1, 2. (a) Bañanyi bajinga batanshi kufikizha byambo bya kwa Yesu biji pa Mateo 24:12? (b) Buku wa Byubilo umwesha byepi amba bena Kilishitu batanshi bavula batwajijile kumwesha butemwe? (Monai kipikichala kitanshi.)

KIYUKILO kimo kyaambilepo Yesu amba kikamwesha’mba tuji ku “mpelo ya buno bwikalo” ke kya kuba’mba “butemwe bwa bavula bukakepa.” (Mat. 24:3, 12) Mu moba a batumwa, Bayudea betelanga’mba bajinga bantu ba Lesa balekele butemwe bwabo pe Lesa kupwa.

² Pano bino, bena Kilishitu bavula pa kyokya kimye bapayankene bingi na “kusapwila mambo awama aamba pe Kilishitu Yesu” ne kumwesha byo batemenwe Lesa, bena Kilishitu bakwabo, ne bantu babujile kwitabila. (Byu. 2:44-47; 5:42) Nangwa byonkabyo, baana ba bwanga ba kwa Yesu bamo mu moba a batumwa nabo balekele butemwe bwabo kukepa.

3. Ki ka kyalengejile butemwe bwa bena Kilishitu bamo kukepa?

³ Mu byambo byanji ku bena Kilishitu batanshi ba mu Efisesa, Yesu Kilishitu waambile’mba: “Kuji kintu kyatama kyo nataana  mwi obewa, waleka butemwe bo wajinga nabo patanshi.” (Lum. 2:4) Ki ka kibalengejile kuleka butemwe bwabo butanshi? Kyamweka balondejilenga byubilo ne ndangulukilo ya bantu ba mu ntanda. (Efi. 2:2, 3) Mu muzhi wa Efisesa mwayujile byubilo bincha, byonka bijipo ne mu mizhi yavula lelo jino. Efisesa wajinga muzhi wa bunonshi, kabiji bantu bavula bateletu muchima pa bwikalo bwa kwitobwela. Byubilo bya kwitemwatu abo bene byo byalengejile bantu kubula kutemwa bakwabo. Kunungapo, byubilo bya kwizozola ne bulalelale byakumbenetu konse.

4. (a) Butemwe bwa bantu lelo jino bwakepa byepi? (b) Tusakwisamba pa ñanyi mbaji isatu ya butemwe?

⁴ Bungauzhi bwa kwa Yesu bwa kuba’mba butemwe bukakepa bubena kufika ne lelo jino. Bantu bavula luno baleka kutemwa Lesa. Bavula baleka kwitabila mwi aye kabiji baketekela’mba makafulumende o akapwisha makatazho a bantu. Onkao mambo, butemwe bwa bantu babula kupopwela Yehoba Lesa bwatwajijila kukepa. Pano bino, byonka byo kyajinga ku bena Kilishitu batanshi mu kipwilo kya mu Efisesa, ne lelo jino butemwe bwa bena Kilishitu ba kine bwakonsha kutendeka kukepa. Tusakwisamba pa bintu byakonsha kukepesha butemwe: (1) bo twatemwa Yehoba, (2) bo twatemwa bukine bwa mu Baibolo, ne (3) bo twatemwa balongo.

5. Mambo ka o twafwainwa kutemenwa Lesa?

⁵ Pa jonkaja juba Yesu saka akyangye kwamba’mba butemwe bwa bantu bukakepa, waambile pa butemwe bwanema kukila butemwe bonse. Waambile’mba: “‘Wafwainwa kutemwa Yehoba Lesa wobe na muchima wobe yense, ne na mweo wobe yense ne na maana obe onse.’ Uno ye mukambizho mukatampe kabiji ye mutanshi.” (Mat. 22:37, 38) Kine, kutemwa Lesa na muchima yense kwitukwasha kukookela mikambizho ya Yehoba, kuchinchika, ne kushikwa byatama. (Tangai Salamo 97:10.) Nangwa byonkabyo, Satana ne ntanda yanji byakonsha kulengela butemwe bo twatemwa Lesa kukepa.

6. Ñanyi bintu byafumamo na mambo a kubula kutemwa Lesa?

⁶ Bantu mu ntanda luno kechi bayuka butemwe bwa kine byo bulumbulula ne. Bantu luno kechi batemwa Mulenga wabo ne, bino “betemwatu abo bene.” (2 Timo. 3:2) Ino ntanda ibena kulamwa na Satana yalengela bantu kutemwa “bya kusakasaka bya mubiji ne bintu bisakasaka meso ne [bantu] kwimwesha na bintu byo [baji] nabyo mu bwikalo.” (1 Yoa. 2:16) Mutumwa Paulo wajimwineko bena Kilishitu kubula kukookela bya kusakasaka bya mubiji. Waambile’mba: “Kuta muchima ku bintu bya buntunshi kuleta lufu . . . mambo kuta muchima ku bintu bya buntunshi kulengela kwikala mulwanyi ne Lesa.” (Loma 8:6, 7) Aba bonse batatu muchima pa kukeba bunonshi ne kuba bisakasaka mibiji yabo bya bulalelale bakamona bya malwa bifumamo.—1 Ko. 6:18; 1 Timo. 6:9, 10.

7. Ñanyi mafunjisho akonsha kulengela butemwe bwa bena Kilishitu kukepa lelo jino?

⁷ Mu byalo bimo muji bantu bakana’mba Lesa ufwako, baitabila’mba bintu bilengeletu bine, ne bazhinauka Lesa. Bano bantu balengela bavula kuleka kutemwa Lesa ne kuleka kwitabila mwi aye. Balengela bantu kulanguluka’mba aba bonse baitabila’mba kuji Mulenga bafwao maana nangwa’mba ba bilubi. Kunungapo, bantu bavula banemeka bingi bashayuka ba bya sayansi kukila byo banemeka Mulenga. (Loma 1:25) Inge ketumvwine mafunjisho a bano bantu, twakonsha kutendeka kufuma kwi Yehoba, ne butemwe bo twamutemwa bwakonsha kupwa.—Hebe. 3:12.

8. (a) Ñanyi makatazho apitamo bantu ba Yehoba? (b) Ñanyi byambo bya lutekenesho bitaanwa mu Salamo 136?

 ⁸ Kulefulwa nako kwakonsha kukookesha lwitabilo lwetu ne kulengela butemwe bo twatemwa Lesa kukepa. Mu ino ntanda ibena kulamwa na Satana, atweba bonse twakonsha kulefulwa. (1 Yoa. 5:19) Kampe tubena kupita mu makatazho na mambo a kukota, kukolwakolwa, nangwa kukajilwa mali. Kimo kimye twakonsha kwikala na bulanda na mambo a kuba bintu byo twaketekejilenga kechi byamwekele ne, nangwa na mambo a bumbulwa kulumbuluka. Inge tubena kupita mu makatazho a uno mutundu, kange tulangulukenga’mba Yehoba witusha ne. Pakuba twafwainwa kuvulukanga byambo bya lutekenesho byaamba pa butemwe bwa Yehoba bubula kupwa. Byambo bimo ke byobya biji pa Salamo 136:23, paamba’mba: “Wituvulukile byo twapopomejilwe, mambo butemwe bwanji bubula kwaluka bo bwa myaka ne myaka.” Kine, butemwe bwa Yehoba bo atemwa bakalume banji bwa myaka ne myaka. Onkao mambo, twashiinwa’mba umvwa ‘misashijilo yetu’ kabiji witukumbula.—Sala. 116:1; 136:24-26.

9. Ki ka kyakwashishe Paulo kutwajijila kutemwa Lesa?

⁹ Byonka byo kyajinga ku nyimbi wa masalamo, Paulo naye kyamutekeneshe bingi kulanguluka pa bukwasho bwa Yehoba. Paulo wanembele’mba: “Yehoba ye nkwasho wami; kechi nakonsha kuchina ne, muntu angube ka?” (Hebe. 13:6) Kuketekela mwi Yehoba na muchima yense kwakwashishe Paulo kuchinchika makatazho o apichilengamo. Kechi waswishishe makatazho kukookesha lwitabilo lwanji ne. Byo ajinga mu kaleya, Paulo wanembele ne makalata a lutundaiko avula. (Efi. 4:1; Fili. 1:7; File. 1) Kino kimwesha’mba nangwa byo apichilenga mu meseko, Paulo watwajijile kutemwa Lesa. Ki ka kyamukwashishe kuba bino? Watwajijile kukinka manungo mwi “Lesa wa lutekenesho lonse, witutekenesha mu meseko etu onse.” (2 Ko. 1:3, 4.) Twakonsha kuba byepi pa kuba’mba tutwajijile kutemwa Yehoba byonka byaubile Paulo?

10. Twakonsha kuba byepi pa kuba’mba butemwe bo twatemwa Yehoba bubule kukepa?

¹⁰ Paulo waambilepo jishinda jimo mo twakonsha kutwajijila kutemwa Yehoba. Wanembele’mba: “Lombainga kimye kyonse.” Kabiji wanembele ne kuba’mba: “Lombainga na mukoyo.” (1 Tesa. 5:17; Loma 12:12) Kulomba kwi Lesa kimye kyonse kwitukwasha kwikala na bulunda bwakosa ne aye. (Sala. 86:3) Inge twaikalapo na kimye kyabaya kya kubuula Yehoba byonse biji ku muchima wetu, tufwenya kwipi na Shetu wa mwiulu, ‘Umvwa milombelo.’ (Sala. 65:2) Kabiji inge twamona Yehoba byo akumbula milombelo yetu, butemwe bwetu pe aye bukoselako. Twimwena kishinka kya kuba’mba “Yehoba uji kwipi na bonse bamwita.” (Sala. 145:18) Inge twashiinwa’mba Yehoba witutemwa kabiji witukwasha, tukachinchika meseko a mu bwikalo.

11, 12. Twakonsha kuba byepi pa kuba’mba tutemwe bukine bwa mu Baibolo?

¹¹ Atweba bena Kilishitu twatemwa bingi bukine bwa mu Baibolo. Mambo a Lesa o onkatu etufunjisha bukine. Yesu walombele kwi Shanji amba: “Byambo byenu bo bukine.” (Yoa. 17:17) Onkao mambo, pa kuba’mba tutemwe bukine, patanshi twafwainwa kuyukisha bulongo Mambo a Lesa. (Kolo. 1:10) Pano bino, kino kechi kibena kulumbulula kuyukatu bijimo ne kwibilabijila ne. Byambo byanembele nyimbi wa Salamo 119 bitukwasha kuyuka kutemwa bukine bwa mu Baibolo byo kulumbulula. (Tangai Salamo 119:97-100.) Nanchi twikala na kimye kya kutanga ne kulangulukapo bulongo pa Binembelo juba jonse nyi?  Inge ketulondele byaamba Baibolo mu bwikalo bwetu ne kumona byo bitukwasha, tukatemwa bingi bukine bwa mu Baibolo.

¹² Nyimbi wa masalamo waambile’mba: “Byambo byenu byo byatobalapo mu kanwa kami, byakila ne buki mu kanwa kami!” (Sala. 119:103) Ne mabuku alumbulula Baibolo o tutambula kufuma ku jibumba ja Lesa twakonsha kwiesakanya ku kajo kawama ko twafwainwa kuja. Twafwainwa kulangulukanga pa byo tutanga ne kuzhindaminamo, nobe kuja kajo katobala, pa kuba’mba tuvulukenga “byambo byafwainwa” bya bukine ne kwibingijisha kukwasha bantu.—Sapwi. 12:10.

13. Ki ka kyalengejile Yelemiya kutemwa bukine bwa mu Binembelo, kabiji byamufikile byepi pa muchima?

¹³ Ngauzhi Yelemiya watemenwe bingi byambo bya Lesa. Akimonai byo byamufikile pa muchima. Waambile’mba: “Byambo byenu nebitaaine kabiji nebijiile; kabiji byambo byenu byalengejile muchima wami kusekela ne kusangalala, mambo natelwa pa jizhina jenu, anweba Yehoba Lesa wa mabumba.” (Yele. 15:16) Yelemiya watemenwe bingi byambo bya Lesa kya kuba walangulukangapo bingi, uba nobe ubena kuja kajo kawama. Kino kyamukwashishe kunemeka mwingilo wa kwimenako Lesa ne kutelwa pa jizhina janji. Nanchi kutemwa bukine bwa mu Baibolo kwitulengela kunemeka mwingilo witupa Lesa wa kusapwila pa Bufumu bwanji ne kutelwa pa jizhina janji mu ano moba a ku mpelo nyi?

14. Twakonsha kubaisha byepi butemwe bwetu bo twatemwa bukine bwa mu Baibolo?

¹⁴ Kununga pa kutanga Baibolo ne mabuku etu alumbulula Baibolo, ñanyi bintu bikwabo byo twakonsha kuba pa kuba’mba tutemwe bukine bwa mu Baibolo? Twakonsha kubayisha butemwe bo twatemwa bukine bwa mu Baibolo inge ketupwile kimye kyonse. Lufunjisho lwa Kyamba kya Usopa pa mulungu pa mulungu jo jishinda jikatampe mo tufunjila Baibolo. Pa kuba’mba tukwatakanye mutwe ye tubena kufunda mu Kyamba kya Usopa, twafwainwa kunengezhanga bulongo. Kintu kimo kyakonsha kwitukwasha kuba bino ke kutanga binembelo byonse bijimo. Ano moba, mwakonsha kukopolola Kyamba kya Usopa pa jw.org nangwa kwikitanga  pa mutanchi wa JW Library app mu milaka yavula. Ino mitanchi ya pa kompyuta itukwasha kutanga bukiji binembelo biji mu Kyamba kya Usopa. Nangwa byonkabyo, kutanga Binembelo byonse biji mu kibaaba ne kulanguluka langulukapo kuketukwasha kutemwa bukine bwa mu Baibolo.—Tangai Salamo 1:2.

15, 16. (a) Kinembelo kya Yoano 13:34, 35 kitubuula’mba twafwainwa kuba ka? (b) Butemwe bo twatemwa balongo betu ne Lesa byakwatankana byepi na Baibolo?

¹⁵ Bufuku, pa juba janji japeleleko pano pa ntanda, Yesu wabuujile baana banji ba bwanga amba: “Mbena kwimupa mukambizho mupya, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.”—Yoa. 13:34, 35.

¹⁶ Kutemwa balongo ne banyenga kumwesha kuba’mba twatemwa Yehoba. Kabiji kechi twakonsha kutemwa Lesa kwa kubula kutemwa bakwetu ne. Mutumwa Yoano wanembele’mba: “Awa wabula kutemwa mulongo wanji ye amona na meso, kechi wakonsha kutemwa Lesa ye abula kumona ne.” (1 Yoa. 4:20) Kunungapo, kutemwa Yehoba ne balongo kumwesha byo twatemwa Baibolo. Mambo ka? Mambo kutemwa bukine bwa mu Baibolo kwitulengela kukookela mikambizho ya mu Binembelo ya kutemwa Lesa ne balongo.—1 Pe. 1:22; 1 Yoa. 4:21.

17. Mu ñanyi mashinda mo twakonsha kumweshesha butemwe?

¹⁷ Tangai 1 Tesalonika 4:9, 10. Mu ñanyi mashinda mo twakonsha kumweshesha butemwe mu kipwilo? Twakonsha kukwashako balongo ne banyenga bakikulumpe mu ñendelo pa kuya na kupwila. Kabiji twakonsha kukwasha nyenga wafwilwa kumuwamishishako bimo byaonaika pa nzubo yanji. (Yako. 1:27) Balongo ne banyenga bonse, banyike ne bakulumpe, balefulwa, onkao mambo twafwainwa kwibatekenesha. (Maana 12:25; Kolo. 4:11) Byambo byetu ne byubilo byetu bimweshenga’mba twatemwa “bakwetu ba mu lwitabilo.”—Nga. 6:10.

18. Ki ka kiketukwasha kupwisha bukiji makatazho inge twapusenamo na bakwetu ba mu lwitabilo?

¹⁸ Baibolo waambijile jimo kuba’mba “mu moba a kupelako” a buno bwikalo bwatama, bantu baketemwatu bene ne kwikala na lwiso. (2 Timo. 3:1, 2) Atweba bena Kilishitu twafwainwa kwibikako kubayisha butemwe bo twatemwa Lesa, bo twatemwa bukine bwa mu Baibolo, ne bo twatemwa balongo betu. Kya kine kuba’mba kimye kimo twakonsha kupusenamo na bakwetu ba mu lwitabilo. Pano bino, mu kipwilo mwikala bingi mutende inge bonse kebapelawizhe kupwisha makatazho mu butemwe. (Efi. 4:32; Kolo. 3:14) Onkao mambo, twayai twibikeko kuba’mba butemwe bwetu bubule kupwa. Kabiji twayai tutwajijile kutemwa Yehoba, Mambo anji, ne balongo betu.