Bamo batanga lubilo jino jishimikila bepuzha buno bwipuzho. Pano bino, mu bino byepelo muji banabalume babiji baji na jizhina ja Mefibosheta, kabiji twakonsha kufunda kintu kyanema kupichila mu kwisamba pa kintu kyamwekele.

Mfumu wa bena Isalela aye Saulo wajinga na baana babalume batanu na babiji ne babakazhi babiji. Mubeji wa kwa Saulo wajinga Yonafwanyi. Mu kuya kwa kimye uno mfumu wasemene mwana wamulume mukwabo ye atumbile’mba Mefibosheta, ye asemejile mwi ntombo wanji aye Lizipa. Yonafwanyi naye wajinga na mwana wamulume ye atumbile’mba Mefibosheta. Onkao mambo, Mfumu Saulo wajinga na mwana wa jizhina ja Mefibosheta ne munkananji wajinga na jonka jino jizhina.

Pa kimye kimo, Mfumu Saulo washikilwe bena Gibeona baikalanga pamo na bena Isalela, kabiji wakebelenga kwibavizha. Kyamweka bavula bebepayile. Kino kintu kyatamine bingi. Mambo ka? Mambo mu moba a kwa Yoshua, bantangi ba mabumba a bena Isalela balayañene lulayañano lwa mutende na bena Gibeona.—Yosh. 9:3-27.

Luno lulayañano lwatwajijile kwingila ne mu kimye kya Mfumu Saulo. Mfumu walengulwile luno lulayañano ne kukeba kuvizha bena Gibeona bonse. Kino kintu kyaletele “mambo a mashi pe Saulo ne pa ba mu nzubo yanji.” (2 Sam. 21:1) Mu kuya kwa kimye, Davida waikele ke mfumu. Bena Gibeona bapulukile baishile na kumubuula kino kintu kyatama kyamwekele. Davida wibepwizhe mfuto ya mambo yo afwainwe kwibapa na mambo a bintu byatama byaubile Saulo ne kulengela Yehoba kupesha ntanda. Bena Gibeona kechi baambile’mba bebape mali ne, pakuba baambile’mba bebape baana ba balume ba muntu ‘wakebelenga kwibavizha’ kuba’mba bebepaye. (Bala. 35:30, 31) Davida wibapaine kwi abo.—2 Sam. 21:2-6.

Pa kikye kimye, Saulo ne Yonafwanyi saka bafwa kala mu nkondo, bino mwana wa kwa Yonafwanyi aye Mefibosheta saka akiji na bumi. Walemene kufumatu ku bwanyike kimye kyo aponene panshi, kabiji kechi wivwangilemo kimye nkambo yanji kyo atujile bulemo bena Gibeona ne. Davida ne Yonafwanyi bachipile kutwajijila kwikala balunda, kubikapotu ne baana babo, kabiji kino kyavwangilemo ne mwana wa kwa Yonafwanyi aye Mefibosheta. (1 Sam. 18:1; 20:42) Jishimikila jaamba’mba: “Mfumu [Davida] waubijile lusa Mefibosheta, mwana wa kwa Yonafwanyi, Yonafwanyi mwana wa kwa Saulo, na mambo a luchipo lo bachipile mu jizhina ja Yehoba.”—2 Sam. 21:7.

Nangwa byonkabyo, Davida waubile kintu kyalombele bena Gibeona. Wibapele baana babalume babiji ba kwa Saulo, kabiji umo pe abo wajinga Mefibosheta, kabiji wibapele ne bankana ba kwa Saulo batanu. (2 Sam. 21:8, 9) Kyaubile Davida kyafumishe mambo a mashi mu ntanda.

Kuji kintu kyanema kyo tufunjilako ku jino jishimikila. Mizhilo ya Lesa yaambile’mba: “Baana . . . kechi bafwainwa kufwa na mambo a bubi bwa bashabo ne.” (Mpitu. 24:16) Inge kya kuba’mba baana babiji ba kwa Saulo ne bankana banji batanu kechi bajinga na mambo ne, Yehoba inge kechi waswishishe kuba’mba bebepaye ne. Kabiji mizhilo yaambile’mba: “Muntu bafwainwa kumwipaya na mambo a bubi bwanji mwine.” Kyamweka bano bantu ba mu kisemi kya kwa Saulo bafwile bevwangilemo kimye Saulo kyo akebelenga kuvizha bena Gibeona. Onkao mambo, bafwile na mambo a bubi bwabo.

Jino jishimikila jibena kwitufunjisha kuba’mba muntu kechi wafwainwa kwikangaizha pa kyatama kyo auba kupichila mu kulanguluka nangwa kwamba’mba nalondejilengatu mikambizho ne. Kishimpi kya mu Baibolo kyaamba’mba: “Wamisha mu jishinda mo wenda, ne mashinda obe onse akekala bulongo.”—Maana 4:24-27; Efi. 5:15.