1. Ñanyi bintu byaelele Adama ne Evwa, kabiji ki ka kyafumamo?

ÑANYI ye mulanguluka’mba ye wafwainwa kubikako mizhilo ya kyawama ne kyatama? Adama ne Evwa byo bajile kipangwa ku kichi kya kuyuka byawama ne byatama, bamwesheshe patoka’mba kechi baketekejile mwi Yehoba ne mizhilo yanji ne. Bafuukwilepo kwilengela mizhilo abo bene ya kuyuka byawama ne byatama. (Nte. 3:22) Pano akilangulukai pa bintu byo baelele. Baelele bulunda bwabo ne Yehoba. Baelele ne bumi bwa myaka ne myaka, kabiji baana babo baswaine bundengamambo ne lufu. (Loma 5:12) Bintu byafuukwilepo Adama ne Evwa byaletele makatazho.

2-3. (a) Ntungu mwina Etiopya waubile byepi byo bamusapwijile kwi Filipa? (b) Ñanyi mapesho o twikala nao inge twabatizhiwa, kabiji ñanyi mepuzho o tusakukumbula?

² Monai lupusano luji pa byafuukwilepo Adama ne Evwa ne byaubile ntungu mwina Etiopya byo bamusapwijile kwi Filipa. Uno ntungu wasanchile bingi pa bintu byamubijile Yehoba ne Yesu kya kuba wafuukwilepo kubatizhiwa ponkapotu. (Byu. 8:34-38) Inge twipana kwi Lesa ne kubatizhiwa byonka byaubile yewa ntungu, tumwesha’mba tusanchila Yehoba ne Yesu pa byo betubila. Tumwesha ne kuba’mba twaketekela Yehoba kabiji twayuka’mba ye wafwainwa kubikako mizhilo ya byawama ne byatama.

³ Akilangulukai pa mapesho o twikala nao inge ketwingijile Yehoba. Mapesho amo ke a kuba’mba Yehoba uketupa bintu byonse byaelele Adama ne Evwa, kubikapotu ne luketekelo lwa kwikala na bumi bwa myaka ne myaka. Na mambo lwitabilo lwetu  mwi Yesu Kilishitu, Yehoba witulekelako mambo etu kabiji twikala na jiwi ja mu muchima jatooka. (Mat. 20:28; Byu. 10:43) Kabiji twikala lubaji lwa kisemi kya bakalume ba Yehoba bo akobila byawama kulutwe. (Yoa. 10:14-16; Loma 8:20, 21) Nangwa kya kuba kuji ano mapesho o twaambapo, bamo bafunda pe Yehoba bakankazhama kulondela byaubile ntungu mwina Etiopya. Ñanyi bintu bibalengela kukankazhama kubatizhiwa? Pano bakonsha kushinda byepi bino bintu?

4-5. Ñanyi makatazho apichilemo nsongwalume aye Avery ne nsongwakazhi aye Hannah?

⁴ Kwizhinauka. Bansemi ba kwa Avery Bakamonyi ba kwa Yehoba. Bashanji bayukanyikwa’mba balama bulongo kisemi kyabo kabiji bengila bingi bulongo mwingilo wa bukulumpe mu kipwilo. Nangwa byonkabyo, Avery wakankazhamanga kubatizhiwa. Mambo ka? Waambile’mba: “Nalangulukanga’mba kechi nkakonsha kutwajijila kwingila bulongo byonka bingila batata ne.” Kabiji Avery wazhinaukanga’mba kechi ukakonsha kwingila mingilo yo bakonsheshe kumupa kulutwe ne. Waambile’mba: “Nachinanga’mba kechi nakonsha kulomba pa mvula bantu, kwamba jashi, nangwa kutangijila jibumba pa kuya mu mwingilo wa kusapwila ne.”

⁵ Hannah, uji na myaka 18, wizhinaukanga bingi mwine. Bamukomeshe ku bansemi bengijila Yehoba. Nangwa byonkabyo, wazhinaukanga inge ukakonsha kutwajijila kulondela mizhilo ya Yehoba. Mambo ka? Hannah wilengulwile bingi mwine. Bimye bimo waumvwanga bingi kutama ku muchima kya kuba wikozhanga ne kwikozha aye mwine. Waambile’mba: “Kechi nabuujilepo muntu nangwa umo byo naubanga ne, nangwatu bansemi kechi nebabuujilepo ne, kabiji nalangulukanga’mba Yehoba kechi wakonsha kukeba’mba ngikale kalume wanji ne, na mambo a byo naubanga.”

6. Ñanyi kintu kyalengelanga Vanessa kukankazhama kubatizhiwa?

⁶ Balunda. Vanessa uji na myaka 22, waambile’mba: “Najinga na mulunda wawama mo twakailanga pa myaka 10.” Pano bino, uno mulunda nanji kechi wamutundaikanga kubatizhiwa ne. Kino kyamukolanga Vanessa ku muchima, kabiji waambile’mba: “Kinkatazha bingi kulenga balunda, kabiji naakaminwe kuba’mba inge mpwishe bulunda na uno nsongwakazhi kechi nkekalapo na mulunda mukwabo ne.”

7. Nsongwakazhi wa jizhina ja Makayla wachinanga ka, kabiji mambo ka?

⁷ Kuchina kulenga mambo. Makayla  wajinga na myaka itanu kimye kolojanji wamulume kyo bamupangile mu kipwilo. Byo akomenenga wamwene bansemi byo baikele na bulanda na mambo a byubilo bya uno kolojanji. Makayla waambile’mba: “Kechi nakebanga kubatizhiwa ne, mambo nachinanga’mba inge nkalenge mambo ne amiwa bakampanga mu kipwilo, kabiji nkaletela bansemi bulanda bukatampe.”

8. Nsongwalume wa jizhina ja Miles wachinanga ka?

⁸ Kuchina kwibakanya kwingijila Lesa. Bashanji Miles ne bainanji ba kushinda bengijila Yehoba, pano bino, bainanji bamusema kechi Bakamonyi ne. Miles waambile’mba: “Naikele na bamama pa myaka 18, bino naumvwa bingi moyo kwibabuula’mba mbena kukeba kubatizhiwa. Namwene byo baubile kimye batata kyo bafuukwilepo kwikala Bakamonyi. Naakaminwe namba bakanguba byatama.”

9. Ñanyi kintu kikamweka inge mwayuka’mba Yehoba watekanya kabiji uji na butemwe?

⁹ Adama ne Evwa basajilepo kubula kwingijila Yehoba mambo kechi bamutemenwe na muchima yense ne. Nangwa byonkabyo, Yehoba wibaswishishe kwikala myaka yavula pa kuba’mba baseme baana ne kwifuukwila bene jishinda ja kukomesheshamo baana babo. Byafuminemo mu byafuukwilepo Adama ne Evwa kubula kukookela Yehoba byamwesheshetu kubula maana. Mwanabo mubeji wamulume waipayile nkasanji wamulume kya nshijitu, kabiji mu kuya kwa kimye bukapondo ne bantu kwitemwatu bene byakumbenetu ntanda yonse. (Nte. 4:8; 6:11-13) Nangwa byonkabyo, Yehoba wanengezhezhe jishinda ja kupulushishamo baana ba kwa Adama ne Evwa bonse bakeba kumwingijila. (Yoa. 6:38-40, 57, 58) Inge mwayuka’mba Yehoba watekanya kabiji uji na butemwe, butemwe bo mwamutemwa bukabayilako. Kino kikemulengela kuchinuzhuka jishinda jasajile Adama ne Evwa kabiji mukafuukulapo kwipana kwi Yehoba.

10. Kulanguluka languluka pa kinembelo kya Salamo 19:7 kwakonsha kwimukwasha byepi kwingijila Yehoba?

¹⁰ Twajijilai kufunda pe Yehoba. Inge mwafunda byavula pe Yehoba, mukashiinwa’mba  mwakonsha kumwingijila bulongo. Avery ye twaambapo ku ntendekelo, waambile’mba: “Nalekele kwizhinauka byo natangile ne kulanguluka-languluka pa mulaye utaanwa pa Salamo 19:7.” (Tangai.) Avery byo emwenejile Yehoba byo afikizhe uno mulaye, butemwe bo atemenwe Lesa bwabayijileko. Kutemwa Yehoba kechi kwitulengelatu kushiinwa kuba’mba twakonsha kumwingijila bulongo ne, bino kwitukwasha ne kuchinuzhuka kuba bintu bimufichisha ku muchima kabiji kwitukwasha ne kwikala na kizaku kya kumwingijila. Hannah, ye twaambapo ku ntendekelo waambile’mba: “Kupichila mu kufunda Baibolo pa bunke, nafunjile kuba’mba inge nekozha amiwa mwine ko kuba’mba nakozha ne Yehoba ku muchima.” (1 Pe. 5:7) Hannah watendekele ‘kuba byamba mambo a Lesa.’ (Yako. 1:22) Ñanyi kintu kyafuminemo? Waambile’mba: “Byo namwene bintu byawama bifuma mu kukookela Yehoba, butemwe bo namutemwa bwabayijileko. Luno nashiinwa’mba Yehoba untangijilanga kimye kyonse inge mbena kukeba bukwasho.” Hannah washinjile kyubilo kyanji kya kwikozha mwine. Wipaine kwi Yehoba ne kubatizhiwa.

11. Vanessa waubile byepi pa kuba’mba ekale na balunda bawama, kabiji twakonsha kufunjilako ka?

¹¹ Salainga balunda bawama. Vanessa ye twaambapo ku ntendekelo, wayukile’mba mulunda nanji ye wamulengelanga kubula kwingijila Yehoba bulongo. Kepo afuukwilepo kupwisha bulunda bwabo. Kino kechi kyo kyonka Vanessa kyo kyaubile ne. Wibikileko bingi kukeba balunda bawama mu kipwilo. Waambile’mba byaubile Nowa ne kisemi kyanji byamukwashishe bingi. Waambile’mba: “Bajinga mu ntanda mwajinga bantu babujile kutemwa Yehoba, pano bino, baumvwañananga mu kisemi kyabo.” Vanessa byo abatizhiwe, watendekele bupainiya. Byo aikele painiya, waambile’mba: “Uno mwingilo wandengela kwikala na balunda bawama mu kipwilo kyo njimo ne mu bipwilo bikwabo bya Bakamonyi.” Ne anweba mwakonsha kwikala na balunda bawama inge ke mwingile na mukoyo mwingilo witupa Yehoba.—Mat. 24:14.

12. Moyo wa mutundu ka wabujile Adama ne Evwa, kabiji ñanyi kintu kyafuminemo?

¹² Ikalai na moyo wawama. Moyo umo wawama bingi kwikala nanji. Twafwainwa kwikala na moyo wa kuchina kufichisha Yehoba ku  muchima. (Sala. 111:10) Inge Adama ne Evwa bajinga na uno moyo, inge kechi basatukijile Yehoba ne. Pano bino basatukile. Byo baubile bino meso abo alabile mu jishinda ja kuba’mba bayukile’mba bajinga bandengamambo. Baana babo baswaine bundengamambo ne lufu. Na mambo a kuba’mba bayukile’mba balala muzhilo wa Lesa baumvwine bumvu pa kumona’mba bajitu mulekese kabiji balukile mabula ne kwinyinga.—Nte. 3:7, 21

13-14. (a) Kwesakana na byaamba kinembelo kya 1 Petelo 3:21, mambo ka o twafwainwa kubujila kuchina lufu? (b)Ñanyi bishinka bitulengela kutemwa Yehoba?

¹³ Twafwainwa kwikala na moyo wa kuchina kufichisha Yehoba ku muchima, pano bino, kechi twafwainwa kuchina lufu ne. Yehoba witunengezhezha jishinda ja kutambwilamo bumi bwa myaka ne myaka. Inge twalenga mambo ne kulapila kya kine, Yehoba uketulekelako mambo. Uketulekelako mambo inge twaikala na lwitabilo mu kitapisho kya bukuzhi bwa Mwananji. Jishinda jimo ja kumwesheshamo amba tuji na lwitabilo ke kupichila mu kwipana kwi Lesa ne kubatizhiwa.—Tangai 1 Petelo 3:21.

¹⁴ Tuji na bishinka byavula bingi byafwainwa kwitulengela kutemwa Yehoba. Witupa bintu byawama byo twiyowa pa juba pa juba kabiji witufunjisha ne bukine pe aye mwine ne kyaswa muchima wanji. (Yoa. 8:31, 32) Witupa kipwilo kuba’mba kitutangijilenga ne kwitutundaika. Witukwasha kuchinchika makatazho luno, kabiji witupa luketekelo lwa kwikala na bumi bwa myaka ne myaka kulutwe. (Sala. 68:19 Lum. 21:3, 4) Inge twalanguluka pa bintu bitubila Yehoba tushiinwa’mba witutemwa, kabiji bitulengela ne atweba kumutemwa. Kabiji inge twamutemwa Yehoba tukekala na moyo wawama. Kechi tukeba kufichisha ku muchima muntu ye twatemwa ne.

15. Makayla washinjile byepi moyo wa kuchina kulenga mambo?

¹⁵ Makayla ye twaambapo ku ntendekelo washinjile moyo wa kuchina kulenga mambo byo afunjile kuba’mba Yehoba ulekela mambo. Waambile’mba: “Nafunjile’mba bonse twibambulwa kulumbuluka kabiji tulubankanya. Bino nafunjile kuba’mba Yehoba witutemwa kabiji witulekelako mambo kupichila mu bukuzhi.” Kutemwa Yehoba kwamulengejile kwipana kwi aye ne kubatizhiwa.

16. Ñanyi kintu kya kwashishe Miles kushinda moyo wa kuchina kubatizhiwa?

¹⁶ Miles wachiinenga amba bainanji kechi bakamuswisha kubatizhiwa ne, walombele bukwasho ku kalama wa mwanzo. Miles waambile’mba: “Uno kalama wa mwanzo naye wakomejile mu kisemi kyo baabenejilemo bupopweshi. Wankwashishe kuyuka bya kwamba ku bamama kuba’mba amiwa mwine yami nafuukwilepo kubatizhiwa kechi batata ne.” Bainanji Miles kechi batemenwe pa byo afuukwilepo ne. Mu kuya kwa kimye wafuminepo pa nzubo, bino kechi walekele kuba byo afuukwilepo ne. Waambile’mba: “Natundaikilwe bingi byo nafunjile pa bintu byawama byangubila Yehoba. Byo nalangulukishepo pa kitapisho  kya bukuzhi bwa kwa Yesu, nafunjile kuba’mba Yehoba wantemwa bingi. Kino kyantundaikile kwipana kwi Yehoba ne kubatizhiwa.”

17. Atweba bonse twafwainwa kumwesha ka?

¹⁷ Evwa byo ajiile kipangwa kya ku kichi kyo bebakainye kujako mu Edena, wakaine kukookela Shanji wa mwiulu. Adama naye byo ajiile kipangwa wamwesheshe’mba kechi wasanchijile Yehoba pa bintu byawama byo amubijile ne. Atweba bonse twafwainwa kumwesha’mba kechi tuji nobe Adama ne Evwa ne. Tusanchila Yehoba pa byonse byo etubila. Inge twabatizhiwa, tumwesha Yehoba kuba’mba ye yenka uji na luusa lwa kubikako mizhilo ya kwitukwasha kuyuka kyawama ne kyatama. Kabiji tumwesha’mba twatemwa Shetu wa mwiulu ne kumuketekela.

18. Mwakonsha kuba byepi pa kuba’mba mwingijilenga Yehoba bulongo?

¹⁸ Kintu kyo twafwainwa kutapo muchima inge twabatizhiwa ke kulondela mizhilo ya Yehoba pa juba pa juba mu bwikalo bwetu bonse. Bakalume ba Lesa bavula byo byo babena kuba. Ne anweba byo byo mwakonsha kwikala inge kya kuba mwatwajijila kufunda Mambo a Lesa, Baibolo; kupwanañana na balongo ne banyenga kimye kyonse; ne kufunjishako bantu bintu byo mwafunda pa Shenu wa butemwe. (Hebe. 10:24, 25) Pa kufuukula bya kuba, umvwinainga lujimuno lupana Yehoba kupichila mu Mambo anji ne jibumba janji. (Isa. 30:21) Inge kemube bino, byonse byo mukobanga mu bwikalo bikalumbuluka.—Maana 16:3, 20.

19. Mwafwainwa kutwajijila kulanguluka pa ñanyi kintu, kabiji mambo ka?

¹⁹ Inge mwatwajijila kulanguluka pa byo mubena kumwenamo mu kulondela lutangijilo lwa Yehoba, butemwe bo mwamutemwa ne mizhilo yanji bukabayilako. Kafwako bintu bileta Satana bikemulengela kuleka kwingijila Yehoba ne. Fwanyikizhai byo mukomvwanga inge papita myaka kiumbi kufuma luno. Mukomvwa bingi bulongo pa kuyuka’mba kubatizhiwa ke kintu kyawama bingi kyo mwafuukwilepo.