1. Ñanyi bintu bimo byawama byo tumwenamo na mambo a kwikala mu jibumba ja Yehoba?

 TWATOKWA bingi pa kwikala mu jibumba ja Yehoba mu ano moba a kupelako akatazha bingi. Nangwa kya kuba bintu bibena kuya na kutaminakotu mu ino ntanda, Yehoba witunengezhezha kisemi kyakwatankana kya balongo ne banyenga. (Sala. 133:1) Witukwasha kwikala na lusekelo mu bisemi byetu. (Efi. 5:33–6:1) Kabiji witupa milangwe ne maana bitukwasha kuyuka bya kuba na bijikila ne kwikala na lusekelo.

2. Ñanyi kintu kyo twafwainwa kuba, kabiji mambo ka?

² Nangwa byonkabyo, twafwainwa kwibikako kutwajijila kwingijila Yehoba mu bukishinka. Mambo ka? Mambo pa bimye bimo bakwetu bakonsha kwituzhingijisha na mambo a bumbulwakulumbuluka bwabo. Kabiji twakonsha kulefulwa na mambo a bintu byo tulubankanya, kikatakata inge twabwezhapo kulubankanya bintutu bimo. Twafwainwa kutwajijila kwingijila Yehoba na mukoyo (1) inge mukwetu mwina Kilishitu wituzhingijisha, (2) inge mwinakwetu witulefula ne (3) inge twalefulwa na mambo a byo tulubankanya. Mu uno mutwe tusakwisamba pa ano makatazho. Kabiji tusakufunjilako ku bantu ba kishinka bo baambapo mu Baibolo.

TWAJIJILAI KWINGIJILA YEHOBA NA MUKOYO INGE BENA KILISHITU BAKWENU BEMUZHINGIJISHA

3. Ñanyi makatazho apitamo bantu ba Yehoba?

³ Lukatazho. Bena Kilishitu bamo boba bintu byakonsha kwituzhingijisha. Bamo bakonsha kwitulefula nangwa kwituba kintu kyatama bingi. Balongo batangijila nabo balubankanya. Bino bintu byakonsha kulengela bamo kuzhinauka’mba kechi baji mu jibumba ja Lesa ne. Mu kifulo kya kutwajijila kwingijila Lesa “na  muchima umo” pamo na balongo ne banyenga, bakonsha kuleka kupwanañana na boba bebazhingijishe nangwa kuleka kupwila. (Zefwa. 3:9) Nanchi kyawama kuba bino nyi? Akilangulukai pa muntu umo ye twakonsha kufunjilako ye baambapo mu Baibolo wapichile mu makatazho a uno mutundu.

4. Ñanyi makatazho apichilemo mutumwa Paulo?

⁴ Muntu ye baambapo mu Baibolo. Mutumwa Paulo wayukile’mba balongo ne banyenga bajinga bambulwakulumbuluka. Balongo ne banyenga bamo bo apwanañenenga nabo mu kipwilo batendekele kumuzhinauka. (Byu. 9:26) Pa kupitapo kimye, bamo batendekele kwamba byatama pe aye pa kuba’mba balengele bakwabo kubula kumuketekela. (2 Ko. 10:10) Paulo wamwene mukulumpe umo mu kipwilo waubile kintu kyakonsheshe kutuntwisha bakwabo. (Nga. 2:11, 12) Kabiji mulunda wa kwa Paulo aye Mako wamufutukilemo. (Byu. 15:37, 38) Paulo inge wakebelenga inge waswishishe bino byamwekele kuleka kupwanañana na bamuzhingijishe. Pano bino, watwajijile kunemeka bano balongo ne banyenga kabiji watwajijile kwingijila Yehoba mu bukishinka. Ñanyi kintu kyakwashishe Paulo kutwajijila kwingijila Yehoba na mukoyo?

5. Ñanyi kintu kyalengejile Paulo kulekelako mambo balongo ne banyenga? (Kolose 3:13, 14) (Monai ne kipikichala.)

⁵ Paulo watemenwe bingi balongo ne banyenga. Kutemwa bakwabo kwalengelanga Paulo kutatu muchima pa byubilo byabo byawama, kechi kuta muchima pa byo balubankanyanga ne. Kabiji buno butemwe bo bwalengejile Paulo kuba byo anembele aye mwine biji pa Kolose 3:13, 14. (Tangai.) Langulukai pe Paulo byo alekejileko mambo Mako. Nangwa kya kuba Mako washiile Paulo mu lwendo lwanji lutanshi lwa bumishonale, Paulo kechi watwajijile kuzhingila ne. Palutwe kacheche, Paulo byo anembejile nkalata kipwilo kya mu Kolose ya kwibatundaika, watakaikile Mako kuba’mba ke mukwabo wa mwingilo ye anemeka kabiji ‘umutekenesha bingi.’ (Kolo. 4:10, 11) Byo ajinga mu kaleya mu Loma, Paulo wanembele kuba’mba bamutumine Mako kwiya na kumukwasha. (2 Timo. 4:11) Paulo walekejileko mambo balongo banji kabiji watwajijile kwibatemwa. Ñanyi bintu byo twafwainwa kufunjilako kwi Paulo?

6-7. Twafwainwa kutwajijila kumwesha byepi butemwe balongo ne banyenga yetu nangwa kya kuba balubankanya? (1 Yoano 4:7)

⁶ Byo tufunjilako. Yehoba ukeba’mba tutwajijile kutemwa balongo ne banyenga. (Tangai 1 Yoano 4:7.) Inge mulongo nangwa nyenga wituba kintu kyatama, twafwainwa kuketekela’mba kechi waubijilemotu ne, bino amba ubena kwibikako kulondela mafunde a mu Baibolo. (Maana 12:18) Lesa watemwa bakalume banji ba kishinka nangwa kya kuba balubankanya.  Inge twalubankanya kechi witusankilapo ne, kabiji kechi utwajijila kwituzhingijila ne. (Sala. 103:9) Ne atweba twafwainwa kulekelangako bakwetu mambo byonka byuba Shetu wa mwiulu!​—Efi. 4:32–5:1.

⁷ Vulukainga’mba mpelo byo ibena kufwenya pepi, twafwainwa kufwenya kwipi ku balongo ne banyenga. Twafwainwa kuketekela’mba kwitumanyika kwakonsha kukizhamo. Bakonsha ne kwitukasa mu kaleya na mambo a lwitabilo lwetu. Inge kino kyamweka, po po tukakebeshanga balongo ne banyenga yetu. (Maana 17:17) Akilangulukai pa byamwekejile Mulongo Josep, a mukulumpe mu kipwilo wa mu kyalo kya Spain. Aye ne balongo bakwabo bebatayile pa kazhima na mambo a kubula kwivwanga mu bya bumulwilantanda. Waambile’mba: “Mu kaleya mo twajinga kyapeelele bingi kwizhingijisha na bakwetu mambo bonse twaikalangatu mu kakibamba kamo. Twitekenyanga atwe bene na bene ne kwilekelako mambo. Kino kitulengejile kukwatankana ne kuzhikijilwa. Mu kaleya mwajinga ne bantu babujilenga kwingijila Yehoba. Juba jimo, nekozhezhe ku mukoko kabiji bambikileko kitute. Onkao mambo, nakankelwenga kwiingijila mingilo amiwa mwine. Pano bino, mulongo umo wanchapijilenga bya kuvwala ne kunkwashatu mu mashinda akwabo. Bammwesheshe butemwe pa kimye kyo nakebeshenga kunkwasha.” Kino kyafwainwa kwitulengela kupwisha makatazho na balongo ne banyenga lonka luno.

TWAJIJILAI KWINGIJILA YEHOBA INGE BENAKWENU BEMULEFULA

8. Ñanyi makatazho apitamo boba baji mu masongola?

⁸ Lukatazho. Baji mu masongola bonse bapita mu makatazho. Baibolo waambishatu patooka kuba’mba aba baji mu masongola “bakamonanga bya malwa mu mibiji yabo.” (1 Ko. 7:28) Mambo ka? Masongola aleta pamo bantu babiji bambulwakulumbuluka baji na byubilo byapusana pusana kabiji ne bintu byo batemwa nabyo byapusana pusana. Bafuma mu bisho ne nkomeno yapusana pusana. Pa kupitapo kimye, batendeka kumwesha byubilo byo babulanga kumwesha saka bakyangye kwisongola. Bintu bya uno mutundu byo bileta makatazho mu masongola. Mu kifulo kya kumonapo mashinda mo bakonsha kupwishisha lukatazho pamo, bakonsha kutendeka kuzhachisha mwinakwabo. Bakonsha ne kutendeka kulanguluka’mba babane nangwa kwikana. Nanchi kuba bino ko kukebalengela kwikala na lusekelo nyi? b Twayai twisambe pa mwanamukazhi umo ye baambapo mu Baibolo watwajijile kwikala wa kishinka kwi Yehoba nangwa kya kuba mwatawanji wamukatezhenga.

9. Ñanyi lukatazho lwapichilemo Abigaila?

⁹ Muntu ye baambapo mu Baibolo. Abigaila wasongwelwe kwi Nabala. Mu Baibolo, Nabala bamulumbulula kuba’mba wakanamine bingi kabiji wajinga na byubilo byatama. (1 Sam. 25:3) Kyamweka Abigaila kyamukatezhenga bingi kwikala na mwanamulume wa uno mutundu. Nanchi Abigaila wakonsheshe kumonapo jishinda ja kupwishishamo masongola anji nyi? Jishinda jamwekele kimye Davida waikele mfumu wa bena Isalela kulutwe kyo aishile kuba’mba epaye mwatawanji aye Nabala wamwambijile mwenga pamo na bakalume banji. (1 Sam. 25:9-13) Abigaila inge wakebelenga, inge wanyemene pa kuba’mba Davida epaye Nabala. Pano bino, wasashijile Davida kuba’mba abule kwipaya mwatawanji Nabala. (1 Sam. 25:23-27) Mambo ka o aubijile bino?

10. Ñanyi kintu kyalengejile Abigaila kutwajijila kuchinchika byo apichilenga mu makatazho mu masongola anji?

 ¹⁰ Abigaila watemenwe bingi Yehoba kabiji wanemekele mizhilo yanji yaamba pa masongola. Kwakubula nangwa kuzhinaukatu ne, wayukile Lesa byo aambijile Adama ne Evwa kimye kyo ebasongweshe. (Nte. 2:24) Abigaila wayukile’mba Yehoba umona masongola amba azhila bingi. Abigaila wakebelenga kutookesha Lesa ku muchima, kabiji kino kyo kyamulengejile kupulusha mwatawanji ne ba mu nzubo yanji. Wapelawizhe kukanya Davida kwipaya Nabala. Kabiji walombele ne lulekelo lwa mambo nangwa kya kuba kechi walengelepo mambo aji onse ne. Yehoba watemenwe bingi uno mwanamukazhi wachinchikile kabiji wajinga na butemwe. Ñanyi bintu baji mu masongola byo bafwainwa kufunjilako ku byaubile Abigaila?

11. (a) Yehoba ukeba baji mu masongola kuba ka? (Efisesa 5:33) (b) Ñanyi bintu byo mwafunjilako ku byaubile nyenga Carmen pa kuba’mba azhikijile masongola anji? (Monai ne kipikichala.)

¹¹ Byo tufunjilako. Yehoba ukeba bamulume ne mukazhi kunemeka masongola nangwa kya kuba umo ubena kwikazha mukwabo bufinda. Lesa utemwa bingi inge baji mu masongola ke bengijile pamo kupwisha makatazho ne kwimwesha butemwe ne kwinemeka. (Tangai Efisesa 5:33.) Twayai twisambe pa byamwekejile nyenga Carmen. Byo papichile myaka itanu na umo kufuma po besongwejile, nyenga Carmen watendekele kufunda Baibolo na Bakamonyi ba kwa Yehoba kabiji palutwe kacheche wabatizhiwe. Waambile’mba: “Bamwatawami kechi basekejilemo ne. Bashikilwe bingi Yehoba. Bañambilanga mwenga ne kukeba kunsha.” Nangwa byonkabyo, nyenga Carmen watwajijile kuchinchika mu masongola anji. Pa myaka 50, watwajijile kunemeka ne kutemwa bamwatawanji. Wanungilepo amba: “Mu kuya kwa moba, nafunjile mwa kubila bintu ne kuyuka bya kwisamba bulongo na bamwatawami. Nayukile’mba Yehoba umona masongola amba azhila bingi. Onkao mambo, nebikangako kwiazhikijila. Kechi nakebelenga kupwisha masongola ami ne, mambo natemwa Yehoba.” c Inge mwaikala na makatazho mu masongola enu, ketekelai kuba’mba Yehoba ukemukwasha kutwajijila kuchinchika.

TWAJIJILAI KWINGIJILA YEHOBA NA MUKOYO INGE MWALEFULWA NA MAMBO A BYO MULUBANKANYA

12. Ñanyi lukatazho lo twakonsha kupitamo inge twalenga mambo akatampe?

¹² Lukatazho. Inge twalenga mambo akatampe tulefulwa bingi. Baibolo walumbulula’mba inge twalenga mambo ‘muchima wetu ulajika kabiji uba bulanda.’ (Sala. 51:17) Mulongo  Robert waingijile na ngovu pa myaka yavula pa kuba’mba afikilemo kwikala nkwasho mu kipwilo. Nangwa byonkabyo, walengele mambo akatampe amulengejile kuyuka’mba wafichishe Yehoba ku muchima. Waambile’mba: “Jiwi jami ja mu muchima jankatezhe bingi kabiji naumvwine ne munda kululu, najijile ne kulomba kwi Yehoba. Nalangulukilenga’mba Lesa kechi wakonsha kunteleka ne, mambo namufichishe ku muchima.” Inge twalenga mambo, tulefulwa bingi mambo muchima wetu ulajika ne kwitulengela kulanguluka’mba Yehoba witusankilapo. (Sala. 38:4) Langulukai pa muntu wa kishinka ye baambapo mu Baibolo watwajijile kwingijila Yehoba nangwa kya kuba walengele mambo akatampe.

13. Ñanyi mambo akatampe alengele mutumwa Petelo, kabiji ñanyi kintu kyalengejile kuba’mba alenge ano mambo?

¹³ Muntu ye baambapo mu Baibolo. Bufuku Yesu saka bakyangye kumwipaya, mutumwa Petelo walubankenye javula. Kabiji kino kyamulengejile kulenga mambo akatampe. Patanshitu, Petelo wiketekejile mwine ne kwamba’mba nangwatu batumwa bakwabo bakamushe Yesu, aye kechi ukamusha ne, ukatwajijila kwikala wa kishinka. (Mako 14:27-29) Kabiji byo bakijinga mu bujimi bwa Ngesemani, Petelo wakankelwe kutwajijila kulaba ne kukenkenta. (Mako 14:32, 37-41) Kyalondejilepo, Petelo wamushiile Yesu balwanyi banji byo baishile na kumukwata. (Mako 14:50) Kyapeleleko, Petelo wakaine Yesu jisatu ne kuchipa amba kechi wamuyuka ne. (Mako 14:66-71) Petelo waubile byepi byo ayukile’mba walenga mambo akatampe? Kyamukolele bingi ku muchima kya kuba watendekele ne kujila, kampe na mambo a kwizhachisha mwine. (Mako 14:72) Akilangulukai byo kyamukatezhe Petelo byo amwene mulunda nanji Yesu bamwipaya pa kupitapo kakimye kacheche. Petelo waumvwine bibi ku muchima.

14. Ñanyi bintu byakwashishe Petelo kutwajijila kwingijila Yehoba na mukoyo? (Monai ne kipikichala.)

¹⁴ Kuji bintu byavula byalengejile Petelo kutwajijila kwingijila Yehoba na mukoyo. Kechi witolwejile ne. Wayile ku baana ba bwanga bakwabo kabiji nabo bamutekeneshe. (Luka 24:33) Kunungapo, Yesu ye basangwile wayile kwi Petelo na kumutundaika. (Luka 24:34; 1 Ko. 15:5) Yesu kechi wazhachishe Petelo pa byo alubankenye ne. Pakuba wamwambijile’mba bakamupa mingilo yanema. (Yoa. 21:15-17) Petelo wayukile’mba walengele mambo akatampe. Pano bino, kechi walekele kwingijila Lesa ne. Mambo ka? Mambo wayukile’mba Nkambo yanji aye Yesu watwajijile kumutemwa. Kabiji bakwabo baana ba bwanga batwajijile kumukwasha. Ñanyi kintu kyo mwafwainwa kufunjilako kwi Petelo?

15. Ñanyi kintu Yehoba kyo akeba’mba tushiinwe? (Salamo 86:5; Loma 8:38, 39) (Monai ne kipikichala.)

 ¹⁵ Byo tufunjilako. Yehoba ukeba’mba tuyuke’mba witutemwa kabiji witulekelako mambo. (Tangai Salamo 86:5; Loma 8:38, 39.) Inge twalenga mambo, tutendeka kwizhachisha. Kumvwa bino kechi kyatama ne. Nangwa byonkabyo, kechi twafwainwa kulanguluka’mba Yehoba kechi witutemwa nangwa’mba kechi wakonsha kwitulekelako mambo ne. Onkao mambo, twafwainwa kulomba bukwasho ponkapotu. Mulongo Robert ye twaambapo kala waambile’mba: “Nalengele mambo na mambo a kuba’mba neketekejile amiwa mwine kuba’mba nkashinda meseko.” Wavulukile’mba wafwainwe kubuulako bakulumpe mu kipwilo. Waambile’mba: “Byo nesambile na bakulumpe mu kipwilo, bankwashishe kuyuka’mba Yehoba wakintemwa kabiji nayukile’mba bakulumpe mu kipwilo nabo bantemwa. Bankwashishe kuyuka’mba Yehoba kechi wansha ne.” Ne atweba twafwainwa kushiinwa’mba Yehoba witutemwa bingi kabiji witulekelako mambo inge twalapila, kubuula bakulumpe mu kipwilo kuba’mba betukwashe ne kubula kubwezhapo kuba bintu byatama byo twaubile. (1 Yoa. 1:8, 9) Inge twashiinwa mu jino jishinda, kechi tukaleka kwingijila Yehoba na mukoyo ne, nangwatu inge twalenga mambo.

16. Mambo ka o twafwainwa kutwajijila kwingijila Yehoba na mukoyo?

¹⁶ Yehoba utemwa bingi inge ke twibikeko kumwingijila mu ano moba a kupelako akatazha. Yehoba wakonsha kwitukwasha kutwajijila kumwingijila na mukoyo nangwatu inge twalefulwa. Twafwainwa kutwajijila kutemwa balongo ne banyenga ne kwibalekelako mambo nangwatu inge betuzhingijisha. Twafwainwa kumwesha’mba twatemwa Yehoba ne kunemeka masongola kupichila mu kwibikako kupwisha makatazho o twakonsha kwikala nao mu masongola. Inge twalenga mambo, twafwainwa kulomba kwi Yehoba kuba’mba etukwashe kushiinwa’mba wakitutemwa kabiji amba witulekelako mambo. Kabiji twafwainwa kutwajijila kumwingijila na mukoyo. Twafwainwa kuyuka’mba tukamwenamo bintu byawama bingi inge twabula ‘kuleka kuba kyawama.’​—Nga. 6:9.