1-3. Kwingijila Yehoba “na muchima yense” kulumbulula ka? Lumbululai.

ATWEBA bonse twi bambulwa kulumbuluka, kabiji tulubankanya. Bino inge twipelula ne kulapila, twakonsha kulomba Yehoba amba etulekeleko mambo. Inge twauba bino, Yehoba kechi uketubila “monka mwayila mambo etu” ne. (Sala. 103:10) Pano bino, byonkatu Davida byo abuujile Solomone, umvwe tukeba’mba Yehoba etabizhe mpopwelo yetu, twafwainwa “kumwingijila na muchima yense.” (1 Moba 28:9) Bino byo tuji bambulwa kulumbuluka, twakonsha kuba byepi bino?

² Kintu kimo kyakonsha kwitukwasha ke kwesakanya byaubile Mfumu Asa na byaubile Mfumu Amaziya. Abano bamfumu babiji ba mu Yuda baubile byaoloka ku meso a Yehoba, pano bino Asa aye waubile bino na muchima yense. (2 Moba 15:16, 17; 25:1, 2; Maana 17:3) Bonse babiji bajinga bambulwa kulumbuluka, kabiji balubankanyanga. Bino Asa kechi wasendukile mu jishinda ja Lesa ne, mambo ‘wipaine na muchima yense’ kwi Lesa. (1 Moba 28:9, tubyambo twa munshi.) Pakuba Amaziya aye kechi wipaine na muchima yense kwi Yehoba ne. Kimye kimo byo ashinjile balwanyi ba Lesa, wasendele  balesa ba bubela ne kutendeka kwibapopwela.—2 Moba 25:11-16.

³ Kwingijila Lesa “na muchima yense” kulumbulula kwipana kwi aye ne kumwingijila kwa kubula kuleka. Mu Baibolo, kyambo kya “muchima” kilumbulula muntu byo aji mukachi, ko kuba’mba bintu byo asaka, milanguluko yanji, byubilo byanji, ne bintu byo akeba kuba mu bwikalo. Onkao mambo, muntu wingijila Yehoba na muchima yense kechi umwingijila na michima ibiji ne. Kabiji upopwela Yehoba na mambo a kumutemwa, kechi kya kwikanjikizhatu ne. Nga atweba tuba byepi? Nangwa kya kuba twi bambulwa kulumbuluka, umvwe twipana kwi Lesa ne kumupopwela na mambo a kumutemwa, tukamwingijilanga na muchima yense. —2 Moba 19:9.

4. Ñanyi bintu byo tusakwisambapo?

⁴ Pa kuba’mba tuyuke bulongo byo kilumbulula kwingijila Lesa na muchima yense, twayai tufunjileko ku byaubile Asa ne bamfumu bakwabo ba mu Yuda baingijilanga Lesa na muchima yense. Bano bamfumu ke Yehoshafwata, Hezekiya ne Yosiya. Abano bamfumu bana nabo balubankanyanga, bino basangajikile muchima wa Yehoba. Mambo ka Lesa o aambijile’mba bamwingijile na muchima yense, kabiji twakonsha kuba byepi byo baubile?

5. Ñanyi bintu byawama byaubile Asa?

⁵ Bena Isalela byo baabene, mwafumine bufumu bwa Yuda ne bufumu bwa Isalela bwa mikoka jikumi ya ku kabeta ka ku buyeke. Asa ye wajinga mfumu wa busatu wa bufumu bwa Yuda. Asa byo aikele mfumu, wafumishemo bankishi bonse mu bufumu bwanji ne kupanga banabalume belaalanga na banabalume bakwabo ku nzubo ya Lesa. Kabiji wafumishepo Maaka nkambo yanji wamukazhi pa kifulo kyanji kya bu “inamfumu, mambo walengele nkishi wa bunya.” (1 Mfu. 15:11-13) Asa wakambizhe ne bantu banji “kukeba Yehoba . . . ne kulondela Mizhilo ne mikambizho yanji.” Asa waingijile bingi kutundaika bupopweshi bwa kine.—2 Moba 14:4.

6. Asa waubile byepi kimye bena Etiopya kyo balukukile bena Yuda?

⁶ Mu myaka itanshi jikumi ya bukalama bwa kwa Asa, Yehoba wapesheshe bena Yuda ne kwibapa mutende. Kepo Zela mwina Etiopya aishile na kulwa na bena Yuda saka aji na nzhita ya banabalume 1,000,000 ne makalaki 300. (2 Moba 14:1, 6, 9, 10) Asa waubile byepi? Waketekejile mwi Yehoba na muchima yense. (Tangai 2 Byambo bya Moba 14:11.) Lesa wakumbwile lulombelo lwa kwa Asa ne kumukwasha kushinda nzhita ya bena Etiopya. (2 Moba 14:12, 13) Nangwa kya kuba bimye bimo bamfumu bamo kechi bamwingijilanga mu bukishinka ne, Yehoba wibakwashanga kushinda balwanyi babo na mambo a jizhina janji. (1 Mfu. 20:13, 26-30) Bino Asa waketekejile mwi Lesa kabiji Yehoba wakumbwile lulombelo lwanji. Ibyo kuba’mba mu kuya kwa kimye, Asa walubankenye. Kimye kimo, kechi walombele bukwasho bwa Yehoba ne, pakuba waketekejile mu mfumu wa bena Silya. (1 Mfu. 15:16-22) Pano bino, Lesa byo atajile mu muchima, wamwene kuba’mba Asa “waingijilanga Yehoba na muchima wanji yense mu bumi bwanji bonse.” Twakonsha kulondela byepi byaubile Asa mu kuba byawama?—1 Mfu. 15:14.

7, 8. Mwakonsha kwingijila byepi Yehoba byonka byaubile Asa?

⁷ Atweba bonse twafwainwa kumona inge kine twipana kwi Lesa na muchima yense. Mwakonsha kwishikisha’mba, ‘Nanchi nafuukulapo kusangajika Yehoba, kutundaika mpopwelo ya kine, ne kukwasha kipwilo kwikala kyatoka kyabula kaneneno nyi?’ Kechi kyapeelele Asa kufumyapo bankambo yanji ba Maaka pa kifulo  kyabo kya bu “inamfumu” mu Yuda ne. Kimye kimo, ne anweba mwakonsha kupitapo mu bintu bimo bikebewa kuchinchika byonka byaubile Asa. Mwakonsha kuba byepi inge umo wa mu kisemi nangwa mulunda nenu bamupanga mu kipwilo na mambo a kuba’mba walenga mambo kabiji wakana kulapila? Nanchi mwakonsha kuleka kupwanañana nanji nyi? Muchima wenu wakonsha kwimulengela kuba ka?

⁸ Nangwatu inge bantu babena kwimumanyika, mwakonsha kuketekela mwi Lesa na muchima yense, byonka byaubile Asa. Bakwenu ku sukulu bakonsha kwimwendeleka na mambo a kuba’mba mwi Bakamonyi ba kwa Yehoba. Nangwa kampe bakwenu ku nkito bakonsha kwimwendeleka inge mwalombako moba pa kuba’mba mukaye na kubuñana, nangwa inge mwingilatu maola acheche pa kuba’mba mwikalengako na kimye kya mwingilo wa Lesa. Mu bimye bya uno mutundu, lombai kwi Lesa, byonka byaubile Asa. Chinchikai ne kuketekela mwi Yehoba, ne kutwajijila kuba bintu byo mwayuka amba byaoloka. Kabiji vulukai kuba’mba byonkatu Lesa byo akwashishe Asa ne kumukosesha, ne anweba ukemukosesha.

9. Byo tusapwila, tumwesha byepi amba tubena kwingijila Yehoba na muchima yense?

⁹ Bakalume ba Lesa kechi betatu muchima abo bene ne. Asa watundaikile mpopwelo ya kine. Ne atweba twakonsha kukwasha bantu “kukeba Yehoba.” Yehoba usangalala bingi inge wamona byo tufunjisha bantu pe aye, kikatakata byo tuba bino na mambo a kumutemwa ne kutemwa bantu ne kukeba’mba nabo bakekale na bumi bwa myaka ne myaka.

10, 11. Mwakonsha kuba byepi byaubile Yehoshafwata?

¹⁰ Yehoshafwata, mwana wa kwa Asa “waendelenga mu jishinda ja shanji aye Asa.” (2 Moba 20:31, 32) Waubile byepi bino? Byonka byaubile bashanji, Yehoshafwata naye watundaikile bantu kukeba Yehoba. Wanengezhezhe mwingilo wa kufunjisha bantu byanembelwe mu “buku wa Mizhilo ya Yehoba.” (2 Moba 17:7-10) Kabiji wayile ne ku kibunji kya mitumba kya Efelaimu mu bufumu bwa Isalela bwa ku kabeta ka ku buyeke, “kuba’mba abwezhe bantu kwi Yehoba.” (2 Moba 19:4) Kine Yehoshafwata wajinga mfumu umo “wakebele Yehoba na muchima wanji yense.”—2 Moba 22:9.

¹¹ Ne atweba twakonsha kwingilako mwingilo mukatampe witupa Yehoba wa kufunjisha bantu lelo jino. Nanchi mwibikila kikonkwanyi kya kufunjisha bantu Mambo a Lesa pa ñondo pa ñondo, ne kwibafika pa muchima pa kuba’mba nabo bengijilenga Lesa nyi? Inge mwibikako, Lesa ukemukwasha pa kuba’mba mukataanepo muntu wa kufunjisha Baibolo. Umvwe kino kyo kikonkwanyi kyenu, nanchi mubena kulombapo nyi? Nanchi mwinengezha kupimpulako byo mwingijisha kimye kyenu, pa kuba’mba mwingileko kimye kyabaya ne kufikizha kino kikonkwanyi nyi? Kabiji byonkatu Yehoshafwata byo ayile ku kibunji kya Efelaimu na kukwasha bantu kuba’mba babwele mu bupopweshi bwa kine, twakonsha kukwasha boba bakooka mu lwitabilo. Kunungapo, bakulumpe mu kipwilo banengezha kufwakesha ne kukwasha bonse bapangilwe mu kipwilo bino baleka byubilo byatama byo bebapangijilepo.

12, 13. (a) Yehoshafwata waubile byepi byo aumvwine moyo? (b) Mambo ka o twafwainwa kulombela bukwasho byonka byaubile Yehoshafwata?

¹² Yehoshafwata naye waketekejile mwi Lesa kimye kyo bamulukukile ku balwanyi, byonka byaubile shanji aye Asa. (Tangai 2 Byambo bya Moba 20:2-4.) Yehoshafwata waumvwine moyo. Pano bino, “wafuukwilepo kukeba Yehoba.” Mu lulombelo, waambile kuba’mba aye ne bantu banji ‘kechi bajinga na bulume bwa kulwa na jino jibumba jikatampe’ ne, kabiji kechi bayukile  bya kuba ne. Waketekejile mwi Yehoba, ne kwamba’mba: “Tubena kutalatu kwi anweba.”—2 Moba 20:12.

¹³ Bimye bimo, ne atweba tumvwa moyo ne kubula kuyuka bya kuba, byonka byo kyajinga kwi Yehoshafwata. (2 Ko. 4:8, 9) Bino vulukai kuba’mba mu lulombelo lwanji lwa pa mvula bantu, Yehoshafwata waswile kuba’mba aye ne bantu banji kechi bajinga na bulume ne. (2 Moba 20:5) Mitwe ya bisemi nabo bakonsha kuba byaubile Yehoshafwata ne kulomba kuba’mba Yehoba ebatangijile ne kwibakosesha pa kuba’mba bachinchike makatazho o bapitamo. Inge mubena kulomba pamo na kisemi kyenu, kechi mwafwainwa kumvwa bumvu kusashijila Yehoba amba emukwashe ne. Po po bakayuka’mba mwaketekela mwi Yehoba. Lesa wakwashishe Yehoshafwata, ne anweba ukemukwasha.

14, 15. Hezekiya wamwesheshe byepi amba waketekejile mwi Lesa na muchima yense?

¹⁴ Mfumu Hezekiya naye “wakakachijile kwi Yehoba.” Waubile bino nangwa kya kuba bashanji bajinga na byubilo byatama bya kupopwela bankishi. Hezekiya “waonawine mapunzha atuntama, walalawile mashiki azhila ne kutetaula bichi bya milumbulumbu byazhila. Kabiji wasansakenye ne muloolo wa mukuba Mosesa ye alengele,” mambo mu moba a kwa Hezekiya, bantu baingijishanga uno muloolo mu kupopwela bankishi. Hezekiya wipaine kwi Yehoba na muchima yense, mambo “walaminenga mikambizho Yehoba yo apele Mosesa.”—2 Mfu. 18:1-6.

¹⁵ Nangwatu kimye nzhita ikatampe ya bena Asilya kyo yazhokolokele Yuda ne kukeba konauna muzhi wa Yelusalema, Hezekiya waketekejile mwi Yehoba na muchima yense. Mfumu wa bena Asilya aye Senakelibu waendelekele Yehoba ne kuzakamisha Hezekiya pa kuba’mba akookele. Bino Hezekiya walombele ne kumwesha kuba’mba waketekejile Yehoba kwibapulusha. (Tangai Isaya 37:15-20.) Lesa wakumbwile lulombelo lwa kwa Hezekiya ne kutuma malaika wanji kuya na kwipaya bashilikale 185,000 ba bena Asilya.—Isa. 37:36, 37.

16, 17. Mwakonsha kulondela byepi Hezekiya pa kuba’mba mwingijilenga Lesa bulongo?

¹⁶ Palutwe kacheche, Hezekiya wakolelwe bingi kwashajiletu kufwa. Wasashijile Yehoba amba avuluke byo aendele mu bukishinka ku meso a Lesa. (Tangai 2 Bamfumu 20:1-3.) Binembelo bimwesha kuba’mba lelo jino kechi twafwainwa kuketekelanga’mba Lesa usakwitubuka mu jishinda ja kukumya nangwa kwitunungilako bumi ne. Nangwa byonkabyo, twakonsha kulomba byonka byalombele Hezekiya kwi Yehoba, amba: “Naenda mu bukishinka ku meso enu ne na muchima yense.” Nanchi mwashiinwa kuba’mba Yehoba wakonsha kwimukosesha inge mwakolwa, kabiji ukebesha bingi kuba bino nyi?—Sala. 41:3.

¹⁷ Inge twalanguluka pa byamwekejile Hezekiya, kampe twakonsha kumonapo byubilo bimo byo twafwainwa kuleka mambo bibena kukookesha bulunda bwetu ne Lesa ne kwitujiila kimye kyetu kya kwingijila Lesa. Kechi tukeba kwikala nobe bantu bavula ba mu ntanda bataya kimye kyabaya pa Intaneti na kutakaika bantu nobe balesa ne. Ibyo, bena Kilishitu bengijisha mashinda amo a kwisambilamo a pa Intaneti pa kwisamba na balongo ne balunda. Bino bantu bavula mu ntanda bengijisha Intaneti pa kulenga bulunda na banabakazhi ne banabalume bo babula ne kuyuka ne. Bamo bataya kimye kyabaya bingi na kutambatu bipikichala bya bano bantu ne kutanga mashimikila abo. Bino mwakonsha kufuma makatazho inge muntu wanonkwa buzha ku bino bintu byabula ne kunema. Mwina Kilishitu wakonsha kutendeka kwitota inge waikala na balunda ba pa Intaneti  bavula, kabiji inge wamona’mba balunda nanji bamo baleka kutako maana ku byambo byo atuma pa Intaneti, wakonsha ne kuzhingila. Akilangulukai pa mutumwa Paulo nangwa Akwila ne Pilisila. Abya mwakonsha kwibafwanyikizha baji pa Intaneti pa juba pa juba na kwisampa bulunda na muntu wabula Kamonyi, nangwa kwitumina tubipikichala nyi? Baibolo witubuula’mba Paulo ‘watesheko bingi muchima kusapwila mambo a Lesa.’ Kabiji Pilisila ne Akwila baingijishanga kimye kyabo ‘kulumbulula bulongo jishinda ja Lesa’ ku bantu. (Byu. 18:4, 5, 26) Twakonsha kwishikisha’mba: ‘Nanchi nchinuzhuka kutakaika bantu nobe balesa nyi? Kabiji nanchi nchinuzhuka konauna kimye kyami ku bintu byabula ne kunema nyi?’—Tangai Efisesa 5:15, 16.

18, 19. Mu ñanyi mashinda mo mukeba kwikala byonka byajinga Yosiya?

¹⁸ Mfumu Yosiya wajinga munkanununa wa kwa Hezekiya, naye walamine malamuna a Yehoba “na muchima wanji yense.” (2 Moba 34:31) Byo akijingatu mwanyike, Yosiya “watendekele kukeba Lesa wa Davida,” kabiji byo afikizhenga myaka 20, watendekele kufumyamo bankishi bonse mu Yuda. (Tangai 2 Byambo bya Moba 34:1-3.) Yosiya waubile bintu byaoloka ku meso a Lesa, kukila ne bamfumu bavula bajingako kala mu Yuda. Bino kimye kyo bataaine buku mwanembelwe Mizhilo ya Mosesa ne kumutangila ino mizhilo, Yosiya wamwene kuba’mba wafwainwe kwingijila Lesa kukila ne byo amwingijilenga kala. Kabiji wakambizhe ne bantu kwingijila Yehoba. Onkao mambo, mu moba onse a bumi bwa kwa Yosiya, bantu “kechi balekele kulondela Yehoba Lesa” ne.—2 Moba 34:27, 33.

¹⁹ Banyike lelo jino bafwainwa kutendeka kwingijila Yehoba mu bwanyike bwabo, byonka byaubile Yosiya. Kyamweka Mfumu Manase byo alapijile, wafunjisheko munkananji aye Yosiya pa lusa lwa Lesa. Anweba banyike, ikalai balunda na bakikulumpe mu kisemi kyenu ne mu kipwilo baingijila Yehoba mu bukishinka, ne kufunjilako Yehoba byo ebobila bibusa. Kabiji vulukainga kuba’mba Yosiya byo atangile Binembelo, byamufikile pa muchima ne kumulengela kufuukulapo kwingijila Yehoba. Inge kemutange Mambo a Lesa, akemulengela kufuukulapo kwingijila Yehoba ne kukosesha bulunda bwenu na Lesa, kabiji mukekala ba lusekelo. Mukakebanga ne kubuulako bakwenu pe Lesa. (Tangai 2 Byambo bya Moba 34:18, 19.) Kufunda Baibolo kukemukwasha ne kumona mo mwafwainwa kuwamishako pa kuba’mba mwingijilenga Lesa bulongo. Onkao mambo, ibikaingako kuba byonka byaubile Yosiya.

20, 21. (a) Bamfumu bana bo twisambapo baubile byepi? (b) Tukesamba pa ka mu mutwe walondelapo?

²⁰ Nanchi mwamona bintu byawama byo twakonsha kufunjilako ku bano bamfumu bana ba mu Yuda baingijile Yehoba na muchima yense nyi? Baubanga kyaswa muchima wa Lesa na mukoyo, kabiji bepaine kumwingijila. Nangwatu kimye kyo bebalukukile ku balwanyi, abo batwajijile kuba kyaswa muchima wa Lesa. Kyakila mu kunema, baingijilenga Yehoba na mambo a kumutemwa na muchima yense.

²¹ Byonka byo tukafunda mu mutwe walondelapo, bano bamfumu bana bo twisambapo nabo balubankanyanga. Pano bino, Yehoba aye utalatala mu muchima, wamwene kuba’mba bamwingijile na muchima yense. Ne atweba twi bambulwa kulumbuluka. Yehoba byo atalatala mu michima yetu, nanchi umona kuba’mba tubena kumwingijila na muchima yense nyi? Tukesamba pa buno bwipuzho mu mutwe walondelapo.