1, 2. (a) Mambo ka banyike bena Kilishitu o babena kushinjila nkondo yo babena kulwa na Satana ne bandemona? (Monai kipikichala kitanshi.) (b) Tusakwisamba pa ka?

MUTUMWA PAULO waesakenye bwikalo bwetu atweba bena Kilishitu ku bashilikale balwa nkondo. Pano bino, nkondo yetu kechi ya kulwa na bantu ne, ke nkondo ya ku mupashi. Kabiji balwanyi betu kechi ba kufwanyikizhatu ne, kobaji. Satana ne bandemona bayuka bingi bya kulwa. Umvwe twalanguluka pa kino, twakonsha kumona nobe kafwako kyo twakonsha kuba ne. Kikatakata banyike bena Kilishitu bakonsha kumweka nobe kechi bayuka bya kwizhikijila ne. Bakonsha kuba byepi pa kuba’mba bashinde bilengwa bya mupashi byatama biji na bulume bukatampe kukila bantu? Kishinka ke kya kuba’mba banyike bakonsha kushinda. Mambo ka? Mambo batwajijila ‘kwikosesha mwi Nkambo.’ Kununga pa kuketekela mu bulume bwa Lesa, bavwala ne bivwalo bya nkondo. Byonkatu bivwala bashilikale bafunda kulwa nkondo, banyike bena Kilishitu nabo bavwala “byonse bya nkondo byafuma kwi Lesa.”—Tangai Efisesa 6:10-12.

² Pa kulumbulula kino kishinka, Paulo kampe wavulukile byavwalanga bashilikale bena Loma. (Byu. 28:16) Twayai twisambe ene mambo kino kifwanyikizho kyaingijishe Paulo o kyawamina. Byo tusakwisambanga, monai banyike bamo byo baambapo pa makatazho ne  byawama bifumamo mu kuvwala byonse bya nkondo bifuma kwi Lesa.

3, 4. Bukine buji mu Baibolo buji byepi nobe mushipi wavwalanga bashilikale bena Loma?

³ Tangai Efisesa 6:14. Mushipi wavwalanga bashilikale bena Loma wajinga na byela byazhikijilanga lubunda wa mushilikale. Kabiji mu uno mushipi mo mwakwatanga kyela kya pa kyaji. Mishipi imo yajinga ne na nkobelo mo babikanga mpoko ne mupenyi watwa kubiji. Inge mushilikale wanyinga uno mushipi, kechi waumvwanga moyo pa kuya ku nkondo ne.

⁴ Ne atweba bukine bo tufunda mu Mambo a Lesa bwituzhikijila ku mafunjisho a bubela. (Yoa. 8:31, 32; 1 Yoa. 4:1) Kabiji kutemwa bukine bwitufunjisha Lesa kwitukwasha “kuvwala kyela kya pa kyaji,” ko kuba’mba kulondela mizhilo yaoloka ya Lesa. (Sala. 111:7, 8; 1 Yoa. 5:3) Kunungapo, umvwe twayukisha bukine bwa mu Mambo a Lesa, twakonsha kwimena balwanyi betu saka twakosa ne kushinda.—1 Pe. 3:15.

5. Mambo ka o twafwainwa kwambilanga bya kine?

⁵ Inge twinyinga mushipi wa bukine bwa mu Baibolo ne kumukashisha, tukekelanga monka mwayila Mambo a Lesa kabiji tukambanga bya kine kimye kyonse. Mambo ka o twafwainwa kuchinuzhukila kwamba bubela? Mambo bubela kyo kingijisho kimo Satana kyo engijisha bingi. Bubela bulengela mwine wabepa ne yewa waumvwina bobo bubela kwikala mu lukatazho. (Yoa. 8:44) Onkao mambo, twayai twibikeko papelela bulume bwetu kuchinuzhuka bubela. (Efi. 4:25) Bino kechi kyapeela ne. Mwanyike uji na myaka 18 wa jizhina ja Abigail waambile’mba: “Kikatazha bingi kwamba bya kine kikatakata inge bubela bwakonsha kukukwasha kufuma mu lukatazho.” Pano mambo ka uno nsongwakazhi o esekela na ngovu kwamba bya kine? Waambile’mba: “Inge naamba bya kine, ngikala na jiwi ja mu muchima jatooka ku meso a Yehoba. Kabiji bansemi bami ne balunda nami banketekela.” Nsongwakazhi uji na myaka 23, aye Victoria, waambile’mba: “Inge waamba bya kine ne kutwajijila kulondela bintu byo waitabilamo, bantu bakonsha kukuseka, bino mufuma byawama bingi: Ufunda kuchinchika, ufwenya kwipi ne Yehoba, kabiji aba bakutemwa batendeka kukunemeka.” Onkao mambo, kyanema bingi ‘kwinyinga mushipi wa bukine mu lubunda wenu’ kimye kyonse.

6, 7. Mambo ka bololoke o bebwesakenya ku kyela kya pa kyaji?

⁶ Kyela kya pa kyaji kyavwalanga bashilikale bena Loma kyajinga kya byela byapapakana bya kapotwe. Abino byela bebikonkomekanga kwesakana na biji kyaji ne jivumo ja mushilikale ne kwibikasa na ntambo ya kiseba kya nyama mambo byajinga na nkobelo mwa kupishisha ntambo. Abino byela bya kapotwe byo bakasanga na ntambo ya kiseba byazhokolokanga mubiji yense wa mushilikale. Kuvwala kino kyela kwalengelanga mushilikale kubula kupimpauka pa kwenda, kabiji kimye kyonse wikitalatalanga bulongo kuba’mba inge paji pakasuluka akasepo bulongo. Bino kino kyela kyamuzhikijilanga ku mpoko ne ku miketo yakonsheshe kwasa ku muchima nangwa ku binungwa bikwabo bya mubiji bya mukachi.

⁷ Ne mizhilo yaoloka ya Yehoba izhikijila muchima wetu wa kifwanyikizho twakonsha kwiyesakanya ku kino kyela kya pa kyaji. (Maana 4:23) Byonkatu mushilikale byo akonsha kubula kuvuula kyela kya pa kyaji kya kapotwe ne kuvwala kyo balenga na kyela kyanekena, ne atweba kechi tukeba kuleka kulondela mizhilo yaoloka ya Yehoba ne kwilengela yetu ne. Kechi tuji na maana ne bulume bwa kuzhikijila muchima wetu ne. (Maana 3:5, 6) O ene mambo o tutwajijila kuwamisha ‘kyela kya pa kyaji’ kitupa Yehoba kuba’mba kitwajijile kuzhikijila muchima wetu.

8. Mambo ka o kyawamina kukakachila ku mizhilo ya Yehoba?

 ⁸ Nanchi bimye bimo mumona’mba mizhilo yaoloka ya Yehoba imukanya kuba bintu byo mukeba nangwa kwimwangata bwana bwa bene nyi? Daniel, uji na myaka 21, waambile’mba: “Bafunjishi ne bakwetu ku sukulu bansekelenga na mambo a kulondela mafunde a mu Baibolo. Pa kimye kimo nalekele kwiketekela kabiji najinga na bulanda.” Pano waubilepo byepi? Waambile’mba: “Mu kuya kwa kimye, nemwenejile byawama bifuma mu kulondela mizhilo ya Yehoba. Balunda nami bamo batatwile kwingijisha bizhima; bakwabo balekele sukulu. Ñumvwa bingi lusa pa kumona bwikalo bwabo byo bwatama. Kine, Yehoba wituzhikijila.” Nsongwakazhi uji na myaka 15 aye Madison, waambile’mba: “Kinkatazha bingi kukakachila ku mizhilo ya Yehoba ne kubula kubako bintu biyowa bakwetu.” Ki ka kimukwasha kuchinchika? Waambile’mba: “Mvuluka kuba’mba ntelwa pa jizhina ja Yehoba ne kuba’mba meseko o mpitamo ke jishinda Satana jo engijisha kukeba kukookesha lwitabilo lwami. Inge nashindapo lweseko lumo, ñumvwa bingi bulongo.”

9-11. (a) Ñanyi makwabilo a kifwanyikizho avwala bena Kilishitu ku maulu? (b) Ki ka kiketukwasha kusapwila bulongo mambo awama?

⁹ Tangai Efisesa 6:15. Inge mushilikale mwina Loma wabula kuvwala makwabilo ku maulu ko kuba’mba kechi winengezha kuya ku nkondo ne. Makwabilo o bavwalanga bealenganga na biseba byo batentakanya bisatu, onkao mambo, kechi afwanga bukiji ne. Kabiji ano makwabilo kechi akozhanga ku maulu ne, kabiji kechi batezhimukanga pa kwenda ne.

¹⁰ Makwabilo avwalanga bashilikale bena Loma ebakwashanga kulwa nkondo, pano bino makwabilo a kifwanyikizho avwala bena Kilishitu ebakwasha kusampanya byambo bya mutende. (Isa. 52:7; Loma 10:15) Pano bino, kikebewa kuchinchika pa kuba’mba tusapwile mambo awama. Nsongwalume uji na myaka 20 wa jizhina ja Bo waambile’mba: “Nachinaga kusapwila bakwetu mo twafunjilanga. Naumvwanga bumvu. Inge navuluka, nkankalwa kuyuka kyandengelanga kumvwa bumvu. Luno ñumvwa bingi bulongo kuspwila bakwetu.”

¹¹ Banyike bavula bataana kuba’mba umvwe benengezha bulongo kusapwila mambo awama, kibapelela bingi kusapwila. Mwakonsha kwinengezha byepi? Nsongwakazhi uji na myaka 16 aye Julia, waambile’mba: “Nsenda mabuku etu mu kyola kya ku sukulu, kabiji nteleka ku byamba bakwetu baana ba sukulu ne bintu byo baitabilamo. Kepo ndangulukapo byo nakonsha kwibakwasha. Inge nenengezha, nakonsha kwisamba nabo pa bintu byakonsha kwibakwasha.” Nsongwakazhi mukwabo uji na myaka 23, aye Makenzie waambile’mba: “Inge ubila bakwenu lusa ne kutelekesha inge babena kwamba, uyuka makatazho o abena kupitamo. Ntanga bibaba byonse byo banengezhezha banyike. Kuba bino kunkwasha kumwesha bakwetu biji mu Baibolo nangwa biji pa jw.org byakonsha kwibakwasha.” Byonka byaambapo bano banyike, inge mwinengezha bulongo kusapwila, kikekalatu nobe mwakashisha “makwabilo” ku maulu enu.

12, 13. Ñanyi ‘miketo ya mujilo’ imo Satana yo engijisha?

¹² Tangai Efisesa 6:16. “Jikebo jikatampe” jasendanga bashilikale bena Loma jalepulukile kabiji javwetanga mubiji kutendekela pa bipuzhi kufika mu manungo. Jibazhikijilanga ku bilwilo bya nkondo ne miketo.

¹³ ‘Miketo ya mujilo’ imo Satana yo akonsha kwingijisha kwi anweba ke kwamba bubela pe Yehoba, kuba’mba kechi wimuta muchima ne, kabiji amba kechi wimutemwa ne. Nsongwakazhi uji na myaka 19, aye Ida, wilengululanga.  Waambile’mba: “Javula namonanga’mba Yehoba uji kwalepa ne amiwa kabiji kechi ukeba’mba ngikale mulunda nanji ne.” Uba byepi na uno muketo? Waambile’mba: “Kupwila kukosesha bingi lwitabilo lwami. Kala kechi nakumbulangapo kimye kya kupwila ne, mambo nalungulukanga’mba kafwako usakumvwa byo nsakwamba ne. Pano luno nnengezha kupwila kabiji nebikako kukumbulapo jibiji nangwa jisatu. Kechi kyapeela ne, bino ñumvwa bingi bulongo inge nakumbulapo. Kabiji balongo ne banyenga bantundaika bingi. Kimye kyonse inge nafuma na kupwila, shiinwa kuba’mba Yehoba wantemwa.”

14. Byapichilemo Ida bitufunjishapo ñanyi kishinka?

¹⁴ Byapichilemo Ida bimwesha kishinka kyanema bingi kya kuba’mba: jikebo jaingijishanga mushilikale kechi jabayilangako ne, bino jikebo jetu ja lwitabilo jakonsha kubaya nangwa kukepa. Atweba bene yetu twafwainwa kusalapo. (Mat. 14:31; 2 Tesa. 1:3) Kukosesha lwitabilo lwetu kwanema bingi.

15, 16. Mu ñanyi jishinda luketekelo mo lwaikela nobe kampompo?

¹⁵ Tangai Efisesa 6:17. Kampompo kavwalanga bashilikale bena Loma kajinga kakuzhikijila mutwe, nshingo ne kilungi. Bimye bimo kampompo kaikalanga na mwa kukwachila inge mushilikale ukeba kwikasenda ku maboko inge kechi wikavwala ku mutwe ne.

¹⁶ Byonkatu kampompo byo kazhikijilanga bongo bwa mushilikale, ne “kampompo ka luketekelo lwa lupulukilo” lwetu kazhikijila milanguluko yetu, ne maana alumbuluka a kupima bintu. (1 Tesa. 5:8; Maana 3:21) Luketekelo lwitukwasha  kuta muchima pa milaye ya Lesa ne kubula kukakilwa na mambo a makatazho o tupitamo. (Sala. 27:1, 14; Byu. 24:15) Pano bino, inge tukeba’mba “kampompo” ketu kengilenga bulongo, twafwainwa kwikavwala ku mutwe kechi kwikasenda ku maboko ne.

17, 18. (a) Satana wakonsha kwitulengela byepi kuvuula kampompo ketu? (b) Twakonsha kumwesha byepi amba Satana kechi witujimbaika ne?

¹⁷ Satana wakonsha kwitulengela byepi kuvuula kampompo? Monai byo aesekele Yesu. Satana wayukile’mba Yesu wajinga na luketekelo lwa kukekala Mfumu wa bantu. Pano bino, Yesu wapembejilenga kimye kyatongwele Yehoba. Kabiji saka akyangye kwikala mfumu, wafwainwe kumanama ne kufwa. Onkao mambo, Satana waesekele Yesu kuba’mba akya kyo apembejilenga kifike bukiji. Satana waambijile Yesu amba umvwe amufukamine ne kumupopwela, aye usakumupa luusa lonse pa bufumu bwa pano pa ntanda ponkapotu. (Luka 4:5-7) Ne luno Satana wayuka’mba Yehoba ukobila bantu banji bintu byawama mu ntanda ipya. Pano bino, twafwainwa kupembelela, kabiji twakonsha kupita mu bya malwa kimye kyo tubena kupembelela. Onkao mambo, Satana wakonsha kwituletela bintu bya kwitongola michima kuba’mba twiyowe bwikalo pa kyonka kino kimye. Ukeba’mba tutangizheko bintu bya mu bwikalo, ne kubula kuta muchima pa kukeba Bufumu bwa Lesa.—Mat. 6:31-33.

¹⁸ Banyike bena Kilishitu bavula kechi bajimbaikwa na buno bujimuku bwa kwa Satana ne. Nsongwakazhi umo wa myaka 20 aye Kiana waambile’mba: “Nayuka’mba Bufumu bwa Lesa bo bonkatu bukapwisha makatazho onse.” Kwikala na luno luketekelo kukwasha byepi uno nsongwakazhi? Waambile’mba: “Kuketekela kuba’mba kukekala Paladisa kunkwasha kubula kuta muchima pa kukeba bintu bya mu bwikalo. Kechi nkeba kwingijisha bya bupe byami kulenga mali avula nangwa kukeba bifulo bikatampe pa nkito ne. Pakuba ñingijisha kimye kyami ne ngovu mu mwingilo wa Lesa.”

19, 20. Twakonsha kuwamishako byepi busendwe bwetu bwa kwingijisha Mambo a Lesa?

¹⁹ Kimye Paulo kyo anembele ino nkalata, mapoko aingijishanga bashilikale bena Loma pa kulwa nkondo alepele masentimita 50. Bashilikale bena Loma bayukile bingi kwingijisha mapoko pa kulwa mambo bafundanga bya kwiengijisha pa juba pa juba.

²⁰ Paulo waesakenye Mambo a Lesa ku mpoko itupa Yehoba. Bino twafwainwa kufunda bya kwiingijisha bulongo pa kulumbulula bintu byo twaitabilamo. (2 Ko. 10:4, 5; 2 Timo. 2:15) Mwakonsha kuwamishako byepi busendwe bwenu? Nsongwalume wa myaka 21 aye Sebastian, waambile’mba: “Kimye kyonse inge natanga Baibolo, nnembapo kyepelo kimo kyo natemwa mu kitango kyo naji kutanganga. Mbena kukeba kwikala na mutanchi wa byepelo byo natemwa bingi. Kuba bino kwankwasha kuyuka bulongo bilanguluka Yehoba.” Daniel ye twaambapo ku ntendekelo waambile’mba: “Inge mbena kutanga Baibolo, nsalamo byepelo bimo byo ndanguluka’mba byakonsha kukwasha bantu mu mwingilo. Nataana kuba’mba bantu batako bingi muchima inge bamona byo watemwa Baibolo ne kwibikako kwibakwasha.”

21. Mambo ka o twafwainwa kubujila kuchina Satana ne bandemona?

²¹ Byonka byamwesha banyike bo twaambapo ku ntendekelo ya uno mutwe, kechi twafwainwa kuchina Satana ne bandemona ne. Baji na bulume, bino twakonsha kwibashinda. Kabiji bakafwa. Katatakatu bakebakase mu Bukalama bwa Myaka Kiumbi bwa Kilishitu, kabiji pa kupitapo kimye bakebonauna. (Lum. 20:1-3, 7-10) Twayuka mulwanyi wetu, bya bujimuku byanji ne byo akeba kuba. Na bukwasho bwa Yehoba, twakonsha kumwimena saka twakosa!