1. Ñanyi kintu kitutekenesha Yehoba kyo afunjishe Abalahama?

 ABALAHAMA kechi walubilemo bintu byo esambile ne Lesa ne. Kwingijisha malaika, Lesa wabuujile Abalahama amba ukonauna mizhi ya Sodoma ne Gomola. Abino byambo byashinkishe bulaka uno mwanamulume wa kishinka aye Abalahama. Waipwizhe’mba: “Nanchi kine mukonauna baoloka pamo na babi nyi? . . . Nanchi Mutonyi wa ba pano pa ntanda ponse kechi ukoba kintu kyaoloka nenyi?” Yehoba watekenyejile uno mulunda nanji ye atemenwe ne kumufunjisha kintu kitutekenesha kabiji kyo twakonsha kumwenamo atweba bonse. Kino kintu ke kya kuba’mba Lesa kechi ukonauna baoloka ne.​—Nte. 18:23-33.

2. Twayuka byepi’mba Yehoba umwesha bantu lusa kabiji wibachibila mambo monka mo aolokela?

² Twayuka byepi’mba Yehoba umwesha bantu lusa kabiji wibachibila mambo monka mo aolokela? Twayuka bino mambo “Yehoba utala mu muchima” wa muntu. (1 Sam. 16:7) Kabiji wayuka “michima yonse ya bantu.” (1 Mfu. 8:39; 1 Moba 28:9) Kino kishinka kyanema bingi. Yehoba uji bingi na maana kwitukila. O ene mambo pa bimye bimo o kitukatezha kumvwisha bintu bimo bifuukula Yehoba. Mutumwa Paulo waambile pe Yehoba Lesa amba: “Bunchibamambo bwanji byo bwakatazhapo kwibuyuka!”​—Loma 11:33.

3-4. Pa bimye bimo ñanyi mepuzho o twakonsha kwipuzha, kabiji ñanyi mepuzho o tusakwisambapo mu uno mutwe? (Yoano 5:28, 29)

³ Nangwa kya kuba twayuka kuba’mba Yehoba kimye kyonse uba bintu byaoloka, twakonsha kwipuzha mepuzho epasha na aipwizhepo Abalahama. Kimye kimo twakonsha kwipuzha’mba: ‘Nanchi bantu Yehoba bo aipayile nabiji bajinga mu Sodoma ne Gomola wakonsha kwibasangula nyi? Nanchi bamo pa bano bantu bakekala mu “lusanguko lwa. . . babula koloka” nyi?’​—Byu. 24:15.

 ⁴ Twayai tupituluke mu bintu byo twayuka pa lusanguko. Katataka papo, twatambwijile ñumvwino ya katataka yaambilenga pa bantu “bakasangukila ku bumi” ne “bakasangukila ku kije.” a (Tangai Yoano 5:28, 29.) Ino ñumvwino ya katataka itulengela kunungapo bishinka bikwabo ku ino ñumvwino. Tusakwisamba pa bino bintu mu uno mutwe ne mu mutwe mukwabo walondelapo. Byo tusakwisambanga pa bunchibamambo bwa Yehoba bwaoloka, patanshi tusakwisamba pa bintu byo twabula kuyuka, apa bino twisambe ne pa bintu byo twayuka.

BINTU BYO TWABULA KUYUKA

5. Mu myaka ya kunyumakwe, mabuku etu aambapo’mba ka pa bantu bo baipayile mu Sodoma ne Gomola?

⁵ Mu myaka ya kunyumakwe, mabuku etu aambile pa bintu bimwekela boba Yehoba bo achibila mambo amba kechi baoloka ne. Twaambanga’mba bantu Yehoba bo achibijile mambo nabiji boba bajinga mu Sodoma ne Gomola kechi bakasangulwa ne. Nangwa byonkabyo, na mambo a kulombeshapo ne kukebakeba bishinka, kechi twakonsha kupwisha’mba byo byo kiji ne. Mambo ka?

6. Ñanyi mashimikila amo aamba pa bantu babula koloka Yehoba bo achibijile mambo, kabiji ñanyi bintu byo twabula kuyuka?

⁶ Akilangulukai pa mepuzho akwabo o twakonsha kwipuzha. Mashimikila avula a mu Baibolo aamba pa bantu babula koloka Yehoba bo achibijile mambo. Mu bano bantu mwavwangwa bantu bavula bafwile mu muyulo, bisaka bitanu na bibiji byajinga mu Ntanda ya Mulaye Yehoba byo akambizhe bantu banji konauna ne bashilikale bena Asilya 185,000 bo baipayile ku malaika wa Yehoba mu bufukutu bumo. (Nte. 7:23; Mpitu. 7:1-3; Isa. 37:36, 37) Mu bino bintu byonse byamwekele, nanchi Baibolo witubuula bishinka byonse bimwesha’mba Yehoba wachibijile mambo bano bantu bonse pa muntu pa muntu kuba’mba bebepaye kwa kubula kwikala na luketekelo lwa kukasangulwa kulutwe nenyi? Ine, kechi witubuula bishinka byonse ne. Mambo ka o twaambila bino?

7. Ñanyi bintu byo twabula kuyuka pa bantu bo baipayile mu Muyulo nangwa bo baipayile mu Kenana ku bena Isalela? (Monai kipikichala kya pa.)

⁷ Kechi twayuka Yehoba byo achibijile mambo bano bantu bonse pa muntu pa muntu ne. Kabiji kechi twayuka bano bantu bo baipayile inge bebafunjishepo pe Yehoba ne kulapila ne. Mu kimye kya Muyulo, Baibolo waamba’mba Nowa wajinga “musapwishi wasapwilanga bololoke.” (2 Pe. 2:5) Pano bino, Baibolo kechi waambapo amba Nowa byo afikilenga bwato bukatampe, wasapwijilenga ne bantu bonse pa muntu pa muntu bajinga pano pa ntanda bafwile mu Muyulo ne. Po pamotu, kechi twayuka inge bantu babi bonse baikalanga mu ntanda ya Kenana bebafunjishe pe Yehoba ne kupimpula byubilo byabo ne.

8. Ñanyi bintu byo twabula kuyuka pa bantu baikalanga mu Sodoma ne Gomola?

⁸ Ibyepi bantu bo baipayile kimye Yehoba kyo aonawine mizhi ya Sodoma ne Gomola? Mu muzhi wa Sodoma mwaikalanga ne muntu waoloka aye Lota. Pano nanchi Lota wasapwijile bantu bonse bajingamo nyi? Ine. Ibyo kuba’mba baubanga byatama, pano nanchi bonse bayukile kyawama ne kyatama nyi? Vulukai kuba’mba jibumba ja banabalume ba mu uno muzhi bakebelenga kukuna benyi ba kwa Lota. Baibolo waamba’mba jino jibumba javwangilemo bantu bavula “kutatwilatu ku banyike kufika ne ku bakulumpe.” (Nte. 19:4; 2 Pe. 2:7) Nanchi twayuka’mba Lesa wa lusa aye Yehoba wazhachishe bano bantu bonse pa muntu pa muntu kwa kubula luketekelo lwa kukasangulwa kulutwe nyi? Yehoba wabuujile Abalahama amba mu uno muzhi kechi mwajingapotu nangwa banabalume jikumi baoloka ne. (Nte. 18:32) Onkao mambo, bajinga bantu babula koloka kabiji Yehoba wibazhachishe na mambo a byubilo byabo byatama.  Nangwa kiji bino, nanchi twakonsha kwamba ne kupwisha’mba, kafwako nangwa umo pe abo ukekala mu “lusanguko lwa . . . babula koloka” nenyi? Ine, kechi twakonsha kwamba bino ne.

9. Ñanyi bintu byo twabula kuyuka pe Solomone?

⁹ Nangwa byonkabyo, mu Baibolo tutangamo ne bantu baoloka batendekele kuba byatama. Pa bano bantu pajinga ne Mfumu Solomone. Bamufunjishe bingi bulongo bya kulondela mashinda a Lesa kabiji Yehoba wamupesheshe bingi. Nangwa byonkabyo, kulutwe watendekele kupopwela balesa babubela. Bintu byatama byo aubile byazhingijishe bingi Yehoba kabiji kino kyalengejile kisaka kyonse kya bena Isalela kumanama pa myaka yavula bingi. Ibyo kuba’mba Binembelo byaamba’mba Solomone “bamutwajile na kulaala kwalaala bashakulu banji” kuvwangakotu ne mwanamulume wa kishinka aye Mfumu Davida. (1 Mfu. 11:5-9, 43; 2 Mfu. 23:13) Pano nanchi jishinda jo bazhiikijilemo Solomone jimwesha’mba kine bakamusangula nyi? Baibolo kechi waambapo ne. Nangwa byonkabyo, bamo bakonsha kulanguluka’mba, “awa wafwa, bamukasulula ku bundengamambo bwanji.” (Loma 6:7) Byo ibyo, pano bino kino kechi kilumbulula’mba bantu bonse bafwa bakebasangula na mambotu a kuba’mba muntu inge wafwa ko kuba’mba uji na luusa lwa kwikala na bumi jibiji ne. Lusanguko ke bupetu Lesa wa butemwe bo apa bantu. Wibupana ku boba bo akeba’mba bakamwingijilenga myaka ne myaka. (Yoba 14:13, 14; Yoa. 6:44) Nanchi Solomone bakamupa buno bupe nyi? Yehoba mwine ye wayuka, atweba kechi twayuka ne. Pano bino, twayuka’mba Yehoba ukoba kintu kyaoloka.

BINTU BYO TWAYUKA

10. Yehoba umvwa byepi ku muchima konauna bantu? (Ezikyo 33:11) (Monai ne kipikichala.)

¹⁰ Tangai Ezikyo 33:11. Yehoba witusolwela byo omvwa ku muchima pa kuchibila bantu mambo. Mutumwa Petelo bamutangijile na mupashi kunemba byambo byaambilepo ne ngauzhi Ezikyo kuba’mba: “Yehoba . . . kechi usaka muntu nangwa umo amba akafwe ne.” (2 Pe. 3:9) Abino byambo bitutekenesha bingi mambo bitulengela kuyuka’mba Yehoba kechi wipaya muntu kuba’mba akafwe myaka ne myaka ne, kanatu inge kwaikala kine kintu kyakonsha kumulengela kuba bino. Yehoba uji bingi na lusa kabiji umwesha bantu lusa inge kekikebewe.

11. Bañanyi bo bakabula kusangula kabiji twayuka byepi bino?

¹¹ Ñanyi bintu byo twayukapo pa bantu bakabula kusangulwa? Baibolo waambapotu pa bantu bacheche. b Yesu waambile’mba Yudasa Isakaliota kechi bakamusangula ne. (Mako 14:21; monai ne Yoano 17:12.) c Yudasa wasatukijile Yehoba ne Mwananji kya nshiji. (Monai Mako 3:29 ne mutwe uji pa jw.org wa kuba’mba Mambo Abulwa Kulekelwa o Epi, nangwa w07 8/1 ji. 8.) Kabiji Yesu waambile pa bantangi ba bupopweshi bamo bamukaine amba bafwainwe kufwa kwa kubula luketekelo lwa kusangulwa. (Mat. 23:33) Mutumwa Paulo wajimwineko’mba bansatuki babula kulapila kechi bakasangulwa ne.​—Hebe. 6:4-8; 10:29.

12. Ñanyi bintu byo twayuka pa lusa lwa Yehoba? Ambaipo pa bantu bamo.

¹² Nangwa byonkabyo, ñanyi bintu byo twayuka pa lusa lwa Yehoba? Yehoba umwesha byepi amba “kechi usaka muntu nangwa umo amba akafwe ne”? Akilangulukai pa bantu bamo balengele mambo akatampe bo amwesheshe lusa. Mfumu Davida walengele mambo a bulala avula  bingi avwangilemo bukende ne kwipayañana. Pano bino, Davida walapijile kabiji Yehoba wamulekejileko mambo na mambo a lusa lwanji. (2 Sam. 12:1-13) Mfumu Manase waubile bintu bya bunya bingi mu bwikalo bwanji. Nangwa kya kuba waubile bino bintu bya bunya, Yehoba wamubijile lusa ne kumulekelako mambo na mambo a kuba’mba walapijile. (2 Moba 33:9-16) Byamwekejile bano bantu bimwesha kuba’mba Yehoba ubila bantu lusa inge paji kishinka kyamulengela kuba bino. Ukasangula bantu ba uno mutundu na mambo a kuba’mba balapijile nangwa kya kuba balengele mambo akatampe.

13. (a) Mambo ka Yehoba o aubijile lusa bena Ninevwa? (b) Palutwe kacheche, Yesu waambilepo amba ka pa bena Ninevwa?

¹³ Kabiji twayuka’mba Yehoba waubijile lusa bena Ninevwa. Lesa waambijile Yona amba: “Bubi bwabo bwafika kwi amiwa.” Pano bino, byo balapijile Yehoba wibalekejileko mambo. Kino kyamwesheshe’mba Yehoba wibobijile lusa, pakuba Yona kechi byo byo aubile ne. Lesa wavulwilemo ngauzhi wanji wazhingijile kuba’mba bena Ninevwa “kechi bayukile kyawama ne kyatama ne.” (Yona 1:1, 2; 3:10; 4:9-11) Palutwe kacheche, Yesu waambile pa kino byo afunjishenga pa bololoke bwa Yehoba ne lusa. Yesu waambile’mba bena Ninevwa balapijile “bakasangulwa mu juba ja kije.”​—Mat. 12:41.

14. “Kusangukila ku kije” kukalumbulula ka ku bena Ninevwa?

¹⁴ Ñanyi “juba ja kije” jo “bakasangwilamo” bena Ninevwa? Yesu waambile’mba kukekala bantu “bakasangukila ku kije.” (Yoa. 5:29) Waambilenga pa Bukalama Bwanji bwa Myaka Kiumbi Kimo kimye “baoloka ne babula koloka” kyo bakasangulwa. (Byu. 24:15) Bantu babula koloka “bakasangukila ku kije.” Yehoba ne Yesu bakamona bintu byo bakobanga pa kyokya kimye inge bibena kumwesha’mba babena kukookela ne kulondela bintu byo babena kwibafunjisha. Inge mwina Ninevwa ye bakasangula pa kyokya kimye wakana kupopwela Yehoba, ko kuba’mba Yehoba kechi ukamuswisha kutwajijila kwikala na bumi ne. (Isa. 65:20) Pano bino, aba bonse bakasalapo kwingijila Yehoba mu bukishinka, bakekala myaka ne myaka.​—Da. 12:2.

15. (a) Mambo ka o twafwainwa kubujila kwambanga’mba kafwako muntu nangwa umo wafwile mu Sodoma ne Gomola ukasangulwa ne? (b) Twakonsha kumvwisha byepi mwatala byambo biji pa Yuda 7? (Monai kakitenguluzha ka kuba’mba “ Yuda Walumbulwilenga Ka?”)

¹⁵ Byo aambilenga pa bantu ba mu Sodoma  ne Gomola, Yesu waambile’mba bakebobila lusa mu “Juba ja Kije” kukila bantu bamukaine kabiji bakaine bintu byo afunjishenga. (Mat. 10:14, 15; 11:23, 24; Luka 10:12) Yesu watazhizhe mwepi? Nanchi Yesu waingijishe ñambilo ya kifwanyikizho pa kumwesha’mba bantu bajingako pa kyokya kimye bajinga na byubilo byatama kukila bantu ba mu Sodoma ne Gomola nyi? Vulukai kuba’mba Yesu byo aambile’mba bena Ninevwa bakasangulwa mu juba ja kije, walumbulwilenga’mba byo byo kikekala. “Juba ja Kije” Yesu jo aambilepo pa kikye kimye jo juba ja kije jintutu jimo jo aambilepo ne pa bena Ninevwa. d Byonka byajinga bena Ninevwa, bantu ba mu Sodoma ne Gomola nabo baubanga byatama. Nangwa byonkabyo, bena Ninevwa balapijile. Kabiji vulukai Yesu byo aambile pa bantu “bakasangukila ku kije.” Pa bano bantu pajinga ne bantu “baubilenga byatama.” (Yoa. 5:29) Onkao mambo, kyamweka bantu bamo ba mu Sodoma ne Gomola bakasangulwa. Kabiji kampe yetu tukebafunjishanga pe Yehoba ne Yesu Kilishitu.

16. Ñanyi bintu byo twayuka pe Yehoba byo akoba pa kusangula bantu? (Yelemiya 17:10)

¹⁶ Tangai Yelemiya 17:10. Kino kyepelo kitukwasha kuyuka Yehoba byo oba pa kuchibila bantu mambo. Yehoba kimye kyonse ‘ukebakeba ne kuyuka biji muchima, upalanguzha milanguluko ya mukachi mwine.’ Byo akasangulanga bantu kulutwe, ukafweta “muntu yense monka mwayila byubilo byanji.” Aba bo kyafwainwa, Yehoba ukebobila lusa. Bakwabo nabo kechi ukebobila lusa ne. Onkao mambo, kechi twafwainwa kwamba’mba awe muntu kechi ukasangulwa ne, kanatu inge twayuka kuba’mba byo byo kiji.

“MUTONYI WA BA PANO PA NTANDA PONSE” UKOBA “KINTU KYAOLOKA”

17. Ñanyi kintu kikamweka ku bantu bafwa?

¹⁷ Kufumatu kimye Adama ne Evwa kyo bakookejile Satana ne kusatukila Yehoba Lesa, bantu bakukankalwa kubala bafwa. ‘Mulwanyi, ko kuba’mba lufu,’ lwasenda bantu bavula bingi. (1 Ko. 15:26) Ñanyi kintu kikamweka ku bano bantu bonse? Bantu bachechetu, 144,000, baana ba bwanga ba kishinka ba kwa Kilishitu  bakebasangula ne kwikala na bumi bubula kufwa. (Lum. 14:1) Bantu bavula bingi, banabalume ne banabakazhi ba kishinka batemenwe Yehoba bakekala mu “lusanguko . . . lwa baoloka” kabiji bakekala myaka ne myaka pano pa ntanda inge batwajijila kwikala baoloka mu kimye kya Bukalama bwa kwa Kilishitu bwa Myaka Kiumbi ne mu kimye kya lweseko lukapelako. (Da. 12:13; Hebe. 12:1) Kabiji mu Myaka Kiumbi Kimo, bantu “babula koloka” kuvwangakotu ne boba babulanga kwingijila Yehoba nangwa “baubilenga byatama,” bakebapa kimye kya kupimpula byubilo byabo pa kuba’mba bakengijilenga Yehoba Lesa mu bukishinka. (Luka 23:42, 43) Nangwa byonkabyo, bantu bamo bakizhizhemo kuba byatama kabiji batwajijile kusatukila Yehoba ne kukanatu nsalansala kuba kyaswa muchima wanji. Bantu ba uno mutundu Yehoba kechi ukebasangula ne.​—Luka 12:4, 5.

18-19. (a) Mambo ka o twafwainwa kuketekela kuba’mba Yehoba ukachibila mambo bantu bafwa monka mo aolokela? (Isaya 55:8, 9) (b) Ñanyi bintu byo tukesambapo mu mutwe walondelapo?

¹⁸ Nanchi twafwainwa kushiinwa kuba’mba Yehoba inge wachibila bantu mambo, uchiba monka mo aolokela nyi? Ee. Abalahama wayukile kuba’mba Yehoba ye “Mutonyi wa ba pano pa ntanda ponse” waoloka, uji bingi na maana ne lusa. Wafunjisha Mwananji ne kumupa mwingilo wa kuchibila mambo bantu bonse. (Yoa. 5:22) Bonse babiji, Yehoba ne Mwananji bayuka biji mu michima ya bantu bonse. (Mat. 9:4) Onkao mambo, pa kuchibila bantu mambo, bakoba “kintu kyaoloka.”

¹⁹ Twayai tutwajijile kuketekela Yehoba ne kuketekela byonse byo afuukula kuba. Twayuka kuba’mba kechi twakonsha kuchiba mambo monka mwakonsha kuchibila Yehoba ne. (Tangai Isaya 55:8, 9.) Onkao mambo, twafwainwa kulekela Yehoba ne Mwananji mwingilo wa kuchibila bantu mambo. Kabiji twayuka kuba’mba Mfumu wetu aye Yesu naye ukamwesha lusa ne bololoke pa kuchibila bantu mambo byonka byuba Shanji. (Isa. 11:3, 4) Pano twakonsha kwambapo amba ka pe Yehoba ne Yesu byo bakachibila bantu mambo, mu kimye kya malwa akatampe? Ñanyi bintu byo twabula kuyuka? Kabiji ñanyi bintu byo twayuka? Mutwe walondelapo ukakumbula ano mepuzho.