1, 2. (a) Bansemi bena Kilishitu bamo bakamwa ka inge mwanabo keakebe kubatizhiwa? (b) Mambo ka bantu babena kuya ku lubatizhilo kyo bebepwizha inge bepana kwi Yehoba? (Monai kipikichala kitanshi.)

BANSEMI banji bena Kilishitu bashinkilweko kimye nsongwakazhi ye tusakutela’mba Maria kyo aimene pamo na bakwabo bayilenga na kubatizhiwa. Wakumbwile na jiwi ja peulu mepuzho abiji aipwizhe ñambi. Kabiji byo papichiletu ka kimye kacheche, wabatizhiwe.

² Bansemi ba kwa Maria baumvwine bingi bulongo pa kumona byafuukwilepo mwanabo kwipana kwi Yehoba ne kubatizhiwa. Pano bino, patanshi bainanji bazhinaukilenga. Beipwizhenga bene amba: ‘Nanchi Maria wakoma kya kuba wabatizhiwa nyi? Nanchi wayuka buneme bwa kintu kyo akeba kuba nyi? Nanchi kechi kyakonsha kuwama wakipembelelako nenyi?’ Ano o mepuzho bansemi bavula o beipuzha inge mwanabo keakebe kubatizhiwa. (Sapwi. 5:5) Bepuzha bino mambo kwipana ne kubatizhiwa ke bintu byanema bingi mu bwikalo bwa mwina Kilishitu yense.—Monai kakitenguluzha ka kuba’mba “ Nanchi Mwipana kwi Yehoba Nyi?”

3, 4. (a) Mutumwa Petelo waesakenye lubatizhilo ku ka? (b) Mambo ka Petelo o aesakenye lubatizhilo ku kufiika bwato mu moba a kwa Nowa?

 ³ Mutumwa Petelo waesakenye lubatizhilo ku mwingilo waingijile Nowa wa kufiika bwato. Waambile’mba: “Lubatizhilo lwaesakana na kino kyamwekele, nalo lubena kwimupulusha.” (Tangai 1 Petelo 3:20, 21.) Bwato bo afiikile Nowa bwajinga kishiino kikatampe kyamwesheshenga’mba wipana kuba kyaswa muchima wa Lesa. Nowa waingijile mwingilo ye bamupele kwi Yehoba mu bukishinka. Na mambo a mingilo yanji ya lwitabilo, Nowa wapulukile ne kupulusha kisemi kyanji mu Muyulo. Ñanyi kishinka kyo twakonsha kufunjilako ku kifwanyikizho kyaingijishe Petelo?

⁴ Byonkatu bwato byo bwajinga kishiino kyamwesheshenga lwitabilo lwa kwa Nowa, kubatizhiwa pa mvula bantu nako ke kishiino kikatampe. Kimwesha ka? Kimwesha kuba’mba mwina Kilishitu wipana kwi Yehoba na mambo a lwitabilo lwanji mwi Kilishitu wasangwilwe. Byonka byaubile Nowa, aba babatizhiwa bakookela Lesa ne kutwajijila kwingila mwingilo ye ebapa. Kabiji byonkatu Nowa byo apulukile mu Muyulo, ne boba babatizhiwa bakatwajijila kwikala ba kishinka bakapuluka kimye ino ntanda yatama kyo bakeyonauna. (Mako 13:10; Lum. 7:9, 10) Kino kimwesha’mba kwipana ne kubatizhiwa kwanema bingi. Onkao mambo, muntu ukankazhama kubatizhiwa kechi wakonsha kuketekala kwikala na bumi bwa myaka ne myaka ne.

5. Tusakwisamba pa ka mu uno mutwe?

⁵ Byo twayuka kuba’mba lubatizhilo lwanema bingi, twafwainwa kukumbula mepuzho asatu. Baibolo waambapo’mba ka pa lubatizhilo? Ñanyi bintu byafwainwa kuba muntu saka akyangye kubatizhiwa? Mambo ka mwina Kilishitu o afwainwa kuvulukilanga buneme bwa lubatizhilo kimye kyo abena kufunjisha mwananji nangwa muntu mukwabo?

6, 7. (a) Lumbululai buneme bwa lubatizhilo lwaubanga Yoano. (b) Ñanyi lubatizhilo lwanemene bingi lwaubile Yoano?

⁶ Yoano Mubatizhi ye muntu mutanshi wanembwa mu Baibolo amba wabatizhanga bantu. (Mat. 3:1-6) Bantu Yoano bo abatizhanga bamweshanga’mba balapila ku bundengamambo bwabo bwa kubula kukookela Mizhilo ya Mosesa. Bino kwajinga lubatizhilo lwanemene bingi lwaubile Yoano lwapusene na lwa kulapila. Yoano wabatizhe Yesu, Mwana Lesa walumbuluka. (Mat. 3:13-17) Yesu kechi wajinga ndengamambo ne, onkao mambo, kechi wakebewenga kulapila ne. (1 Pe. 2:22) Lubatizhilo lwanji lwajinga lwa kwipana kuba kyaswa muchima wa Lesa.—Hebe. 10:7.

⁷ Yesu byo aingijilenga mwingilo wanji pano pa ntanda, baana banji ba bwanga nabo babatizhenga bantu. (Yoa. 3:22; 4:1, 2) Luno lubatizhilo lwajingatu pamo na lwa kwa Yoano, bantu bo babatizhanga bamweshanga’mba balapila ku bundengamambo bwabo bwa kubula kukookela Mizhilo ya Mosesa. Pano bino, Yesu byo afwile ne kusanguka, baana banji ba bwanga batendekele kubatizhiwa lubatizhilo lwapusanako.

8. (a) Yesu byo asangwilwe, wakambizhe baana banji ba bwanga kubanga ka? (b) Lumbululai buneme bwa lubatizhilo lwa bena Kilishitu.

⁸ Mu 33 C.E., Yesu byo asangwilwe wamwekele ku jibumba ja banabalume ne banabakazhi kukila pa 500, kampepo ne baana. Kyamweka pa kyonkakya kimye po po aambile byambo bya kuba’mba: “Onkao mambo, yainga na kufunjisha bantu ba mu bisaka byonse bya bantu kwikala ke baana bami ba bwanga, ne kwibabatizha mu jizhina ja Tata ne ja Mwana ne ja mupashi wazhila, ne kwibafunjisha kulama bintu byonse byo nemukambizha.” (Mat. 28:19, 20; 1 Ko. 15:6) Kyamweka kwatainwe baana ba bwanga ba kwa Yesu bavula kimye kyo apaine uno mukambizho wa kufunjisha bantu kwikala baana ba bwanga. Yesu wamwesheshe’mba aba bakeba kusenda kikonkoji kya kwikala baana banji ba bwanga bafwainwa kubatizhiwa. (Mat. 11:29, 30) Muntu yense ukeba kwingijila Lesa mu jishinda jaitabilwa, wafwainwa kuswa’mba Yehoba wingijisha Yesu kufikizha kyaswa muchima wanji. Umvwe muntu waswa bino, ko kuba’mba wakonsha kubatizhiwa. Luno lo lubatizhilotu lwa mu mema Lesa lo aitabizha. Mu Baibolo mwanembwa bishinka bimwesha’mba mu myaka ya batumwa, aba baikelenga baana ba bwanga ba kwa Kilishitu bayukile buneme bwa lubatizhilo. Kabiji kechi bakankazhamanga kubatizhiwa ne.—Byu. 2:41; 9:18; 16:14, 15, 32, 33.

9, 10. Twakonsha kufunjilako ka ku lubatizhilo lwa mwina Etiopya ne lwa mutumwa Paulo?

⁹ Tangai Byubilo 8:35, 36. Langulukai pa byaubile mwanamulume mwina Etiopya waalukile ke Muyudea. Byo abwelelenga ku nzubo kufuma ku Yelusalema ko ayile na kupwila, malaika wa Yehoba watumine Filipa kuya na kumonañana na uno mwina Etiopya kabiji “wamusapwijile mambo awama aamba pe Yesu.” Uno mwina Etiopya waubilepo byepi? Kintu kyo aubile byo aumvwine mambo awama kyamwesheshe’mba wasanchile pa bukine bo afunjile. Wafuukwilepo kuba bikeba Yehoba, onkao mambo wabatizhiwe kwa kubula kukankazhama.

¹⁰ Muntu mukwabo ke mwanamulume Muyudea wamanyikilenga bena Kilishitu. Wasemekejilwe mu kisaka kya bantu bepaine kwi Lesa. Pano bino, Bayudea bebakaine kwi Yehoba. Uno mwanamulume aye walangulukanga’mba Bayudea bakingijila Lesa mu bukishinka. Bino mu kuya kwa kimye wafunjile bukine. Juba jimo, Yesu Kilishitu saka asangulwa kala wisambile nanji kufuma mwiulu. Uno Muyudea waubilepo byepi? Waswile bukwasho kufuma ku mwana wa bwanga wa kwa Kilishitu aye Ananyasa. Baibolo witubuula byaubile uno  mwanamulume amba: “Kepo aimene ne kubatizhiwa.” (Byu. 9:17, 18; Nga. 1:14) Uno mwanamulume Muyudea mu kuya kwa kimye watendekele kutelwa’mba mutumwa Paulo. Kishinka ke kya kuba’mba Paulo byo afunjiletu bukine bwaamba pe Yesu mu kufikizha kyaswa muchima wa Lesa, waubilepo kimo. Wabatizhiwe kwa kubula kukankazhama.—Tangai Byubilo 22:12-16.

11. (a) Ñanyi kintu kitundaika bafunda Baibolo lelo jino kubatizhiwa? (b) Tumvwa byepi inge twamona bakatataka bepana ne kubatizhiwa?

¹¹ Byo byo kiji ne ku bafunda Baibolo lelo jino, bakulumpe nangwa banyike. Bonse baji na lwitabilo kabiji banemeka bukine bwa mu Baibolo bafuukulapo kwipana ne kubatizhiwa. Jashi ja lubatizhilo ke lubaji lwanema bingi pa kubuñana ne pa kushonkena. Bakamonyi ba kwa Yehoba basekela bingi inge muntu ufunda Baibolo waswa bukine kabiji wakomenako kufika ku lubatizhilo. Nanchi bansemi bena Kilishitu kechi basekela inge baana babo baikala pa babena kuya na kubatizhiwa nenyi? Mu mwaka wa mwingilo wa 2017, bantu 284,000 “bajinga na michima ya bukishinka” bamwesheshe kwipana kwabo kwi Yehoba kupichila mu kubatizhiwa mu mema. (Byu. 13:48) Kine, bano baana ba bwanga bayukile kuba’mba lubatizhilo ke kintu kikebewa ku bena Kilishitu. Pano ñanyi bintu byo baubile pa kuba’mba bafikilemo kubatizhiwa?

12. Ñanyi bintu byafwainwa kuba ufunda Baibolo saka akyangye kubatizhiwa?

¹² Muntu ufunda Baibolo saka akyangye kubatizhiwa, patanshi wafwainwa kwikala na lwitabilo lwaimena pa maana alumbuluka a kuyuka Lesa, kyaswa muchima wanji ne lunengezho lo a bikako lwa kupulukilamo. (1 Timo. 2:3-6) Luno lwitabilo lo lulengela muntu ufunda Baibolo kuleka byubilo bifichisha Lesa ku muchima ne kutendeka kulondela malamuna aoloka a Yehoba. (Byu. 3:19) Mambo kishinka ke kya kuba’mba muntu kechi wakonsha kwipana kwi Lesa na muchima yense inge kya kuba uji na byubilo bikamulengela kubula kuswana Bufumu ne. (1 Ko. 6:9, 10) Bino muntu ukeba kwipana kechi wafwainwa kupelelatu pa kukookela malamuna a Yehoba ne. Muntu ukebesha bololoke wafwainwa kupwilanga kimye kyonse ne kwingila mwingilo wa kusapwila ne kufunjisha bantu kwikala baana ba bwanga. Yesu waambile’mba baana banji ba bwanga ba kishinka bo bakengilanga uno mwingilo. (Byu. 1:8) Umvwe muntu ke obe bino byonse popo afwainwa kwipana kwi Yehoba mu mulombelo apa bino wamwesha patoka kuno kwipana kwanji kupichila mu kubatizhiwa pa meso a bantu bavula.

13. Mambo ka bafunjishi ba Mambo a Lesa o bafwainwa kuvulukilanga’mba lubatizhilo ke kintu kikebewa ku bena Kilishitu?

¹³ Byo tubena kukwasha baana betu ne bantu bakwabo bafunda Baibolo kufikizha bikebewa pa kwikala mwana wa bwanga, twafwainwa kuvulukanga’mba baana ba bwanga ba kine bafwainwa kubatizhiwa. Umvwe saka tuvuluka kino, tukakwasha bulongo bantu bo tufunjisha Baibolo. Kechi tukachinuzhuka kwamba pa buneme bwa kwipana ne kubatizhiwa ne. Kya kine, tukeba baana betu ne bantu bakwabo bo tufunjisha Baibolo kukoma kufika ku lubatizhilo.

14. Mambo ka o twafwainwa kubujila kukanjikizha muntu kubatizhiwa?

¹⁴ Pano bino, kafwako muntu wafwainwa kumvwa nobe babena kumukanjikizha kubatizhiwa ku bansemi banji, ku muntu umufunjisha Baibolo nangwa muntu mukwabo mu kipwilo ne. Abino kechi byo bisaka Yehoba ne. (1 Yoa. 4:8) Bino pa kufunjisha bantu, twafwainwa kwibalumbulwila buneme bwa kwikala na bulunda bwakosa na Lesa. Ufunda Baibolo inge wayuka buneme bwa bukine ne kukebesha kusenda kikonkoji  kya kwikala mwana wa bwanga wa Kilishitu, popo akafuukulapo kubatizhiwa.—2 Ko. 5:14, 15.

15, 16. (a) Nanchi kujipo myaka yatongolwa yafwainwa kwikala na muntu pa kuba’mba abatizhiwe nyi? Lumbululai. (b) Mambo ka muntu ufunda Baibolo o afwainwa kubatizhiwa pa kuba’mba ekale Kamonyi wa Yehoba nangwa kya kuba wabatizhiwe kala mu bupopweshi bukwabo?

¹⁵ Kechi kujipo myaka yo batongola yafwainwa kwikala na muntu pa kuba’mba abatizhiwe ne. Bamo bafunda Baibolo bakwatakanya bintu bukiji ne kukomenako, pakuba bakwabo ne. Bavula babatizhiwa saka bakijitu banyike, kabiji batwajijila kwikala ba kishinka kwi Yehoba. Bino bamo bayuka buneme bwa lubatizhilo inge bafunda bukine bwa mu Baibolo saka bakoma, kabiji bamo bepana saka baji na myaka kukila pa 100.

¹⁶ Mukulumpe umo wafundanga Baibolo waipwizhe mufunjishi wanji inge kyayijilemo kuba’mba abatizhiwe jibiji, mambo wabatizhiwe kala kimye kyo ajinga mu bupopweshi bukwabo. Mufunjishi wanji wapitulukilemo nanji mu binembelo bya mu Baibolo. Uno mukulumpe waumvwishishe bikebewa bya mu Binembelo kabiji wabatizhiwe. Nangwa kya kuba uno nyenga wajinga na myaka kukila pa 70, kechi walangulukangapo bya kuba’mba wafwainwa kubatizhiwa ne. Kya kine, lubatizhilo lwaimena pa kuyukisha kyaswa muchima wa Yehoba. Onkao mambo, bantu bafunda Baibolo bafwainwa kubatizhiwa jikwabo nangwa kya kuba babatizhiwe kala mu bupopweshi bukwabo.—Tangai Byubilo 19:3-5.

17. Ñanyi bintu byafwainwa kulangulukapo muntu pa juba ja kubatizhiwa?

¹⁷ Juba ja lubatizhilo ke juba ja lusekelo. Kabiji ke kimye kya kulangulukapo bulongo pa bintu byavwangwamo mu kwipana ne kubatizhiwa. Kikebewa kwibikako kutwajijila kufikizha byonse bikebewa ku mwina Kilishitu wipana. O ene mambo Yesu o asakenyejile kwikala mwina Kilishitu ku kusenda kikonkoji. Baana ba bwanga ba kwa Yesu kechi bafwainwa “kwikelanga mwayila bikeba michima yabo [ne], kana kwikela mwayila bikeba yewa wibafwijile kabiji ye basangwile.”—2 Ko. 5:15; Mat. 16:24.

18. Ñanyi mepuzho o tukesambapo mu mutwe walondelapo?

¹⁸ Baina Maria balangulukilenga pa bino bintu kimye kyo beipwizhenga mepuzho aji ku ntendekelo ya uno mutwe. Umvwe mwi bansemi, kampe ne anweba mwakiipuzhapo kala’mba: ‘Nanchi mwanami kine wafikilamo kubatizhiwa nyi? Abya wafunda byavula pa kuba’mba afuukulepo kwipana nyi? Nanchi mwanami wafwainwa kukifunda sukulu ne kutwela nkito apa bino akabatizhiwe nyi? Kikekala byepi inge mwanami walenga mambo akatampe saka abatizhiwa kala?’ Mu mutwe walondelapo, tukesamba pa ano mepuzho ne bansemi bena Kilishitu byo bakonsha kwikala na ndangulukilo yawama pa lubatizhilo.