MUTWE WA KUFUNDA 19
LWIMBO 22 Bufumu Bubena Kulama—Bwiye!
Ñanyi bintu byo Twayuka pe Yehoba byo Akachibila Bantu Mambo Kulutwe?
“Yehoba kechi usaka muntu nangwa umo amba akafwe ne.”—2 PE. 3:9.
BYO TUSAKWISAMBAPO
Twafwainwa kushiinwa’mba Yehoba byo akachibila bantu mambo kulutwe, ukebachibila monka mo aolokela.
1. Mambo ka o twakonsha kwambila’mba tubena kwikala mu moba anema bingi?
TUBENA kwikala mu moba anema bingi. Pa juba pa juba, tubena kwimwena bungauzhi bwa mu Baibolo byo bubena kufika. Tubena kumona “mfumu wa ku kabeta ka ku buyeke” ne “mfumu wa ku kabeta ka ku bulenge” byo babena kwikyombesha ne kukeba kwikala bufumu bwa ntanda yonse. (Da. 11:40, tubyambo twa munshi.) Tubena kwimwena mambo awama a Bufumu bwa Lesa byo abena kusapwilwa pano pa ntanda ponse, ne mamilyonyi a bantu byo babena kufunda bukine. (Isa. 60:22; Mat. 24:14) Kabiji tubena kutambwila kajo ka ku mupashi “pa kimye kyafwainwa.”—Mat. 24:45-47.
2. Ñanyi kintu kyo twafwainwa kushiinwa, kabiji ñanyi kintu kyo twafwainwa kuyuka?
2 Yehoba watwajijila kwitukwasha kumvwisha bintu byanema bikamweka kulutwe katataka. (Maana 4:18; Da. 2:28) Twafwainwa kushiinwa kuba’mba malwa akatampe saka akyangye kutendeka, tukayuka bintu byo twafwainwa kuyuka pa kuba’mba tukachinchike ne kutwajijila kwikala bakishinka mu kyokya kimye kikakatazha bingi. Nangwa byonkabyo, twafwainwa kuyuka’mba kuji bintu bimo byo twabula kuyuka bikamweka kulutwe katataka. Mu uno mutwe, tusakwisamba patanshi pa ene mambo o twapimpwilako bintu byo twaambile pa bino bintu bikamweka kulutwe. Kepo tusakwisamba pa bintu bimo byo twayuka bikamweka kulutwe ne bikoba Shetu wa mwiulu.
BINTU BYO TWABULA KUYUKA
3. Ñanyi bintu byo twaambile’mba byo bikamwekela bantu babula kwitabila mwi Yehoba inge malwa akatampe atendeka, kabiji mambo ka o twaambijile bino?
3 Kunyuma akwe, twaambile kuba’mba inge malwa akatampe atendeka, bantu kechi bakekala na kimye kya kwitabila mwi Yehoba ne kupuluka pa Amagedonyi ne. Twaambile bino mambo twalangulukanga’mba jishimikila jaamba pa muyulo jaimenejilengako kintu kikamweka kulutwe. Twalangulukanga kuba’mba byonkatu Yehoba byo ashinkile kinzhilo kya bwato Muyulo saka akyangye kutendeka, ne malwa akatampe saka akyangye kutendeka, Yehoba byobyo ‘akashinka kinzhilo’ pa kuba’mba bantu ba mu ino ntanda ya kwa Satana bakabule kufunda pe aye ne kupuluka.—Mat. 24:37-39.
4. Nanchi luno tumona jishimikila jaamba pa Muyulo kuba’mba jimenako bintu bikamweka kulutwe nyi? Lumbululai.
4 Nanchi twafwainwa kumonanga jishimikila jaamba pa Muyulo kuba’mba jimenako bintu bikamweka kulutwe nyi? Ine. Mambo ka? Mambo Baibolo kechi waambapo bino ne. a Yesu waesakenye “moba a Nowa” ku kimye kya kwikalapo kwanji. Pano bino, kechi waambile’mba byonse byamwekele mu moba a kwa Nowa byaimenejilengako bintu bikamweka kulutwe, nabiji kushinka kinzhilo kya bwato ne. Nangwa byonkabyo, kino kechi kibena kulumbulula’mba ku jishimikila ja kwa Nowa ne Muyulo kechi twakonsha kufunjilako bintu ne.
5. (a) Ñanyi kintu kyaubile Nowa Muyulo saka akyangye kufika? (Bahebelu 11:7; 1 Petelo 3:20) (b) Mwingilo wa kusapwila waingijile Nowa wipasha byepi na mwingilo wa kusapwila ye tubena kwingila lelo jino?
5 Nowa byo aumvwine byambo bya Yehoba bya lujimuno, wafiikile bwato kabiji kino kyamwesheshenga’mba wajinga na lwitabilo. (Tangai Bahebelu 11:7; 1 Petelo 3:20.) Po pamotu, bantu bomvwa mambo awama a Bufumu bwa Lesa bafwainwa kwingijishanga bintu byo bafunda. (Byu. 3:17-20) Petelo waambile’mba Nowa wajinga “musapwishi wasapwilanga bololoke.” (2 Pe. 2:5) Nangwa byonkabyo, kwesakana na byo twafunjile mu mutwe wafumako, kechi twayuka inge kya kuba Nowa wasapwijilenga bantu bonse pano pa ntanda Muyulo saka akyangye kwiya ne. Lelo jino, ne atweba tusapwila bantu mwaya ntanda yonse kabiji twibikako kwingila uno mwingilo na mukoyo. Nangwa kya kuba tubena kwibikako kwingila na mukoyo, kechi tukasapwila mambo awama ku bantu bonse pano pa ntanda mpelo saka ikyangye kufika ne. Mambo ka?
6-7. Mambo ka o twakonsha kwambila’mba kechi tukakonsha kusapwila mambo awama pano pa ntanda ku bantu bonse pa muntu pa muntu mpelo saka ikyangye kwiya ne? Lumbululai.
6 Akilangulukai pa byaambile Yesu pa mwingilo wa kusapwila. Waambijile jimo kuba’mba mambo awama bakeasapwila “pano pa ntanda ponse kwikala bukamonyi ku bisaka byonse bya bantu.” (Mat. 24:14) Buno bungauzhi bubena kufika mu ano moba kukila ne byo kyajinga kala. Mambo a Bufumu beanemba mu milaka kukila 1,000 kabiji bantu bavula pano pa ntanda babena kumvwa ano mambo a Bufumu kwingijisha keyala wetu wa jw.org.
7 Nangwa byonkabyo, Yesu waambijile baana banji ba bwanga amba kechi bakapwisha kusapwila “mu mizhi yonse,” nangwa’mba kusapwila ku bantu bonse aye saka akyangye kwiya ne. (Mat. 10:23; 25:31-33) Byambo byaambile Yesu bikafika ne mu ano moba etu. Lelo jino, mamilyonyi a bantu bekala mu mapunzha mo bakanya mwingilo wetu wa kusapwila. Kabiji baana bavula bingi basemwa mu minititu umo. Twingila papelela bulume bwetu kusapwila mambo awama “ku bisaka bya bantu byonse ne ku mikoka yonse ne ku ba njimi yonse.” (Lum. 14:6) Pano bino, kishinka ke kya kuba’mba kechi tukakonsha kusapwila mambo awama ku bantu bonse pa muntu pa muntu pano pa ntanda mpelo saka ikyangye kwiya ne.
8. Ñanyi bwipuzho bo twakonsha kwiipuzha pe Yehoba byo akachibila bantu mambo kulutwe? (Monai ne bipikichala.)
8 Onkao mambo, twakonsha kwiipuzha’mba: “Pano nanchi kikekala byepi ku boba bakabula kwikala na kimye kya kumvwa mambo awama malwa akatampe saka akyangye kufika? Yehoba ne Mwananji ye apa mwingilo wa kuchibila bantu mambo, bakeboba byepi? (Yoa. 5:19, 22, 27; Byu. 17:31) Kishina kya uno mutwe kyaamba’mba ‘Yehoba kechi usaka muntu nangwa umo amba akafwe ne.’ Pakuba ukeba’mba “bantu bonse balapile.” (2 Pe. 3:9; 1 Timo. 2:4) Na mambo a kino, twafwainwa kuyuka’mba Yehoba ukyangye kwitusolwela bintu byo akoba pa mambo a buno bwipuzho. Nangwa byonkabyo, kechi kyo kyetu kya kuba’mba kanatu Yehoba etubuule bintu byonse byo auba ne byo akoba ne.
Yehoba ukoba byepi na bantu babujile kwikalapo na kimye kya kumvwapo mambo awama malwa akatampe saka akyangye kutendeka? (Monai jifuka 8) c
9. Ñanyi kintu kimo Yehoba kyo etusolwela mu Baibolo?
9 Mu Baibolo, Yehoba witusolwela bintu bimo byo akooba kulutwe. Kintu kimo kyo etusolwela mu Baibolo ke kya kuba’mba Yehoba ukasangula bantu “babula koloka” babujile kufunda mambo awama ne kupimpula byubilo byabo byatama. (Byu. 24:15; Luka 23:42, 43) Kino kitulengela kwipuzha mepuzho akwabo anema.
10. Ñanyi mepuzho akwabo o twakonsha kwiipuzha?
10 Nanchi bantu bonse bakafwa na mambo a bintu bikamweka mu kimye kya malwa akatampe, bakonaika myaka ne myaka kwa kubula kwikala na luketekelo lwa kukebasangula nenyi? Binembelo byaambishatu patoka’mba balwanyi bo bakonauna kwi Yehoba ne nzhita yanji pa Amagedonyi kechi bakasangulwa ne. (2 Tesa. 1:6-10) Pano ibyepi pa bantu bakonsha kufwa na mambo a kukolwa, bukote, mapuso nangwa bo baipaya ku bakwabo? (Sapwi. 9:11; Zeka. 14:13) Nanchi bamo pa bano bantu bakekala pa bantu “babula koloka” bo bakasangula mu ntanda ipya nyi? Kechi twayuka ne.
BINTU BYO TWAYUKA
11. Bantu bakebachibila mambo pa Amagedonyi kwesakana na ka?
11 Twayuka bintu byavula bingi pa bikamweka kulutwe. Twayuka kuba’mba pa Amagedonyi, bantu bakebachibila mambo kwesakana na byo baubanga ku balongo ba kwa Kilishitu. (Mat. 25:40) Aba batundaika bashingwa ne Kilishitu bakebachibila mambo amba mikooko. Kabiji twayuka kuba’mba balongo bamo ba kwa Kilishitu bakekala pano pa ntanda kimye kikatendeka malwa akatampe. Bakebasenda kuya mwiulu Amagedonyi saka iji pepi kutendeka. Balongo ba kwa Kilishitu bamo byo bakiji pano pa ntanda, kyakonsheka bantu baji na michima ya bukishinka kufuukulapo kutundaika balongo ba kwa Kilishitu ne mwingilo ye babena kwingila. (Mat. 25:31, 32; Lum. 12:17) Mambo ka bino bishinka o byanemena?
12-13. Bantu bamo bakobapo ka kimye “Babilona Mukatampe” kyo bakamonauna? (Monai ne bipikichala.)
12 Nangwatu malwa akatampe saka atendeka kala, kyakonsheka kuba’mba bantu bamo bakamona “Babilona Mukatampe” byo bakamonauna, bakavuluka kuba’mba Bakamonyi ba kwa Yehoba baambilepo kuba’mba kintu kya uno mutundu kikamweka. Nanchi bantu bamo bakafuukulapo kupimpula byubilo byabo na mambo a bino bintu bikamweka nyi?—Lum. 17:5; Ezi. 33:33.
13 Kino inge kyamweka, kikepasha bingi na byamwekele mu Ijipita mu moba a kwa Mosesa. Vulukai kuba’mba “jibumba ja bantu bapusana pusana” bayile na bena Isalela byo bafumine mu Ijipita. Bamo batendekele kwitabila mwi Yehoba byo bamwene binkunka jikumi bibajimwineko Mosesa byo byafikile. (Lupu. 12:38) Inge abino byo bikoba ne bantu kimye kikonaunwa Babilona Mukatampe, nanchi tukalefulwa na mambo a kuba’mba bantu bamo bakafuukulapo kupopwela Lesa pamo ne atweba saka kwashalatu pacheche mpelo kufika nyi? Ine. Twafwainwa kwikala na byubilo bijipo na Shetu wa mwiulu, “Lesa wa lusa ne kifyele, ubanda kuzhingila, wavula butemwe bubula kwaluka ne bukine.” b—Lupu. 34:6.
Bantu bamo bakamona bikonaunwa “Babilona Mukatampe,” bakavuluka kuba’mba Bakamonyi ba kwa Yehoba baambilepo kuba’mba kintu kya uno mutundu kikamweka (Monai mafuka 12-13) d
14-15. Nanchi bumi bwa myaka ne myaka bwa muntu bwaimena pa kimye kyo akonsha kufwa nangwa ko ekala nyi? Lumbululai. (Sala. 33:4, 5)
14 Pa bimye bimo, tumvwa bantu bamo na kwamba’mba, “Kyakonsha kuwama inge mulongo wami wafwa malwa akatampe saka akyangye kutendeka pa kuba’mba akekale na luketekelo lwa kukasangulwa.” Kijitu bulongo kwamba bino. Nangwa byonkabyo, bumi bwa myaka ne myaka bwa muntu kechi bwaimena pa kimye kyo akonsha kufwa ne. Yehoba ye Nchibamambo waoloka kabiji kimye kyonse uba byaoloka. (Tangai Salamo 33:4, 5.) Twafwainwa kushiinwa kuba’mba “Mutonyi wa ba pano pa ntanda ponse” ukoba kyaoloka.—Nte. 18:25.
15 Kabiji twakonsha kwamba’mba bumi bwa myaka ne myaka bwa muntu kechi bwaimena na ko ekala ne. Yehoba kechi wakonsha kutela mamilyonyi a bantu bekala mu byalo mo kyakatazha kumvwa mambo a Bufumu kuba’mba bambuzhi ne. (Mat. 25:46) Mutonyi waoloka wa ba pano pa ntanda ponse wata bingi muchima bano bantu kukila ne byo twibata muchima atweba. Kechi twayuka Yehoba byo akoba bintu mu kimye kya malwa akatampe ne. Kampe Yehoba ukapa bano bantu bamo kimye kya kufunda pe aye, kumwitabila ne kufuukulapo kumwingijila kimye kyo akezhijika aye mwine ku bisaka byonse bya bantu.—Ezi. 38:16.
Inge malwa akatampe atendeka, nanchi bantu bamo bakamona bino bintu bikamweka bakapimpula byubilo byabo nyi?
16. Ñanyi bintu byo twayuka pe Yehoba? (Monai ne kipikichala.)
16 Tufunda mu Baibolo kuba’mba Yehoba wanemeka bingi bumi bwa bantu. Wapaine Mwananji kwitufwila pa kuba’mba atweba bonse twikale na luketekelo lwa kukekala na bumi bwa myaka ne myaka. (Yoa. 3:16) Atweba bonse Yehoba witubila kifyele. (Isa. 49:15) Wituyuka mazhina atweba bonse pa muntu pa muntu. Wituyuka bingi bulongo kya kuba’mba inge twafwa, uketusangula mambo uvuluka bintu byonse pe atweba ne milanguluko yetu. (Mat. 10:29-31) Onkao mambo, twashiinwa kuba’mba Shetu wa mwiulu wa butemwe ukachibila mambo bantu bonse pa muntu pa muntu monka mo aolokela ne kwibobila lusa.—Yako. 2:13.
Twashiinwa’mba Shetu wa mwiulu wa butemwe ukachibila mambo bantu bonse pa muntu pa muntu monka mo aolokela ne kwibobila lusa (Monai jifuka 16)
17. Ñanyi bintu byo tukesambapo mu mutwe walondelapo?
17 Byo kiji kuba’mba twaumvwisha luno lupimpu, kino kyafwainwa kwitulengela kwingilanga na mukoyo mwingilo wa kusapwila. Mambo ka o twaambila bino? Kabiji ñanyi bintu bitulengela kutwajijila kusapwila mambo awama kwakubula kuleka? Tukesamba pa mikumbu ya ano mepuzho mu mutwe walondelapo.
LWIMBO 76 Nanchi Mwatemwa Kusapwila Nyi?
a Inge mukeba kuyuka ene mambo o kwaikela luno lupimpu, monai mutwe wa kuba’mba “Bino byo byo Mwakebelenga” mu Kyamba kya Usopa kya March 15, 2015, ma. 7-11.
b Babilona Mukatampe inge bamonauna, bantu ba Yehoba bonse bakesekwa kimye Gogi wa Magogi kyo akebalukuka. Muntu yense ukafuukulapo kupopwela Yehoba pamo na bantu ba Lesa panyuma ya konauna Babilona Mukatampe naye ukesekwa.
c KULUMBULULA BIPIKICHALA : Bipikichala bisatu bibena kumwesha ene mambo bantu bamo o kyakonsha kukatezha kwibasapwila: (1) Mwanamukazhi wikala mu mpunzha muji bupopweshi bwabayilamo kabiji kino kikatazha kutambwila mambo awama, (2) bamulume ne mukazhi bekala mu mpunzha bamulwilantanda mo bakanya mwingilo wetu, ne (3) mwanamulume wikala mu mpunzha mwine munkonkoso mubula kufika mambo awama.
d KULUMBULULA KIPIKICHALA: Nsongwakazhi walekele kwingijila Yehoba wavuluka byo afunjile pa konaunwa kwa “Babilona Mukatampe.” Wapimpula byubilo byanji ne kubwela ku bansemi banji bena Kilishitu. Inge bintu bya uno mutundu byamweka, twafwainwa kwikala na lusa ne kifyele byonka biji Shetu wa mwiulu ne kusekela kuba’mba ndengamambo watendeka jikwabo kwingijila Yehoba.
