Bena Kilishitu bamo bengijisha misabilo ya pa Intaneti kwisambilamo na balongo babo ne bakwabo Bakamonyi. Pano bino, mwina Kilishitu wakoma mu lwitabilo uvuluka lujimuno lwa kuba’mba: “Muntu wajimuka umona bileta malwa kabiji ufyama, pakuba muntu wabula maana uyatu kabiji umona bya malwa.”—Maana 27:12.

Tusanta bingi pa kuyuka’mba Yehoba ukeba kwituzhikijila. Onkao mambo, kechi tupwanañana na bantu baleta mabano, bapangiwa mu kipwilo, nangwa boba batundaika milanguluko yatama ne. (Loma 16:17; 1 Ko. 5:11; 2 Yoa. 10, 11) Bamo bo tupwila nabo kechi bakookela mizhilo ya mu Baibolo ne. (2 Timo. 2:20, 21) Pa kusala balunda, twafwainwa kuvulukanga kino kishinka. Kusala balunda bawama kechi kwapeela inge twingijisha misabilo ya pa Intaneti ya kwisambilamo ne.

Kyanema bingi kusala balunda baji na byubilo byawama kikatakata inge twalenga jibumba jikatampe ja bantu ba kwisamba nabo kwingijisha misabilo ya pa Intaneti ya kwisambilamo. Bena Kilishitu bamo baji mu mabumba abaya a bantu bo besamba nabo, kabiji mu kuba bino kechi mufuma byawama ne. Mulongo nangwa nyenga wakonsha kujimuka byepi inge uji mu jibumba ja bantu bavula bingi? Kyakonsha kukatazha kuyuka bonse byo baji ne kuyuka inge baji na lwitabilo lwakosa. Salamo 26:4 waamba’mba: “Kechi mpwanañana na bantu ba bujimbijimbi ne, kabiji nchinuzhuka boba befya byo baji.” Kino kibena kumwesha kuba’mba kyanema bingi kwisambangatu na bantu bo twayuka.

Nangwatu inge mwina Kilishitu uji mu kajibumba ka bantu bacheche bo esamba nabo kwingijisha ino misabilo, wafwainwa kujimuka na kimye kyo engijisha na kwisamba. Kabiji kechi kibena kulumbulula’mba twafwainwa kukumbulapo pa byonsetu byo babena kwambapo bantu baji mu jo jo jibumba ne. Paulo wajimwineko Timoti pa bantu “bakalokwete kabiji batemwa kwibika mu mambo a bakwabo.” (1 Timo. 5:13) Ne lelo jino, kyakonsheka kubiwa kupichila mu kwingijisha misabilo ya kwisambilamo.

Mwina Kilishitu wakoma mu lwitabilo kechi wambapo pa misambo ya kapunyi nangwa kwamba bya bufyamfya pa bena Kilishitu bakwabo ne. (Sala. 15:3; Maana 20:19) Kabiji kechi uteleka nangwa kwambapo pa masawakya abula bishinka ne. (Efi. 4:25) Atweba tuji na masawakya a kine aimena pa Baibolo o tutambwila kupichila mu musabilo wetu wa jw.org ne mutanchi wa pa ñondo pa ñondo wa JW Broadcasting^®.

Bakamonyi bamo bengijisha misabilo ya pa Intaneti ya kwisambilamo kupotesha bintu, kupota bintu, ne kutentemesha bya busulu nangwa nkito. Abino ke bya busulu, kabiji kechi byakwatankana na kupopwela Yehoba ne. Onkao mambo, bena Kilishitu “babula kutemwa mali” kechi bengijisha balongo ne banyenga mu kukeba kulenga mali ne.—Hebe. 13:5.

Nanchi twakonsha kwingijisha misabilo ya kwisambilamo kulomba mali a kukwasha bakwetu ba mu lwitabilo bakajilwa nangwa boba baponenwa na bya malwa nyi? Twatemwa balongo ne banyenga yetu kabiji tukeba kwibakwasha, kabiji javula tukwasha boba bakajilwa ne kwibatundaika. (Yako. 2:15, 16) Bino inge ke twingijishe misabilo ya pa Intaneti ya kwisambilamo kukwasha bano balongo, yakonsha kupusenamo na lunengezho lwabikako ofweshi wa musampi uji mu kyalo kyenu nangwa lunengezho lwa kipwilo. (1 Timo. 5:3, 4, 9, 10, 16) Kabiji kafwako wakonsha kukeba kulengela bantu kulanguluka’mba tuji na jishinda jikwabo ja kukwashishamo mikooko ya Lesa ne.

Tukeba kuba bintu bileta lukumo kwi Lesa. (1 Ko. 10:31) Onkao mambo, pa kufuukulapo kwingijisha musabilo wa pa Intaneti wa kwisambilamo nangwa mashinda akwabo, yukai bizumba bijimo ne kutujimuka.