshi].” (Luka 21:34) Twafwainwa kumvwina luno lujimuno. Mambo ka? Pa kino kimye tubena kupita mu makatazho onka abena kupitamo bantu bonse.
2. Ñanyi makatazho abena kupitamo balongo ne banyenga yetu?
2 Bimye bimo, tupita mu makatazho avula pa kimye kimo. Akilangulukai pa byapichilemo bano bantu. Kamonyi wa jizhina ja John, * uji na kikola kyonauna mubiji yense ne bongo, wakankamenetu ne kwikala na bulanda kimye kyamunyemene mukazhanji ye aikele nanji mu masongola myaka 19. Kabiji baana banji babiji babakazhi balekele kwingijila Yehoba. Ba mulume ne mukazhi abo ba Bob ne ba Linda bapita mu makatazho avula. Bonse babiji bebapangile nkito, kabiji bakankelwe kutwajijila kwikala mu nzubo yabo. Kununga pa ano makatazho, ba Linda bebakwachile na kikola kya ku muchima, kabiji kikola kikwabo kyatendekele konauna bulume buvimbila mubiji ku bikola.
3. Kinembelo kya Filipai 4:6, 7 kitufunjisha’mba ka pe Yehoba?
3 Twafwainwa kuyuka kuba’mba Mulenga wetu kabiji Shetu wa butemwe aye Yehoba wayuka byo tumvwa inge tubena kupita mu makatazho, kabiji ukeba kwitukwasha. (Tangai Filipai 4:6, 7.) Mu Mambo a Lesa muji mashimikila avula alumbulula makatazho achinchikile bakalume ba Lesa. Kabiji aamba ne pe Yehoba byo ebakwashishe kuchinchika ano makatazho. Twayai twisambeko pa bano bantu.
ELAIJA “WAJINGA MUNTU BYONKA BYO TUJI”
4. Ñanyi makatazho apichilemo Elaija, kabiji waumvwine byepi Yehoba byo amukwashishe?
4 Elaija waingijilenga Yehoba mu bimye byakatazha kabiji wapichile mu makatazho akatampe. Mfumu umo pa bamfumu ba bena Isalela wabujile bukishinka aye Ahaba wasongwele Yezebeli mwanamukazhi wakanamine wapopwelanga Baela. Bano bantu babiji balengejile bantu bavula kutendeka kupopwela Baela, kabiji baipayile bangauzhi bavula ba Yehoba. Bino Elaija aye wanyemene. Kabiji wapulukile kipowe kya nzala na mambo a kuketekela mwi Yehoba. (1 Mfu. 17:2-4, 14-16) Kunungapo, na mambo a kuba’mba Elaija waketekejile mwi Yehoba, wayile na kusanzamo bangauzhi ba bubela ne bantu bonse bapopwelanga Baela. Watundaikile bena Isalela kwingijilanga Yehoba. (1 Mfu. 18:21-24, 36-38) Elaija wimwenejile Yehoba byo amuzhikijilenga ne byo amukwashishenga mu bimye bya makatazho.
Yehoba watumine malaika kuya na kukosesha Elaija (Monai mafuka 5-6) *
5-6. Kwesakana na byaamba 1 Bamfumu 19:1-4, Elaija waumvwinenga byepi, kabiji Yehoba wamumwesheshe byepi amba wamutemwa?
5 Tangai 1 Bamfumu 19:1-4. Elaija waumvwine moyo kimye Muka Mfumu aye Yezebeli kyo akebelenga kumwipaya. Onkao mambo, wanyemejile ku Belesheba. Walefwilwe bingi kya kuba “watatwile kulomba’mba afwe.” Ki ka kyamulengejile kumvwa bino? Elaija “wajinga muntu byonka byo tuji.” (Yako. 5:17) Kampe wakakijilwe na mambo a makatazho ne kukooka. Kyamweka Elaija walangulukilenga’mba byo aubilenga pa kutundaika bupopweshi bwa kine byayilengatu mu mema, kafwako byapimpwilwe mu Isalela ne, kabiji wamwenenga’mba ye yenkatu waingijilenga Yehoba. (1 Mfu. 18:3, 4, 13; 19:10, 14) Twakonsha kukumya pa kumvwa byalangulukilenga uno ngauzhi wa kishinka. Bino Yehoba wayukile byo apichilengamo.
6 Yehoba kechi wamunene Elaija pa kulumbulula byo aumvwinenga ne. Pano bino, wamukwashishe kwikala na bulume jibiji. (1 Mfu. 19:5-7) Palutwe kacheche, Yehoba wakwashishe Elaija kupimpula milanguluko yanji kupichila mu kumumwesha bulume bwanji. Kepo Yehoba amubuujile’mba mu Isalela muji bantu 7,000 bakana kupopwela Baela. (1 Mfu. 19:11-18) Abino byaubile Yehoba byamwesheshe byo atemenwe Elaija.
YEHOBA BYO ETUKWASHA
7. Kitutekenesha byepi pa kumona Yehoba byo akwashishe Elaija?
7 Nanchi ne anweba mubena kupita mu makatazho nyi? Kitutekenesha bingi pa kuyuka’mba Yehoba wayukile byaumvwinenga Elaija. Kino kitulengela ne atweba kushiinwa kuba’mba wayuka makatazho o tubena kupitamo. Wayuka bintu byo tukankalwa kuba, kabiji wayuka ne byo tulanguluka ne byo tumvwa inge tubena kupita mu makatazho. (Sala. 103:14; 139:3, 4) Inge twaketekela mwi Yehoba byonka byaubile Elaija, uketukwasha kuchinchika makatazho etuletela bijikila.—Sala. 55:22.
8. Yehoba ukemukwshakwimukwasha byepi kuyuka bya kuba na bijikila?
8 Bijikila byakonsha kwimulengela kulanguluka’mba makatazho kechi akapwa ne. Umvwe kino kimumwekela, vulukainga kuba’mba Yehoba ukemukwasha kuyuka bya kuba na bijikila. Ukemukwasha byepi? Wimutundaika kumubuula makatazho enu onse, kabiji ukakumbula milombelo yenu ya misashijilo. (Sala. 5:3; 1 Pe. 5:7) Onkao mambo, lombainga kwi Yehoba kimye kyonse ne kumubuula makatazho enu. Kechi ukemukumbula byonka byo akumbwile Elaija ne, bino ukumbula kupichila mu Mambo anji Baibolo ne jibumba janji. Mashimikila o mutanga mu Baibolo akonsha kwimutekenesha ne kwimupa luketekelo. Kabiji balongo ne banyenga bakonsha kwimutundaika.—Loma 15:4; Hebe. 10:24, 25.
9. Mulunda ye twaketekela wakonsha kwitukwasha byepi?
9 Yehoba wapele Elaija mulunda wa kumukwasha kimye kyo ajinga na makatazho byo amubuujile kupapo Elisha mingilo imo. Kyo kimotu ne atweba, inge twabuulako mukwetu makatazho o tubena kupitamo, wakonsha kwitukwasha kuyuka bya kuchinchika. (2 Mfu. 2:2; Maana 17:17) Umvwe kya kuba mwamona’mba kechi muji na mulunda ye mwakonsha kubuulako makatazho enu ne, lombai Yehoba kwimukwasha kutaanapo mwina Kilishitu wakoma mu lwitabilo wakonsha kwimutundaika.
10. Byapichilemo Elaija bikosesha byepi luketekelo lwetu, kabiji mulaye uji pa Isaya 40:28, 29 wakonsha kwitukwasha byepi?
10 Yehoba wakwashishe Elaija bya kuba na bijikila ne kumwingijila mu bukishinka pa myaka yavula. Byapichilemo Elaija bitulengela kwikala na luketekelo. Bimye bimo twakonsha kwikala na makatazho avula akonsha kwitukookesha ne kwituletela bulanda. Bino inge twaketekela mwi Yehoba, uketupa bulume buketukwasha kutwajijila kumwingijila.—Tangai Isaya 40:28, 29.
HANA, DAVIDA NE NYIMBI WA MASALAMO BAKETEKEJILE MWI YEHOBA
11-13. Makatazho alengejile bakalume ba Lesa ba kala kuba byepi?
11 Bantu bakwabo banembwa mu Baibolo nabo bajinga na bijikila. Hana ye umo wachinchikile lukatazho lwa kwikala ñumba kabiji mpaji nanji wamwendelekangatu kimye kyonse. (1 Sam. 1:2, 6) Bijikila byajinga ne Hana byamulengejile kwikala na bulanda bukatampe kya kuba walekele ne kuja.—1 Sam. 1:7, 10.
12 Bimye bimo Mfumu Davida waikalanga bingi na binyenge. Langulukai pa makatazho o apichilemo. Waakaminwe bingi na mambo a mambo o alengele. (Sala. 40:12) Mwananji ye atemenwe bingi aye Abisalomo wamusatukijile, kabiji mu kuya kwa kimye Abisalomo bamwipayile. (2 Sam. 15:13, 14; 18:33) Kabiji mulunda naji umo wamusatukijile. (2 Sam. 16:23–17:2; Sala. 55:12-14) Masalamo avula anembele Davida alumbulula makatazho o apichilengamo ne byo aketekejile mwi Yehoba na muchima yense.—Sala. 38:5-10; 94:17-19.
Ñanyi kintu kyakwashishe nyimbi wa masalamo kutwajijila kwingijila Lesa? (Monai mafuka 13-15) *
13 Nyimbi wa masalamo watendekele kubila kichima bantu babi. Kyamweka wafumine mu kisaka kya mwina Levi aye Asafwa, kabiji waingijilanga mu nzubo yazhila ya Lesa. Uno nyimbi wa masalamo wajinga bingi na bijikila kya kuba kechi wajinga na lusekelo ne. Watendekele ne kuzhinauka’mba kafwako byawama bifuma mu kwingijila Lesa ne.—Sala. 73:2-5, 7, 12-14, 16, 17, 21.
14-15. Ñanyi bintu byo tufunjilako ku bantu basatu banembwa mu Baibolo baketekejile mu bukwasho bwa Yehoba?
14 Bapopweshi basatu bo twaambapo bonse baketekejile mu bukwasho bwa Yehoba. Babuulanga Yehoba bijikila byabo byonse kupichila mu kulomba kwi aye. Bakasulukile bingi ne kumubuula ene mambo o baikelanga na bijikila. Kabiji batwajijile kuya ku nzubo ya Yehoba na kumupopwela.—1 Sam. 1:9, 10; Sala. 55:22; 73:17; 122:1.
15 Yehoba wakumbwile milombelo ya bano bantu bonse. Hana walekele kwikala na bulanda. (1 Sam. 1:18) Davida wanembele’mba: “Makatazho amwekela muntu waoloka avula bingi, bino Yehoba umupokolola mu onse.” (Sala. 34:19) Kabiji palutwe kacheche, nyimbi wa masalamo waumvwine’mba Yehoba ‘wamukwachile ku kuboko kwanji kwa kilujo,’ ne kumutangijila mu butemwe. Waimbile’mba: “Pakuba amiwa, kyangwamina kufwenya kwipi ne Lesa. Naalula Nkambo Mfumu Yehoba kwikala kya kufyamamo kyami.” (Sala. 73:23, 24, 28) Tubena kufunjilako ka ku bano bantu? Bimye bimo, tupita mu makatazho akonsha kwituletela bijikila. Twakonsha kuchinchika inge twalanguluka Yehoba byo akwashishe bakwetu, kulomba kwi aye ne kumuketekela na muchima yense, ne kumukookela kupichila mu kuba byonse byo etukambizha.—Sala. 143:1, 4-8.
KETEKELAI MWI YEHOBA NE KUCHINCHIKA
Kimye kimo nyenga umo wakebelenga kwipaatula ku bakwabo, bino bintu byapimpwilwe kimye kyo atendekele kumonapo mashinda a kukwashishamo bakwabo bapichilenga mu makatazho (Monai mafuka 16-17)
16-17. (a) Mambo ka o twafwainwa kubujila kwipatula kwi Yehoba ne bantu banji? (b) Ki ka kyakonsha kwitukwasha kwikala na bulume bwa kuchinchika?
16 Bano bantu basatu betufunjishapo kintu kikwabo kyanema kya kuba’mba kechi twafwainwa kwipaatula kwi Yehoba ne bantu banji ne. (Maana 18:1) Ba Nancy bajinga bingi na bijikila kimye kyo bebashile ku bamwatawabo. Baambile’mba: “Kwaikalanga moba amo o nabulanga kukeba kumona nangwa kwisamba na muntu. Pano bino, inge nabula kwisambapo na muntu po po nakizhangamo ne kwikala na bulanda.” Bintu byapimpwilwe kimye ba Nancy kyo batendekele kumonapo mashinda a kukwashishamo bakwabo bapichilenga mu makatazho. Baambile’mba: “Natangako muchima inge bakwetu babena kwamba makatazho o babena kupitamo. Namwene kuba’mba kuta muchima bantu ne kwibomvwina lusa kwandengelanga kukepeshako bijikila.”
17 Twakonsha kwikala na bulume bwa kuchinchika inge ke tupwile kimye kyonse. Inge ketupwile kimye kyonse, ko kuba’mba tubena kuswisha Yehoba ‘kwitukwasha ne kwitutekenesha.’ (Sala. 86:17) Pa kupwila, Yehoba witukosesha kupichila mu mupashi wanji wazhila, Mambo anji, ne bantu banji. Kupwila kwitulengela ‘kwikosesha atwe bene na bene.’ (Loma 1:11, 12) Nyenga wa jizhina ja Sophia waambile’mba: “Yehoba ne balongo mwaya ntanda bankwashishe kuchinchika. Kintu kyo nanemekele bingi ke kupwila pamo na balongo. Nataaine kuba’mba kwingila na ngovu mwingilo wa kusapwila ne kupwila kunkwasha kukepeshako makatazho ne bijikila.”
18. Umvwe twalefulwa Yehoba wakonsha kwitupa ka?
18 Inge twalefulwa, twafwainwa kuvulukanga’mba Yehoba walaya’mba kulutwe ukafumyapo makatazho onse, bino witukwasha ne kuchinchika makatazho luno. Witupa “kizaku ne bulume” bwa kushinda bijikila.—Fili. 2:13.
19. Ñanyi mulaye uji pa Loma 8:37-39?
19 Tangai Loma 8:37-39. Mutumwa Paulo walayile’mba kafwako kintu kyakonsha kwitwabanya na butemwe bwa Lesa ne. Pano twakonsha kukwasha byepi balongo ne banyenga babena kupita mu makatazho? Mutwe walondelapo ukamba byo twakonsha kulondela Yehoba kupichila mu kumwesha kifyele ne kukwasha balongo ne banyenga inge kebapite mu makatazho.
LWIMBO 44 Lulombelo lwa Mulanda
^ jifu. 5 Makatazho inge avula nangwa abula kupwa bukiji akonsha kwitukookesha ne kwitulengela kwikala na bijikila. Yehoba wakonsha kwitukwasha byepi? Tusakwisamba pe Yehoba byo akwashishe Elaija kimye kyo ajinga na makatazho. Mashimikila akwabo a bantu banembwa mu Baibolo asakwitukwasha kuyuka byo twafwainwa kuba pa kuba’mba Yehoba etukwashenga inge twaikala na makatazho.
^ jifu. 2 Mazhina amo mu uno mutwe apimpulwa.
^ jifu. 53 KULUMBULULA BIPIKICHALA: Malaika wa Yehoba wabusha Elaija ne kumupa shinkwa ne mema.
^ jifu. 55 KULUMBULULA BIPIKICHALA: Nyimbi wa masalamo wafumine mu kikota kya kwa Asafwa ubena kumvwa bulongo kunemba masalamo ne kwimba na bakwabo bena Levi.
