BA DANIEL NE BA MIRRIAM batwelele mu masongola mu September 2000 kabiji bayile na kwikala mu muzhi wa Barcelona, mu kyalo kya Spain. Ba Daniel bashimikizhe’mba: “Twaikelenga bwikalo bo bamona bavula’mba bo bwikalo bwawama. Twafolanga mali avula kabiji twajiilanga mu bishimikwa byawama bingi, kuya na kufwakasha mu byalo bikwabo ne kuvwala bivwalo bipotwa na mali avula. Kabiji twasapwilanga kimye kyonse.” Bino bintu byapimpwilwe.

Pa kushonkena kwa mu 2006, pajinga jashi jafikile ba Daniel pa muchima jajinga na bwipuzho bwa kuba’mba: “Nanchi tubena kuteshako muchima kukwasha boba babena ‘kutelententa pa kwibatwala na kwibepaya’ kwenda mu jishinda jaya ku bumi bwa myaka nyi?” (Maana 24:11) Jino jashi jakoseshe kishinka kya kuba’mba twafwainwa kusapwilanga byambo bya mu Baibolo bikalengela bantu kwikala na bumi. (Byu. 20:26, 27) Ba Daniel bavuluka’mba, “Naumvwinengatu nobe Yehoba kwambila amiwa.” Jashi jaambile ne kuba’mba kwingilako pakatampe mu mwingilo kuleta bingi lusekelo. Ba Daniel baswile kino kishinka. Ba Miriam bajinga bapainiya kabiji bemwenejilenga lusekelo lufumamo.

Ba Daniel baambile’mba: “Napwishishe mu muchima namba nafwainwa kupimpula bwikalo bwami.” Ne kya kine byo byo baubile. Bakepesheko kimye kyo baingilanga nkito, batendekele bupainiya kabiji balangulukile pa lusekelo lo bakekala nalo abo ne ba Miriam inge baya na kwingijila kwakepa basapwishi ba Bufumu.

Mu May 2007, ba Daniel ne ba Miriam balekele nkito ne kuya na kwingijila ku kyalo kyo bafwakashijilepo kala kya Panama. Nyaunda yo bakengijilengamoyavwangilemo makuji avula bingi a Bocas del Toro Archipelago pa kalunga ka mema ka Caribbean, paji bantu bavula batelwa’mba ba Guaymi. Ba Daniel ne baMiriam balangulukile’mba kwesakana na mali o bajinga nao bakekalakotu bañondo batanu na basatu.

Baendanga mu maato ne na makinga, kabiji bavuluka kimye kitanshi kyo bakyofwelepo nkinga museke walepa makilomita 32 kupita mu mitumba mwatwa bingi kyuya. Kwashajiletu pacheche ba Daniel kupungila na mambo a kukooka. Pano bino, bisemi bya ba Guaymi bibatambwijilenga bingi bulongo, kikatakata kimye kyo bafunjileko byambo bimo bya mu mulaka wa bangikazhi ba ku ino mpunzha. Palutwe kacheche, baikele na bantu 23 bo bafunjishenga Baibolo.

Mali abo byo apwile, lusekelo lwa bano bamulume ne mukazhi lwaalukile ke bulanda. Ba Daniel bavuluka’mba: “Twajijile ne mipolo, kabiji twalangulukilenga bya kubwela ku Spain. Kitukolele bingi ku muchima kusha bantu bo twafunjishenga Baibolo.” Bino byo papichiletu ñondo umo, batambwijile sawakya wawama bingi. Ba Miriam baambile’mba: “Betupele mwingilo wa bupainiya bwiikajila. Twaikele bingi na lusekelo pa kutwajijila kwingila mwingilo wetu.”

Na mambo a lupimpu lwaubiwe mu jibumba ja Lesa mu mwaka wa 2015, ba Daniel ne ba Miriam bebafumishe pa bupainiya bwiikajila ne kushalatu bapainiya ba kimye kyonse. Baubile byepi na luno lupimpu? Baketekejile mu mulaye uji pa Salamo 37:5 wa kuba’mba: “Fikizha jishinda jobe kwi Yehoba; ketekela mwi aye, ne aye ukakukwasha.” Batwelele nkito pa kuba’mba bekwashishengamo mu mwingilo wabo wa bupainiya, kabiji baji mu kipwilo kiji mu kibunji kya Veraguas, mu kyalo kya Panama.

Ba Daniel bashimikizhe’mba: “Saka tukyangye kufuma mu Spain kechi twaketekejilenga’mba tukakonsha kwikala bwikalo bwapeela ne. Lelo jino, tubena kwikala bwikalo bwapeela, kabiji tuji na byonse byanema bikebewa mu bwikalo.” Ñanyi kintu kibaletela lusekelo lukatampe? Baambile’mba: “Kukwasha bantu kufunda pe Yehoba kyo kintu kituletela lusekelo lukatampe!”