1. Ñanyi bintu byo twafunjile pa kupwila kwa pa mwaka kwa mu 2023?

 PA KUPWILA kwa pa mwaka kwa mu 2023, a twaumvwine bintu byo bapimpulako mu bintu bimo byo twaitabilamo kabiji twaumvwine bya kubijika bimo byawama byaambilenga pa mwingilo wetu. Twafunjile kuba’mba kampe bantu bamo bakafuukulapo kwingijila Yehoba pamo na bantu banji nangwatu panyuma ya konaunwa kwa Babilona Mukatampe. Kabiji twafunjile kuba’mba kutatula mu November 2023, basapwishi ba Bufumu kechi bakanembanga mingilo yabo yonse yo baingila mu mwingilo wa kusapwila pa sawakya wabo ne. Nanchi luno lupimpu lubena kulumbulula’mba mwingilo wa kusapwila kechi wanema ne, kabiji amba kechi twafwainwa kumwingilanga na mukoyo nenyi? Ine, kwalepeshatu.

2. Mambo ka uno mwingilo o abena kukebewa kumwingila bukiji? (Mako 13:10)

² Pa juba pa juba, mwingilo wetu ubena kukebewa kumwingila bukiji bukiji. Mambo ka? Mambo kimye kyashalako kyakepa. Vulukai Yesu byo aambijile jimo pa mwingilo wetu wa kusapwila mu ano moba a kupelako. (Tangai Mako 13:10.) Kwesakana na jishimikila ja kwa Mateo, Yesu waambile’mba mambo awama akasapwilwa pano pa ntanda ponse “mpelo” saka ikyangye kufika. (Mat. 24:14) Kino kyambo kibena kulumbulula mpelo ya buno bwikalo bwatama bwa kwa Satana. Yehoba watongwela jimo “juba ne kimye” kikamwekelamo bino bintu katataka. (Mat. 24:36; 25:13; Byu. 1:7) Jino juba jibena kuya na kufwenya pepi pa juba pa juba. (Loma 13:11) Pa kino kimye, twafwainwa kutwajijila na kusapwila kufika ne ku mpelo.

3. Ñanyi kintu kitulengela kusapwila?

 ³ Inge ketulanguluke pa mwingilo wetu byo aji, twafwainwa kwiipuzhanga buno bwipuzho bwanema bingi: Mambo ka o tusapwila mambo awama? Butemwe bo bwitulengela kusapwila. Byo tuba mu mwingilo wetu wa kusapwila bimwesha byo twatemwa mambo awama, byo twatemwa bantu ne kyakila pa byonse tumwesha byo twatemwa Yehoba ne jizhina janji. Twayai twisambe pa bino bintu kimo kimo.

TUSAPWILA MAMBO TWATEMWA MAMBO AWAMA

4. Tuba byepi inge twatambwila sawakya wawama?

⁴ Nanchi muvuluka byo mwasangalele byo mwatambwijile sawakya wawama wa kuba’mba mwana wasemwa mu kisemi kyenu nangwa byo mwataaine nkito yo mwakebelenga nyi? Kwa kubula nangwa kuzhinaukatu ne, mwabuujileko ba mu kisemi kyenu ne balunda nenu uno sawakya wawama. Nanchi kintu kya uno mutundu kyo kimumwekejile ne anweba byo mwatambwijile sawakya wawama bingi, ko kuba’mba mambo awama a Bufumu bwa Lesa nyi?

5. Mwaumvwine byepi ku muchima kimye kitanshi kyo mwafunjile bukine bwa mu Mambo a Lesa? (Monai ne bipikichala.)

⁵ Akilangulukai pa byo mwaumvwine ku muchima kimye kitanshi kyo mwafunjile bukine bwa mu Mambo a Lesa. Mwayukile kuba’mba Shenu wa mwiulu wimutemwa bingi kabiji ukeba anweba kwikala mu kisemi kya bapopweshi banji. Kunungapo, mwayukile kuba’mba walaya kufumyapo makatazho onse kabiji mwaikele na luketekelo lwa kuba’mba mukamona balongo benu bafwa bo bakasangula mu ntanda ipya ne bintu bikwabo byo mwafunjile. (Mako 10:29, 30; Yoa. 5:28, 29; Loma 8:38, 39; Lum. 21:3, 4) Bino bintu byo mwafunjile bimusangajikile bingi. (Luka 24:32) Mwatemenwe bintu byo mwafunjilenga kabiji mwakebeshe bingi kubuulako bakwenu buno bukine.​—Esakanyaiko Yelemiya 20:9.

6. Ñanyi bintu byo mwafunjilako ku mulongo Ernest ne nyenga Rose?

⁶ Akilangulukai pa kino kyamwekele.  Mulongo Ernest b wajinga na myaka jikumi kimye kyafwile bashanji. Mulongo Ernest uvuluka’mba: “Neipuzhanga’mba: ‘Nanchi batata baya mwiulu nyi, inyi kyapwa bafwa myaka ne myaka?’ Nakumbwanga bakwetu banyike bajinga na bashabo.” Mulongo Ernest kimye kyonse wayanga ku kilende ko bazhiikile bashanji. Wafukamanga ku kilende ne kulomba’mba: “Anweba Lesa, nkeba kuyuka kuji batata.” Byo papichile myaka nobe 17 kufuma pafwijile bashanji, mulongo Ernest waswile kumufunjisha Baibolo. Waumvwine bingi bulongo byo afunjile kuba’mba bantu bafwa kafwako kintu nangwa kimo kyo bayuka ne, mambo kijitu nobe muntu walaala mu tulo twine kabiji amba Baibolo walaya kuba’mba kukekala kusangula bantu bafwa. (Sapwi. 9:5, 10; Byu. 24:15) Wataaine mikumbu ya mepuzho amukatezhe pa myaka yavula bingi. Mulongo Ernest wajinga bingi na lusekelo na mambo a bukine bo afunjilenga mu Baibolo. Mukazhanji aye Rose, naye watatwile kufunda Baibolo kabiji watemenwe bingi bintu byo afunjilenga. Bonse babiji babatizhiwe mu 1978. Basapwilanga na mukoyo ku ba mu kisemi kyabo, balunda nabo ne bantutu bakwabo bakebelenga kufunda bukine. Ne kyafumamo, mulongo Ernest ne nyenga Rose bakwasha bantu kukila 70 kufunda bukine ne kubatizhiwa.

7. Ñanyi kintu kimweka inge twatemwa bukine bo tufunda mu Baibolo? (Luka 6:45)

⁷ Inge twatemwa bingi bukine bo twafunda mu Baibolo, kechi tukeba kuzhindamapotu ne, tukebesha kubuulako bakwetu. (Tangai Luka 6:45.) Tumvwa byonka byaumvwine baana ba bwanga ba kwa Yesu ba mu myaka kitota kitanshi baambile’mba: “Atweba kechi twakonsha kuleka kwamba pa bintu byo twamwene ne kumvwa ne.” (Byu. 4:20) Na mambo a kuba’mba twatemwa bingi bukine, kino kitulengela kusapwila ku bantu bavula.

TUSAPWILA MAMBO TWATEMWA BANTU

8. Ñanyi bintu bitulengela kusapwila bantu mambo awama? (Monai kakitenguluzha ka kuba’mba “ Temwai Bantu, Bakwashai Kwikala Baana ba Bwanga.”) (Monai ne kipikichala.)

⁸ Twatemwa bantu byonka bibatemwa Yehoba ne Mwananji. (Maana 8:31; Yoa. 3:16) Tumvwina bingi lusa bantu babula ‘kuyuka Lesa’ kabiji “[babula] luketekelo.” (Efi. 2:12) Bapita mu makatazho avula bingi mu bwikalo bwabo kabiji tuji na mambo awama a Bufumu bwa Lesa akonsha kwibakwasha. Kwibatemwa ne kwibomvwina lusa byo bintu bitulengela kwibasapwila mambo awama. Buno bukine bwanema bwakonsha kwibalengela kwikala na luketekelo, kwibakwasha kwikala bwikalo bwawama pa kino kimye ne kwikala na  “bumi bwa kine kine” kulutwe, ko kuba’mba kwikala na bumi bwa myaka ne myaka mu ntanda ipya ya Lesa.​—1 Timo. 6:19.

9. Kutemwa bantu kwitulengela kwibajimunako pa ka, kabiji mambo ka? (Ezikyo 33:7, 8)

⁹ Kabiji kutemwa bantu kwitulengela kwibajimunako kuba’mba mpelo ya ino ntanda yatama ijitu pepi. (Tangai Ezikyo 33:7, 8.) Tumvwina lusa bantu bonse kuvwangakotu ne ba mu kisemi kyetu. Bantu bavula beyeka na kuba bintu bya mu bwikalo kwa kubula kuyuka kintu kibena kwiya kulutwe, ko kuba’mba “malwa akatampe, akyangye kumwekapo kala kufumatu ku ntendekelo ya pano pa ntanda kufika ne buji lelo, kabiji kechi akamwekapo jibiji ne.” (Mat. 24:21) Tukeba kwibakwasha kuyuka bintu bikamweka mu kyokya kimye kya bunchibamambo kimye bupopweshi bwa bubela kyo bakebonauna apa bino pakalondele ne ino ntanda yatama. (Lum. 16:14, 16; 17:16, 17; 19:11, 19, 20) Tubena kulomba kuba’mba bantu bavula bakatambwila mambo awama a Bufumu ne kufuukulapo kutendeka kupopwela Yehoba pamo ne atweba. Pano kikekala byepi ku bantu bakana kuteleka ku mambo awama kuvwangakotu ne ba mu kisemi kyetu?

10. Mambo ka o kyanemena luno kutwajijila kujimunako bantu?

¹⁰ Byonka byo balumbulwile mu mutwe wafumako, kampe Yehoba ukafuukulapo kupulusha bantu bakapimpula byubilo byabo inge bamona konaunwa kwa Babilona Mukatampe. Inge byo byo kiji, ko kuba’mba kyanema bingi kujimunako bantu. Akilangulukai pa kino: Bintu byo twibajimunako luno bakonsha kwibivuluka pa kyokya kimye. (Esakanyaiko Ezikyo 33:33.) Kampe bakavuluka bintu byo twibajimunako pa kino kimye ne kufuukulapo kutendeka kupopwela Yehoba pamo ne atweba mema saka akiji mu kapokoso. Byonka byajinga kaili wajinga mu kaleya mu Filipai wapimpwile byubilo byanji na mambo “a kitentanshi kikatampe kyamwekele,” kampe ne bantu bamo bakana mambo awama a Bufumu pa kino kimye bakapimpula byubilo byabo inge bamona kintu kimo kishinkisha bulaka kyamweka, ko kuba’mba konaunwa kwa Babilona Mukatampe.​—Byu. 16:25-34.

TUSAPWILA MAMBO TWATEMWA YEHOBA NE JIZHINA JANJI

11. Yehoba tumupa byepi lukumo, munema ne bulume? (Lumwekesho 4:11) (Monai ne bipikichala.)

¹¹ Kintu kikatampe kimo kitulengela kusapwila mambo awama ke kutemwa Yehoba Lesa ne jizhina janji jazhila. Tumona mwingilo wetu amba ke jishinda ja kutotelamo Lesa wetu ye twatemwa. (Tangai Lumwekesho 4:11.) Tuswa na muchima yense kuba’mba bapopweshi ba Lesa ba kishinka bafwainwa kupa Yehoba Lesa lukumo, buneme ne bulume.  Tumupa bulume ne munema inge ketubuule bantu kuba’mba aye ye “walengele bintu byonse” kabiji amba twi bomi mambo ye witulengele. Tumupa bulume inge ketwingijishe kimye kyetu, bulume ne bintu byo tuji nabyo mu mwingilo wa kusapwila kwesakana na papelela bulume bwetu. (Mat. 6:33; Luka 13:24; Kolo. 3:23) Kwambatu kine twatemwa bingi kwamba pe Lesa wetu ye twatemwa. Kabiji tukebesha kubuula bakwetu pa jizhina janji ne byo jilumbulula. Mambo ka?

12. Tuzhijika byepi jizhina ja Yehoba mu mwingilo wetu?

¹² Kutemwa Yehoba kwitulengela kuzhijika jizhina janji. (Mat. 6:9) Tukeba kwingilako mwingilo wa kufumyapo mwenga pa jizhina janji Satana ye aleta na mambo a bubela bwanji. (Nte. 3:1-5; Yoba 2:4; Yoa. 8:44) Mu mwingilo wetu wa kusapwila, twimenako Lesa wetu ne kwamba bukine ku bantu bonse bakeba kumvwa mambo awama. Tukeba bantu bonse kuyuka’mba kyubilo kyanji kikatampe ke butemwe, ne kuba’mba bukalama bwanji bwaoloka kabiji amba Bufumu bwanji katatakatu bukafumyepo buyanji bonse ne kulengela bantu kwikalanga mu mutende ne na lusekelo. (Sala. 37:10, 11, 29; 1 Yoa. 4:8) Inge ketusapwile bantu pa bino bintu, tuzhijika jizhina ja Yehoba. Kabiji twikala bingi na lusekelo mambo tuba bintu kwesakana na mwayila jizhina jetu. Mu ñanyi jishinda?

13. Mambo ka o tumvwina bulongo kutelwa’mba Bakamonyi ba kwa Yehoba? (Isaya 43:10-12)

¹³ Yehoba witusala kwikala “Bakamonyi” banji. (Tangai Isaya 43:10-12.) Myaka imo yapitapo, nkalata kufuma ku Jibumba Jitangijila yaambile’mba: “Munema mukatampe witufwainwa ke kutelwa’mba Bakamonyi ba kwa Yehoba.” c Mambo ka o kyaikela bino? Fwanyikizhai kuba’mba bemubepela’mba mwauba kintu  kyatama. Pano bino, mubena kukeba muntu wakonsha kubuulañana kuba’mba bemubepelatu kabiji amba muji na byubilo byawama kechi mwakonsha kuba kintu kya uno mutundu ne. Ñanyi muntu ye mwakonsha kusala? Kwambatu kine, mwakonsha kusala muntu ye mwayuka, ye mwaketekela kabiji uji na byubilo byawama byakonsha kulengela bantu kuswa byo asakwamba. Po pamotu, Yehoba byo etusala kwikala Bakamonyi banji, kino kimwesha’mba wituyuka bingi bulongo ne kwituketekela’mba tukabuulanga bantu amba aye ye Lesa yenkatu wa kine. Ke munema bingi wa kwikala Bakamonyi banji bo abena kwingijisha kuyukanyikisha jizhina janji ne kukwasha bantu kuyuka kuba’mba bintu byatama byo bamba pe aye kechi bya kine ne. Inge ketube bino, tumwesha’mba tubena kwikela mwayila jizhina jetu jo twatemwa ja kuba’mba Bakamonyi ba kwa Yehoba.​—Sala. 83:18; Loma 10:13-15.

TUKATWAJIJILA KUSAPWILA KUFIKATU NE KU MPELO

14. Ñanyi bintu byawama byo tubena kutengela kulutwe?

¹⁴ Tubena kutengela bintu byawama kulutwe. Na bukwasho bwa Yehoba, twaketekela’mba bantu bavula bakafunda bukine malwa akatampe saka akyangye kutendeka. Kabiji twaketekela kuba’mba nangwatu mu kimye kikakatazha bingi, kya malwa akatampe, kampe bantu bakwabo bavula bakapimpula byubilo byabo byatama bya mu ino ntanda ya kwa Satana ne kutendeka kutota Yehoba pamo ne atweba.​—Byu. 13:48.

15-16. Ñanyi bintu byo tukatwajijila kubanga kabiji kufika ñanyi kimye?

¹⁵ Nangwa byonkabyo, tuji na mwingilo wanema wa kwingila. Uno mwingilo ke wa kushimuna bukine ye tukabula kwingilapo jikwabo, ko kuba’mba kusapwila mambo awama a Bufumu bwa Lesa pano pa ntanda ponse. Kabiji twafwainwa kutwajijila kujimunako bantu pa bikamweka katataka. Bantu bafwainwa kuyuka’mba mpelo ya buno bwikalo bwatama yafwenya kala pepi. Kimye kya kuchibila bantu mambo byo kikafika, po po bakayuka’mba byambo byo twasapwijilenga byafumine kwi Yehoba Lesa.​—Ezi. 38:23.

¹⁶ Pano ñanyi bintu byo twafwainwa kubanga? Na mambo a kutemwa mambo awama, kutemwa bantu ne kyakila pa byonse kutemwa Yehoba Lesa ne jizhina janji, tukatwajijila kunemeka mwingilo wa kusapwila ne kumwingila na kizaku ne na mukoyo kufikatu ne kimye Yehoba kyo akamba’mba: “Pano kyapwa.”