Bena Levi bamo babujile bañanga baingilanga mingilo ikwabo, nabiji kwingila nobe bakapokola. Bebatangijilanga ku kapitao wa pa nzubo ya Lesa. Nnembi Muyudea aye Philo walumbulula mwingilo waingilanga bano bakapokola amba: “[Bena Levi] bamo balamanga bibelo patwelelanga bantu mu kipango kya nzubo ya Lesa. Bakwabo basopanga kibelo kya mwazhijisha na kumona kuba’mba kafwako muntu ye babujile kuswisha wafwainwe kutwelamo kya mapuso nangwa kya kwifuukwilatu aye mwine amba atwelemo ne. Bakwabo bazhokolokanga nzubo ya Lesa saka bepimpula mute ne bufuku na kusopa.”

Kije kya Saniedilini kyatumanga bano bakapokola kuya na kuba bintu bimo. Bano bakapokola bo bonka Bayudea bo baswishishe ku kafulumende wa bena Loma kusenda bilwilo.

Shayuka aye Joachim Jeremias waambile’mba: ‘Byambo byamyendeleko byaambile Yesu kimye kyo bamukwachile bya kuba’mba, pa juba pa juba watanwanga mu nzubo ya Lesa na kufunjisha, bino kechi baishile na kumukwata ne (Mat. 26:55), bimwesha kuba’mba bakapokola baingijilanga pa nzubo ya Lesa bo bamukwachile.’ Uno yenka shayuka ulanguluka’mba aba bo batumine kuya na kukwata Yesu pa bimye bya kunyuma, bajinga bakapokola. (Yoa. 7:32, 45, 46) Kulutwe, bano bonka bakapokola ne kapitao wabo bebatumine kuya na kuleta baana ba bwanga ba kwa Yesu ku kije kya Saniedilini, kabiji kyamweka bo bakulumwine ne mutumwa Paulo kumufumya mu nzubo ya Lesa.—Byu. 4:1-3; 5:17-27; 21:27-30.