KYAMBA KYA USOPA—KYA KUFUNDAMO Kapyantoto 2020
Mu kino kyamba muji mitwe ya kufunda kutendeka pa 3 kufika pa 30 August, 2020.
“Jizhina Jenu Jizhile”
Mutwe wa Kufunda 23: August 3-9, 2020. Ñanyi mambo anema bingi akunza bantu ne bamalaika? Ki ka kyalengela ano mambo kunema bingi, kabiji mwavwangwamo byepi? Kuyuka mikumbu ya ano mepuzho ne akwabotu, kuketukwasha kukosesha bulunda bwetu ne Yehoba.
“Nkwashai Ngikale na Muchima Umo Kuba’mba Ngakamwenga Jizhina Jenu”
Mutwe wa Kufunda 24: August 10-16, 2020. Mu uno mutwe, tusakwisamba pa byaambile Mfumu Davida kwi Lesa mu lulombelo lwanji lwanembwa pa Salamo 86:11, 12. Kwakamwa jizhina ja Yehoba kulumbulula ka? Mambo ka o twafwainwa kunemekela jizhina janji jikatampe? Kabiji kwakamwa Lesa kwakonsha kwituzhikijila byepi ku meseko?
Mepuzho Afuma ku Batanga
Nanchi byubilo byatanchikwa pa Ngalatiya 5:22, 23 byo byonkatu “bipangwa bya mupashi” nyi?
“Amiwa Mwine Nkeikeba Mikooko Yami”
Mutwe wa Kufunda 25: August 17-23, 2020. Mambo ka bamo baingijila Yehoba mu bukishinka pa myaka yavula o balekela kupwila? Lesa umvwa byepi pa bano bantu? Uno mutwe waamba mikumbu ya ano mepuzho. Kabiji waamba ne pa byo twakonsha kufunjilako kwi Yehoba byo akwashishe bamo balekele kumwingijila mu myaka yanembejilwengamo Baibolo.
“Bwelai kwi Amiwa”
Mutwe wa Kufunda 26: August 24-30, 2020. Yehoba ukeba boba baleka kupwila kuba’mba babwele kwi aye. Twakonsha kuba byavula pa kuba’mba tutundaike bakooka kuswa lwito lwa Yehoba lwa kuba’mba: “Bwelai kwi amiwa.” Mu uno mutwe tusakwisamba byo twakonsha kwibakwasha kuba bino.
