1-2. (a) Paulo wajinga pi kimye kyo anembejile bena Efisesa nkalata? (b) Ñanyi mepuzho o tusakwisambapo?

 KIMYE kyo bamukashijile pa nzubo mu Loma, mutumwa Paulo wakebelenga kutundaika bena Kilishitu bakwabo. Wibanembejile makalata mambo kechi wakonsheshe kwibafwakesha ne. Wanembele imo nkalata ku bena Efisesa nobe mu 60 nangwa mu 61 C.E.​—Efi. 1:1; 4:1.

² Pa myaka nobe jikumi saka akyangye kwibanembela ino nkalata, Paulo waikele kimye kyabaya mu Efisesa na kusapwila ne kufunjisha mambo awama. (Byu. 19:1, 8-10; 20:20, 21) Watemenwe bingi kabiji wakebelenga kwibakwasha kutwajijila kwikala ba kishinka kwi Yehoba. Pano mambo ka o anembejile nkalata bena Kilishitu bashingwa yaambilenga pa mfishi ne pa kyeya? Ñanyi bintu bena Kilishitu bonse byo bafwainwa kufunjilako ku bintu byo ebajimwineko? Twayai twisambe pa mikumbu ya ano mepuzho.

KUFUMA MU MFISHI NE KUYA MU KYEYA

3. Ñanyi byambo bya kifwanyikizho Paulo byo aingijishe mu nkalata yo anembejile bena Efisesa?

³ Paulo wanembejile bena Kilishitu bajinga mu Efisesa amba: “Kala mwajinga mfishi, pakuba luno mwi kyeya.” (Efi. 5:8) Paulo waingijishe bino byambo bya kifwanyikizho bya kuba’mba mfishi ne kyeya pa kulumbulula bena Efisesa byo bapimpwile byubilo byabo. Twayai twisambe pa ene mambo Paulo o aambijile’mba bena Efisesa ‘kala bajinga mfishi.’

4. Mu ñanyi jishinda bena Efisesa mo baikejile mu mfishi ya bupopweshi bwa bubela?

 ⁴ Kwikala mu mfishi na mambo a bupopweshi bwa bubela. Saka bakyangye kufunda bukine ne kwikala bena Kilishitu, bena Efisesa Paulo bo anembejile nkalata, balondejilenga mafunjisho a bupopweshi bwa bubela kabiji baubilenga bingelekezha. Mu muzhi wa Efisesa mwajinga nzubo ya lesa wa Atemesa yayile bingi nkuwa, nzubo yo bamonanga bantu bavula baikalangako pa kyokya kimye amba yajinga ikatampe, kabiji amba beishimikile bingi bulongo. Bantu bayanga ku ino nzubo na kupopwela bankishi. Bantu bayukile bya kusonga, balenganga bankishi ba lesa wamukazhi aye Atemesa ne kwibapotesha ku bantu kabiji bamwenangamo mali avula bingi. (Byu. 19:23-27) Kabiji bantu bavula baikalanga mu muzhi wa Efisesa, baubanga bya buñanga.​—Byu. 19:19.

5. Mu ñanyi jishinda bena Efisesa mo baikejile mu mfishi na mambo a byubilo byabo bya bunya?

⁵ Kwikala mu mfishi na mambo a byubilo bya bunya. Bantu baikalanga mu Efisesa baubanga bulalelale ne byubilo bikwabo bya bunya. Mu bishimikwa bya kukayilamo byajinga mu uno muzhi ne pa bijiilo bya bupopweshi, bantu bavula besambangatu pa bulalelale ne pa bubipisho bonse. (Efi. 5:3) Bantu bavula ba mu Efisesa ‘balekele kumvwa bumvu’ kwamba pa bintu bya bunya. (Efi. 4:17-19) Saka bakyangye kufunda kyawama ne kyatama, bena Efisesa jiwi jabo ja mu muchima kechi jibakatazhanga ne, kabiji kechi balangulukanga’mba Yehoba ukebazhachisha pa byubilo byabo byatama ne. Kino kyo kyalengejile Paulo kwibalumbulula’mba “abo milanguluko yabo iji mu mfishi kabiji bebafumya ku bumi bufuma kwi Lesa.”

6. Mambo ka Paulo o aambijile bena Efisesa amba pano “luno mwi kyeya”?

⁶ Nangwa byonkabyo, bena Efisesa bamo kechi batwajijile kwikala mu mfishi ne. Paulo wanembele’mba “luno mwi kyeya monka mwi Nkambo.” (Efi. 5:8) Batendekele kwikela mwayijile bintu byo bafunjile mu Mambo a Lesa byajinga nobe kyeya kibatangijilanga. (Sala. 119:105) Bena Efisesa balekele kulondela byubilo byatama byajinga mu bupopweshi bwa bubela. Batendekele kulondela Lesa kabiji bebikilengako kupopwela Yehoba ne kumutookesha ku muchima.​—Efi. 5:1.

7. Bwikalo bwetu bwipasha byepi na byajinga bwikalo bwa bena Kilishitu bena Efisesa?

 ⁷ Kyo kimotu, saka tukyangye kufunda bukine twajinga mfishi mambo twajinga mu bupopweshi bwa bubela kabiji twajinga na byubilo byatama. Atweba bamo twasekelelanga moba a kukokoloka a bupopweshi bwa bubela. Bakwabo nabo bajinga na byubilo byatama. Pano bino, byo twafunjile mizhilo ya Yehoba yaamba pa kuyuka kyawama ne kyatama, twapimpwile byubilo byetu. Twatendekele kwikala bwikalo butookesha Yehoba ku muchima kabiji twamwenamo bintu byawama bingi. (Isa. 48:17) Nangwa byonkabyo, kechi kyapeela kutwajijila kwenda mu kyeya ne kubula kubwela mu mfishi ne. Pano twafwainwa kuba byepi pa kuba’mba tutwajijile ‘kwenda nobe baana ba kyeya’?

CHINUZHUKAI MFISHI

8. Kwesakana na Efisesa 5:3-5, ñanyi bintu bena Efisesa byo bafwainwe kuchinuzhuka?

⁸ Tangai Efisesa 5:3-5. Pa kuba’mba babule kubwela mu mfishi, bena Kilishitu ba mu Efisesa bafwainwe kutwajijila kukaana kuba bintu byafichishanga Yehoba ku muchima. Bino byavwangilemo bulalelale ne kwamba pa bubipisho buji bonse. Paulo wavulwilemo bena Efisesa kuba’mba bafwainwe kutwajijila kuchinuzhuka bino bintu pa kuba’mba ‘bakaswane Bufumu bwa Kilishitu ne bwa Lesa.’

9. Mambo ka o twafwainwa kuchinuzhukila kuba bintu byakonsha kwitulengela kuba bulalelale?

⁹ Ne atweba twafwainwa kutwajijila kwibikako kubula kwingila “mingilo yatu ya mu mfishi.” (Efi. 5:11) Inge muntu keatale, kuteleka ne kwamba pa bintu byatama, kipeela bingi kwibyuba. (Nte. 3:6; Yako. 1:14, 15) Mu kyalo kimo, balongo bavula balengele musabilo wa pa Intaneti wa kwisambilapo. Patanshitu, besambilenga pe Yehoba ne pa bukine. Nangwa byonkabyo, mu kuya kwa moba, batendekele kwamba pa byatama nabiji bulalelale. Balongo bavula bajinga mu jino jibumba, baswile’mba ino misambo yatama ibalengejile kuba bulalelale.

10. Satana ukeba’mba tumonenga byepi bintu? (Efisesa 5:6)

¹⁰ Ino ntanda ya kwa Satana ikeba’mba atweba tumonenga byubilo byatama byakanya Yehoba amba bijitu bulongo. (2 Pe. 2:19) Ino yo milanguluko ya bantu, mambo jino jo jishinda jimo Satana jo aingijisha pa myaka yavula kongwelamo bantu pa kuba’mba babule kuyuka kyawama ne kyatama. (Isa. 5:20; 2 Ko. 4:4) O ene mambo mu mafilimu avula lelo jino, mitanchi ya pa TV ne byo batambisha pa Intaneti o bibena kulengela bantu kulengulula mizhilo ya Yehoba. Satana ukeba atweba kuba’mba tulangulukenga’mba byubilo ne miteetotu ikwabo yatama bijitu bulongo mambo bitusangajika.​—Tangai Efisesa 5:6.

11. Byapichilemo nyenga Angela bimwesha byepi amba kyanema kulondela lujimuno luji pa Efisesa 5:7? (Monai ne kipikichala.)

¹¹ Satana ukeba’mba tupwanañanenga na bantu bakonsha kwitulengela kulala mizhilo ya Yehoba. O ene mambo Paulo o ajimwineko bena Efisesa amba: “Kange mupwanañanenga nabo ne,” ko kuba’mba bantu boba bintu byashikwa Lesa. (Efi. 5:7) Twafwainwa kuvulukanga’mba kechi tupwanañanatu na bantu bo tumona kilungi na kilungi ne, bino mwavwangwa kupwanañana ne na boba bo twisamba nabo pa foni nangwa pa Intaneti. Nangwa byonkabyo, atweba lelo jino, twafwainwa kujimuka bingi kukila ne byo kyajinga ku bena Efisesa mambo ano moba kechi twisambatu na bantu bo tumona kilungi na kilungi ne, bino twisamba ne na bantu pa foni ne pa Intaneti. Nyenga Angela a wikala ku Asia, wamwene kizumba kiji mu kupwanañana na bantu pa foni ne pa Intaneti.  Waambile’mba: “Kupwanañana na bantu pa Intaneti kwakonsha kulengela muntu kutendeka kupimpula milanguluko yanji pachepache. Nobe mu kukopatu kwa jiso, natendekele kulanguluka’mba kijitu bulongo kwikala na balunda babula kulondela mafunde a mu Baibolo. Ko kyakayilenga, natendekele kulanguluka’mba kyajingatu bulongo kwikala bwikalo bufichisha Yehoba ku muchima.” Kyawaminekotu ke kya kuba’mba bakulumpe mu kipwilo bakwashishe nyenga Angela kupimpula byubilo byanji. Waambile’mba: “Luno nguba bintu bikosesha bulunda bwami ne Yehoba kukila kupwanañana na bantu ba pa Intaneti baji na byubilo byatama.”

12. Ñanyi kintu kiketukwasha kulondela mizhilo ya Yehoba itukwasha kuyuka kyawama ne kyatama?

¹² Twafwainwa kukaana ndangulukilo yatama ya bantu ba mu ino ntanda bamba’mba byubilo byatama bijitu bulongo. Twayukishatu bulongo kuba’mba ndangulukilo ya uno mutundu yatama. (Efi. 4:19, 20) Twafwainwa kwiipuzha’mba: ‘Nanchi nkebesha kuchinuzhuka kupwanañana na bantu bo ñingila nabo, bo mfunda nabo ku sukulu nangwa bantutu bakwabo babula kunemeka mizhilo ya Yehoba nyi? Nanchi nchinchika ne kulondela mizhilo ya Yehoba nangwa kya kuba bamo bakonsha kutendeka kuñendeleka nyi?’ Byonka byaamba 2 Timoti 2:20-22, twafwainwa kujimuka bingi pa kusala balunda netu nangwatu mu kipwilo. Twafwainwa kuvulukanga’mba bamo kechi bakonsha kwitukwasha kutwajijila kwingijila Yehoba mu bukishinka ne.

ENDAINGA “NOBE BAANA BA KYEYA”

13. Byambo bya kuba’mba “endainga nobe baana ba kyeya” bilumbulula ka? (Efisesa 5:7-9)

¹³ Paulo watundaikile bena Kilishitu ba mu Efisesa kutwajijila kukaana mfishi ne kwibatundaika ‘kwendanga nobe baana ba kyeya.’ (Tangai Efisesa 5:7-9.) Bino byambo bilumbulula ka? Bilumbulula kubanga bintu kimye kyonse bimwesha’mba twi bena Kilishitu ba kine. Jishinda jimo jo twakonsha kubilamo bino ke kutanganga ne kufunda Baibolo pamo na mabuku etu alumbulula Baibolo. Kyanema bingi kuyuka byaubanga Yesu Kilishitu ne byo afunjishenga, aye “kyeya kya pano pa ntanda.”​—Yoa. 8:12; Maana 6:23.

14. Mupashi wazhila wakonsha kwitukwasha byepi?

 ¹⁴ Kabiji twafwainwa kulomba mupashi wazhila wa Lesa pa kuba’mba etukwashe kutwajijila kuba bintu bimwesha’mba twi “baana ba kyeya.” Mambo ka? Mambo kyakatazha bingi kutwajijila kwikala batooka mu ino ntanda muji byubilo byatama. (1 Tesa. 4:3-5, 7, 8) Mupashi wazhila wakonsha kwitukwasha kukana ndangulukilo ya bantu ba mu ino ntanda babula kumwena bintu monka mwibimwena Yehoba. Kabiji mupashi wa Lesa witukwasha kwikala na “buwame bonse [ne] bololoke.”​—Efi. 5:9.

15. Mu ñanyi mashinda mo tutambwila mupashi wazhila? (Efisesa 5:19, 20)

¹⁵ Jishinda jimo Lesa jo akonsha kwitupeelamo mupashi wanji wazhila ke kumulomba. Yesu waambile’mba Yehoba ‘upana mupashi wazhila ku boba bamulomba.’ (Luka 11:13) Kabiji Yehoba witupa mupashi wanji wazhila inge twapwila pamo na kumutota. (Tangai Efisesa 5:19, 20.) Mupashi wazhila uketukwasha kwikalanga bwikalo butookesha Lesa ku muchima.

16. Ñanyi kintu kiketukwasha kufuukula bintu bulongo? (Efisesa 5:10, 17)

¹⁶ Umvwe tubena kukeba kufuukula bintu byanema, twafwainwa kuyukanga “kyaswa muchima wa Yehoba” ne kubila bintu monka mwayila kyaswa muchima wanji. (Tangai Efisesa 5:10, 17.) Inge twayuka mafunde a mu Baibolo o twakonsha kwingijisha pa kyo tukeba kufuukula, ko kuba’mba tubena kukeba milanguluko ya Lesa pa kintu kyo tubena kufuukula. Inge twaingijisha mafunde anji, tukafuukula bintu bulongo.

17. Ñanyi bintu byavwangwa mu kwingijisha kimye kyetu bulongo? (Efisesa 5:15, 16) (Monai ne kipikichala.)

¹⁷ Kabiji Paulo wajimwineko bena Kilishitu ba mu Efisesa kwingijishanga bulongo kimye kyabo. (Tangai Efisesa 5:15, 16.) Mulwanyi wetu “aye mubi” kabiji Satana, ukeba atweba kupayankana na kuba bintu bya mu ino ntanda pa kuba’mba tukankalwenga kwikala na kimye kya kwingijila Lesa. (1 Yoa. 5:19) Mwina Kilishitu wakonsha kwiyeka na kukeba mali, kukeba kufunda kufika palepa nangwa kutwezhamo  ne mutwe mu nkito mu kifulo kya kwingijila Yehoba. Inge mwina Kilishitu wauba bino, ko kuba’mba watendeka kulanguluka nobe bantu ba mu ino ntanda babula kwingijila Yehoba. Bino bintu kechi byatama ne, pano bino, kechi byo byo twafwainwa kutangizhako mu bwikalo bwetu ne. Pa kuba’mba twendenga “nobe baana ba kyeya,” twafwainwa ‘kwingijisha kimye kyetu bulongo,’ ko kuba’mba kuta muchima pa bintu byanema.

18. Ñanyi bintu byaubile mulongo Donald pa kuba’mba engijishenga kimye kyanji bulongo?

¹⁸ Monaingapo mashinda akonsha kwimukwasha kwingijila Yehoba bulongo. Abino byo byaubile mulongo Donald wikala ku South Africa. Waambile’mba: “Nalangulukile pa byajinga bwikalo bwami kabiji nalombele kwi Yehoba kuba’mba ankwashe kwingilanga kimye kyabaya mu mwingilo. Nalombele kuba’mba ntaane nkito yafwainwa kunshilangako kimye kyabaya kya kusapwila. Yehoba wankwashishe kutaana nkito yawama. Amiwa ne benakwami twatendekele mwingilo wa kimye kyonse.”

19. Twakonsha kuba byepi pa kuba’mba twendenga “nobe baana ba kyeya”?

¹⁹ Nkalata Paulo yo anembejile bena Kilishitu ba mu Efisesa ibakwashishe kutwajijila kwikala ba kishinka kwi Yehoba. Kabiji mikambizho iji mu ino nkalata itukwasha ne atweba. Byonka byo twafunda, ino nkalata yakonsha kwitukwasha kusala bulongo bya kisangajimbwe ne bantu ba kupwanañana nabo. Yakonsha kwitutundaika kutanganga Baibolo kimye kyonse pa kuba’mba tutwajijile kwenda mu bukine. Kabiji yaamba ne pa mupashi wazhila byo etukwasha kwikala na byubilo byawama. Kulondela mikambizho yanembele Paulo kwitukwasha kufuukula bintu bulongo byakwatankana na milanguluko ya Yehoba. Inge ketube bino bintu, tukachinuzhuka mfishi ya mu ino ntanda ne kutwajijila kwenda mu kyeya.