1. Mambo ka Yesu o alombejile Yehoba kuzhikijila baana banji ba bwanga?

BUFUKU bwapeleleko saka bakyangye kumwipaya, Yesu walangulukilenga pa makatazho akapitangamo baana banji ba bwanga. Mambo a kuba’mba watemenwe baana banji ba bwanga, Yesu wibalombejileko kwi Bashanji amba “mwibazhikijilenga na mambo a aye mubi.” (Yoa. 17:14, 15) Yesu wayukile’mba byo akabwela mwiulu, Satana Diabola ukatwajijila kukatazha bonse bakeba kwingijila Yehoba. Onkao mambo, bantu ba Yehoba bakebewa luzhikijilo.

2. Ki ka kyakonsha kwitulengela kushiinwa’mba Yehoba ukakumbula milombelo yetu?

² Yehoba wakumbwile lulombelo lwa kwa Yesu mambo watemwa Mwananji. Umvwe ketwibikeko kutokesha Yehoba ku muchima, ne atweba uketutemwa kabiji ukakumbulanga milombelo yetu inge twalomba bukwasho ne luzhikijilo. Byo aji Mutwe wa kisemi wawama, Yehoba ukatwajijila kwitulama bulongo byo tuji baana banji bo atemwa. Mambo inge wabula kuba bino kyakonsha kulengela jizhina janji kunenwa bibi.

3. Mambo ka o tukebela luzhikijilo lwa Yehoba lelo jino?

³ Lelo jino, tukeba bingi luzhikijilo lwa Yehoba kukila kala. Mambo Satana bamutaile pano pa ntanda kufuma mwiulu, kabiji ‘wazhingila bingi.’ (Lum. 12:12) Ulengela bantu betumanyika kulanguluka’mba “babena kwingila mwingilo wazhila kwi Lesa.” (Yoa. 16:2) Kabiji bantu babula kwitabila mwi Lesa, betumanyika na mambo a kuba’mba twapusanako na bantu ba mu ino ntanda. Pano bino, kechi twafwainwa kwakamwa ne. Mambo ka? Mambo Baibolo waamba’mba: “Nkambo ye wa kishinka kabiji ukemukosesha ne kwimuzhikijila kwi aye mubi.” (2 Tesa. 3:3) Yehoba wituzhikijila  byepi? Twayai twisambe pa mashinda abiji.

4. Kwesakana na byaamba Efisesa 6:13-17, ñanyi bintu Yehoba byo etunengezhezha pa kuba’mba etuzhikijile?

⁴ Yehoba witunengezhezha bivwalo bya nkondo byakonsha kwituzhikijila inge Satana witulukuka. (Tangai Efisesa 6:13-17.) Bino bivwalo bya nkondo bitupa Lesa byakosa kabiji bingila bingi bulongo. Bino twafwainwa kwingijishanga byonse bya nkondo pa kuba’mba tuzhikijilwe. Bivwalo bya nkondo byonse bimenako ka? Twayai tumone byo bimenako.

5. Mushipi wa bukine ya mu ka, kabiji mambo ka o twafwainwa kumunyingila?

⁵ Mushipi wa bukine wimenako bukine buji mu Mambo a Lesa, Baibolo. Mambo ka o twafwainwa kwinyingila uno mushipi? Mambo Satana ye “shanja bubela.” (Yoa. 8:44) Wabepa bubela pa myaka yavula bingi kabiji wajimbaika “bantu ba pano pa ntanda ponse.” (Lum. 12:9) Bino bukine buji mu Baibolo bwituzhikijila ku bubela bwa kwa Satana. Twakonsha kunyinga byepi uno mushipi wa kifwanyikizho? Tuba bino kupichila mu kufunda bukine pe Yehoba, kumupopwela mu “mupashi ne na bukine,” ne kwikala ba kishinka mu bintu byonse.—Yoa. 4:24; Efi. 4:25; Hebe. 13:18.

6. Kyela kya pa kyaji kya bololoke kimenako ka, kabiji mambo ka o twafwainwa kwikivwajila?

⁶ Kyela kya pa kyaji kya bololoke kimenako mizhilo ya Yehoba yaoloka. Mambo ka o twafwainwa kuvwajila kyela kya pa kyaji? Byonkatu kyela kya pa kyaji byo kizhikijila muchima wa mushilikale, ne kyela kya pa kyaji kya bololoke byo byo kizhikijila muchima wetu wa kifwanyikizho ku byubilo byatama biji mu ino ntanda. (Maana 4:23) Yehoba ukeba’mba tumutemwe ne kumwingijila na muchima wetu yense. (Mat. 22:36, 37) Bino Satana usaka’mba tuleke kwingijila Yehoba kupichila mu kwitulengela kutemwa bintu bya mu ino ntanda byashikwa Yehoba. (Yako. 4:4; 1 Yoa. 2:15, 16) Kabiji inge kino kyabula kwingila, wituletela bya malwa pa kuba’mba tube kintu kifichisha Yehoba ku muchima.

7. Twakonsha kuvwala byepi kyela kya pa kyaji kya bololoke?

⁷ Tuvwala kyela kya pa kyaji kya bololoke kupichila mu kulondela mizhilo ya Yehoba yaamba pa kyawama ne kyatama. (Sala. 97:10) Bantu bamo bakonsha kulanguluka’mba mizhilo ya Yehoba yakatazha. Bino inge twaleka kulondela mizhilo ya mu Baibolo mu mwikalo bwetu, tukekala nobe mushilikale wavula kyela kya pa kyaji kimye kyo babena kulwa nkondo na mambo a kuba’mba kyamunemena. Kuba bino ke kubula maana. Bantu batemwa Yehoba bamona’mba mikambizho yanji “kechi yakatazha ne.” Pakuba beimona’mba po paimena bumi.—1 Yoa. 5:3.

8. Kuvwala makwabilo mu kwinengezhezha jimo kusapwila mambo awama kulumbulula ka?

⁸ Kabiji Paulo witutundaikile kuvwala ku maulu etu makwabilo mu kwinengezhezha jimo kusapwila mambo awama a mutende. Kino kibena kulumbulula’mba twafwainwa kwikala benengezhezha jimo kusapwila mambo awama a Bufumu. Umvwe ketubuuleko bantu byambo biji mu Baibolo, lwitabilo lwetu lukoselako. Kitutundaika bingi pa kumona bantu ba Yehoba mwaya ntanda byo babena kwibikako kumonapo mashinda a kusapwilamo mambo awama. Basapwila kimye kyo baji ku nkito, ku sukulu, ku mapunzha a busulu, ku nzubo ku nzubo, kimye kyo baya na kupota bintu, kimye kyo bafwakashila balongo babo babula kwitabila, kusapwila bantu bo bayuka, nangwa inge bekalatu pa nzubo na mambo a lukatazho lwa kwenda. Umvwe ketuchiine bantu kya kuba twaleka kusapwila, tukekala nobe mushilikale uvuula makwabilo anji kimye kyo babena kulwa nkondo, kuba bino kukamulengela kwikozha ku maulu. Kabiji kyakonsha kumukatazha kwizhikijila ku balwanyi inge  bamulukuka, kabiji ukakankalwa kukookela mikambizho ya mukulumpe wa bashilikale.

9. Mambo ka o twafwainwa kusendela jikebo jikatampe ja lwitabilo?

⁹ Jikebo jikatampe ja lwitabilo jimenako lwitabilo lwetu mwi Yehoba. Twaketekela kuba’mba ukafikizha milaye yanji yonse. Kwikala na luno lwitabilo kwitukwasha “kuleyelamo miketo yonse ya mujilo ya kwa aye mubi.” Mambo ka o twafwainwa kusendela jino jikebo jikatampe? Mambo jituzhikijila ku mafunjisho a bubela a bansatuki, kabiji kechi tukalefulwa inge bantu ke betwendeleke ne. Kwa kubula lwitabilo, kechi twakonsha kwikala na bulume bwa kukana kuba byatama inge bantu kebetukanjikizhe’mba tuleke kukookela Yehoba ne. Bino kimye kyonse inge twakana kuba byashikwa Yehoba ku nkito nangwa ku sukulu, ko kuba’mba jikebo ja lwitabilo lwetu jibena kwituzhikijila. (1 Pe. 3:15) Kabiji kimye kyonse kyo tukana kwingila nkito ya kufola muzema wa mali na mambo a kuba’mba isakwitulengela kukankalwa kwingijila Yehoba bulongo, ko kuba’mba jikebo ja lwitabilo lwetu jibena kwituzhikijila. (Hebe. 13:5, 6) Kabiji inge twatwajijila kwingijila Yehoba nangwa kya kuba babena kwitumanyika, kimwesha’mba jikebo ja lwitabilo lwetu jibena kwituzhikijila.—1 Tesa. 2:2.

10. Kampompo ka lupulukilo kalumbulula ka, kabiji mambo ka o twafwainwa kwikavwajila?

 ¹⁰ Kampompo ka lupulukilo ke luketekelo lwitupa Yehoba. Twaketekela kuba’mba ukapesha bonse boba kyaswa muchima wanji, kabiji nangwatu inge twafwa uketusangula. (1 Tesa. 5:8; 1 Timo. 4:10; Titu. 1:1, 2) Byonkatu kampompo byo kazhikijila mutwe wa mushilikale, ne luketekelo lwa lupulukilo luzhikijila milanguluko yetu. Mu ñanyi jishinda? Luketekelo lwitukwasha kuta muchima pa milaye ya Lesa ne kubula kukakilwa umvwe ke tupite mu makatazho. Twakonsha kuvwala byepi kano kampompo? Tuvwala kampompo kupichila mu kumona bintu byonka Lesa byo ebimona. Jishinda jimo jo twakonsha kubilamo bino, ke kuketekela mwi Lesa ne kubula kuketekela mu bunonshi.—Sala. 26:2; 104:34; 1 Timo. 6:17.

11. Mpoko ya mupashi yo ika, kabiji mambo ka o twafwainwa kwiingijishanga?

¹¹ Mpoko ya mupashi ke Mambo a Lesa, Baibolo. Ino mpoko iji na bulume bwa kusolola bubela ne kukasulula bantu ku buzha bwa mafunjisho a bubela ne byubilo byatama. (2 Ko. 10:4, 5; 2 Timo. 3:16, 17; Hebe. 4:12) Tufunda bya kwingijisha ino mpoko kupichila mu kwikala na lufunjisho lwa pa bunke ne mafunjisho etufunjisha jibumba ja Lesa. (2 Timo. 2:15) Kabiji kununga pa bivwalo bya nkondo, Yehoba witupa ne kintu kikwabo kikatampe kyakonsha kwituzhikijila. Ñanyi kintu kyonkakyo?

12. Ñanyi kintu kikwabo kyo tukeba, kabiji mambo ka?

¹² Mushilikale wapijilwa kulwa nkondo wayuka’mba kechi wakonsha kushinda nzhita ikatampe bunke bwanji ne. Ukeba bukwasho bwa bashilikale bakwabo. Ne atweba kechi twakonsha kushinda Satana ne bantu banji bunke bwetu ne, kanatu twaingijila pamo na balongo ne banyenga. Yehoba witupa balongo mwaya ntanda yonse bakwitukwasha.—1 Pe. 2:17.

13. Kwesakana na byaamba Bahebelu 10:24, 25, tumwenamo ka mu kupwila kwetu?

¹³ Jishinda jimo jo tutambwilamo bukwasho ke kupichila mu kupwila. (Tangai Bahebelu 10:24, 25.) Bimye bimo, atweba bonse tulefulwa, bino inge twaya na kupwila tutundaikwa bingi. Mikumbu ikumbula balongo ne banyenga kufuma panshi ya muchima itutundaika bingi. Majashi aimena pa Baibolo ne bimwesho bikalako pa kupwila bitutundaika kutwajijila kwingijila Yehoba. Kabiji misambo yo twisamba kupwila saka kukyangye kutendeka ne pa kupwisha kupwila nayo itutundaika. (1 Tesa. 5:14) Kikwabo, kupwila kwitupa kimye kya kukwasha bakwetu, kabiji kino kituletela bingi lusekelo. (Byu. 20:35; Loma 1:11, 12) Kabiji kupwila kwitukwasha ne mu mashinda akwabo. Kwitufunjisha bya kwikala basendwe mu mwingilo wa kusapwila ne kufunjisha. Kintu kimo kyo tufunda ke kuyuka bulongo bya kwingijisha bingijisho byo twingijisha mu mwingilo wa kusapwila. Onkao mambo, nengezhainga bulongo kupwila konse. Kabiji kimye kya kupwila, telekeshainga. Inge mwafuma na kupwila, ingijishainga bintu byo mwafunda. Umvwe kemube bino, mukekala “mushilikale wawama wa kwa Kilishitu Yesu.”—2 Timo. 2:3.

14. Ñanyi bintu bikwabo byo muji nabyo byakonsha kwimukwasha?

¹⁴ Kabiji tuji na biumbi bya bamalaika baji bingi na bulume. Akilangulukaitu pa byakonsha kuba malaika umotu. (Isa. 37:36) Pano langulukai pa byafwainwa kuba nzhita ya bamalaika ba bulume. Kafwako muntu nangwa ndemona wakonsha kushinda nzhita ya Yehoba ya bulume ne. Onkao mambo, kamonyi umo umvwe waikala ne Yehoba, ko kuba’mba bavula kukila balwanyi babo. (Mito. 6:16) Abino byambo bya kine. Langulukainga pa bantu bakonsha kwimukwasha inge bo mwingila nabo, bo mufunda nabo nangwa mulongo wenu wabula kwitabila wimulefula. Yukai kuba’mba kechi muji bunke bwenu  mu ino nkondo ne. Mubena kulondela lutangijilo lwa kwa Yehoba.

15. Kwesakana na byaamba Isaya 54:15, 17, mambo ka bantu ba Lesa o bakatwajijila kusapwila?

¹⁵ Kuji bishinka byavula byakonsha kulengela bantu baji mu ino ntanda iji mu bulume bwa kwa Satana kwitushikwa. Atweba kechi tutundaika bya bumulwila ntanda ne, kabiji kechi tulwako makondo ne. Tusapwila pa jizhina ja Lesa, kabiji tutundaika Bufumu bwanji kuba’mba bo bonkatu bukaleta mutende, kabiji tukookela mizhilo yanji yaoloka. Tukwasha bantu kuyuka’mba kalama wa ino ntanda wa bubela kabiji mbanzhi. (Yoa. 8:44) Kabiji tubijika kuba’mba ntanda ya kwa Satana katatakatu bakeyonaune. Satana ne bantu bamulondela kechi bakonsha kulekesha mwingilo wetu wa kusapwila ne. Atweba tukatwajijila kutota Yehoba mu mashinda onse akonsha kwingila. Nangwa kya kuba Satana uji bingi na bulume, bino wakankalwa kukanya byambo bya Bufumu kufika monse mwapela ntanda. Kino kibena kubiwa mambo Yehoba ubena kwituzhikijila.—Tangai Isaya 54:15, 17.

16. Yehoba ukazhikijila byepi bantu banji mu kimye kya malwa akatampe?

¹⁶ Ñanyi bintu bikamweka kulutwe? Mu kimye kya malwa akatampe, Yehoba uketupulusha mu mashinda abiji a kukumya. Jitanshi, ukazhikijila bakalume banji ba kishinka kimye kyo akalengela bamfumu ba pano pa ntanda konauna Babilona Mukatampe, ko kuba’mba bupopweshi bwa bubela bonse. (Lum. 17:16-18; 18:2, 4) Ja bubiji, ukazhikijila bantu banji kimye kyo akazhiya bintu byonse byashala biji pano pa ntanda ya kwa Satana pa Amagedonyi.—Lum. 7:9, 10; 16:14, 16.

17. Tumwenamo ka mu kwikala na bulunda bwakosa ne Yehoba?

¹⁷ Umvwe twaikala na bulunda bwakosa ne Yehoba, kafwako kintu kyakonsha kwituba Satana kiketulengela kuleka kwingijila Lesa ne. Bino aye bakamonauna kikupu. (Loma 16:20) Onkao mambo, vwalai byonse bya nkondo, ne kutwajijila kwibingijisha. Kange mulwenga ne Satana ne bantu banji bunke bwenu ne. Kwashainga balongo ne banyenga yenu. Kabiji londelainga lutangijilo lwa Yehoba. Umvwe ke mube bino, mwakonsha kushiinwa kuba’mba Shenu wa mwiulu wa butemwe ukemukosesha ne kwimuzhikijila.—Isa. 41:10.