KYAMBA KYA USOPA—KYA KUFUNDAMO Kisaka 2017
Mu kino kyamba muji mitwe ya kufunda mu kutendeka pa 1 May kufika pa 28 May, 2017.
JISHIMIKILA JA BWIKALO
Kupwanañana na Bantu ba Maana Kwamfunjisha Byavula
Mu myaka yonse yo baingila mwingilo wa kimye kyonse, ba William Samuelson bapita mu bintu byapusana pusana ne kwingila mingilo yapusana pusana.
Panainga Munema ku Boba Bafwainwa Kunemekwa
Bañanyi bo twafwainwa kunemeka, kabiji mambo ka? Ñanyi bintu byawama byakonsha kufumamo inge mwibanemeka?
Ikalai na Lwitabilo pa Kuba’mba Mufuukulenga Bintu Bulongo
Bintu bimo byo mukafuukulapo ke bintu bikatampe byakonsha kupimpula bwikalo bwenu. Ki ka kyakonsha kwimukwasha kufuukulanga bintu bulongo?
Ingijilainga Yehoba na Muchima Yense
Bamfumu ba mu Yuda bana, Asa, Yehoshafwata, Hezekiya, ne Yosiya bonse balubankanyanga. Bino Lesa wibatelele’mba bamwingijile na muchima yense. Mambo ka?
Nanchi Muteshako Muchima ku Bintu Byanembelwe Kala Nyi?
Mwakonsha kufunjilako byavula ku bilubankanya bakwetu, kubikapotu ne byalubankenye bantu bamo banembwa mu Baibolo.
Kulamawizha Bulunda Inge Bulunda Bwenu Buji mu Kizumba
Inge bulunda bwenu kebukebe kupwa, mwakonsha kubapo bimo pa kuba’mba mulamawizhi bulunda bwenu. Mwakonsha kumukwasha byepi?
Jizhina ja mu Baibolo Janembwa pa Mulondo wa Kala
Mu 2012, bashayuka ba bya kupoyapoya bataaine bipimvwa bya mulondo byazhikamine kala papita ne myaka 3000. Ñanyi kintu kyo batelepo bingi muchima pa uno mulondo?
