1, 2. (a) Mambo ka o tutundaikilwa pa kumona boba batwajijila kusapwila mu bukishinka mu manyaunda muji bantu babula kutako muchima ku mambo awama? (Monai kipikichala kitanshi.) (b) Yesu waambilepo’mba ka pa kusapwila ‘ku bantu ba mu muzhi mo aikalanga’? (Monai tubyambo twa munshi.)

BA SERGIO NE BA OLINDA ke ba mulume ne mukazhi bapainiya baji na myaka ya mu ma 80 bekala mu United States. Ano moba na mambo a maulu kukola, kibakatazha bingi kwenda. Pano bino, pa myaka yavula yapitapo kufikatu ne lelo jino, babuka ku makya ne kuya pa mpunzha papita bantu bavula mu muzhi mo bekala. Bafika pa ino mpunzha na kimye kya 7 koloko ne kwimana kwipi na kiteshenyi kya masakya na kupana mabuku alumbulula Baibolo ku bantu. Bantu bavula kechi batako muchima ne, bino bano ba mulume ne mukazhi batwajijila kwiya pa ino mpunzha ne kumwemwesela inge bantu bebatala. Pa kushinkimana juba, babwela ku nzubo saka benda pachepache. Kabiji juba jalondelapo lukelo na kimye kya 7 koloko babwela pa yonka ino mpunzha. Bano ba mulume ne mukazhi ba kishinka bapayankana na kusapwila byambo bya Bufumu pa ino mpunzha lukelo kelo moba atanu na jimo mu mulungu, pa mwaka pa mwaka.

² Byonkatu byuba ba Sergio ne ba Olinda, balongo ne banyenga bavula bingi mwaya ntanda basapwila pa myaka yavula mu mapunzha  muji bantu bavula babula kutako muchima ku mambo awama. Inge byo biji ne nyaunda yo musapwilamo, tubena kwimusanchila bingi pa kuchinchika kwenu. * Bakwenu ba mu lwitabilo, kubikapotu ne boba baingijila Lesa pa myaka yavula batundaikwa bingi pa kumona byo mwatwajijila kwingijila Yehoba na kuchinchika. Umvwai byambo byaambile bakalama ba myanzo: “Inge naingila na balongo ne banyenga ba uno mutundu mu mwingilo, ntundaikwa bingi.” “Bukishinka bwabo buntundaika kuchinchika ne kwingila mwingilo kwa kubula moyo.” “Byubilo byabo byawama bintundaika bingi.”

3. Ñanyi mepuzho asatu o tusakwisambapo, kabiji mambo ka?

³ Pa kuba’mba tutwajijile kwingila mwingilo wa kusapwila witupa Yesu, twayai twisambe mikumbu ya ano mepuzho asatu: Ñanyi kintu kyakonsha kwitukozha ku muchima? Twakonsha kupanga byepi bipangwa? Ki ka kiketukwasha kupanga bipangwa?

4. (a) Paulo waumvwine byepi Bayudea bavula byo bakaine kumvwa mambo awama? (b) Mambo ka Paulo o kyamukolejile ku muchima?

⁴ Inge mwakyumvwapo kala ku muchima kukola na mambo a kusapwila mu nyaunda muji bantu babula kutako muchima ku mambo awama, mwakonsha kuswa byaumvwine mutumwa Paulo. Pa myaka nobe 30 yo aingijilenga mwingilo wanji, wakwashishe bantu bavula kwikala baana ba bwanga ba kwa Kilishitu. (Byu. 14:21; 2 Ko. 3:2, 3) Pano bino, Bayudea bavula bakaine kwikala bapopweshi ba kine. Bavula bakananga byambo byo asapwilanga kabiji bakwabo bamumanyikilenga. (Byu. 14:19; 17:1, 4, 5, 13) Abino byubilo bya Bayudea byalengejile Paulo kumvwa byepi? Waambile’mba: “Mbena kwamba kine mwi Kilishitu . . . nji na bulanda bukatampe ne musongo ubula kupwa mu muchima wami.” (Loma 9:1-3) Mambo ka Paulo o aumvwijilenga bino ku muchima? Mambo watemenwe mwingilo wa kusapwila. Wasapwijile ku Bayudea mambo wakebeshe bingi kwibakwasha. Onkao mambo, kyamukolelenga bingi ku muchima pa kumona kebakane lusa lwa Lesa.

5. (a) Ki ka kitutundaika kusapwila ku bantu? (b) Mambo ka o kitukolela ku muchima bimye bimo?

⁵ Byonka byaubanga Paulo, ne atweba tusapwila bantu mambo tukebesha kwibakwasha. (Mat. 22:39; 1 Ko. 11:1) Mambo ka? Mambo twayuka mapesho avula akatambula boba basalapo kwingijila Yehoba. Inge twalanguluka pa bantu baji mu nyaunda yetu, twamba mu muchima amba, ‘Kyakonsha kuwama bingi inge twibakwasha kuyuka bintu byanema byo babula kuyuka.’ Onkao mambo, tutwajijila kwibatundaika kufunda bukine pe Yehoba ne bintu byo akeba kubila bantu. Kijitu nobe twambila bantu bo tusapwilako amba: ‘Twimuletela bupe bwanema bingi. Mwane tambulai.’ Onkao mambo, inge bantu bakana kutambula buno bupe, kyakonsha kwitulengela kwikala na “musongo ubula kupwa mu muchima [wetu].” Kumvwa kutama ku muchima kechi kulumbulula’mba lwitabilo lwetu lwakooka ne, bino kumwesha’mba twatemwa mwingilo wa kusapwila. Onkao mambo, nangwa kya kuba twakonsha kumvwa kutama ku muchima, bino tuchinchika. Atweba bavula twakonsha kuswa byaambile ba Elena baingila bupainiya pa myaka 25, amba: “Mwingilo wa kusapwila wakatazha. Pano bino, kafwako mwingilo mukwabo ye nakonsha kwingila wawama kukila kusapwila ne.”

6. Ñanyi bwipuzho bo tusakwisambapo, kabiji ki ka kisakwitukwasha kukumbula buno bwipuzho?

⁶ Twayuka byepi amba twakonsha kupanga bipangwa mu mwingilo wa kusapwila nangwa kya kuba twingijila mu nyaunda yakatazha? Pa kuba’mba tukumbule buno bwipuzho bwanema  bingi, twayai twisambe pa bishimpi bibiji bya kwa Yesu byaamba pa buneme bwa ‘kupanga bipangwa.’ (Mat. 13:23) Kishimpi kitanshi kyaamba pa muñanzañanza.

7. (a) “Njimi,” “muñanzañanza,” ne “misampi” bimenako bañanyi? (b) Ñanyi bwipuzho bo tusakukumbula?

⁷ Tangai Yoano 15:1-5, 8. Akimonai byambo Yesu byo abuujile batumwa banji, amba: “Batata batumbijikilwa mu kyonka kino, kuba’mba anweba mupangenga bipangwa byavula ne kwikala baana bami ba bwanga.” Yesu walumbulwile’mba ‘njimi’ wimenako Yehoba, “muñanzañanza,” wimenako aye mwine Yesu, kabiji “misampi” imenako baana banji ba bwanga. * Pano ñanyi bipangwa byafwainwa kupanga baana ba bwanga ba kwa Kilishitu? Mu kino kishimpi, Yesu kechi watongwele bine bipangwa ne, bino waambile kishinka kyanema kitukwasha kutaana mukumbu.

8. (a) Mambo ka o twaambila’mba bipangwa bya mu kino kishimpi kechi bimenako baana ba bwanga ba katataka ne? (b) Nanchi Yehoba witubuula kuba bintu byakila pa bulume bwetu nyi?

⁸ Yesu waambile pe Bashanji amba: “Bakopola musampi yense uji mwi amiwa ubula kupanga bipangwa.” Kino kibena kulumbulula’mba Yehoba witumonatu amba twi bakalume banji inge ketupange bipangwa. (Mat. 13:23; 21:43) Onkao mambo, mu kino kishimpi, bipangwa mwina Kilishitu yense byo afwainwa kupanga kechi bilumbulula bantu bo twafwainwa kufunjisha kwikala baana ba bwanga ne. (Mat. 28:19) Mambo inge kyaikala bino, Bakamonyi ba kishinka babula kukwashapo bantu kwikala baana ba bwanga na mambo a kwingijila mu nyaunda yakatazha bakonsha kwikala nobe misampi ya mu kishimpi kya kwa Yesu ibula kupanga bipangwa. Bino kulanguluka bino kechi kwayilamo ne! Mambo ka? Mambo kechi twakonsha kukanjikizha bantu kwikala baana ba bwanga ne. Kino kyakonsha kumwesha’mba Yehoba kechi watemwa bakalume banji ne, inge kya kuba keebabuule kuba kintu kyakila pa bulume bwabo. Yehoba kechi witupa mwingilo wakila pa bulume bwetu ne.—Mpitu. 30:11-14.

9. (a) Tupanga bipangwa kupichila mu ñanyi mwingilo? (b) Ñanyi kishimpi kyo tusakwisambapo, kabiji mambo ka?

⁹ Pano ñanyi bipangwa byo twafwainwa kupanganga? Kyamwekeshatu patoka’mba bino bipangwa ke mwingilo ye twakonsha kwingila atweba bonse. Ñanyi mwingilo wa “kupanga bipangwa” ye betupa? Ke mwingilo wa kusapwila mambo awama a Bufumu bwa Lesa. * (Mat. 24:14) Kishimpi kya kwa Yesu kya njimi kyalumbulula bulongo kino kishinka. Onkao mambo, twayai twisambe pa kino kishimpi kya bubiji.

10. (a) Mu kino kishimpi, nkunwa ne mushiji bimenako ka? (b) Ñanyi bintu bipanga ku lunenge wa wichi?

¹⁰ Tangai Luka 8:5-8, 11-15. Mu kishimpi kya njimi, nkunwa ke “mambo a Lesa,” nangwa’mba byambo bya Bufumu. Mushiji wimenako muchima wa muntu. Twambe’mba nkunwa yaponejile pa mushiji wawama yajinga ya wichi. Kabiji byo yamenene ne kukoma, “yapangile bipangwa 100.” Pano ñanyi bipangwa bipanga ku lunenge wa wichi? Nanchi kupanga nnenge ikwabo nyi? Ine, kupanga nkunwa ya katataka, kabiji imena ne kwikala nnenge ikwabo. Mu kino kishimpi, ka lukunwa kamo ka wichi kasemununa ne kwikala nkunwa yavula bingi. Kino kishimpi kyakwatankana byepi na mwingilo wetu wa kusapwila?

11. (a) Kishimpi kya njimi kyakwatankana byepi na mwingilo wetu wa kusapwila? (b) Tupanga byepi nkunwa ya Bufumu ya katataka?

¹¹ Pa kuba’mba tumvwishe bulongo, twambe’mba myaka ya kunyuma Bakamonyi nangwa bansemi betu bena Kilishitu betufunjishe mambo awama a Bufumu. Baumvwine bingi bulongo byo bamwene twatambwila nkunwa ya mambo a Bufumu. Byonkatu mushiji wawama mu kishimpi kya kwa Yesu byo alengejile nkunwa kumena, ne atweba  twaswile byambo byo betufunjishe ne kwibilama. Na mambo a kino, nkunwa ya mambo a Bufumu yajimbile mizhazhi ne kukoma ne kwikala nobe lunenge wa wichi, kabiji mu kuya kwa kimye twatendekele kupanga bipangwa. Kabiji byonkatu bipangwa bifuma ku lunenge ke nkunwa ya wichi, kechi nnenge ikwabo ne, ne atweba bipangwa byo tupanga kechi baana ba bwanga ba katataka ne, bino ke nkunwa ya Bufumu ya katataka. * Pano tupanga byepi nkunwa ya Bufumu ya katataka? Kimye kyonsetu inge twasapwila byambo bya Bufumu, kikalatu nobe nkunwa yo babyajile mu muchima wetu ibena kusemununa. (Luka 6:45; 8:1) Onkao mambo, kino kishimpi kitufunjisha kuba’mba inge ketusapwile byambo bya Bufumu, ko kuba’mba tubena “kupanga bipangwa saka [twachinchika].”

12. (a) Tufunjilako ka ku kishimpi kya kwa Yesu kya muñanzañanza ne kya njimi? (b) Luno lufunjisho lwimulengela kumvwa byepi?

¹² Ñanyi lufunjisho lwanema lo tufunjilako ku bishimpi bya kwa Yesu, kya muñanzañanza ne kya njimi? Bitukwasha kuyuka kuba’mba kupanga bipangwa mu mwingilo kechi kwaimena pa byuba bantu mu nyaunda yetu pa kwibasapwila ne. Bino kwaimena pa bukishinka bwetu. Paulo waambilepo pa kino kishinka amba: “Muntu yense bakamufweta monka mwayila mingilo yanji.” (1 Ko. 3:8) Muntu yense bakamufweta monka mwayila mingilo yanji, kechi mwayila bifumamo mu mwingilo wanji ne. Ba Matilda baingila bupainiya pa myaka 20 baambile’mba: “Kindetela bingi lusekelo pa kuyuka’mba Yehoba witufweta pa kwibikako kwetu.”

13, 14. Kwesakana na byaamba Loma 10:1, 2, ñanyi bishinka byalengejile Paulo kubula kuleka kusapwila bantu bakananga kumvwa byambo bya Bufumu?

¹³ Ki ka kiketukwasha kutwajijila kupanga bipangwa saka twachinchika? Byonka byo twaambapo kala, Paulo kyamukolele bingi ku muchima Bayudea byo bakaine kumvwa byambo bya Bufumu. Nangwa byonkabyo, kechi wikilekele kwibasapwila ne. Akimonai byambo byo aambile mu nkalata yo atumijile bena Kilishitu mu Loma kulumbulula byo amonanga Bayudea amba: “Nakebesha  bingi kwibasashijilako bena Isalela kwi Lesa kuba’mba bapuluke. Mambo nebamona namba baji na mukoyo wa kwingijila Lesa, bino kechi mwayila maana alumbuluka ne.” (Loma 10:1, 2) Ñanyi bishinka Paulo byo aambilepo byamulengejile kutwajijila kusapwila?

¹⁴ Kitanshi, Paulo waambile pa kine kintu kyamulengejile kutwajijila kusapwila ku Bayudea. ‘Wakebeshe bingi’ kwibakwasha. Wakebeshe bingi kuba’mba Bayudea bamo bakapuluke. (Loma 11:13, 14) Kya bubiji, Paulo waambile pa “kwibasashijilako . . . kwi Lesa.” Wasashijile Lesa mu milombelo kuba’mba akwashe Bayudea baswe mambo a Bufumu. Kya busatu, Paulo wanungilepo’mba: “Baji na mukoyo wa kwingijila Lesa.” Wamwenemo byawama mu bantu. Paulo wayukile’mba bano Bayudea bajinga na mukoyo, inge bafunda Mambo a Lesa, bakonsheshe kwikala baana ba bwanga ba kwa Kilishitu ba mukoyo byonka byo ajinga aye.

15. Twakonsha kufunjilako ka kwi Paulo? Ambaipo bishinka bimo.

¹⁵ Twakonsha kufunjilako ka kwi Paulo? Kitanshi, twafwainwa kwibikako kwikala na kizaku kya kukebamo bantu bakonsha kwikala na “michima ya bukishinka ya kukeba bumi bwa myaka.” Kya bubiji, tusashijila Yehoba mu milombelo kuba’mba ashinkule michima ya bantu ba kishinka. (Byu. 13:48; 16:14) Ba Silvana, baingila bupainiya pa myaka 30 baambile’mba: “Saka nkyangye kuya na kusapwila ku nzubo ku nzubo mu nyaunda yami, patanshi ndomba kwi Yehoba kuba’mba ankwashe kwingila na lusekelo.” Kabiji tulomba kwi Lesa kuba’mba bamalaika betutangijile ku bantu bakeba kufunda bukine. (Mat. 10:11-13; Lum. 14:6) Ba Robert, baingila bupainiya pa myaka kukila pa 30 baambile’mba: “Kyawama bingi kwingila na bamalaika bayuka bibena kumweka mu mazubo a bantu.” Kya busatu, twesekesha na ngovu kumonamo byawama mu bantu. Ba Carl, bakulumpe mu kipwilo babatizhiwe kala papita ne myaka 50 baambile’mba: “Nta muchima pa biyukilo bimwesha’mba muntu ukeba kufunda, nabiji inge wamwemwesela, kumwesha kilungi kya lusekelo, nangwa kwipuzha mepuzho awama.” Kya kine, byonkatu byajinga Paulo, ne atweba twakonsha kuchinchika pa kupanga bipangwa.

16, 17. (a) Tufunjilako ka ku mukambizho uji pa Musapwishi 11:6? (b) Lumbululai mwingilo wa kubyala nkunwa byo akonsha kukwasha boba betumona.

¹⁶ Nangwatu inge kyamweka nobe byambo bya Bufumu byo tusapwila kechi bibena kufika bantu pa muchima ne, kechi twafwainwa kulengulula mwingilo wa kubyala nkunwa ne. (Tangai Musapwishi 11:6.) Nangwa kya kuba bantu bavula bakana kwibasapwila, bino betumona. Bamona byo tuvwala bulongo, byubilo byetu byawama, ne lusekelo. Mu kuya kwa kimye, byubilo byetu byakonsha kukwasha bamo kuyuka’mba bintu byatama byo betulangulukila kechi byo ibyo ne, kabiji bakonsha kupimpula. Ba Sergio ne ba Olinda, bo twaambapo kala, bemwenejile luno lupimpu.

¹⁷ Ba Sergio bashimikizhe’mba: “Na mambo a kukolwa, moba amo kechi twayile pa mpunzha po twaimananga na kusapwila ne. Byo twayilepo juba jikwabo, bantu bapichilenga betwipwizhe’mba, ‘Ki ka kyamwekele? Mwalekele kumweka.’” Ba Olinda banungilepo’mba: “Bendesha masakya betusokwenenga kabiji bamo babijikilenga’mba, ‘Mubena kwingila mwingilo wawama!’ Balombelenga ne magazini etu.” Kabiji bano ba mulume ne mukazhi bakuminye bingi mwanamulume umo byo aimene po batanchikile mabuku ne kwibapa maluba awama, ne kwibasanchila pa mwingilo ye baingijilenga.

18. Mambo ka o mwafuukwilapo kutwajijila “kupanga bipangwa saka [mwachinchika]”?

¹⁸ Kya kine, inge twatwajijila kubyala nkunwa ya Bufumu, ko kuba’mba tubena kwingila mwingilo wanema wa kushimuna “bukamonyi ku bisaka byonse bya bantu.” (Mat. 24:14) Kyakila pa byonse, twikala na lusekelo lufuma mu kuyuka’mba Yehoba witutemwa, mambo watemwa boba ‘bapanga bipangwa saka bachinchika’!