1. Na mambo a bundengamambo, bakalume ba Lesa ba kishinka bavula bomvwa byepi?

MUTUMWA Paulo wanembele’mba: “Amiwa kamulanda!” (Loma 7:24) Bakalume ba Lesa ba kishinka bavula bamba bino byambo. Bonse tumanama na mambo a bundengamambo bo twaswana, kabiji inge twauba kintu kimwesha’mba kechi tubena kutokesha Yehoba ku muchima ne, tumvwa bulanda. Bena Kilishitu bamo balengapo kala mambo akatampe balanguluka’mba Lesa kechi wakonsha kwibalekelako mambo ne.

2. (a) Salamo 34:22 umwesha byepi amba bakalume ba Lesa kechi bafwainwa kukizhamo kwizhachisha ne? (b) Uno mutwe usakwamba pa ka? (Monai kakitenguluzha ka kuba’mba “ Kuji Bintu byo Bimenako Nyi, Inyi Kuji Bintu byo Tufunjilako?”)

² Nangwa byonkabyo, Binembelo bitutundaika’mba aba bafyama mwi Yehoba kechi bafwainwa kutwajijila na kwizhachisha ne. (Tangai Salamo 34:22.) Kufyama mwi Yehoba kulumbulula ka? Twafwainwa kuba byepi pa kuba’mba Yehoba etubile lusa ne kwitulekelako mambo? Tutaana mikumbu ya ano mepuzho inge twalanguluka pa lunengezho lwa mizhi ya kufyamamo yajinga mu Isalela kala. Kya kine kuba’mba luno lunengezho belubikileko mu kimye kya lulayañano lwa Mizhilo,  kabiji pa luno lulayañano bapingishepo lulayañano lupya pa Pentekosita mu 33 C.E. Bino vulukai kuba’mba ino Mizhilo yafumine kwi Yehoba. Lunengezho lwa mizhi ya kufyamamo lwitufunjisha Yehoba byo amona bubi, byo amona bandengamambo ne lulapilo. Patanshi twayai tuyuke ene mambo o kwaikejile lunengezho lwa mizhi ya kufyamamo ne byo yaingilanga.

3. Bena Isalela baubanga byepi inge muntu waipaya mukwabo kya nshiji?

³ Mu bena Isalela, mambo a mashi ajinga mambo akatampe kwi Yehoba. Muntu waipaya mukwabo kya nshiji, naye bamwipayanga ku mulongo wa yewa ye aipaya. Uno mulongo waikalanga mwanamulume kabiji bamutelanga’mba “muntu ushinkanya na mambo a mashi.” (Bala. 35:19) Ino yajinga mfuto ya mambo a mashi a muntu wafwa wabula mambo. Kwipaya ndengamambo bukiji bukiji kwalengelanga Kyalo kya Mulaye kubula kuzhilululwa, mambo Yehoba wakambizhe’mba: “Kechi mukazhilulule kyalo kyo mukekalamo ne,” mambo kwichila mashi a muntu ko kuzhilulula kyalo.—Bala. 35:33, 34.

4. Bena Isalela baubanga byepi na mambo a muntu waipayañana kya mapuso?

⁴ Pano bena Isalela baubanga byepi na mambo a muntu waipayañana kya mapuso? Nangwa kya kuba waipayañana kya mapuso, bino waikalanga na mambo a mashi a muntu wabula mambo ye aipaya. (Nte. 9:5) Pano bino muntu waipayañana kya mapuso bamuswishishe kunyemena mu muzhi umo pa mizhi itanu na umo ya kufyamamo, kuchina kumwipaya ku yewa ushinkanya na mambo a mashi. Wazhikijilwanga inge wanyemena mu ino mizhi. Muntu waipayañana kya mapuso wafwainwe kwikala mu muzhi wa kufyamamo posotu ñanga mwine mukatampe wafwa.—Bala. 35:15, 28.

5. Lunengezho lwa mizhi ya kufyamamo lwitukwasha byepi kuyuka biji lusa lwa Yehoba?

⁵ Bantu kechi bo babikileko lunengezho lwa mizhi ya kufyamamo ne. Yehoba aye mwine ye wakambizhe Yoshua amba: “Buula bena Isalela amba, ‘Isajilai mizhi ya kufyamamo.’” Ino mizhi ‘beizhijikile.’ (Yosh. 20:1, 2, 7, 8) Na mambo a kuba Yehoba ye wakambizhe kuba’mba basale ino mizhi ya kufyamamo, twakonsha kwiipuzha’mba: Luno lunengezho lwitukwasha byepi kuyuka bulongo biji lusa lwa Yehoba? Kabiji kitufunjishapo ka pa byo twakonsha kufyama mwi aye lelo jino?

6, 7. (a) Lumbululai mwingilo waingilanga bakulumpe pa kuchiba mambo a muntu waipayañana kya mapuso. (Monai kipikichala kitanshi.) (b) Mambo ka o kyaikejile kintu kya maana muntu waipayañana kunyemena ku bakulumpe?

⁶ Inge muntu waipayañana kya mapuso, patanshi wafwainwe “kulondolola mambo anji [ku] bakulumpe” ku kibelo kya muzhi wa kufyamamo ye anyemenamo. Bafwainwe kumutambwila bulongo. (Yosh. 20:4) Pa kupitapo kimye, bamubwezhanga ku bakulumpe ba muzhi mo aipayijile mukwabo kuba’mba bakamuchibile mambo. (Tangai Kubala 35:24, 25.) Posotu kyataanwa kuba’mba uno muntu waipayile mukwabo kya mapuso, bino bamubwezha mu muzhi wa kufyamamo mo anyemejile.

⁷ Mambo ka muntu waipayañana o ayilanga ku bakulumpe? Mambo bano bakulumpe baingilanga mwingilo wa kulama kisaka kya bena Isalela kwikala kyatoka kabiji bakwashanga muntu waipayañana kya mapuso kumwenamo mu lusa lwa Yehoba. Shayuka umo wa Baibolo wanembele’mba inge muntu waipayañana wabula kuya ku bakulumpe, “wabikanga bumi bwanji mu kizumba.” Wanungilepo’mba: “Inge bamwipaya, kafwako ye bapangamo mambo ne, mambo aye mwine kechi wanyemejile mu muzhi wa kufyamamo wanengezhezhe Lesa ne.” Muntu waipayañana wakonsheshetu kutambula bukwasho inge walomba buno bukwasho. Inge wabula kunyemena mu muzhi umo pa mizhi ya  kufyamamo yanengezhezhe Yehoba, mulongo wa yewa ye aipaya wakonsheshe kumwipaya.

8, 9. Mambo ka mwina Kilishitu walenga mambo akatampe o afwainwa kulombela bukwasho bwa bakulumpe mu kipwilo?

⁸ Lelo jino, inge mwina Kilishitu walenga mambo akatampe wafwainwa kulomba bukwasho ku bakulumpe mu kipwilo. Mambo ka o kyanemena kuba bino? Kitanshi, lunengezho lwa bakulumpe lwa kuchiba mambo akatampe lwafuma kwi Yehoba, byonka byaamba Mambo a Lesa. (Yako. 5:14-16) Kya bubiji, luno lunengezho lukwasha bandengamambo balapila kutwajijila kwibazhikijila kwi Lesa ne kuchinuzhuka kubwezhapo oo mambo jibiji. (Nga. 6:1; Hebe. 12:11) Kya busatu, bakulumpe mu kipwilo bebafunjisha ne kwibapa mwingilo wa kukwasha bandengamambo balapila kukasuluka ne kuleka kwizhachisha. Yehoba utela bano banabalume amba “mpunzha ya kufyamamo pa kwiya mvula wa kinkunkwila.” (Isa. 32:1, 2) Nanchi kechi mwaswa kuba’mba luno lunengezho lumwesha lusa lwa Lesa nenyi?

⁹ Bakalume ba Lesa bavula bemwena buwame bwa kulomba bukwasho bwa bakulumpe mu kipwilo. Mulongo wa jizhina ja Daniel walengele mambo akatampe, bino kechi wasolwele mambo anji ku bakulumpe mu kipwilo bukiji bukiji ne. Waambile’mba: “Byo papichile kimye kyabaya, nalangulukilenga’mba bakulumpe kechi bakakonsha kunkwasha ne. Nangwa byonkabyo, kechi nakasulukile ne, mambo nayukile’mba kuji bintu byatama bikafumamo mu byubilo byami. Kabiji pa kulomba kwi Yehoba, nakankalwanga kulomba pa bintu bikwabo kwa kubula patanshi kulomba lulekelo lwa mambo pa kyo naubile.” Ko kyakayanga, Daniel wayile na kulomba bukwasho ku bakulumpe mu kipwilo. Waambile’mba: “Nachiinenga bingi kusolomoka bakulumpe mu kipwilo. Bino byo nebasolomokele, kyajingatu nobe kuji muntu washikula kintu kyannemejile kyajinga pa bipuzhi byami. Luno nakasuluka kulomba kwi Yehoba kwa kubula kuzhinauka.” Luno, Daniel uji na jiwi ja mu muchima jatoka kabiji katataka papo bamutongwele kwikala nkwasho mu kipwilo.

10. Pa kuba’mba bamubile lusa, muntu waipaya mukwabo kya mapuso wafwainwe kuba byepi?

¹⁰ Muntu waipayañana kya mapuso wafwainwe kubapo kimo pa kuba’mba apuluke. Wafwainwe  kunyemena mu muzhi wa kufyamamo wajinga pepi. (Tangai Yoshua 20:4.) Muntu waipayañana kechi wafwainwe kukankazhama ne; pa kuba’mba apuluke wafwainwe kunyemena bukiji bukiji mu muzhi wa kufyamamo ne kwikala monka. Kino kyalumbulwilenga kusha bintu byo atemenwe. Ko kuba’mba kusha nkito, nzubo yanji yawama, ne kuleka kupitañana poso ñanga mwine mukatampe wafwa. * (Bala. 35:25) Bino kuba bino kwanemene bingi. Inge wafuma mu muzhi wa kufyamamo, kyakonsheshe kumwesha’mba kechi wanemekele mashi o aichijile ne, kabiji bakonsheshe kumwipaya.

11. Ñanyi bintu byafwainwa kuba mwina Kilishitu walapila bimwesha’mba kechi waalula lusa lwa Lesa ke lwatu ne?

¹¹ Ne lelo jino bandengamambo balapila pa kuba’mba bebobile lusa kwi Lesa, bafwainwa kubapo kimo. Twafwainwa kuja nyenye, kechi kuchinatu kulenga mambo akatampe ne, bino ne kuchina mambo amweka nobe acheche alengela muntu kulenga mambo akatampe. Mutumwa Paulo bamutangijile ku mupashi kulumbulula bintu byaubile bena Kilishitu mu Kolinda balapijile. Wanembele’mba: “Kwikala na bulanda mwayila kyaswa muchima wa Lesa kwimulengela kwitokesha, kushikwa bubi, kwakamwa, kukebesha kulapila, kwikala na mukoyo ne kwingijilapo pa kintu kyatama!” (2 Ko. 7:10, 11) Inge twibikako kuleka byubilo bya bundengamambo, tumwesha Yehoba amba tukebesha bingi kuwamishako byubilo byetu kabiji kechi twaalula lusa lwanji ke lwatu ne.

12. Ñanyi bintu byafwainwa kuleka mwina Kilishitu pa kuba’mba Lesa amubilenga lusa?

¹² Ñanyi bintu byafwainwa kuleka kuba mwina Kilishitu pa kuba’mba batwajijile kumubila lusa kwi Lesa? Wafwainwa kuleka kuba bintu byo atemwa inge kya kuba byakonsha kumulengela kulenga mambo. (Mat. 18:8, 9) Inge kya kuba balunda nenu bamo bemutundaika kuba bintu bifichisha Yehoba ku muchima, nanchi mukaleka kupwanañana nabo nyi? Inge mukankalwa kutoma binyu mu kwesakanya, nanchi muchinuzhuka bintu byakonsha kwimulengela kukizhamo kutoma nyi? Inge kimukatazha kufumya milanguluko ya bulalelale mu muchima wenu, nanchi kechi mwafwainwa kuchinuzhuka kutamba mafilimu nangwa kuya pa makeyala a pa Intaneti alengela kwikala na milanguluko ya kukeba kwilaala nenyi? Vulukai kuba’mba kwibikako kutwajijila kwikala ba kishinka kwi Yehoba kwanema bingi. Ke kintu kyatama bingi inge Lesa witukana. Kabiji kafwako kintu kyakonsha kwituletela lusekelo kyaesakana pamo na kuyuka’mba Lesa witutemwa “butemwe bwa myaka bubula kwaluka” ne.—Isa. 54:7, 8.

13. Lumbululai kyalengelanga muntu wanyemena mu muzhi wa kufyamamo kumona kuba’mba wazhikijilwa ne kwikala na lusekelo.

¹³ Inge muntu waipayañene wanyemena mu muzhi wa kufyamamo, wazhikijilwanga. Yehoba waambile pa ino mizhi amba: “Ikekala ya kufyamamo anweba.” (Yosh. 20:2, 3) Yehoba kechi waambile’mba muntu waipaya mukwabo bafwainwa kumuchibila mambo amo bimye bibiji ne, kabiji awa ushinkanya na mambo a mashi kechi bamuswishishe kutwela mu muzhi mwanyemena muntu waipayañana ne kumwipaya ne. Onkao mambo, muntu wanyemena mu muzhi wa kufyamamo kechi waakamwanga’mba bakamwipaya ne. Yehoba wazhikijilanga muntu wanyemena mu muzhi wa kufyamamo. Ino mizhi ya kufyamamo kechi yajinga nobe kaleya ne. Muntu inge wanyemena mu muzhi wa kufyamamo, wakasulukile kwingila mingilo, kukwasha bakwabo, ne kwingijila Yehoba mu mutende. Uno muntu waikalanga bwikalo bwa lusekelo.

14. Mwina Kilishitu walapila wafwainwa kuyuka ñanyi kishinka?

¹⁴ Bantu ba Lesa bamo balengele mambo akatampe bino balapila bomvwatu nobe baji mu “kaleya” na mambo a kwizhachisha, ne kumona  nobe Yehoba ukebamonangatu amba bangubabibi myaka ne myaka. Inge byo byo mumvwa, mwane yukai amba inge Yehoba wimulekelako mambo, ko kuba’mba wimubila lusa. Byo byo kyajinga ne kwi Daniel. Bakulumpe mu kipwilo byo bamukwashishe kwikala na jiwi ja mu muchima jatoka, waambile’mba: “Nakasulukile kabiji nalekele kwizhachisha. Inge Lesa wakulekelako mambo, ko kuba’mba kyapwa walubako. Byonkatu Yehoba byo aamba, ufumyapo bintu bitunemena ne kwibitaya kwalepa. Kechi tukebimona jibiji ne.” Inge muntu waipayile mukwabo watwela mu muzhi wa kufyamamo, kechi wachinanga yewa ushinkanya na mambo a mashi ne. Kyo kimotu, inge Yehoba witulekelako mambo etu, kechi twafwainwa kwakamwa’mba uketuzhachisha pa mambo o twalengele kala ne.—Tangai Salamo 103:8-12.

15, 16. Mingilo ya kwa Yesu byo aji Mukuzhi kabiji Ñanga Mwine Mukatampe ikosesha byepi luketekelo lwenu mu lusa lwa Lesa?

¹⁵ Atweba tuji na bishinka byavula byafwainwa kwitulengela kuketekela mu lusa lwa Yehoba kukila byo kyajinga ku bena Isalela. Paulo byo aambile pa bulanda bo ajinga nabo na mambo a kukankalwa kukookela Yehoba bulongo, waambile’mba: ‘Nsanchila Lesa kupichila mwi Yesu Kilishitu Nkambo yetu!’ (Loma 7:25) Kya kine, nangwa kya kuba waumvwanga bulanda pa bundengamambo bwanji ne pa mambo o alengele kala o alapijile, Paulo waketekejile kuba’mba Lesa wamulekejileko mambo kupichila mwi Yesu. Yesu byo aji Mukuzhi wetu, utokesha jiwi jetu ja mu muchima ne kwitupa mutende wa mu milanguluko. (Hebe. 9:13, 14) Byo aji Ñanga Mwine Mukatampe, “aye wakonsha kupulusha aba basolomoka Lesa kupichila mwi aye, mambo ye mumi kimye kyonse kuba’mba ebasashijileko.” (Hebe. 7:24, 25) Inge kya kuba mwingilo waingilanga ñanga mukatampe wajinga wa kukwasha bena Isalela kushiinwa’mba mambo abo alekelwa, ko kuba’mba mingilo ya Ñanga wetu Mukatampe, aye Yesu, yafwainwa kwitukwasha kushiinwa’mba bakonsha kwitubila “kifyele ne lusa lukatampe lwa kwitukwasha pa kimye kyafwainwa.”—Hebe. 4:15, 16.

¹⁶ Onkao mambo, pa kuba’mba tufyame mwi Yehoba, twafwainwa kwikala na lwitabilo mu kitapisho kya kwa Yesu. Kechi mwafwainwa kuswatu kishinka kya kuba’mba bukuzhi bukwasha bantu bavula ne. Bino, mwafwainwa kwitabila kuba’mba kitapisho kimukwasha ne anweba pa bunke bwenu. (Nga. 2:20, 21) Ketekelai kuba’mba bukuzhi kyo kishina kya lulekelo lwa mambo enu. Ketekelai kuba’mba bukuzhi bwimulengela kwikala na luketekelo lwa kwikala na bumi bwa myaka ne myaka. Kitapisho kya kwa Yesu ke bupe bwimupa Yehoba.

17. Mambo ka o mukebela kufyama mwi Yehoba?

¹⁷ Mizhi ya kufyamamo yamweshanga lusa lwa Yehoba. Luno lunengezho lumwesha Lesa byo anemeka bumi ne bakulumpe byo betukwasha, byavwangamo kulapila kwa kine ne Lesa byo etulekelako mambo. Nanchi mufyama mwi Yehoba nyi? Mwi aye mo muji luzhikijilo lwa kine. (Sala. 91:1, 2) Mu mutwe walondelapo, tukamona mizhi ya kufyamamo byo yakonsha kwitukwasha kulondela bunchibamambo bwaoloka bwa Yehoba ne lusa.