1-2. (a) Yehoba wisamba byepi na bantu? (b) Tusakwisamba pa ka mu uno mutwe?

YEHOBA umvwa bingi bulongo kwamba ne atweba. Kala, waingijishanga bangauzhi, bamalaika ne Mwananji aye Kilishitu Yesu kubuula bantu milanguluko yanji. (Amo. 3:7; Nga. 3:19; Lum. 1:1) Lelo jino, wisamba ne atweba kupichila mu Mambo anji, Baibolo. Witupele Baibolo kuba’mba tufundenga milanguluko yanji ne kuyuka mashinda anji.

² Kimye Yesu kyo ajinga pano pa ntanda, Yehoba waambile kufuma mwiulu pa bimye bisatu. Twayai twisambe pa byambo byaambile Yehoba, bintu byo twakonsha kufunjilako, ne byo twakonsha kumwenamo mu byo aambile.

3. Kwesakana na byaamba Mako 1:9-11, Yehoba waambile’mba ka kimye Yesu kyo abatizhiwe, kabiji byambo byanji bisolola ñanyi bishinka byanema?

³ Pa Mako 1:9-11 po panembwa kimye kitanshi Yehoba kyo aambile kufuma mwiulu. (Tangai.) Waambile’mba: “Obewa wi Mwanami ye natemwa; mo mmwena lusekelo.” Kyamweka Yesu waumvwine bingi bulongo pa kumvwa Shanji byo aambile kulumbulula byo amutemwa ne kumuketekela. Byambo bya Yehoba byasolwele bishinka bisatu byanema pe Yesu. Kitanshi, Yesu ke Mwananji. Kya bubiji, Yehoba watemwa Mwananji. Ne kya busatu, Yehoba umwena lusekelo mu Mwananji. Twayai tufunde byavula pa bino bishinka.

4. Ñanyi bulunda Lesa ne Yesu bo balengele kimye kyabatizhiwe Yesu?

⁴ “Obewa wi Mwanami.” Bino byambo bimwesha kuba’mba Yehoba ne Mwananji ye atemwa aye Yesu balengele bulunda  bwa katataka. Yesu byo ajinga mwiulu, wajinga mwana Lesa. Pano bino, kimye kyo abatizhiwe, waikele mwana Lesa mu jishinda jikwabo. Pa kyo kya kimye Lesa wamwesheshe’mba Yesu wajinga Mwananji washingwa kabiji waikele na luketekelo lwa kubwela mwiulu na kwikala Mfumu kabiji Ñanga Mwine Mukatampe. (Luka 1:31-33; Hebe. 1:8, 9; 2:17) O ene mambo Shanji o aambijile pa lubatizhilo lwanji amba: “Obewa wi Mwanami.”—Luka 3:22.

5. Twakonsha kulondela byepi Yehoba mu kumwesha butemwe ne kutundaika bakwetu?

⁵ “Obewa . . . ye natemwa.” Yehoba byo amwesheshe byo atemwa Mwananji ne kumuketekela kituvululamo kuba’mba twafwainwa kutundaikanga bakwetu. (Yoa. 5:20) Twingila bingi bulongo inge muntu ye twanemeka witumwesha byo etutemwa ne kwitutakaika. Balongo ne banyenga mu kipwilo ne ba mu kisemi kyetu nabo bakeba kwibatemwa ne kwibatundaika. Inge twatakaika bakwetu, tukosesha lwitabilo lwabo kabiji twibakwasha kwingijila Yehoba mu bukishinka. Kikatakata bansemi bafwainwa kutundaikanga baana babo. Inge bansemi batakaika baana babo ne kwibamwesha butemwe, bakebakwasha kwingijila Lesa bulongo.

6. Mambo ka o twafwainwa kuketekela Yesu Kilishitu?

⁶ “Mo mmwena lusekelo.” Abino byambo bimwesha’mba Yehoba waketekejile kuba’mba Yesu ukoba kyaswa muchima wa Shanji. Yehoba waketekela bingi Mwananji, onkao mambo, ne atweba twafwainwa kuketekela’mba Yesu ukafikizha milaye yonse ya Yehoba. (2 Ko. 1:20) Inge twalanguluka pe Yesu, tukebesha kufunjilako byavula kwi aye ne kulondela mu ngayo yanji. Yehoba wituketekela ne atweba bakalume banji kuba’mba  tukatwajijila kufunjilako byavula ku Mwananji.—1 Pe. 2:21.

7. Kwesakana na byaamba Mateo 17:1-5, ñanyi kimye Yehoba kyo aambile kufuma mwiulu, kabiji waambile’mba ka?

⁷ Tangai Mateo 17:1-5. Kimye kya bubiji Yehoba kyo aambile kufuma mwiulu kyajinga kimye Yesu kyo ‘aalukile.’ Yesu wasendele Petelo, Yakoba ne Yoano ne kuya nabo kwa bunke ku mutumba walepa. Byo bajinga ku mutumba, bamwene kya kukumya. Kilungi kyanji kyasamine nobe juba ne bivwalo byanji byatokeletu too nobe kyeya. Bantu babiji baimenejilengako Mosesa ne Elaija bamwekele kabiji batendekele kwisamba ne Yesu pa lufu lwanji ne lusanguko. Nangwa kya kuba batumwa basatu “bakunukilenga,” bamwene kimwesho kya kukumya byo babuukile. (Luka 9:29-32) Kyalondejilepo, jikumbi jatokatu too jibavwetele, kabiji baumvwine jiwi jafumine mu jikumbi. Jino jajinga jiwi ja Lesa. Byonka byaubile Yehoba kimye kyabatizhiwe Yesu, ne pa kikye kimye napo wamwesheshe byo amwenanga lusekelo mu Mwananji ne byo amutemenwe, kupichila mu kwamba’mba: “Uno ye Mwanami ye natemwa, mo mmwena lusekelo.” Bino pa kikye kimye Yehoba wanungilepo’mba: “Mumvwinai.”

8. Kimwesho kya kwaluka kyakwashishe byepi Yesu ne baana ba bwanga?

⁸ Kino kimwesho kyamwesheshe lukumo lukekala ne Yesu ne bulume bo akekala nabo byo akekala Mfumu wa Bufumu bwa Lesa. Kwa kubula ne kuzhinaukatu ne, Kilishitu watundaikilwe bingi kabiji kyamukwashishe kuchinchika lumanamo kufika ne ku lufu. Kino kimwesho kyakoseshe ne lwitabilo lwa baana ba bwanga, kabiji kibakwashishe kwinengezha kwingila mwingilo mukatampe wajinga kulutwe ne kuchinchika meseko. Byo papichile myaka nobe 30, mutumwa Petelo waambilepo pa kino kimwesho, kumwesha kuba’mba kechi wikilubilemo ne.—2 Pe. 1:16-18.

9. Ñanyi bintu byanema Yesu byo afunjishe baana banji ba bwanga?

⁹ “Mumvwinai.” Yehoba wamwesheshe patoka kuba’mba ukeba atweba kumvwina byambo bya Mwananji ne kwibikookela. Ñanyi byambo byaambile Yesu byo ajinga pano pa ntanda? Waambile bintu byavula bingi byanema byo twafwainwa kumvwinanga. Wafunjishe baana banji ba bwanga bya kusapwila mambo awama, kabiji wabwezhezhe bwezhezhepo kwibavululamo kwikala balaba. (Mat. 24:42; 28:19, 20) Kabiji wibatundaikile kwibikishako ne kubula kuleka kwingila mwingilo wa Lesa. (Luka 13:24) Yesu watundaikile bingi baana banji ba bwanga kwitemwa bene na bene, kukwatankana, ne kulama mikambizho yanji. (Yoa. 15:10, 12, 13) Abino bintu Yesu byo afunjishe baana banji ba bwanga byawamine bingi. Abino byambo byanema bingi ne mu ano moba byonkatu byo byanemene kimye Yesu kyo ebyambile.

10-11. Twakonsha kumwesha byepi kuba’mba tumvwina Yesu?

¹⁰ Yesu waambile’mba: “Yense watemwa bukine umvwa jiwi jami.” (Yoa. 18:37) Tumwesha’mba tumvwina jiwi janji inge ‘twitekenya atwe bene na bene ne kwilekelako mambo.’ (Kolo. 3:13; Luka 17:3, 4) Kabiji tumwesha’mba tubena kumvwina jiwi janji inge ketusapwile na mukoyo mambo awama “mu bimye byawama ne byakatazha.”—2 Timo. 4:2.

¹¹ Yesu waambile’mba: “Mikooko yami yumvwa jiwi jami.” (Yoa. 10:27) Baana ba bwanga ba kwa Kilishitu bamwesha’mba bomvwina jiwi ja kwa Yesu kupichila mu kumvwa  byambo byanji ne kwibingijisha. Kechi balabikwa na “bijikila bya mu buno bwikalo” ne. (Luka 21:34) Pano bino, banemeka bingi kukookela mikambizho ya kwa Yesu nangwatu inge bintu byakatazha. Balongo betu bavula babena kuchinchika makatazho akatampe, nabiji, kwibalukuka ku balwanyi, buyanji bukatampe ne bya malwa biponakotu bine. Bino batwajijila kwikala ba kishinka kwi Yehoba nangwa makatazho abayepotu byepi. Yesu wibalaya’mba: “Yense umvwa mikambizho yami ne kwiilama, ye wantemwa. Kabiji yense wantemwa bakamutemwa kwi Batata.”—Yoa. 14:21.

12. Ñanyi jishinda jikwabo jo twakonsha kumwesheshamo’mba tumvwina Yesu?

¹² Kukookela bo atongola kwitutangijila jo jishinda jikwabo jo tumwesheshamo’mba tumvwina jiwi ja kwa Yesu. (Hebe. 13:7, 17) Jibumba ja Lesa japimpulako bintu byavula, nabiji bingijisho byo twingijisha pa kusapwila, mashinda a kwingijisha mu mwingilo, kupwila kwa mukachi ka mulungu, kushimika ne kuwamisha Mazubo a Bufumu. Tusanta bingi pa luno lupimpu lonse ne lutangijilo lwawama. Twafwainwa kushiinwa’mba Yehoba uketupesha inge ketwibikeko kulondela mikambizho ibena kwitupa jibumba janji pa kimye kyafwainwa.

13. Ñanyi bintu byawama bifumamo inge ketumvwine Yesu?

¹³ Tumwenamo bingi inge ketumvwine byonse byafunjishe Yesu. Yesu walayile baana banji ba bwanga amba mafunjisho anji akebakokolosha. Waambile’mba: “Anweba mukakokoloka. Mambo kikonkoji kyami kyapeela, ne kipe kyami kyapeela.” (Mat. 11:28-30) Byambo bya Lesa, kubikapo ne mabuku ana a Mambo Awama aamba pa bwikalo ne mwingilo wa kwa Yesu, etukokolosha, akosesha lwitabilo lwetu kabiji etulengela kwikala ba maana. (Sala. 19:7; 23:3) Yesu waambile’mba: “Batokwa ke boba bomvwa mambo a Lesa ne kwialama!”—Luka 11:28.

14-15. (a) Ñanyi kimye kya busatu kyanembwa pa Yoano 12:27, 28, Yehoba po aambile kufuma mwiulu? (b) Mambo ka byambo bya kwa Yehoba o byatekeneshe ne kukosesha Yesu?

¹⁴ Tangai Yoano 12:27, 28. Mambo Awama anembele Yoano amwesha kimye kya busatu Yehoba kyo aambile kufuma mwiulu. Byo kwashajile moba acheche kumwipaya, Yesu wayile ku Yelusalema na kutanwa ku Kijiilo  kya Lupitailo kyapeleleko. Waambile’mba: “Muchima wami wankatazha bingi.” Kabiji walombele’mba: “Tata tumbijikai jizhina jenu.” Kepo Shanji aambile kufuma mwiulu amba: “Amiwa ne jitumbijika kabiji nkejitumbijika jibiji.”

¹⁵ Muchima wamukatezhe bingi Yesu mambo wafwainwe kutwajijila kwikala wa kishinka kwi Yehoba. Yesu wayukile’mba usakumanama bingi ne kufwa lufu lwatama. (Mat. 26:38) Kintu kyanemene bingi kwi Yesu ke kutumbijika jizhina ja Shanji. Yesu bamupelemo mambo a kuba mwenga Lesa, kabiji waakaminwe’mba lufu lwanji lusakuleta myendeleko pe Lesa. Bino byambo byaambile Yehoba byatundaikile bingi Yesu. Waketekejile’mba jizhina ja Yehoba jikatumbijikwa. Byambo byaambile Shanji byamutundaikile ne kumukosesha kuchinchika lumanamo lo apichilemo. Nangwa kya kuba Yesu ye yenka waumvwine byambo byaambile Shanji pa kyo kya kimye, bino Yehoba watangijile banembi ba Baibolo kunemba byambo byanji kuba’mba bonse tufunjileko.—Yoa. 12:29, 30.

16. Mambo ka kimye kimo o kyakonsha kwitwikela ku muchima pa mwenga waleta bantu pa jizhina ja Lesa?

¹⁶ Byonka byaubile Yesu, ne atweba kyakonsha kwitwikala ku muchima pa mambo a myendeleko bantu yo baleta pa jizhina ja Yehoba. Kampe ne atweba betuba shinji byonka byo baubile Yesu. Nangwa kampe kitukola ku muchima pa kumvwa balwanyi betu byo betubepela bubela. Twakonsha kulanguluka  pa bubela bo betubepela byo bwakonsha kuleta mwenga pa jizhina ja Yehoba ne pa jibumba janji. Pa bimye bya uno mutundu, byambo bya Yehoba bitutekenesha bingi. Kechi twafwainwa kukizhamo kwikala na bijikila ne. Twafwainwa kuketekala’mba “mutende wa Lesa wakila milanguluko ya bantu ukalama michima ne milanguluko [yetu] kupichila mwi Kilishitu Yesu.” (Fili. 4:6, 7) Yehoba kechi ukakankalwa kutumbijika jizhina janji ne. Ukengijisha Bufumu kupwisha makatazho onse Satana ne ntanda yanji o yaleta pa bakalume ba Lesa.—Sala. 94:22, 23; Isa. 65:17.

17. Kwesakana na byaamba Isaya 30:21, Yehoba wamba byepi ne atweba lelo jino?

¹⁷ Yehoba watwajijila kwamba ne atweba lelo jino. (Tangai Isaya 30:21.) Pano bino, kechi tumvwa Lesa na kwamba kufuma mwiulu ne. Nangwa byonkabyo, witupa Mambo anji, Baibolo, muji mikambizho yanji. Kabiji mupashi wa Yehoba utangijila “kalama wa kishinka” kupana kajo ku bakalume ba Lesa. (Luka 12:42) Tutambula kajo ka ku mupashi kavula bingi kupichila mu mabuku o bapulinta, mabuku aji pa intaneti, mavidyo ne byo batangila jimo.

18. Byambo bya Yehoba bikosesha byepi lwitabilo lwenu ne kwimukwasha kuchinchika?

¹⁸ Twayai tuvulukenga byambo byaambile Yehoba ku Mwananji kimye kyo ajinga pano pa ntanda. Byambo bya Lesa byanembwa mu Baibolo, bitulengela kushiinwa’mba kafwako kintu Yehoba kyo akankalwa kuba ne, kabiji ukafumyapo makatazho onse etuletela Satana ne ntanda yanji yatama. Kabiji twayai tutwajijile kumvwina jiwi ja Yehoba. Umvwe ketube bino, tukakonsha kuchinchika makatazho onse o tupitamo luno ne akeya kulutwe. Baibolo wituvululamo amba: “Kimufwainwa anweba kuchinchika kuba’mba umvwe mwapwisha kuba kyaswa muchima wa Lesa, mukatambule akya kyalaiwe.”—Hebe. 10:36.