1-2. Yehoba waita bapopweshi banji ba kishinka kuba’mba bobe byepi?

 INGE muntu wimwipuzha’mba: ‘Yehoba ñanyi kwi anweba?’ Mwakonsha kukumbula’mba: ‘Yehoba ye Tata, Lesa wami kabiji mulunda nami.’ Kabiji kuji mazhina akwabo o mwakonsha kutelelamo Yehoba. Nangwa byonkabyo, nanchi mulanguluka’mba Yehoba wakonsha kwimwita kwikala mwenyi wanji nyi?

² Mfumu Davida waesakenye bulunda bwa Yehoba ne bapopweshi banji ba kishinka ku bulunda bwa mwenyi ne mwina nzubo. Waipwizhe’mba: “Anweba Yehoba, ñanyi wakonsha kwikala mwenyi mu tente wenu? Ñanyi wakonsha kwikala ku mutumba wenu wazhila?” (Sala. 15:1) Bino byambo bitukwasha kuyuka’mba twakonsha kwikala benyi ba Yehoba, ko kuba’mba balunda nanji. Aluno ke lwito lwanema bingi kufuma kwi Yehoba.

YEHOBA UKEBA’MBA TWIKALE BENYI BANJI

3. Ñanyi wajinga mwenyi wa Yehoba mutanshi, kabiji Yehoba ne mwenyi wanji baumvwinenga byepi ku muchima?

³ Yehoba wajingatu bunke saka akyangye kulenga bintu byonse. Nangwa byonkabyo, pa kupitapo kimye walengele Mwananji mubeji ne kumulengela kwikala mu tente wanji wa kifwanyikizho. Yehoba wajinga bingi na lusekelo byo kiji kuba’mba watendekele kwikala na benyi mu nzubo yanji ya kifwanyikizho. Baibolo wamba’mba Yehoba wayilenga na ‘kutemenwangakotu’ Mwananji. Mwenyi wanji mutanshi naye ‘waikalanga na lusekelo kwi [Yehoba] kimye kyonse.’​—Maana 8:30.

4. Bañanyi bakwabo Yehoba bo aichile kwikala benyi mu tente wanji?

 ⁴ Kepo Yehoba alengele bamalaika bakwabo ne kwibeta kwikala benyi banji. Bano bamalaika batelwa’mba “baana ba Lesa” kabiji Baibolo wibalumbulula’mba baji bingi na lusekelo pa kwikala pamo ne Yehoba. (Yoba 38:7; Da. 7:10) Pa myaka yavula, balunda ba Lesa bajinga boba bo ekala nabo mwiulu. Nangwa byonkabyo, pa kupitapo kimye walengele bantu kabiji nabo baikele benyi banji. Pa bano benyi banji pajinga ne Enoka, Nowa, Abalahama ne Yoba. Bano bapopweshi ba kine bebatelele’mba balunda ba Lesa nangwa’mba bantu “baendelenga na Lesa wa kine.”​—Nte. 5:24; 6:9; Yoba 29:4; Isa. 41:8.

5. Ñanyi bintu byo tubena kufunjilako ku bungauzhi buji pa Ezikyo 37:26, 27?

⁵ Pa myaka yavula, Yehoba watwajijila kwita balunda nanji kwikala benyi banji. (Tangai Ezikyo 37:26, 27.) Ku buno bungauzhi bwa kwa Ezikyo tufunjilako kuba’mba Lesa ukeba bapopweshi banji ba kishinka kwikala na bulunda bwakosa ne aye. Walaya kulayañana nabo “lulayañano lwa mutende.” Buno bungauzhi bwamba pa kimye bantu baji na luketekelo lwa kwikala mwiulu ne bantu baji na luketekelo lwa kwikala pano pa ntanda kyo bakekala pamo mu tente wa kifwanyikizho saka bakwatankana nobe “jitanga jimo.” (Yoa. 10:16) Kino kyo kimye kibena kufika buno bungauzhi.

LESA WITUTA MUCHIMA KECHI NA MAMBO A KO TWIKALA NE

6. Muntu wikala byepi mwenyi mu tente wa Yehoba kabiji kwepi ko twakonsha kutaana uno tente wanji?

⁶ Mu moba a kala, tente yaikalanga mpunzha mwa kukokolokela ne kuzhikijilwa ku mvula, mwela wa kinkunkwila, mute ne bintutu bikwabo. Inge mwenyi waiya mu uno tente, bamutanga bingi muchima ne kumulama bulongo. Inge twipana kwi Yehoba, twikala benyi mu tente wanji wa kifwanyikizho. (Sala. 61:4) Twiyowa kajo ka ku mupashi kavula ne kutaana balunda netu benyi ba Yehoba. Tente wa Yehoba wa kifwanyikizho kechi ujitu mu mpunzha imo ne. Kampe mwakiyapo ku kyalo kikwabo na kushonkena ko mwamonañene na bantu bakwabo baji na lusekelo na mambo a kwikala benyi mu tente wa Lesa. Uno tente utaanwa ku mapunzha onse kuji bapopweshi banji ba lukookelo.​—Lum. 21:3.

7. Mambo ka o twakonsha kwambila’mba bantu ba Lesa ba kishinka bafwa bakiji benyi mu tente wa Yehoba? (Monai ne kipikichala.)

⁷ Ibyepi pa bantu ba Lesa ba kishinka bafwa? Nanchi twakonsha kwamba’mba nabo  bakiji benyi mu tente wa Yehoba nyi? Ee. Mambo ka o twaambila bino? Bano bantu bakiji bomi mambo Yehoba ukibavuluka. Yesu waambile’mba: “Mosesa naye waambilepo pa kusangulwa kwa bafu mu jishimikila ja kipupu kya miba, byo aambile pe Yehoba amba, ‘Lesa wa Abalahama, Lesa wa Izaka kabiji Lesa wa Yakoba.’ Aye kechi ye Lesa wa bafu ne, ke wa bomi, mambo bonse kwi aye ke bomi.”​—Luka 20:37, 38.

BINTU BYAWAMA BYO TUMWENAMO NE BINTU BYO TWAFWAINWA KUBA

8. Benyi ba Yehoba bamwenamo byepi na mambo a kwikala mu tente wanji?

⁸ Byonkatu tente byo ekala mpunzha mwa kukokolokela ne kuzhikijila bantu ku bintu byatama, tente wa Yehoba naye uzhikijila benyi banji ku bintu byakonsha konauna bulunda bwabo ne aye, kabiji wibalengela kwikala na luketekelo lwa bintu byawama biji kulutwe. Inge twatwajijila kufwenya kwipi ne Yehoba, Satana kechi ukoba kintu kyatama kyakonsha konauna bulunda bwetu ne Yehoba myaka ne myaka ne. (Sala. 31:23; 1 Yoa. 3:8) Mu ntanda ipya, Yehoba ukatwajijila kuzhikijila balunda nanji ba kishinka, kechi ku bintutu byakonsha konauna bulunda bwabo ne aye ne, bino ukafumyapo ne lufu.​—Lum. 21:4.

9. Yehoba ukeba benyi banji kuba ñanyi bintu?

⁹ Ke kintu kyanema bingi kwikala mwenyi mu tente wa Yehoba ne kutwajijila kwikala na bulunda bwawama ne aye. Ñanyi bintu byo twafwainwa kuba pa kuba’mba tutwajijile kwikala benyi banji? Inge muntu wimwita ku nzubo kwanji mukalondela bintu byo akeba’mba mube. Wakonsha kwimwambila kuvuula nsapato saka mukyangye kutwela mu nzubo kabiji mwakonsha kulondela byo emubuula. Po pamotu, ne atweba twafwainwa kuyuka bintu Yehoba byo akeba atweba kuba pa kuba’mba tutwajijile kwikala benyi mu tente wanji. Na mambo a kuba’mba twatemwa Yehoba, twibikako kuba bintu ‘bimutokesha ku muchima.’ (Kolo. 1:10) Yehoba mulunda netu kabiji twayuka kuba’mba ye Lesa wetu ye twafwainwa kunemeka atweba bonse. (Sala. 25:14) Onkao mambo, kimye kyonse twafwainwa kuvulukanga bino ne kutwajijila kumupa munema. Kwikala na uno moyo wa kwakamwa Yehoba kuketukwasha kuchinuzhuka kuba bintu byakonsha kumufichisha ku muchima. Kimye kyonse tukebesha ‘kwendanga na Lesa saka twipelula.’​—Mika 6:8.

YEHOBA KECHI WAMWESHESHE MISALULULO BENA ISALELA BYO BAJINGA MU KISELEBWA NE

10-11. Yehoba byo aubilenga na bena Isalela byo bajinga mu kiselebwa kya Sinai bimwesha byepi amba kechi uji na misalululo ne?

¹⁰ Yehoba kechi umwesha misalululo benyi banji ne. (Loma 2:11) Twakonsha kufunjilako kwi Yehoba byo abujile kumwesha misalululo bena Isalela kimye kyo bajinga mu kiselebwa kya Sinai.

¹¹ Byo afumishe bantu banji mu buzha mu Ijipita, Yehoba watongwele bañanga ba kwingijila mu tente wa lusambakeno. Bena Levi bebapele mingilo ikwabo ya kwingila mu tente wazhila. Nanchi Yehoba wateletu muchima aba baingijilanga mu tente wa lusambakeno nangwa boba baikalanga kipikipi na uno tente kukila bakwabo nyi? Ine. Yehoba kechi uji na misalululo ne.

12. Yehoba wamwesheshe byepi kuba’mba kechi wajinga na misalululo ku kisaka kyanji kya bena Isalela kyo alengele ne? (Kulupuka 40:38) (Monai ne kipikichala.)

¹² Bena Isalela bonse bakonsheshe kwikala balunda ne Yehoba kechi na mambo  a mingilo yo bebapele kwingila nangwa na mambo a kwikala kipikipi na tente wa lusambakeno ne. Kiji bino, mambo Yehoba walengelanga kisaka kyonse kya bena Isalela kumona jikumbi ne mujilo waimananga mulumbulumbu peulu ya tente wa lusambakeno. (Tangai Kulupuka 40:38.) Inge jikumbi jatendeka kwenda, nangwatu boba baikelanga kwalepa na tente wa lusambakeno, bejimonanga ne kutendeka kukasa bipe byabo, kufiikulula matente ne kuyila pamo na ba mu kisaka kyonse. (Bala. 9:15-23) Bonse baumvwanga kuvuma kwa matolompita abiji a siliva ebalengelanga kuyuka’mba bafwainwa kutendekako lwendo. (Bala. 10:2) Onkao mambo, kwikala kipikipi na tente wa lusambakeno kechi kwalumbululanga’mba muntu uji na bulunda bwakosa ne Yehoba ne. Nangwa byonkabyo, bena Isalela bonse bakonsheshe kwikala benyi mu tente wanji ne kuyuka’mba ukebatangijilanga ne kwibazhikijila. Ne lelo jino, Yehoba ubena kutangijila bantu banji ne kwibazhikijila kechi na mambo a mpunzha ko bekela pano pa ntanda ne.

NE LELO JINO YEHOBA KECHI UMWESHA MISALULULO NE

13. Mambo ka o twakonsha kwambila’mba Yehoba kechi umwesha bantu misalululo lelo jino ne?

¹³ Lelo jino bantu ba Lesa bamo bekala kwipi na ofweshi mukatampe nangwa ofweshi wa musampi wa Bakamonyi ba kwa Yehoba. Bakwabo nabo bengijila pa ano mapunzha. Onkao mambo, bano bantu bengilako mingilo yavula ingijiwa pa ano mapunzha kabiji bapwanañana na batangijila. Bamo bakalama ba mwanzo kabiji bakwabo baji mu mwingilo wa kimye kyonse. Inge muji pa bantu bavula babula kwingilako ino mingilo yonse, shiinwai kuba’mba Yehoba watemwa benyi banji bonse baji mu tente wanji. Kabiji bonse wibata bingi muchima. (1 Pe. 5:7) Bano bantu banji bonse, Yehoba wibapa kajo ka ku mupashi, kwibatangijila ne kwibazhikijila.

14. Ñanyi kintu kikwabo kimwesha’mba Yehoba kechi uji na misalululo pa kwita bantu mu tente wanji ne?

 ¹⁴ Kintu kikwabo kimwesha’mba Yehoba kechi uji na misalululo ne, ke kya kuba’mba bantu bonse mwaya ntanda lelo jino baji na Baibolo kabiji bamutanga. Binembelo byazhila patanshi bebinembele mu milaka isatu: Kihebelu, Kialamaiki ne Kingiliki. Nanchi aba batanga Baibolo mu milaka itanshi yo banembejilemo Baibolo baji na bulunda bwakosa ne Yehoba kukila boba babula kuyuka ino milaka nyi? Ine, kechi byo byo kiji ne.​—Mat. 11:25.

15. Ñanyi bintu bitulengela kushiinwa’mba Yehoba kechi uji na misalululo ne? (Monai ne kipikichala.)

¹⁵ Bulunda bwetu ne Yehoba kechi bwaimena pa kufunda sukulu wa ku mubiji nangwa kuyuka milaka itanshi yo banembejilemo Baibolo ne. Yehoba kechi upanatu maana ku boba bafunda sukulu wa ku mubiji kufika palepa ne, pano bino wiapana ku bantu bonse mwaya ntanda, bafunda nangwa babula kufunda. Mambo anji, Baibolo beatuntulula mu milaka yavula bingi. Kino kilengela bantu mwaya ntanda yonse kufunda bintu byawama bijimo ne kuyuka byo bafwainwa kuba pa kuba’mba bekale balunda nanji.—2 Timo. 3:16, 17.

TWAJIJILAI KWIKALA ‘BAITABILWA’ KWI YEHOBA

16. Kwesakana na Byubilo 10:34, 35, twakonsha kutwajijila byepi kwitabilwa kwi Yehoba?

¹⁶ Twatokwa bingi kwikala benyi ba Yehoba mu tente wanji wa kifwanyikizho. Aye uji bingi na kifyele, butemwe kabiji utambwila benyi banji bulongo kukila bantu bonse. Kunungapo kechi uji na misalululo ne, mambo utambwila bantu bonse kechi na mambo a ko bekala, nkomeno, kufunda, kikoba, mulaka, jifumbi, mwanamulume nangwa mwanamukazhi ne. Nangwa byonkabyo, aba balondela mizhilo yanji bo bonkatu bo atambwila kwikala benyi banji.​—Tangai Byubilo 10:34, 35.

17. Kwepi ko twafwainwa kutaana byambo bikwabo byaamba pa byo twafwainwa kuba pa kuba’mba tutwajijile kwikala benyi mu tente wa Yehoba?

¹⁷ Pa Salamo 15:1, Davida waipwizhe mepuzho a kuba’mba: “Anweba Yehoba, ñanyi wakonsha kwikala mwenyi mu tente wenu? Ñanyi wakonsha kwikala ku mutumba wenu wazhila?” Nyimbi wa salamo bamutangijile na mupashi kukumbula ano mepuzho. Mu mutwe walondelapo, tukesamba pa bintu bimo byo twafwainwa kuba pa kuba’mba tutwajijile kwitabilwa kwi Yehoba.