1-2. Ñanyi kintu muntu kyo afwainwa kuba saka akyangye kufuukulapo kubatizhiwa?

 PA MYAKA itanu yapitapo, bantu kukila pa milyonyi umo babatizhiwa kwikala Bakamonyi ba kwa Yehoba. Byonka byo kyajinga ku mwana wa bwanga Timoti wajingako mu myaka kitota kitanshi, bavula pa bano bantu bebafunjishe bukine ‘kufumatu kimye kyo bajinga balukeke.’ (2 Timo. 3:14, 15) Bamo bafunjile pe Yehoba saka bakoma, bakwabo nabo saka bakota kala. Mwanamukazhi umo wafundanga Baibolo na Bakamonyi ba kwa Yehoba, wabatizhiwe saka aji na myaka 97.

² Inge mubena kufunda Baibolo nangwa inge bansemi benu Bakamonyi ba kwa Yehoba, nanchi mubena kulangulukapo kubatizhiwa nyi? Umvwe ibyo, uno ke mulanguluko wawama bingi. Nangwa byonkabyo, saka mukyangye kubatizhiwa, mwafwainwa kwipana kwi Yehoba. Uno mutwe usakwamba pa byo kilumbulula kwipana kwi Lesa. Kabiji usakwimukwasha kuyuka ene mambo o mwafwainwa kubujila kukankazhama kwipana kwi Lesa ne kubatizhiwa inge mwinengezha kala kuba bino.

KWIPANA KULUMBULULA KA?

3. Ambaipo bantu bamo ba mu Baibolo bepaine kwi Yehoba.

³ Kwesakana na Baibolo, kwipana kulumbulula muntu kwifuukwilapo mwine kwingila mwingilo umo wanema. Bena Isalela bajinga kisaka kipaine kwi Yehoba. Bino bantu bamo mu kisaka bepaine kwi Yehoba mu jishinda japusanako. Alona wavwalanga “kayukilo kazhila ka kwipana,” ko kuba’mba kyela kibekauka kyo balenga na ngolode yawamisha kyajinga palutwe ya kitambala kyanji. Kino kyela kya ngolode kyamwesheshe’mba bamusajile  kwi Yehoba kwingila mwingilo wanema, ko kuba’mba kwikala ñanga mukatampe wa bena Isalela. (Levi 8:9) Banazili nabo bepaine kwi Yehoba kwingila mwingilo wanema. Kyambo kya kuba’mba Munazili kyafuma ku kyambo kya Kihebelu kya kuba’mba nazirʹ kilumbulula muntu “ye bapatulako” nangwa “wipana.” Banazili balondelanga bintu byo bebazhijikile byajinga mu mizhilo ya Mosesa.​—Bala. 6:2-8.

4. (a) Mu ñanyi jishinda bantu bepana kwi Yehoba mo bepatwilako kwingila mwingilo wa Yehoba? (b) Kwikana muntu aye mwine kulumbulula ka? (Monai ne kipikichala.)

⁴ Kwipana kwenu kwi Yehoba kumwesha’mba mwasalapo kwikala mwana wa bwanga wa kwa Yesu Kilishitu ne kuba’mba mwanemeka kuba kyaswa muchima wa Lesa mu bwikalo bwenu. Pano ñanyi bintu byavwangwa mu kwipana? Yesu waambile’mba: “Umvwe muntu ukeba kundondela, ekane mwine.” (Mat. 16:24) Byambo bya Kingiliki byatuntululwa’mba “ekane mwine,” byakonsha ne kutuntululwa’mba “kubula kwikela monka mo ukebela.” Byo muji kalume wa Yehoba, kechi mwafwainwa kubanga bintu bifichisha Lesa ku muchima ne. (2 Ko. 5:14, 15) Kino kyavwangamo kukana “mingilo ya mubiji” nabiji bulalelale. (Nga. 5:19-21; 1 Ko. 6:18) Nanchi kulondela ino mikambizho kwakatazha nyi? Ine, kechi kwakatazha ne, inge mwatemwa Yehoba ne kushiinwa’mba mukamwenamo byawama mu kulondela mizhilo yanji. (Sala. 119:97; Isa. 48:17, 18) Mulongo Nicholas waambile’mba: “Mwakonsha kumona mizhilo ya Yehoba nobe kaleya mo bemushinkila mo mwakonsha kukankalwa kuba byo mubena kukeba nangwa luvimba mo bashinkila bokwe kuba’mba abule kwimuja.”

5. (a) Mwipana byepi kwi Yehoba? (b) Kwipana kwapusana byepi na lubatizhilo?(Monai ne kipikichala.)

⁵ Mwipana byepi kwi Yehoba? Pa kwipana, mumulaya mu lulombelo amba mukapopwelanga aye yenka kwapwa kabiji amba mukatangizhako kuba kyaswa muchima wanji mu bwikalo bwenu. Kino kilumbulula kumulaya Yehoba amba mukatwajijila kumutemwa ‘na muchima  wenu yense ne na mweo wenu yense ne na maana enu onse ne na bulume bwenu bonse.’ (Mako 12:30) Mwipana kwi Yehoba kwa bunke bwenu, ko kuba’mba anweba ne Yehoba kwapwa. Kupusanako na kwipana, lubatizhilo lubiwa pa mvula bantu kumwesha’mba mwipana kwi Yehoba. Kwipana kwenu ke lulayañano lwanema bingi kabiji Yehoba ukeba’mba mwikelenga mwayila lulayañano lwenu byonka byo mukeba ne anweba.​—Sapwi. 5:4, 5.

MAMBO KA O MWAFWAINWA KWIPAINA KWI YEHOBA?

6. Ñanyi kintu kilengela muntu kufuukulapo kwipana kwi Yehoba?

⁶ Butemwe kyo kintu kikatampe kimulengela kwipana kwi Yehoba. Buno butemwe kechi bwaimenatu pa byo mumvwa ku muchima ne, bino bwaimena pa ‘kuyukisha bulongo’ ne “kukwatakanya bintu bya ku mupashi,” ko kuba’mba bintu byo mwafunjile pe Yehoba byalengejile butemwe bo mwamutemwa kukoselako. (Kolo. 1:9) Kufunda Binembelo kwimulengela kushiinwa’mba (1) Yehoba koaji, (2) Baibolo ke Mambo anji o banembele na lutangijilo lwa mupashi, ne (3) wingijisha jibumba janji kufikizha kyaswa muchima wanji.

7. Ñanyi bintu byo twafwainwa kubanga saka tukyangye kwipana kwi Lesa?

⁷ Bonse bepana kwi Yehoba bafwainwa kuyuka mafunjisho atanshi aji mu Mambo anji ne kwikela mwayila mikambizho yanji. Bebikako bingi kubuulako bakwabo bintu byo bafunda. (Mat. 28:19, 20) Butemwe bo batemwa Yehoba bwakoselako kabiji bakebesha kumupopwela aye yenka kwapwa. Nanchi byo byo kiji ne kwi anweba nyi? Inge mwamutemwa Yehoba na muchima wenu yense, kechi mukepana ne kubatizhiwa na mambotu a kukeba kutookesha ku muchima muntu wimufunjisha Baibolo nangwa  bansemi benu ne. Kabiji kechi mukoba bino na mambo a kuba’mba bakwenu bonse byo byo babena kuba ne.

8. Kulanguluka pa bintu byawama bitubila Yehoba kwimulengela byepi kufuukulapo kwipana kwi aye? (Salamo 116:12-14)

⁸ Inge kemulanguluke pa bintu byonse bimubila Yehoba, mukakebanga kumusanchila kabiji kino kikemulengela kufuukulapo kwipana kwi Yehoba. (Tangai Salamo 116:12-14.) Baibolo utela Yehoba amba ye Mpanyi wa “bya bupe byonse byawama ne byalumbuluka.” (Yako. 1:17) Bupe bwakila bonse ke kitapisho kya Mwananji, aye Yesu. Akilangulukai pa kino. Bukuzhi bwimulengela kwikala na bulunda bwakosa ne Yehoba. Kabiji bwimulengela kwikala na luketekelo lwa kukekala myaka ne myaka. (1 Yoa. 4:9, 10, 19) Kwipana kwi Yehoba ke jishinda jawama bingi jo mwafwainwa kumwesheshamo amba musanta pa buno butemwe bukatampe bwitumwesha Yehoba kuvwangakotu ne bintu bikwabo byawama bitubila Yehoba. (Mpitu. 16:17; 2 Ko. 5:15) Bintu byafwainwa kwitulengela kusanchila Yehoba bebyambapo mu buku wa kuba’mba Mukekala Myaka ne Myaka! mu lufunjisho 46 pa kishinka 4 paji ne vidyo wa maminiti asatu wa kuba’mba Panainga bya Bupe Byenu kwi Lesa.

NANCHI MWINENGEZHA KWIPANA NE KUBATIZHIWA NYI?

9. Mambo ka muntu o afwainwa kubula kunyemena kwipana kwi Yehoba?

⁹ Kimye kimo mwakonsha kemulanguluke’mba kechi mwinengezha kwipana ne kubatizhiwa ne. Kampe mukeba kupimpulako byubilo byenu pa kuba’mba mulondelenga mizhilo ya Yehoba nangwa kampe mukeba kupembelelako pa kuba’mba mukoseshe lwitabilo lwenu. (Kolo. 2:6, 7) Bantu bo tufunjisha kechi batemwa Yehoba pa kimye kimo ne, kabiji banyike bonse kechi bafuukulapo kwipana ne kubatizhiwa pa jifumbi jimo ne. Yukai byubilo byo mwafwainwa kupimpulako ne kuba byawama kwesakana na papelela bulume bwenu, kechi kwiesakanya na bakwenu ne.​—Nga. 6:4, 5.

10. Mwafwainwa kuba byepi inge mwamona’mba kechi mwinengezha kwipana ne kubatizhiwa ne? (Monai ne kakitenguluzha ka kuba’mba “ Banyike Babena Kukomena mu Bukine.”)

¹⁰ Nangwatu inge mwamona’mba kechi mwinengezha kwipana kwi Yehoba ne, twajijilai kwibikila kino kikonkwanyi. Lombai kwi Yehoba kuba’mba emukwashe kupimpulako byubilo byenu pa kuba’mba mukepane. (Fili. 2:13; 3:16) Yukai’mba Yehoba ukateleka milombelo yenu ne kwimukwasha.​—1 Yoa. 5:14.

ENE MAMBO BAMO O BAKANKAZHAMINA

11. Yehoba wakonsha kwitukwasha byepi kutwajijila kwikala ba kishinka?

¹¹ Bamo batwajijila kukankazhama nangwa kya kuba benengezha kwipana ne kubatizhiwa. Bakonsha kebalanguluke’mba inge nabatizhiwa kampe nkalenga mambo akatampe ne kumpanga mu kipwilo. Umvwe byo byo mulanguluka, yukai’mba Yehoba ukemukwasha ‘kwenda monka mo akebela mwa kumutookeshesha ku muchima.’ (Kolo. 1:10) Kabiji ukemupa ne bulume bwa kuba byaoloka mambo wakwashapo kala bantu bavula kuba byaoloka. (1 Ko. 10:13) Kino kyo kintu kimo kilengela bavula kubula kwibapanga mu kipwilo. Yehoba ukwasha bantu banji pa kuba’mba batwajijile kwikala ba kishinka.

12. Twakonsha kuchinuzhuka byepi kulenga mambo akatampe?

¹² Atweba bonse twi bambulwakulumbuluka kabiji twesekwa kuba byatama. (Yako. 1:14) Nangwa byonkabyo, kiji kwi anweba bene kufuukulapo kyo mwakonsha kuba inge mwalefulwa. Kishinka ke kya kuba’mba anweba bene yenu muji na bulume bwa kwifuukwila byo mwafwainwa kuba. Bantu bamo bakana’mba atweba bonse kechi tuji na bulume bwa kuchinuzhuka  kuba byatama ne. Pano bino, kechi byo byo kiji ne. Mwakonsha kufunda bya kwikanya ku milanguluko ne byubilo byatama. Onkao mambo, nangwatu inge mwaesekwa kuba byatama, mwakonsha kusalapo kuchinuzhuka kwibyuba. Pa kuba’mba mubulenga kuba byatama, lombainga kimye kyonse. Ikalainga na lufunjisho lwa Baibolo lwa pa bunke. Taanwainga ku kupwila kimye kyonse. Buulaingako bakwenu bintu byo mwaitabilamo. Kuba bino bintu kimye kyonse kukemukwasha kwikala ba kishinka kwi Yehoba. Kabiji vulukainga’mba aye ukemukwasha kuba bino.​—Nga. 5:16.

13. Ñanyi kintu kyawama kyo tufunjilako kwi Yosefwa?

¹³ Kikemupeelela kutwajijila kwikala ba kishinka kwi Yehoba inge mwayukila jimo byo mwafwainwa kuba umvwe mwaesekwa. Mu Baibolo muji bantu bavula baubile bino nangwa kya kuba nabo bajinga bambulwakulumbuluka. Muka Potifwalo watwajijile kukanjikizha Yosefwa kuba’mba alenge mambo. Pano bino, wayukijile jimo bya kuba. Baibolo witubuula’mba “wakainenga” kabiji waambile’mba: “Nanchi nakonsha kuba byepi buno bubi bukatampe ne kumulenga mambo aye Lesa?” (Nte. 39:8-10) Kwa kubula nangwa kuzhinaukatu ne, Yosefwa wayukijile jimo bya kuba saka bakyangyetu ne kumweseka. Kino kyo kyamukwashishe kuba kyawama byo aesekelwe.

14. Ñanyi bintu byo twafwainwa kuba pa kuba’mba tubule kulenga mambo?

¹⁴ Mwakonsha kulondela byepi byaubile Yosefwa inge mwaesekwa? Mwakonsha kufuukwila jimo lonka luno byo mwafwainwa kuba inge mwaesekwa. Kanainga ponkapotu kuba bintu byashikwa Yehoba ne kubula kutwajijila kulangulukapo. (Sala. 97:10; 119:165) Kuba bino kukemulengela kubula kulenga mambo inge mwaesekwa, mambo mwayukijile jimo byo mwafwainwa kuba.

15. Muntu wakonsha kumwesha byepi’mba ubena ‘kumukebesha’ Yehoba? (Bahebelu 11:6)

¹⁵ Kampe mwashiinwa kuba’mba mwataana bukine ne kuba’mba mukeba kwingijila Yehoba na muchima wenu yense, pano bino, kuji kintu kimo kibena kwimulengela kukankazhama kwipana ne kubatizhiwa. Inge ibyo, mwakonsha kulondela byaubile Mfumu Davida. Mwafwainwa kusashijila Yehoba amba: “Anweba Lesa, nkebakebai ne kuyuka muchima wami. Mpimapimai ne kuyuka milanguluko yami yankatazha. Monai mwi amiwa inge mujipo kyatama, ne kuntangijila mu jishinda ja myaka ne myaka.” (Sala. 139:23, 24) Yehoba upesha boba “bamukebesha.” Kuba bintu bikemulengela kwipana  kwi Yehoba ne kubatizhiwa kumwesha’mba mubena kumukebesha.​—Tangai Bahebelu 11:6.

TWAJIJILAI KUFWENYA KWIPI NE YEHOBA

16-17. Yehoba ukoka byepi aba babena kukomena mu kisemi kya Bakamonyi ba kwa Yehoba? (Yoano 6:44)

¹⁶ Yesu waambile’mba baana banji ba bwanga Yehoba ye wibakoka. (Tangai Yoano 6:44.) Abino byambo byaambile Yesu byanema bingi kabiji byakonsha kwimutundaika. Yehoba umona kintu kyawama mu muntu yense ye akokela kwi aye. Yehoba umona muntu yense amba “kya bunonshi” bwanji nangwa’mba “kipe kyo anemeka.” (Mpitulukilo ya mu Mizhilo 7:6; tubyambo twa munshi.) Abino byo byo emumona ne anweba.

¹⁷ Kampe mwi mwana ubena kukomena mu kisemi kya Bakamonyi ba kwa Yehoba. Mwakonsha kemulanguluke’mba mubena kwingijila Yehoba na mambotu a kuba’mba bansemi benu Bakamonyi ba kwa Yehoba. Nangwa byonkabyo, Baibolo waamba’mba: “Fwenyai kwipi ne Lesa, ne aye ukafwenya kwipi ne anweba.” (Yako. 4:8; 1 Moba 28:9) Inge mwatendekelapo kufwenya kwipi ne Yehoba, ne aye ukafwenya kwipi ne anweba. Yehoba kechi wimumonatu mu bujibumba ne. Aye ukoka muntu pa muntu kuvwangakotu ne yewa ubena kukomena mu kisemi kya Bakamonyi. Muntu wa uno mutundu witendekelakotu aye mwine kufwenya kwipi ne Yehoba, ne aye Yehoba ufwenya kwipi ne aye byonka byaamba Yakoba 4:8.​—Esakanyaiko 2 Tesalonika 2:13.

18. Ñanyi bintu byo tukesambapo mu mutwe walondelapo? (Salamo 40:8)

¹⁸ Inge mwipana kwi Yehoba ne kubatizhiwa, mulondela byonka byaubile Yesu. Wipaine na muchima yense kwi Shanji kuba byonse byo bamukambizhe. (Tangai Salamo 40:8; Hebe. 10:7) Mu mutwe walondelapo, tukesamba pa bintu byakonsha kwimukwasha kutwajijila kwingijila Yehoba mu bukishinka panyuma ya kubatizhiwa.