KECHI kyapeela kutaana mulunda wa kishinka ne, onkao mambo, inge twaikalapo na umo, tunemeka bulunda bwetu nanji. Inge bulunda bwetu kebukebe kupwa, twakonsha kuba byepi? Twakonsha kufunjilako ku bantu bamo batongolwa mu Baibolo bajinga balunda, ne byo baubile pa kuba’mba bulunda bwabo bubule kupwa.

Davida wajinga kafunga kabiji mfumu, kabiji wajinga na balunda ba pa muchima. Mulunda nanji umo ye twakonsha kuvuluka ke Yonafwanyi. (1 Sam. 18:1) Bino Davida wajinga na balunda bakwabo, nabiji ngauzhi Natana. Baibolo kechi watongola kimye kyo baikele balunda ne. Bino kimye kimo Davida wabuujileko Natana kintu kyajinga mu muchima wanji, byonka byo mwakonsha kubuulako mulunda nenu. Davida wakebelenga kushimika nzubo ya Yehoba. Kyamweka Mfumu Davida wanemekele bingi byamubulangako Natana, mambo wajinga mulunda nanji kabiji wajinga ngauzhi wa Yehoba.—2 Sam. 7:2, 3.

Pano bino, kwamwekele kintu kimo kyakebelenga konauna bulunda bwabo. Mfumu Davida waubile bukende ne Batesheba, ne kwipaisha mwatawanji aye Uliya. (2 Sam. 11:2-21) Pa myaka yavula,  Davida wajinga muntu wa kishinka kwi Yehoba kabiji wachibanga mambo monka mo aolokela. Pano ki ka kyalengejile uno mfumu wawama kulenga ano mambo akatampe? Nanchi kechi wayukile’mba byo aubile byatamine nenyi? Nanchi walangulukile’mba wakonsha kufya mambo anji kwi Lesa nyi?

Nga Natana waubile byepi? Nanchi wapembelejile kuba’mba muntu mukwabo akasolomoke mfumu ne kumwambilamo pa kyo aubile nyi? Bantu bakwabo bayukile kuba’mba Davida ye waipaisha Uliya. Natana inge wakebelenga inge wazhindaminepotu, kuchiina’mba inge ambepo, usakonauna bulunda bwanji ne Davida. Kabiji Natana wakonsheshe ne kubika bumi bwanji mu kizumba pa kusolomoka Davida. Mambo Davida waipayishe Uliya, muntu wabujile mambo.

Bino Natana wajinga ngauzhi wa Lesa. Wayukile’mba inge azhindamepotu, bulunda bwanji ne Davida busakutaminakotu kabiji ne jiwi janji ja mu muchima jisakumukatazhanga. Mulunda nanji aye Davida walengele mambo kwi Yehoba. Onkao mambo, mfumu wakebewenga bukwasho pa kuba’mba abwezhe bulunda bwanji ne Yehoba. Kyo kimye kyo akebewenga mulunda wa kishinka, kabiji uno mulunda wajinga Natana. Pa kusolomoka Davida, Natana waingijishe kishimpi kyo ayukile’mba kisakufika Davida pa muchima mambo wayukile amba wajinga kafunga kala. Natana wabuujile Davida byambo bya Lesa mu jishinda jawama, jalengejile Davida kumona’mba walengele mambo akatampe ne kulapila.—2 Sam. 12:1-14.

Mwakonsha kuba byepi inge mulunda nenu walenga mambo akatampe? Mwakonsha kwakamwa’mba inge mwisambe nanji pa mambo o alenga, musakonaunatu bulunda bwenu. Nangwa mwakonsha kulanguluka’mba inge mubuuleko bakulumpe mu kipwilo pa byauba mukwenu, kisakumweka nobe mwamwalukamo. Mwakonsha kuba byepi?

Ba Gianni, bo twaji kwambapo ku ntendekelo bavuluka’mba: “Namwene amba bintu kechi biji bulongo ne. Ba Maurizio balekele kukasuluka inge babena kwamba ne amiwa. Onkao mambo, nafuukwilepo kwisamba nabo nangwa kya kuba kechi kyapelele ne. Naakaminwe’mba: ‘Ñanyi bintu byo nsakwibabuula byo babula kuyuka kala? Kampe basakunzhingijila.’ Bino byo navulukile bintu byonse byo twafunjijile nabo pamo, kyankwashishe kuchinchika ne kwisamba nabo. Ba Maurizio nabo bankwashishepo kala. Kechi nakebelenga’mba bulunda bwetu bupwe ne, pakuba nakebelenga kwibakwasha mambo nebatele bingi muchima.”

Ba Maurizio banungilepo’mba: “Ba Gianni kechi bampichile mu mbaji ne, baambiletu bishinka. Nayukile’mba yami neletejile makatazho na mambo a byubilo byami, kechi ba Gianni nangwa Yehoba ne. Onkao mambo, nakookejile bukwasho bwa bakulumpe mu kipwilo, kabiji pa kupitapo kimye nawamishe bulunda bwami ne Yehoba.”

Davida wajinga na balunda bakwabo bamukwashanga mu bimye bya makatazho. Umo pa bano ke Hushai ye batongola mu Baibolo amba wajinga “mulunda wa kwa Davida.” (2 Sam. 16:16; 1 Moba 27:33) Kyamweka wajinga kinemanga mu kipango kya mfumu, kabiji wajinga mulunda nanji wa pa muchima ye abuulangako bintu byafyamika.

Kimye mwana wa kwa Davida aye Abisalomo kyo etumbijikile kwikala mfumu, bena Isalela bavula bamutundaikilenga, bino Hushai kechi byo byo aubile ne. Davida byo anyemenenga, Hushai wamulondejile. Davida waumvwine bingi bibi byo bamwalukijilemo ku mwananji ne ku balunda nanji bamo bo aketekejile. Pano bino, Hushai watwajijile kwikala wa kishinka kabiji wabikile bumi bwanji mu kizumba pa kuba’mba akwashe Davida kushinda balwanyi bamusatukijile. Hushai kechi waubile bino na mambo a kuba’mba wajinga wa mwingilo mu kipango kya mfumu ne, bino waubile bino mambo wajinga mulunda wa kishinka.—2 Sam. 15:13-17, 32-37; 16:15–17:16.

Ne lelo jino, kitusangajika bingi kumona balongo ne banyenga byo bakwatankana pamo na  mambo a bulunda bwawama, nangwatu bengile mingilo yapusana pusana byepi mu kipwilo. Bemwesha butemwe mu byubilo byabo, uba nobe babena kwiambila bene na bene amba, “Wi mulunda nami, kabiji nakuta bingi muchima.”

Ba Federico bemwenejile kino kishinka. Balunda nabo abo ba Antonio bebakwashishe kuchinchika kimye kyo bapichile mu lukatazho. Ba Federico bavuluka’mba: “Amiwa ne ba Antonio twaikele balunda kimyetu kyo bavilukijile mu kipwilo kyetu. Bonse babiji twajinga bankwasho, kabiji twiyowanga bingi kwingijila pamo uno mwingilo. Palutwe kachechetu, ba Antonio bebatongwele kwikala bakulumpe mu kipwilo. Onkao mambo, natendekele kulondela mu ngayo yabo nangwa kya kuba bajinga balunda nami.” Pano bino, ba Federico balengele mambo. Ponkapotu, basolomokele bakulumpe mu kipwilo kuba’mba bebakwashe, kabiji bebafumishepo pa bupainiya ne bunkwasho. Nga ba Antonio baumvwine byepi?

Ba Federico bavuluka’mba: “Namwene kuba’mba ba Antonio bayukile bulanda bo najinga nabo. Bantekeneshe bingi. Kechi bandekelele ne mambo bakebeshe bingi kunkwasha kwingijila Yehoba bulongo jibiji. Bantudaikile kuchinchika ne kwibikako kukosa jibiji mu lwitabilo.” Ba Antonio balumbulula’mba: “Nesambanga ne ba Federico kimye kyabaya. Nakebelenga kuba’mba bakasuluke kumbuula byonse byajinga mu muchima wabo.” Mu kuya kwa kimye, ba Federico bawamishe jibiji bulunda na Lesa, kabiji bebatongwele kwikala bapainiya ne bankwasho. Ba Antonio bapezhako na bino byambo, amba: “Nangwa kya kuba luno tuji mu bipwilo byapusana, bino bulunda bwetu bwakosa bingi.”

Mwakonsha kumvwa byepi inge mulunda nenu wimufutukamo pa kimye kyo mubena kupita mu makatazho? Kikola bingi ku muchima. Nanchi mwakonsha kumulekelako mambo nyi? Nanchi bulunda bwenu bukatwajijila byonka byo bwajinga patanshi nyi?

Vulukai kyamwekejile Yesu kimye kyo kwashajiletu moba acheche kufwa. Aye ne batumwa banji  ba kishinka bajinga balunda pa kimye kyabaya kabiji bakwatankene. Yesu wibatelanga’mba balunda nanji. (Yoa. 15:15) Pano ki ka kyamwekele kimye kyo bamukwachile ku balwanyi? Batumwa bamunyemene. Patanshitu, Petelo waambile’mba kechi ukamusha Nkambo yanji ne, bino pa joja juba jakatazha, Petelo wakaine amba kechi wamuyukile Yesu ne.—Mat. 26:31-33, 56, 69-75.

Yesu wayukijile jimo amba ukashala bunke mu kimye kya lweseko. Pano bino, kyamukolele bingi ku muchima byo ashajile bunke. Bino byambo byo aambijile baana banji ba bwanga pa moba acheche alondejile kufuma kimye kyo asangwilwe bimwesha’mba kechi wibazhingijile nangwa kwilangulusha pa byo baubile ne. Yesu kechi watendekele kubajila baana banji ba bwanga bintu byo batamishe, kubikako ne byo baubile pa juba jo bamukwachile ku balwanyi ne.

Pakuba, Yesu watundaikile Petelo ne batumwa. Wibaketekejile bingi kya kuba wibapele mwingilo mukatampe wa kusapwila. Mu jino jishinda Yesu wamwesheshe’mba batumwa bakijinga balunda nanji. Kechi balubilemo butemwe bo ebamwesheshe ne. Batumwa batwajijile na kwibikako kuba kyaswa muchima wa Nkambo yabo. Baingijile mwingilo ye ebapele.—Byu. 1:8; Kolo. 1:23.

Nyenga Elvira uvuluka byo bapusenejilemo na mulunda nanji aye Giuliana. Washimikizha’mba: “Naumvwine bibi kimye Giuliana kyo ambujile’mba kintu kyo naubile kyamufichishe bingi ku muchima. Ne kya kine, kyo naubile kyatamine. Pano kyo nakuminye ke kya kuba’mba Giuliana waakaminwe pe amiwa ne byubilo byami byo byakonsheshe kundetela makatazho. Namusanchila bingi mambo kechi watele muchima pa byubilo byami byo bya mufichishe ku muchima ne, bino watele muchima pa makatazho o neletejilenga. Namusanchila bingi Yehoba pa kumpa mulunda wanta muchima.”

Nanchi mulunda wawama uba byepi inge bulunda bwanji na mukwabo kebukebe kupwa? Wafwainwa kwisamba na mulunda nanji na kifyele. Mulunda wa uno mutundu ukakachila ku mukwabo mu bimye byakatazha byonka byaubile Natana ne Hushai, ne kulekelako mukwabo mambo byonka byaubile Yesu. Nanchi byo byo muba na balunda nenu nyi?