1-2. Muntu inge wabatizhiwa, ñanyi bintu byawama byo amwenamo?

 KITULETELA bingi lusekelo inge twabatizhiwa ne kwikala mu kisemi kya Yehoba. Kwikala mu kino kisemi kwitulengela kwikala balunda ne Yehoba. Kino kitulengela kumvwa byonka byaumvwine nyimbi wa Salamo aye Davida waambile’mba: “Ye mwine wa lusekelo ye musala ne kumuleta kwipi kuba’mba ekale mu bipango byenu.”​—Sala. 65:4.

² Yehoba kechi uswisha muntu ujitu yense kwiya mu bipango byanji ne. Byonka byo twafunjile mu mutwe wafumako, tufwenya kwipi na boba bamwesha’mba bakeba kwikala na bulunda bwakosa ne aye. (Yako. 4:8) Inge mwipana kwi Yehoba ne kubatizhiwa, mufwenya kwipi ne aye. Mwafwainwa kushiinwa kuba’mba inge mwabatizhiwa, Yehoba ‘ukemwitulwila mapesho avula kya kuba kechi mukakajilwa kintu nangwa kimo ne.’​—Mala. 3:10; Yele. 17:7, 8.

3. Ñanyi bintu byafwainwa kubanga bena Kilishitu bepana ne kubatizhiwa? (Musapwishi 5:4, 5)

³ Kubatizhiwa yo ntendekelotu ya mwingilo wenu wa kwingijila Yehoba. Inge mwipana, mwafwainwa kwibikako kwikela monka mwayila kwipana kwenu kwi Yehoba nangwatu mubena kupita mu meseko nangwa mu bya malwa. (Tangai Musapwishi 5:4, 5.) Byo muji mwana wa bwanga wa kwa Yesu, mwafwainwa kulondelanga byaubanga Yesu ne kukookela mikambizho yanji. (Mat. 28:19, 20; 1 Pe. 2:21) Uno mutwe usakwimukwasha kuba bino.

TWAJIJILAI ‘KULONDELA’ YESU NANGWATU MUBENA KUPITA MU MESEKO NE MU BYA MWALWA

4. Mu ñanyi jishinda baana ba bwanga ba kwa Yesu mo basendela ‘kichi kya lumanamo’? (Luka 9:23)

⁴ Kange mulangulukenga’mba inge mwabatizhiwa mukekalangatu kwa kubula kupita mu makatazho ne. O ene mambo, Yesu o  aambijile’mba baana banji ba bwanga bakasenda ‘kichi kya lumanamo’ kabiji amba bafwainwa kwikisendanga “pa juba pa juba.” (Tangai Luka 9:23.) Nanchi Yesu walumbulwilenga’mba baana banji ba bwanga bakamanamanga kimye kyonse nyi? Ine kwalepeshatu. Walumbulwilengatu kuba’mba kununga pa mapesho o bakekalanga nao, bakapitanga ne mu makatazho. Kabiji ano makatazho amo o bakapitangamo, akabaya bingi.​—2 Timo. 3:12.

5. Yesu waambile’mba ñanyi bintu byawama bimwenamo boba basankilapo bintu bya ku mubiji?

⁵ Anweba bamo kampe ba mu kisemi kyenu bemwimena ku ntundwa nangwa kampe mwasankilapo bya ku mubiji na mambo a kutangizhako bufumu patanshi. (Mat. 6:33) Inge byo byo kiji, yukai’mba Yehoba wayuka byonse byo mwauba pa kuba’mba mumwingijilenga. (Hebe. 6:10) Kyamweka ne anweba mwaswa bukine bwa byambo byaambile Yesu bya kuba’mba: “Kine nemwambila namba, kafwako washa nzubo, bakolojanji nangwa bankasanji ba balume, banyenga yanji, bainanji, bashanji, baana nangwa majimi na mambo a amiwa ne na mambo a mambo awama ukabula kutambula byavula kufika ku 100 mu kino kimye​—mazubo, bakolojanji ba balume, bankasanji ba balume, banyenga yanji, bainanji, baana, ne majimi, ne kumanyikwa ne mu bwikalo bukeya bumi bwa myaka ne myaka ne.” (Mako 10:29, 30) Bintu byawama byo mwamwenamo byanema bingi kukila bintu byonse byo mwasankilapo.​—Sala. 37:4.

6. Mambo ka o mwafwainwa kutwajijila kwibikako kushinda “bya kusakasaka bya mubiji” panyuma ya kubatizhiwa?

⁶ Nangwa mwabatizhiwa, mwafwainwa kutwajijila kwibikako kushinda “bya kusakasaka bya mubiji.” (1 Yoa. 2:16) Kiji bino, mambo mukiji bambulwakulumbuluka bafuma mu kisemi kya kwa Adama. Pa bimye bimo, mwakonsha kumvwa byonka byaumvwine mutumwa Paulo. Wanembele’mba: “Mu muchima wami nsekela bingi mu mizhilo ya Lesa, bino namona mu mubiji wami muji muzhilo mukwabo ubena kulwa na muzhilo wa mu muchima wami ne kuntwala mu buzha ku muzhilo wa bundengamambo uji mu mubiji wami.” (Loma 7:22, 23) Mwakonsha kulefulwa na mambo a kwibikako kukana bintu byatama bisakasaka muchima wenu. Nangwa byonkabyo, kulanguluka pa byo mwalayile Yehoba byo mwipaine kwi aye, kukemulengela kwikala na bulume bwa kushinda meseko. Kishinka ke kya kuba’mba kuvuluka mulaye wenu wa kwipana kwi Yehoba, kukemukwashanga kushinda meseko. Mu ñanyi jishinda?

7. Kwipana kwi Yehoba kukemukwasha byepi kutwajijila kwikala ba kishinka kwi aye?

⁷ Kwipana kwi Yehoba kulumbulula’mba mwikana anweba bene. Kino kibena kulumbulula’mba mukachinuzhukanga bisakasaka muchima wenu pa kuba’mba mutookeshenga Yehoba ku muchima. (Mat. 16:24) Onkao mambo, inge mwaesekwa, kechi mukakankazhamanga pa byo mwafwainwa kuba ne. Mukafuukwila jimo kintu kyawama kyo mwafwainwa kuba, ko kuba’mba kutwajijila kwikala wa kishinka kwi Yehoba. Mukakebesha kutwajijila kutookeshanga Yehoba ku muchima. Umvwe mwauba bino, mukoba byonka byaubile Yoba. Nangwa kya kuba wapichile mu makatazho ashinkisha bulaka, waambile’mba: “Kechi nkasankilapo bulumbuluke bwami ne.”​—Yoba 27:5.

8. Kulanguluka pa lulombelo lwenu lwa kwipana kwi Yehoba kukemukwasha byepi kushinda meseko?

⁸ Kulanguluka pa lulombelo lwenu lwa kwipana kwi Yehoba, kukemulengela kushinda meseko onse. Nanchi mwakonsha kutendeka kusengula na muntu wabula mwina kwenu nyi? Ine, mambo mwamulayile kala Yehoba kuba’mba kechi mukoba kintu kya uno mutundu ne. Inge mwabula kuswisha ino milanguluko yatama mu muchima wenu, kechi kikemukatazha kwiisankilapo ne. Kabiji kechi mukaya mu jishinda “ja babi” ne.​—Maana 4:14, 15.

9. Kulanguluka languluka pa lulombelo lwenu lwa kwipana kwi Lesa, kukemukwasha byepi kutangizhako bya Bufumu mu bwikalo bwenu?

 ⁹ Mwakonsha kuba byepi inge mwataana nkito ikemulengelanga kubula kutaanwa ku kupwila kimye kyonse? Twaketekela’mba mukayuka bya kuba. Saka mukyangyetu ne kutaana nkito ya uno mutundu, mwayukile kuba’mba kechi mwakonsha kuswa kwiingila ne. Onkao mambo, kechi mwafwainwa kuswa ino nkito ne kulanguluka’mba mukatangizhako mingilo ya Yehoba kulutwe ne. Yesu watookeshanga Shanji ku muchima. Onkao mambo, kulanguluka languluka pa byo aubile kukemulengela kukana bintu bifichisha Lesa ku muchima ye mwalayile kwingijila.​—Mat. 4:10; Yoa. 8:29.

10. Yehoba ukemukwasha byepi kutwajijila ‘kulondela’ Yesu panyuma ya kubatizhiwa?

¹⁰ Kishinka ke kya kuba’mba byo muba umvwe mwaesekwa, byo bikamwesha inge mukatwajijila ‘kulondela’ Yesu. Kabiji mwafwainwa kushiinwa’mba Yehoba ukemukwasha. Baibolo waamba’mba: “Lesa wa kishinka, kabiji kechi ukemuleka’mba mwesekwe lweseko lwakila pa bulume bwenu ne, bino mu lweseko lonse aye ukemumwena jishinda ja kuchinchikilamo.”​—1 Ko. 10:13.

BYO MWAFWAINWA KUBA PA KUBA’MBA MUTWAJIJILE KULONDELA YESU

11. Ñanyi jishinda jimo janema jo mwakonsha kumwesheshamo amba mwatwajijila kulondela Yesu? (Monai ne kipikichala.)

¹¹ Yesu waingijilanga Yehoba na muchima yense kabiji walombanga kimye kyonse. (Luka 6:12) Jishinda jimo jawama jakonsha kwimukwasha kulondela Yesu panyuma ya kubatizhiwa ke kutwajijila kuba bintu bikemulengela kufwenya kwipi ne Yehoba. Baibolo waamba’mba: “Monka mo twaendelako kala kufika ne pano po tuji, twayai twendenga bulongo monkamo.” (Fili. 3:16) Pa kimye pa kimye mukomvwanga masawakya a balongo ne banyenga bafuukulapo kwingilako pakatampe mu mwingilo  wa Yehoba. Kampe batainwe ku Sukulu wa Basapwishi ba Bufumu nangwa bayile na kwingijila kwakepa basapwishi. Inge mukeba kuba byaubile bano balongo ne banyenga, ko kuba’mba mwafuukulapo kintu kyawama. Bantu ba Yehoba bakebesha kwingilako pakatampe mu mwingilo wanji. (Byu. 16:9) Pano mwakonsha kuba byepi inge pa kino kimye kechi mwakonsha kwingilako ino mingilo ne? Kange mwiesakanyenga ku bakwenu bakonsha kwingilako ino mingilo ne. Kintu kyanema ke kutwajijila kuchinchika. (Mat. 10:22) Vulukainga kimye kyonse kuba’mba musangajika bingi Yehoba inge kemumwingijile kwesakana na papelela bulume bwenu. Jino ke jishinda janema bingi jo mwakonsha kumwesheshamo amba mwatwajijila kulondela Yesu panyuma ya kubatizhiwa.​—Sala. 26:1.

12-13. Ñanyi kintu kyo mwafwainwa kuba inge kizaku kyenu kya kwingijila Yehoba kekiye na kupwa? (1 Kolinda 9:16, 17) (Monai ne kakitenguluzha ka kuba’mba “ Twajijilai Kunyema Kapeela.”)

¹² Mwakonsha kuba byepi inge mwamona’mba kechi mubena kulomba kufuma panshi ya muchima nangwa inge kechi mubena kwingila mwingilo wa kusapwila na kizaku byonka byo mwaingilanga kala ne? Mwakonsha kuba byepi umvwe mwamona’mba kechi mubena kwiyowa kutanga Baibolo byonka byo mwaubanga kala ne? Abino inge byo byo mubena kumvwa panyuma ya kubatizhiwa, kange mulangulukenga’mba mupashi wa Yehoba wafuma pe anweba ne. Na mambo a kuba’mba twi bambulwakulumbuluka, milanguluko yetu yakonsha kupimpulwa. Umvwe kizaku kyenu kibena kuya na kupwa, langulukai pa bintu byawama byaubanga mutumwa Paulo. Nangwa kya kuba wibikangako kulondela byaubanga Yesu, wayukile’mba pa bimye bimo kechi wakonsheshe kuba byo akebanga kuba ne. (Tangai 1 Kolinda 9:16, 17.) Waambile’mba: “Umvwe namwingila saka nabula kusaka, kyo kimotu bampa bukalama.” Kino kibena kulumbulula’mba Paulo wakebeshenga  kupwisha mwingilo wanji nangwa kya kuba pa bimye bimo waumvwanga nobe kechi wakonsha kwingila ne.

¹³ Po pamotu, kange mufuukulenga bintu kwesakana na byo mubena kumvwa ku muchima ne. Ibikaingako kuba byawama nangwa kya kuba mubena kumvwa kuba’mba kechi mwakonsha kwibyuba ne. Inge mwatwajijila kuba byawama, pa kupitapo kimye milanguluko yenu ikapimpulwa. Onkao mambo, kutwajijila kuba bintu bikosesha bulunda bwenu ne Yehoba kukemukwasha kutwajijila kulondela Yesu panyuma ya kubatizhiwa. Inge mwatwajijila kwingijila Yehoba saka mwachinchika, mukatundaika bingi balongo ne banyenga.​—1 Tesa. 5:11.

“IESEKAINGA ANWE BENE . . . IPIMAINGA ANWE BENE”

14. Mwafwainwa kwipimanga byepi kimye kyonse, kabiji mambo ka? (2 Kolinda 13:5)

¹⁴ Kyanema bingi kwipimanga anweba bene kimye kyonse panyuma ya kubatizhiwa. (Tangai 2 Kolinda 13:5.) Pa kimye pa kimye, langulukainga pa biji bwikalo bwenu ne byubilo byenu pa kuba’mba muyuke inge mulomba pa juba pa juba, kutanga ne kufunda Baibolo, kutaanwa ku kupwila ne kusapwila kimye kyonse. Monaipo mashinda akonsha kwimukwasha kwingijilamo ino mingilo. Pa kuba’mba mube bino, iipuzhai ano mepuzho: ‘Nanchi nakonsha kulumbulwila bantu mafunjisho atanshi a mu Baibolo nyi? Ñanyi mashinda akonsha kunkwasha kwingilanga bulongo mwingilo wa kusapwila? Nga milombelo yami, nanchi imwesha’mba naketekela mwi Yehoba na muchima wami yense nyi? Abya ntaanwa ku kupwila kimye kyonse nyi? Nakonsha kuba byepi pa kuba’mba nteshengako muchima ne kukumbulapo pa kupwila?’

15-16. Ñanyi bintu byo mwafunjilako ku byamwekejile mulongo umo pa byo mwafwainwa kushinda meseko?

¹⁵ Kabiji mwafwainwa kuyuka bintu byo mubula kuba bulongo. Mulongo Robert walumbulwile bingi bulongo kino kishinka byo aambile pa kyamumwekejile. Waambile’mba: “Byo najinga na myaka 20, naingilanga nkito ya kwingilako moba amo mu mulungu. Juba jimo, byo nakotokele ku nkito, mwanamukazhi ye naingilanga nanji wangichile kuya ku nzubo kwanji. Wañambijile’mba, ‘nakutemwa bingi kabiji tusakwikalatu bubiji bwetu na kwisamba.’ Patanshitu, nakankazhaminenga, pano bino, pa kupitapo kimye nakaine ne kumulumbulwila ene mambo o nakanyijile.” Mulongo Robert washinjile lweseko kabiji kino kintu kyo aubile kyawamine bingi. Pano bino, pa kupitapo kimye watendekele kulanguluka pa bino bintu byamumwekejile kabiji wamwene’mba wafwainwe kuba bintu mu jishinda japusanako. Waambile’mba: “Kechi nakaine ponkapotu byonka byakaine Yosefwa na muka Potifwalo ne. (Nte. 39:7-9) Kabiji nalangulukilenga pa kine kintu kyandengejile kukankazhama  kukana. Kino kintu kyammwekejile, kyandengejile kuyuka’mba nafwainwe kukosesha bulunda bwami ne Yehoba.”

¹⁶ Ne anweba mwafwainwa kwipimanga byonka byaubile Mulongo Robert. Nangwatu inge mwashinda lweseko, mwafwainwa kwiipuzha’mba, ‘Nanchi nakankazhaminenga pa kushinda lweseko nyi?’ Inge mwamona’mba kuji bintu bimo byo mwabujile kuba bulongo, kange mulefulwe ne. Mwafwainwa kumvwa bulongo mambo mwayuka po mwafwainwa kwingijila. Lombai kwi Yehoba pa kyokyo kintu ne kubapo bintu bimo byakonsha kwimukwasha pa kuba’mba mulondelenga mikambizho ya Yehoba.​—Sala. 139:23, 24.

17. Tunemeka byepi jizhina ja Yehoba inge twaikala ba kishinka kwi aye?

¹⁷ Kuji kintu kikwabo kyo twakonsha kufunjilako ku byamwekejile Mulongo Robert. Wanungilepo’mba: “Byo nakaine, uno mwanamukazhi ye naingilanga nanji wañambijile’mba, ‘Waubile bulongo kukana.’ Namwipwizhe pa kuba’mba ngyuke mo atazhizhe. Walumbulwile’mba mulunda nanji wajinga kala Kamonyi wa kwa Yehoba wamubuujile’mba, banyike bonse Bakamonyi bekala bwikalo bwa bukakongolo mutoma kubiji kabiji amba bakonsha kuswa ponkapotu inge bebambila ku bakwabo kuba bintu byatama. Onkao mambo, wabuujile mukwabo kuba’mba ukangeseka pa kuba’mba akashiinwe inge kine. Naumvwine bingi bulongo mambo nannemekele jizhina ja Yehoba.”

18. Mwafuukulapo kutwajijila kuba ka panyuma ya kubatizhiwa? (Monai ne kakitenguluzha ka kuba’mba “ Mitwe Ibiji Yakonsha Kwimukwasha Panyuma ya Kubatizhiwa.”)

¹⁸ Inge mwipana kwi Yehoba ne kubatizhiwa, mumwesha patooka’mba mubena kukeba kunemeka jizhina janji nangwa bintu bikatazhepotu byepi. Kabiji shiinwai kuba’mba Yehoba wayuka meseko ne bya malwa byo mupitamo. Aye ukemupesha inge mwatwajijila kwikala ba kishinka. Yukai’mba ukengijisha mupashi wanji wazhila ne kwimupa bulume bwa kuba bino. (Luka 11:11-13) Yehoba ukemukwasha kutwajijila kulondela Yesu panyuma ya kubatizhiwa.