YESU waambijile jimo amba baana banji ba bwanga bakengila mwingilo mukatampe wa kunowa mu kimye kya ku mpelo. (Mat. 9:37; 24:14) Akimonai bino byambo byanji byo bibena kufika mu mpunzha ya Transcarpathia, mu kyalo kya Ukraine. Mu mataunyi asatu aji ku ino mpunzha muji bipwilo 50 ne basapwishi kukila pa 5,400. * Kino kibena kumwesha’mba mu ano mataunyi onse asatu, paji bantu bana, umo pe abo ke Kamonyi wa kwa Yehoba.

Nyaunda ya kusapwilamo iji byepi? Mulongo wa konkakwa wa jizhina ja Vasile waambile’mba: “Bantu kuno banemeka bingi Baibolo, bashikwa nshiji, betemwa bingi mu bisemi, kabiji bekwasha bene na bene.” Wanungilepo’mba: “Bamo kechi baswa byo twaitabilamo ne. Bino inge mubena kwibamwesha byaamba Baibolo, bateleka na muchima yense.”

Balongo ne banyenga bapita mu makatazho apusanako pa kusapwila mu ino nyaunda mwavula Bakamonyi. Kipwilo kimo kiji na basapwishi 134 bino mu nyaunda mujitu mazubo 50 a bantu babula Bakamonyi. Basapwishi boba byepi?

Balongo ne banyenga babena kuya na kwingijila ku mapunzha kubena kukebewa basapwishi ba Bufumu bavula. Mulongo uji na myaka 90 wa jizhina ja Ionash waambile’mba: “Mu nyaunda ya kipwilo kyetu, musapwishi umo wikalatu na bantu babiji ba kusapwila kwapwa. Nsapwilatu mu muzhi mo ngikala na mambo a kukolwakolwa, bino myaka ya kunyuma nayanga na kusapwila mu nyaunda mwabula kipwilo palepa makilomita 160 mu mulaka wa Hungarian.” Basapwishi bebikako kuya na kukwasha mwingilo wa kusapwila ku mapunzha akwabo. Ba Ionash baambile’mba: “Pa kuba’mba nkanjile shitima, nabukanga kimye kya 4 koloko wa lukelo kabiji nasapwilanga kufika 6 koloko wa mabanga po nakanjilanga shitima kubwela ku nzubo. Naubanga bino jibiji nangwa jisatu mu mulungu.” Nanchi bamona’mba mu kwibikako kwabo mwafumine byawama nyi? Baambile’mba: “Naikalanga bingi na lusekelo pa kwingila uno mwingilo. Nakwashishe kisemi kimo kufunda bukine.”

Kechi bonse basapwishi ba mu ino mpunzha bakonsha kuya na kwingijila kwalepa ne. Bino basapwishi bonse, kubikapotu ne bakulumpe, bebikako kusapwila nyaunda yonse ya kipwilo kyabo. Na mambo a kino, mu 2017, mu ano mataunyi asatu bantu bataainwe ku kivuluko bavujile kukila pa basapwishi bonse, ko kuba’mba kichika kya bantu bonse bekala mu ano mataunyi bataainweko. Kwa kubula nangwa kuzhinaukatu ne, konsetu ko twingijila, kuji “bya kuba byavula mu mwingilo wa Nkambo.”—1 Ko. 15:58.