NA MAMBO a kuba’mba twikala mu ntanda yakatazha, twafwainwa kwibikako pa kuba’mba twikale mu mutende. Nangwatu inge twaikala mu mutende, bino kechi kyapeela kumulamawizha ne. Mambo a Lesa aambapo’mba ka pa kyakonsha kwitukwasha kutaana mutende ne kutwajijila kwikala nanji? Kabiji twakonsha kukwasha byepi bakwetu nabo kwikala mu mutende?

Twakonsha kwikalatu na mutende wa kine inge twaikala ku matwi nzoo kabiji kechi tuji na bijikila ne. Kabiji twafwainwa kwikala na bulunda bwawama na bakwetu. Ne kyakilamo kunema, pa kuba’mba twikale na mutende wa myaka ne myaka, twafwainwa kwikala na bulunda bwakosa na Lesa. Twakonsha kuba byepi bino?

Inge twakookela mikambizho ne mafunde a Yehoba aoloka, tumwesha’mba twamuketekela ne kuba’mba tukeba kwikala balunda nanji. (Yele. 17:7, 8; Yako. 2:22, 23) Kabiji naye ukafwenya kwipi ne atweba ne kwitupesha na mutende mu milanguluko. Isaya 32:17 waamba’mba: “Bololoke bukaleta mutende, kabiji bololoke bukalengela kwikala ku matwi nzoo ne kuzhikijilwa.” Twakonsha kwikala na mutende mu milanguluko inge ketukookele Yehoba na muchima yense.—Isa. 48:18, 19.

Kabiji twakonsha kwikala na mutende wa myaka inge twatambula bupe bwanema bingi bufuma kwi Shetu wa mwiulu, ko kuba’mba mupashi wanji wazhila.—Byu. 9:31.

Pa mutanchi wanembele mutumwa Paulo wa “bipangwa bya mupashi,” mutende kyo kipangwa kya busatu. (Nga. 5:22, 23) Byo kiji kuba’mba mutende kipangwa kya mupashi wa Lesa, twafwainwa kuswisha mupashi wazhila kwingilanga mwi atweba pa kuba’mba etukwashe kwikala na mutende  wa kine. Twayai twisambe mashinda abiji mupashi wa Lesa mo etukwashisha kwikala na mutende.

Jishinda jitanshi, mupashi wa Lesa witukwasha kwikala na mutende kupichila mu kutanga kimye kyonse Mambo a Lesa anembelwe na lutangijilo lwa mupashi. (Sala. 1:2, 3) Inge ketulanguluke pa byambo bya mu Baibolo, mupashi wa Lesa witukwasha kumvwisha milanguluko ya Yehoba pa bintu byavula. Twakonsha kwimwena Lesa byo atwajijila kwikala mutende ne ene mambo mutende o anemena kwi aye. Umvwe ketulondele byo tufunda mu Mambo a Lesa, tukekala na mutende wa kine mu bwikalo bwetu.—Maana 3:1, 2.

Jishinda ja bubiji, twafwainwa kulombanga mupashi wazhila wa Lesa. (Luka 11:13) Yehoba walayile kuba’mba inge twalomba bukwasho bwanji “mutende wa Lesa wakila milanguluko ya bantu ukalama michima ne milanguluko [yetu] kupichila mwi Kilishitu Yesu.” (Fili. 4:6, 7) Inge saka tulomba kimye kyonse mupashi wa Yehoba, Lesa uketupa mutende wa mu milanguluko wikalatu na boba baji na bulunda bwakosa ne aye.—Loma 15:13.

Bamo balondela byepi luno lujimuno lwa mu Binembelo ne kupimpula byubilo byabo pa kuba’mba bekale na mutende na Yehoba, kwikala na mutende abo bene ne na bakwabo?

Mu kipwilo kya bena Kilishitu lelo jino, muji bantu bamo bajinga na “bukaji” kala bino luno baji bingi na lusa, kifyele, butekanye, ne kwikala mu mutende na bakwabo. * (Maana 29:22) Akimonai kino byo kyakwashishe basapwishi ba Bufumu babiji kuleka bukaji ne kutendeka kwikala mu mutende na bakwabo.

Ba David bajinga na bukaji kabiji bwibalengejile kwikala na ñambilo yatama. Saka bakyangye kwipana kwi Lesa, balengululanga bingi bakwabo kabiji baingijishanga byambo byatama bingi mu kisemi kyabo. Mu kuya kwa kimye, ba David bamwene kuba’mba bafwainwe kupimpula byubilo byabo ne kwikala muntu wa mutende. Bataaine byepi mutende? Baambile’mba, “Natendekele kwingijisha mafunde a mu Baibolo mu bwikalo bwami, kabiji kyafuminemo, twatendekele kwinemeka mu kisemi.”

Ba Rachel bakomejile mu kisemi mwajinga bantu ba bukaji. Kino kibalengejile ne abo kwikala na bukaji. Baambile’mba: “Ne lunotu, bimye bimo kinkatazha kufwomona bukaji mambo nakomejile  mu kisemi mwajinga bantu ba bukaji.” Ki ka kibakwasha kwikala mu mutende na bakwabo? Bakumbwile’mba, “Kulomba bukwasho bwa Yehoba kimye kyonse.”

Ba David ne ba Rachel ke bantu babijitu bamwesha’mba twakonsha kwikala na kipangwa kya mutende inge ketulondele mafunde a mu Binembelo ne kulomba bukwasho bwa mupashi wa Lesa. Kya kine, nangwa kya kuba twikala mu ntanda yatama, twakonsha kwikala na mutende wa mu milanguluko ne kukwatankana mu bisemi byetu ne na bakwetu bena Kilishitu. Bino Yehoba witukambizha kwikala “mu mutende na bantu bonse.” (Loma 12:18) Nanchi kino kyakonsheka nyi, kabiji ñanyi bintu byawama bifumamo mu kwibikako kwikala mu mutende?

Byo tuya na kusapwila, tukwasha bantu kuba’mba bamwenemo mu mutende ufuma mu kumvwa mambo awama a Bufumu bwa Lesa. (Isa. 9:6, 7; Mat. 24:14) Kyawamako ke kya kuba’mba bavula babena kutambwila ano mambo awama. Kyafumamo, baleka kwakamwa nangwa kuba bukaji na mambo a bintu bibena kumweka mu ntanda. Pakuba luno baji na luketekelo lwa bwikalo bwawama bwa kulutwe kabiji batundaikwa ‘kukeba mutende ne kumulondalonda.’—Sala. 34:14.

Pano bino, kechi bonse baswa kumvwa mambo awama pa kyonka kimye kitanshi kyo twibasapwila ne. (Yoa. 3:19) Nangwa byonkabyo, mupashi wa Lesa witukwasha kwibasapwila mambo awama na mushingi ne mu mutende. Mu kuba bino, tulondela mikambizho ya kwa Yesu yaamba pa bya kwingila mwingilo, yanembwa pa Mateo 10:11-13, ya kuba’mba: “Umvwe mwatwela mu nzubo, imunai mwina nzubo. Umvwe nzubo yafwainwa, mutende wenu ekalemo; kabiji inge kechi yafwainwa ne, mutende wenu emubwelele.” Inge twalondela lujimuno lwa kwa Yesu, twakonsha kufuma pa nzubo ya muntu wakana kumvwa mambo awama mu mutende ne kuketekela kuba’mba kulutwe awo muntu ukateleka.

Kabiji tutundaika mutende inge twaya na kwisamba na bantangi ba mu kafulumende mu mushingi, kubikapotu ne boba bakanya mwingilo wetu. Mu kyalo kimo kya mu Africa kafulumende kechi waswishishe balongo kushimika Mazubo a Bufumu ne. Na mambo a kukeba kupwisha luno lukatazho mu mutende, mulongo waingijilepo bumishonale mu kino kyalo kya mu Africa bamutumine kuya na kwisamba na ntomesha wimenako kino kyalo mu muzhi wa London, mu England. Bamutumine kuya na kulumbulwila uno ntomesha mwingilo wa mutende wingila Bakamonyi bwa kwa Yehoba mu kyalo kyanji. Ñanyi bintu byafuminemo?

Washimikizhe’mba: “Byo nafikile mu ofweshi mufikila benyi, namwene bivwalo byavwajile yewa wingila mwingilo wa kutambwila benyi, kabiji nafikenejiletu kuyuka’mba wamba mulaka yenka ye nafunjile. Onkao mambo namwimwine mu mulaka wanji. Wakuminye bingi ne kungipuzha’mba, ‘Nemukwasheko mwane?’ Namulumbulwijile mu mushingi namba mbena kukeba kwisambako na ntomesha wimenako kyalo kyabo. Wamutumijile foni kabiji waishile ne kuñimuna mu mulaka wabo. Byo twapwishishe kwiimuna, watelekele bulongo byo namulumbulwijilenga mwingilo wa mutende wingila Bakamonyi.”

Na mambo a kuba mulongo waambile na mushingi, kino kyakwashishe ntomesha kupimpula ndangulukilo yanji pa Bakamonyi ne mwingilo wetu. Mu kuya kwa kimye, uno kafulumende wa kino kyalo kya mu Africa waswishishe mwingilo wetu. Balongo basangalele bingi pa kino kyamwekele. Kya kine, mu kupa bantu mushingi mufuma bintu byawama bingi, kubikapotu ne mutende.

Lelo jino, bantu ba Yehoba baji mu paladisa wa ku mupashi mo beyowa mutende na bakwabo. Nanchi mutundaika uno mutende kupichila mu kwikala na kino kipangwa kya mupashi mu bwikalo bwenu nyi? Kyakilamo kunema, Yehoba ukemutemwa kabiji mukekala na mutende wa myaka ne myaka mu ntanda ipya ya Lesa.—2 Pe. 3:13, 14.