1. Kinembelo kya Musapwishi 3:1, 7 kitufunjishapo ka?

ATWEBA bamo twalokota bingi. Bakwabo kechi bakeba kwamba-amba ne. Byonkatu byaamba kinembelo paimena uno mutwe, kuji kimye kya kwamba ne kimye kya kuzhindama. (Tangai Musapwishi 3:1, 7.) Pano bino, bimye bimo twakonsha kukeba’mba balongo ne banyenga bamo balokotenga. Kabiji twakonsha kukeba bakwabo kuba’mba bakepesheko kwamba.

2. Ñanyi uji na luusa lwa kubikako mizhilo ya kwitukwasha kuyuka kimye kya kwamba ne jishinda ja kwambilamo?

² Kwamba ke kya bupe kitupa Yehoba. (Lupu. 4:10, 11; Lum. 4:11) Mu Mambo anji, Lesa witukwasha kuyuka bya kwingijisha bulongo kino kya bupe. Mu uno mutwe, tusakwisamba pa bantu banembwa mu Baibolo basakwitukwasha kuyuka kimye kya kwamba ne kimye kya kuzhindama. Kabiji tusakumona ne Yehoba byo omvwa pa byambo byo twambila bakwetu. Patanshi, twayai twisambe pa kimye kyo twafwainwa kwamba.

3. Kwesakana na byaamba Loma 10:14, ñanyi kimye kyo twafwainwa kwamba?

³ Kimye kyonse twafwainwa kwinengezha kwamba pe Yehoba ne pa Bufumu. (Mat. 24:14; tangai Loma 10:14.) Inge ke tube bino, ko kuba’mba tubena kulondela Yesu. Kishinka kimo kyalengejile Yesu kwiya pano pa ntanda ke kufunjisha bantu bukine pe Shanji. (Yoa. 18:37) Bino twafwainwa kuvulukanga’mba jishinda jo twambilamo najo janema. Onkao mambo, pa kwisamba na bantu pe Yehoba, twafwainwa kwamba “na kukooka muchima ne na mushingi mukatampe,” kabiji twafwainwa kumwesha’mba twanemeka milanguluko ya muntu ye tubena kwisamba nanji ne byo aitabilamo. (1 Pe. 3:15) Onkao mambo, kechi tukesambangatu na muntu ne, bino twafwainwa kumufunjisha ne kumufika pa muchima.

4. Kwesakana na byaamba Byambo bya Maana 9:9, byambo byetu byakonsha kukwasha byepi bakwetu?

 ⁴ Bakulumpe mu kipwilo kechi bafwainwa kukankazhama kwamba inge mulongo nangwa nyenga ubena kukebewa lujimuno ne. Pano bino, bafwainwa kusala kimye kyawama kwamba pa kuba’mba babule kulengesha bumvu yewo mulongo nangwa nyenga. Bafwainwa kupembela bantu bakwabo bafumapo apa bino besamba nanji. Bakulumpe mu kipwilo bafwainwa kwisamba na yeo muntu mu mushingi. Pano bino, kechi bachina kubuulako balongo mafunde a mu Baibolo akonsha kwibakwasha kuba bintu na maana ne. (Tangai Byambo bya Maana 9:9.) Mambo ka o kyanemena kuchinchika ne kwamba pa bintu inge kibena kukebewa? Langulukai pa bantu babiji baubile byapusana bo twakonsha kufunjilako. Umo wajinga mwanamulume wafwainwe kololako baana banji, kabiji mukwabo ke mwanamukazhi wayile na kusolomoka mwanamulume ye batongwele kuba’mba ukaswana pa bufumu.

5. Ñanyi kimye Ñanga Mukatampe aye Eli kyo akankelwe kwamba bino saka ajinga na luusa lwa kwamba?

⁵ Ñanga Mukatampe aye Eli wajinga na baana babiji babalume bo atemenwe bingi. Bino bano baana kechi banemekanga Yehoba ne. Bajinga na mingilo yanema bingi ya buñanga pa tente wa lusambakeno. Bino baingijishanga luusa lwabo mu jishinda jatama, kechi banemekele milambo yapananga bantu kwi Yehoba ne, kabiji baubilenga bupite pa tente wa lusambakeno. (1 Sam. 2:12-17, 22) Kwesakana na byaamba Mizhilo ya Mosesa, baana ba kwa Eli bafwainwe kufwa, bino Eli aye wibajimwinekotu kya na mukose-mukose ne kwibaswisha kutwajijila kwingijila pa tente wa lusambakeno. (Mpitu. 21:18-21) Yehoba wamwene byepi jishinda Eli jo aubijilemo bintu na luno lukatazho? Waambijile Eli amba: “Mambo ka o unemekela baana bobe kukila amiwa?” Kepo Yehoba afuukwilepo kwipaya bano banabalume babiji bangubabibi.—1 Sam. 2:29, 34.

6. Tufunjilako ka ku byaubile Eli?

⁶ Tufunjilako kintu kyanema bingi ku byaubile Eli. Inge twayuka’mba mulunda netu nangwa mulongo wetu walala muzhilo wa Lesa, twafwainwa kwisamba nanji ne kumuvululamo malamuna a Yehoba. Kabiji twafwainwa kumona kuba’mba watambula bukwasho ku bantu bemenako Yehoba. (Yako. 5:14) Kechi twafwainwa kwikala nobe Eli kupichila mu kunemeka mulunda netu nangwa mulongo wetu kukila byo twanemeka Yehoba ne. Kikebewa kuchinchika pa kuba’mba usolomoke muntu ubena kukebewa kumololako, bino inge twauba bino, mufuma byawama. Monai lupusano luji pa byaubile Eli ne byaubile mwanamukazhi mwina Isalela wa jizhina ja Abigaila.

7. Mambo ka Abigaila o ayijile na kwisamba ne Davida?

 ⁷ Abigaila wajinga muka Nabala, mwanamulume wanonkele bingi. Davida ne bantu banji byo banyemenenga Mfumu Saulo, baikeleko pamo na bakafunga ba kwa Nabala ne kuzhikijila matanga a mikooko ya kwa Nabala ku bangivi. Abya Nabala wasanchile pa buno bukwasho nyi? Ine. Davida byo amulombele kuba’mba apepo bantu banji kajo ne mema, Nabala wazhingijile bingi ne kwibanena mwenga. (1 Sam. 25:5-8, 10-12, 14) Na mambo a kino, Davida wafuukwilepo kuya na kwipaya banabalume bonse ba mu nzubo ya kwa Nabala. (1 Sam. 25:13, 22) Pano ano malwa aishilenga bakonsheshe kwiachinuzhuka byepi? Abigaila wamwene kuba’mba akya kyo kyajinga kimye kya kwamba. Onkao mambo, wachinchikile ne kuya na kukinzha banabalume 400 bajinga na nzala ne bukaji ne kwisamba ne Davida.

8. Tufunjilako ka kwi Abigaila?

⁸ Abigaila byo amonañene ne Davida, waambile kwa kubula moyo ne na mushingi, kabiji walengejile Davida kubula kuba kintu kyo akebelenga kuba. Nangwa kya kuba Abigaila kechi ye watamishe ne, bino aye walombele lulekelo lwa mambo kwi Davida. Waambile’mba wayukile kuba’mba Davida wajinga na byubilo byawama kabiji usakuba byawama. Abigaila waketekejile mwi Yehoba kuba’mba usakumukwasha. (1 Sam. 25:24, 26, 28, 33, 34) Byonka byaubile Abigaila, twafwainwa kuchinchika ne kwamba inge twamona mukwetu ubena kuba bintu byakonsha kumulengela kuba kintu kyatama. (Sala. 141:5) Twafwainwa kwamba na mushingi, bino kechi twafwainwa kwikala na moyo ne. Inge twajimunako muntu, tumwesha kuba’mba twi balunda ba kine.—Maana 27:17.

9-10. Bakulumpe mu kipwilo bafwainwa kuvulukanga ñanyi bishinka pa kufundako bakwabo?

⁹ Kyanema bingi bakulumpe mu kipwilo kubula moyo ne kwisamba na ba mu kipwilo babena kuya mu jishinda jatama. (Nga. 6:1) Bakulumpe bepelula ne kuyuka kuba’mba nabo bambulwa kulumbuluka kabiji juba jimo bakakebewanga kwibajimunako. Pano bino, kino kechi kyafwainwa  kulengela bakulumpe mu kipwilo kukankalwa kololako boba babena kukebewa lujimuno ne. (2 Timo. 4:2; Titu. 1:9) Pa kufundako muntu, bakulumpe bengijisha kya bupe kya kwamba pa kuba’mba bafunjishe bulongo ne kutekanya. Butemwe bo bwibalengela kukwasha muntu ubena kuya mungi. (Maana 13:24) Pano bino, kine kintu kyo batapo muchima ke kunemeka Yehoba kupichila mu kutundaika mizhilo yanji yaoloka ne kuzhikijila kipwilo ku bintu byakonsha kuleta makatazho.—Byu. 20:28.

¹⁰ Bishinka byo twafunda bitukwasha kuyuka kimye kyo twafwainwa kwamba. Nangwa byonkabyo, kuji bimye bimo po twafwainwa kubula kwambapo nangwa kyambo kimo ne. Ñanyi makatazho o twakonsha kwikala nao pa bimye bya uno mutundu?

11. Ñanyi kifwanyikizho kyaingijishe Yakoba, kabiji kyakwatankana byepi na kulama lujimi?

¹¹ Kyakonsha kukatazha bingi kwikanya kwamba. Nnembi wa Baibolo aye Yakoba waingijishe kifwanyikizho kyawama bingi kyalumbulula bulongo luno lukatazho. Waambile’mba: “Umvwe muntu kechi wituntula mu byambo ne, ko kuba’mba walumbuluka kabiji wakonsha kulama mubiji wanji yense.” (Yako. 3:2, 3) Kyambo kya kuba’mba “kulama” kyo baingijisha mu kino kyepelo kilumbulula “kukoka ntambo” yo bakasa mbili ku mutwe ne ku kanwa. Muntu wakanjila pa mbili inge wakoka ino ntambo, ko kuba’mba ubena kubuula uno nyama kuya kulutwe nangwa kwimana. Muntu wakanjila pa mbili inge wabula kukwata ino ntambo, wakonsha kukankalwa kutangijila bulongo uno nyama, kabiji mbili wakonsha kwikozha nangwa kukozha muntu wakanjilapo. Kyo kimotu ne lujimi wetu inge twabula kumulama, wakonsha kuleta makatazho avula. Twayai twisambe pa bintu bimo po twakonsha “kukoka ntambo” mu bukifwanyikizho ne kwikanya kwamba.

12. Ñanyi kimye kyo twafwainwa “kukoka ntambo” ya kifwanyikizho ne kwikanya kwamba?

 ¹² Muba byepi inge mulongo nangwa nyenga wayukapo bintu bimo byo ayuka’mba bya bufyamfya? Twambe’mba, mwamonañana na mulongo nangwa nyenga wikala ku kyalo ko bakanya mwingilo wetu, abya mukekala na kilaka kya kukeba kumwipuzha byo bengila mwingilo wa kusapwila mu kyo kyo kyalo nyi? Ibyo ee kuba’mba kwipuzha bino kechi kubena kulumbulula’mba mukeba kuba kyatama ne. Twatemwa balongo betu kabiji tukeba kuyuka bintu byo babena kupitamo. Kabiji tukeba kushinkamika milombelo yetu pa kwibalombelako. Pano bino, kuji kimye kyo twafwainwa “kukoka ntambo” mu bukifwanyikizho ne kwikanya kwamba. Inge twakanjikizha mukwetu kuba’mba asolole bya bufyamfya, ko kuba’mba kechi twatemwa yeo mukwetu ne balongo ne banyenga baketekela yeo muntu kuba’mba kechi ukasolola byo bengila mwingilo wa kusapwila ne. Onkao mambo, kechi twafwainwa kubika balongo ne banyenga mu lukatazho bekala mu byalo mo bakanya mwingilo wetu ne. Kabiji kafwako mulongo nangwa nyenga wingijila mu kyalo mo bakanya mwingilo wetu wafwainwa kusolola Bakamonyi bekala mu kyo kyo kyalo byo bengila mwingilo wa kusapwila nangwa byo bapwila ne.

13. Kwesakana na byaamba Byambo bya Maana 11:13, bakulumpe mu kipwilo bafwainwa kuba byepi, kabiji mambo ka?

¹³ Kikatakata bakulumpe mu kipwilo bafwainwa kulondela jifunde jiji pa Byambo bya Maana 11:13 kupichila mu kalama bya bufyamfya. (Tangai.) Kino kyakonsha kukatazha kikatakata inge mukulumpe mu kipwilo wasongola. Baji mu masongola bakosesha masongola abo kupichila mu kwisamba ne kwibuulako bya bufyamfya, byo balanguluka ne bijikila byo bekala nabyo. Bino mukulumpe mu kipwilo wafwainwa kuyuka kuba’mba kechi wafwainwa kusolola “bya bufyamfya” pa balongo ne banyenga mu kipwilo ne. Inge wauba bino, bakaleka kumuketekela kabiji wakonsha kwitamishisha jizhina janji. Aba bo batongola kutangijila kipwilo kechi bafwainwa kwikala “banjimi ibiji,” nangwa’mba ba bujimbijimbi mu ñambilo ne. (1 Timoti 3:8, tubyambo twa munshi.) Ko kuba’mba kechi bafwainwa kubepa bakwabo nangwa kwikala na miyebe ne. Inge mukulumpe mu kipwilo watemwa mwinakwanji, kechi ukamubuulanga bintu byo afwainwa kubula kuyuka ne.

14. Muka mukulumpe mu kipwilo wakonsha kulengela byepi mwatawanji kwikala na jizhina jawama?

¹⁴ Mwanamukazhi wakonsha kukwasha mwatawanji kutwajijila kwikala na jizhina jawama kupichila mu kubula kumukanjikizha kwamba pa bintu bya bufyamfya. Inge mwanamukazhi walondela luno lujimuno, ukwasha mwatawanji ne kunemeka boba bamubuula bya bufyamfya. Kabiji kyakilamo kunema, usangajika muchima wa Yehoba mambo ulengela kipwilo kwikala mu mutende ne kukwatankana.—Loma 14:19.

15. Yehoba waumvwine byepi pa byaambile balunda ba kwa Yoba basatu, kabiji mambo ka?

¹⁵ Twakonsha kufunjilako byavula ku byanembwa mu buku wa Yoba pa kuyuka bya kwamba ne kimye kyo twafwainwa kwamba. Yoba byo apichilenga mu bya malwa byavula, kwaishile banabalume bana na kumutekenesha ne kumufundako. Bano banabalume bazhindamine pa kimye kyabaya. Pa bano banabalume baishile, basatu mazhina abo ke Elifwaza, Bilidada, ne Zofwala. Nangwa kya kuba papichile kimye pa kuba’mba batendeke kwamba, bino byambo byo aambile kechi byatekeneshe Yoba ne. Abo bazhindamine na kulanguluka pa bya kubuula Yoba kuba’mba wamanaminenga mambo waubile byatama. Mu byambo byaambile bano banabalume mwajingako bimo bya kine, bino byavula byo baambile pe Yoba ne pe Yehoba kechi byajinga bya kine ne. Baambile’mba Yoba wajinga muntu watama bingi. (Yoba 32:1-3) Yehoba waubilepo byepi? Wibazhingijile bingi bano banabalume basatu.  Wibatelele’mba bakosama kabiji waambijile Yoba kuba’mba ebalombeleko.—Yoba 42:7-9.

16. Tubena kufunjilako ka ku byatama byaubile Elifwaza, Bilidada, ne Zofwala?

¹⁶ Tufunjilako byavula ku byubilo byatama byamwesheshe Elifwaza, Bilidada, ne Zofwala. Kitanshi, kechi twafwainwa kuzhachishanga balongo mu kipwilo ne. (Mat. 7:1-5) Twafwainwa kutelekesha inge babena kwamba apa bino twaamba. (1 Pe. 3:8) Kya bubiji, kimye kyo tubena kwamba, byambo byetu byafwainwa kwikala bya lutekenesho kabiji bya kine. (Efi. 4:25) Kya busatu, Yehoba utako bingi muchima ku byambo byo twambila bakwetu.

17. Twakonsha kufunjilako ka ku byaubile Elihu?

¹⁷ Muntu wa buna wayile na kupempula Yoba wajinga Elihu. Uno muntu wajinga mulongo wa kwa Abalahama. Watelekelenga kimye kyaambilenga Yoba ne balunda nanji basatu. Kyamweka wateleko bingi muchima ku byo baambilenga, mambo waambile byambo bya kubula kupita mu mbaji byakwashishe Yoba kupimpula milanguluko yanji. (Yoba 33:1, 6, 17) Kintu Elihu kyo anemekele ke kutumbijika Yehoba, kechi kwitumbijika aye mwine nangwa bantu bakwabo ne. (Yoba 32:21, 22; 37:23, 24) Kyaubile Elihu kitufunjisha kuba’mba kuji kimye kya kuzhindama ne kuteleka. (Yako. 1:19) Kabiji kitufunjisha kuba’mba pa kujimunako bakwetu, kintu kyo twafwainwa kutapo muchima ke kunemeka Yehoba, kechi kwinemeka atweba bene ne.

18. Twakonsha kumwesha byepi amba tusanta pa kya bupe kya kwamba?

¹⁸ Twakonsha kumwesha’mba twanemeka kya bupe kya kwamba kupichila mu kulondela lujimuno lwa mu Baibolo lwa kuyuka kimye kya kwamba ne bya kwamba. Mupashi wamutangijile mfumu wa maana aye Solomone kunemba’mba: “Byonkatu biji maepo a ngolode aji mu bipe bya siliva byo biji ne byambo byo baamba pa kimye kyafwainwa.” (Maana 25:11) Inge twatelekesha ku bibena kwamba bakwetu ne kulangulukapo saka tukyangye kwamba, byambo byetu bikekala nobe maepo a ngolode, ko kuba’mba bikekala byambo byanema kabiji byawama. Onkao mambo, nangwa twaambatu byambo bicheche nangwa byavula, byambo byetu bikakwasha bakwetu, kabiji tukasangajika muchima wa Yehoba. (Maana 23:15; Efi. 4:29) Inge twauba bino, ko kuba’mba tubena kusanchila Lesa pa kwitupa kya bupe kya kwamba.