1. Muntu wafwainwa kuba byepi saka akyangye kutendeka kushimika nzubo?

TUFWANYIKIZHE kuba’mba muntu ubena kukeba kushimika nzubo. Wayuka mutundu wa nzubo yo akeba kushimika. Nanchi wakonsha kufikenatu kuya na kupota bintu bya kushimikila ne kutendeka kushimika nyi? Ine. Saka akyangye kutendeka kushimika, kuji bintu byanema byo afwainwa kuba. Wafwainwa kwikala panshi ne kubala mali akataiwapo pa kushimika nzubo. Mambo ka? Mambo wafwainwa kuyuka inge uji na mali a kupwishisha kushimika nzubo. Inge wabajila jimo mali akataiwapo pa kushimika nzubo, ukakonsha kupwisha mwingilo wanji.

2. Kwesakana na byaamba Luka 14:27-30, ñanyi bintu byo mwakonsha kulangulukapo saka mukyangye kubatizhiwa?

² Nanchi butemwe bo mwatemwa Yehoba ne kusanta pa byo emubila bibena kwimulengela kukeba kubatizhiwa nyi? Inge byo ibyo, ko kuba’mba mubena kukeba kuba byuba muntu ukeba kushimika nzubo. Mambo ka o twaambila byo byo? Langulukai pa byambo byaambile Yesu biji pa Luka 14:27-30. (Tangai.) Yesu waambilenga pa byo kilumbulula kwikala mwananji wa bwanga. Inge tukeba kwikala baana banji ba bwanga, twafwainwa kwipana kuchinchika makatazho ne kusankilapo bintu bimo. (Luka 9:23-26; 12:51-53) Onkao mambo, saka mukyangye kubatizhiwa, mwafwainwa kulanguluka pa byonse byavwangwamo mu kwikala mwana wa bwanga. Inge mwauba bino, ko kuba’mba mwafikilamo kubatizhiwa ne kutwajijila kwingijila Lesa mu bukishinka.

3. Tusakwisamba pa ka mu uno mutwe?

³ Nanchi kubatizhiwa ne kwikala mwana wa bwanga wa Kilishitu kwanema kukila bintu byo mwasankilapo nyi? Ee. Kubatizhiwa kwimushinkwila mapesho avula bingi pa kino kimye ne kimye kya kulutwe. Twayai twisambe pa mepuzho amo anema aamba pa lubatizhilo. Kuba bino kusakwimukwasha kukumbula buno bwipuzho: “Nanchi nafikilamo kubatizhiwa nyi?”

4. (a) Kwipana kulumbulula ka? (b) Kwesakana na byaamba Mateo 16:24, ‘kwikana’ anweba bene kulumbulula ka?

⁴ Kwipana kulumbulula ka? Saka mukyangye kubatizhiwa, patanshi mwafwainwa kwipana kwi Lesa. Kwipana kwi Yehoba kulumbulula kulomba na muchima yense kwi aye ne kumubuula’mba mukamwingijilanga mu bumi bwenu bonse. Inge mwipana kwi Lesa ko kuba’mba ‘mwikana’ anweba bene. (Tangai Mateo 16:24.) Kino kilumbulula’mba mwaikala ke bantu ba kwa Yehoba. Kino ke kintu kyanema bingi kyo mwafuukulapo. (Loma 14:8) Mumubuula’mba kufuma luno, musakuta muchima pa kwingijila Lesa kechi anweba bene ne. Kwipana ke luchipo, ko kuba’mba mulaye wanema walaya muntu kwi Lesa. Yehoba kechi witukanjikizha kufikizha luno luchipo ne. Umvwe twalaya uno mulaye, Lesa ukeba’mba tumufikizhe.—Sala. 116:12, 14.

5. Kwipana kwakwatankana byepi na lubatizhilo?

⁵ Kwipana kwakwatankana byepi na lubatizhilo? Kwipana kubiwa kwa bunke bwenu ne Yehoba. Bino lubatizhilo lubiwa pa mvula bantu, javula pa kubuñana nangwa pa kushonkena. Inge mwabatizhiwa, mumwesha kuba’mba mwipaine kala kwi Yehoba anweba bene. * Onkao mambo, inge mwabatizhiwa mumwesha bakwenu kuba’mba mwatemwa Yehoba Lesa na muchima wenu yense ne na mweo wenu yense ne na maana enu onse ne na bulume bwenu bonse, kabiji mwafuukulapo kutwajijila kumwingijila myaka ne myaka.—Mako 12:30.

6-7. Kwesakana na byaamba 1 Petelo 3:18-22, ñanyi bishinka bibiji bimwesha buneme bwa lubatizhilo?

⁶ Nanchi lubatizhilo lwanema nyi? Langulukai pa byambo biji pa 1 Petelo 3:18-22. (Tangai.) Byonkatu bwato byo bwajinga kishiino kyamwesheshenga lwitabilo lwa Nowa, lubatizhilo lwenu nalo ke kishiino kikatampe kimwesha kuba’mba mwipaine kwi Yehoba. Bino nanchi lubatizhilo lwanema nyi? Ee, lwanema. Petelo waambile ene mambo lubatizhilo o lwanemena. Kitanshi, waambile’mba lubatizhilo “lubena kwimupulusha.” Lubatizhilo lwakonsha kwitupulusha inge twauba bintu bimwesha’mba tuji na lwitabilo mwi Yesu ne kwitabila kuba’mba witufwijile, bamusangwile ne kuya mwiulu, kabiji luno “waikala ku kilujo kya Lesa.”

⁷ Kya bubiji, lubatizhilo lwitulengela kwikala “na jiwi ja mu muchima jawama.” Inge twipana atweba bene kwi Lesa ne kubatizhiwa, twikala na bulunda bwawama ne Lesa. Na mambo a kuba’mba twalapila kya kine ku bundengamambo bwetu kabiji twaitabila mu bukuzhi, Lesa witulekelako mambo etu. Onkao mambo, twakonsha kwikala na jiwi ja mu muchima jawama.

8. Ñanyi kintu kyafwainwa kwimulengela kufuukulapo kubatizhiwa?

⁸ Ñanyi kintu kyafwainwa kwimulengela kufuukulapo kubatizhiwa? Byo mwafunda Baibolo, mwayuka byavula pe Yehoba, byubilo byanji ne mo obila bintu. Bintu byo mwafunda pe aye bimufikile pa muchima kabiji bimutundaikile kumutemwa bingi. Kutemwa Yehoba ko kwafwainwa kwimulengela kufuukulapo kubatizhiwa.

9. Kwesakana na byaamba Mateo 28:19, 20, kubatizhiwa mu jizhina ja Tata ne ja Mwana ne ja mupashi wazhila kulumbulula ka?

⁹ Kishinka kikwabo kyafwainwa kwimulengela kufuukulapo kubatizhiwa ke kya kuba’mba mwafunda Baibolo byo afunjisha ne kwibitabila. Langulukai pa byaambile Yesu kimye kyo apaine mukambizho wa kufunjisha bantu kwikala baana ba bwanga. (Tangai Mateo 28:19, 20.) Kwesakana na byaambile Yesu, aba babatizhiwa bafwainwa “kwibabatizha mu jizhina ja Tata ne ja Mwana ne ja mupashi wazhila.” Watazhizhe mwepi? Mwafwainwa kwitabila na muchima yense bukine bwa mu Baibolo bwaamba pe Yehoba; Mwananji, aye Yesu; ne mupashi wazhila. Buno bukine buji bingi na bulume kabiji bwakonsha kwimufika pa  muchima. (Hebe. 4:12) Twayai twisambeko pa bukine bumo.

10-11. Ñanyi bukine bo mwafunda pe Shetu ne kwibwitabila?

¹⁰ Vulukai kimye kyo mwafunjile bukine pe Shetu: Mwafunjile kuba’mba jizhina janji “Yehoba,” ye “Mwine Wakila pano pa ntanda ponse,” kabiji ye “Lesa yenka wa kine.” (Sala. 83:18; Isa. 37:16) Wanengezhezhe jishinda ja kwitupokolwelamo ku bundengamambo ne lufu, kabiji witupa luketekelo lwa kwikala na bumi bwa myaka ne myaka. (Yoa. 17:3) Inge mwipana ne kubatizhiwa po po mukekala Bakamonyi ba kwa Yehoba. (Isa. 43:10-12) Kabiji mukekala mu kisemi kya ntanda yonse kya bapopweshi batelwa pa jizhina Lesa ne kwijisolola ku bantu.—Sala. 86:12.

¹¹ Ke munema mukatampe kuyuka bifunjisha Baibolo pe Shetu. Inge mwaitabila buno bukine pe Lesa, mukatundaikwa kwipana anweba bene kwi Yehoba ne kubatizhiwa.

12-13. Ñanyi bukine bo mwafunda pa Mwana ne kwibwitabila?

¹² Mwaubile byepi byo mwafunjile bukine pa Mwana? Yesu ye wa kibiji kwi Yehoba. Ye Mukuzhi wetu. Waswile kwiya na kwitufwila. Inge byubilo byetu ke bimweshe kuba’mba twaitabila mu bukuzhi, mambo etu akonsha kulekelwa, tukekala na bulunda bwakosa ne Lesa, kabiji tukekala na bumi bwa myaka ne myaka. (Yoa. 3:16) Yesu ye Ñanga wetu Mukatampe. Ukeba kwitukwasha kumwenamo mu bukuzhi ne kwikala na bulunda bwawama ne Lesa. (Hebe. 4:15; 7:24, 25) Na mambo a kuba’mba Yesu ye Mfumu wa Bufumu bwa Lesa, Yehoba ye ye akengijisha kuzhijika jizhina janji, kupwisha bubi, ne kuleta mapesho a myaka ne myaka mu Paladisa ubena kwiya. (Mat. 6:9, 10; Lum. 11:15) Yesu ye ye twafwainwa kulondelanga. (1 Pe. 2:21) Waingijishe bumi bwanji mu kuba kyaswa muchima wa Lesa, ne atweba byo byo twafwainwa kubanga.—Yoa. 4:34.

¹³ Inge mwaitabila bifunjisha Baibolo pe Yesu, mukamutemwa bingi Mwana Lesa ye atemwisha. Buno butemwe bukemulengela kwingijisha bumi bwenu mu kuba kyaswa muchima wa Lesa byonka byaubile Yesu. Kino kikemulengela kwipana anweba bene kwi Yehoba ne kubatizhiwa.

14-15. Ñanyi bukine bo mwafunda pa mupashi wazhila ne kwibwitabila?

¹⁴ Mwaubile byepi byo mwafunjile buno bukine pa mupashi wazhila? Mwafunjile’mba mupashi wazhila kechi muntu ne, bino ke ngovu ya Lesa. Yehoba waingijishe mupashi wazhila kukwasha banabalume banembele Baibolo. Kabiji uno mupashi witukwasha kumvwisha byo tutanga ne kwibingijisha. (Yoa. 14:26; 2 Pe. 1:21) Yehoba wingijisha mupashi wanji kwitupa “bulume bwakila bwa bantu.” (2 Ko. 4:7) Uno yenka mupashi witukwasha kusapwila mambo awama, kushinda meseko, bya kuba na bijikila ne kuchinchika. Witukwasha kumwesha byubilo byawama bitelwa’mba “bipangwa bya mupashi.” (Nga. 5:22) Lesa upana mupashi wanji ku bantu bamuketekela kabiji bamulomba na muchima yense.—Luka 11:13.

¹⁵ Kitutekenesha bingi kuyuka’mba bapopweshi ba Yehoba bakonsha kuketekela mupashi wazhila kwibakwasha pa kwingila mwingilo wa Lesa. Inge mwaitabila bukine bo mwafunda pa mupashi wazhila, kikemutundaika kwipana kwi Lesa ne kubatizhiwa.

16. Ñanyi bintu byo twafunda mu uno mutwe?

¹⁶ Inge mwafuukulapo kwipana kwi Lesa ne kubatizhiwa ko kuba’mba mwafuukulapo kintu kyanema bingi. Byonka byo twafunda, mwafwainwa kuyuka bintu byavwangwamo, ko kuba’mba, makatazho ne bintu byo mwafwainwa kusankilapo. Pano bino, mapesho o mukamwenamo awama bingi kukila pa bintu byo mwasankilapo. Lubatizhilo lwakonsha kwimupulusha ne kwimulengela kwikala na jiwi ja mu muchima jawama ku meso a Lesa. Kishinka kine kyafwainwa kwimulengela kubatizhiwa ke kutemwa Yehoba Lesa. Kabiji mwafwainwa kwitabila na muchima yense bukine bo mwafunda pe Tata, Mwana, ne mupashi wazhila. Inge mwalanguluka pa bintu byo twafunda  mu uno mutwe, mwakonsha kukumbula byepi bwipuzho bwa kuba’mba, “Nanchi nafikilamo kubatizhiwa nyi?”

17. Ñanyi bintu bimo byafwainwa kuba muntu pa kuba’mba afikilemo kubatizhiwa?

¹⁷ Inge mwamona’mba mwafikilamo kubatizhiwa, ko kuba’mba mwauba bintu byavula bikebewa pa kuba’mba mukoseshe bulunda bwenu ne Yehoba. * Na mambo a kuba’mba mufunda Baibolo kimye kyonse, mwayuka byavula pe Yehoba ne Yesu. Kuba bino kwimulengela kwikala na lwitabilo. (Hebe. 11:6) Mwaketekela na muchima wenu yense milaye ya Yehoba iji mu Baibolo. Kabiji mwashiinwa kuba’mba lwitabilo lwenu mu kitapisho kyapaine Yesu lukemupokolola ku bundengamambo ne lufu. Mwalapijile ku bundengamambo bwenu; mwaumvwine kutama pa bubi bo mwaubile, kabiji mwalombele lulekelo lwa mambo kwi Yehoba. Mwapimpwile bwikalo bwenu, mwalekele byubilo byatama byo mwajinga nabyo kala, kabiji mwatatwile kwikala bwikalo busangajika Lesa ku muchima. (Byu. 3:19) Kabiji mwakebeshe kubuulako bakwenu bintu byo mwaitabilamo. Mwafikijilemo kwikala musapwishi wabula kubatizhiwa kabiji mwatendekele kusapwila pamo na kipwilo. (Mat. 24:14) Na mambo a kuba bino bintu, Yehoba wimutemwa bingi. Mwasangajika bingi muchima wanji.—Maana 27:11.

18. Ñanyi bintu bikwabo byo mwafwainwa kuba saka mukyangye kubatizhiwa?

¹⁸ Kuji bintu bikwabo byo mwafwainwa kuba saka mukyangye kubatizhiwa. Byonka byo twafunda kala, mwafwainwa kwipana anweba bene kwi Lesa. Mwafwainwa kumusolomoka mu lulombelo bunke bwenu ne kumulaya kuba’mba mukengijishanga bumi bwenu bonse mu kuba kyaswa muchima wanji. (1 Pe. 4:2) Apa bino mwaya na kubuula ukwatankanya mingilo ya jibumba ja bakulumpe kuba’mba mubena kukeba kubatizhiwa. Uno mulongo ukambila bakulumpe bamo kwisamba nenu. Pano bino, kechi mwafwainwa kwakamwa pa kwisamba na bakulumpe ne. Bano balongo bemuyuka kabiji bemutemwa. Bakapitulukamo ne anweba mu mafunjisho atanshi a mu Baibolo o mwafunda. Bakoba bino pa kuba’mba bayuke’mba mwayuka ano mafunjisho kabiji mwayuka buneme bwa kwipana ne kubatizhiwa. Inge bamona’mba mwafikilamo, bakemubuula kuba’mba mukabatizhiwa pa kubuñana nangwa pa kushonkena.

19-20. Mwafwainwa kubanga byepi inge mwabatizhiwa, kabiji mwakonsha kuba byepi byobyo?

¹⁹ Inge mwabatizhiwa, ñanyi bintu byo mwafwainwa kubanga? * Vulukai kuba’mba kwipana ke luchipo, kabiji Yehoba ukeba’mba mufikizhe luno luchipo lwenu. Onkao mambo, mwafwainwa  kutwajijila kufikizha mulaye wenu wa kwipana. Mwakonsha kuba byepi kino?

²⁰ Mwafwainwa kupwilanga kimye kyonse. Byo mwabatizhiwa, mwaikala mu kisemi kya “balongo bonse mwaya ntanda.” (1 Pe. 2:17) Balongo ne banyenga mu kipwilo bajitu nobe kisemi kyenu. Inge kemupwile kimye kyonse, mukakosesha bulunda na balongo ne banyenga. Tangainga Mambo a Lesa pa juba pa juba ne kulanguluka-langulukapo. (Sala. 1:1, 2) Inge mwatanga byepelo bimo mu Baibolo, mwafwainwa kwikala na kimye kya kulanguluka pa byo mwatanga. Inge mwauba bino, byambo byo mwatanga bikemufika pa muchima. Kabiji mwafwainwa “kutwajijila na kulomba.” (Mat. 26:41) Milombelo yenu ifuma panshi ya muchima ikemukwasha kufwenya kwipi ne Yehoba. Kabiji “twajijilai na kukeba Bufumu patanshi.” (Mat. 6:33) Mwakonsha kuba bino kupichila mu kutangizhako mwingilo wa kusapwila mu bwikalo bwenu. Inge kemwingile mwingilo wa kusapwila kimye kyonse, lwitabilo lwenu lukakoselako, kabiji mukakwasha bantu kwiya mu jishinda ja ku bumi bwa myaka ne myaka.—1 Timo. 4:16.

21. Lubatizhilo lukemulengela kumwenamo ka?

²¹ Kufuukulapo kwipana anweba bene kwi Yehoba ne kubatizhiwa ke kintu kyanema bingi kyo mwafwainwa kuba. Ibyo kuba’mba mwakonsha kupita mu makatazho inge mwafuukulapo kubatizhiwa, kabiji kuji bintu bimo byo mwakonsha kusankilapo. Pano nanchi kuji byawama bikafumamo nyi? Ee. Bya malwa byonse byo mwakonsha kupitamo mu ino ntanda ibi ke “bya pa kakimye kacheche kabiji byapela.” (2 Ko. 4:17) Pakuba lubatizhilo lwenu lukemukwasha kwikala bwikalo bwa lusekelo luno ne kukekala na “bumi bwa kine kine” kulutwe. (1 Timo. 6:19) Onkao mambo, langulukishaipo ne kulombapo pa mukumbu wenu wa bwipuzho bwa kuba’mba “Nanchi Mwafikilamo Kubatizhiwa Nyi?”