BANTU ba Lesa kufumatu ne kala bapana bitapisho pa kumupopwela. Bena Isalela bapananga bitapisho bya banyama, kabiji bena Kilishitu bayukanyikwa’mba bapananga kwi Lesa “bitapisho bya kumutota.” Bino kuji bitapisho bikwabo bitokesha Lesa ku muchima. (Hebe. 13:15, 16) Abino bitapisho bileta lusekelo ne mapesho, byonka byo tusakufunda mu mashimikila alondelapo.

Hana wajinga kalume wa Lesa wa kishinka kabiji wakebeshe bingi kwikala na mwana, bino kechi wasemanga ne. Juba jimo byo alombelenga, Hana wachipile kwi Yehoba amba umvwe akaseme mwana wamulume, ‘ukamupana kwi Yehoba moba onse a bumi bwanji.’ (1 Sam. 1:10, 11) Mu kuya kwa kimye, Hana waimichile, kabiji wasemene mwana wamulume ne kumutumba’mba Samwela. Samwela byo asumukile, Hana wamutwajile ku tente wa lusambakeno, byonka byo achipile. Yehoba wapesheshe Hana pa muchima wanji wa kwipana. Hana waikele na baana bakwabo batanu, kabiji Samwela waikele ngauzhi ne nembi wa Baibolo.—1 Sam. 2:21.

Byonka byaubile Hana ne Samwela, bena Kilishitu lelo jino bakonsha kwipana ku Mulenga wabo ne kumwingijila mu bumi bwabo bonse. Kabiji Yesu walayile’mba tukatambwilapo mapesho pa bintu byonse byo tupana pa kupopwela Yehoba.—Mako 10:28-30.

Mu moba a bena Kilishitu batanshi, kwajinga mwina Kilishitu wa jizhina ja Dokasi, “waingilanga mingilo yawama yavula kabiji wapananga bya bupe” bya kukwasha bantu. Bino uno mwanamukazhi “wakolelwe kabiji wafwile,” kabiji kino kyaletele bingi bulanda pa kipwilo. Baana ba bwanga byo baumvwine’mba Petelo waiya mu muzhi, bamusashijile’mba apelawizhe kuya ko bajinga. Byo afikile kokwa, Petelo wasangwile Dokasi, kabiji kino kyaletejile balongo lusekelo lukatampe. Petelo ye wajinga mutumwa mutanshi kusangula muntu. (Byu. 9:36-41) Lesa kechi walubileko mingilo ya kwipana yaingilanga Dokasi ne. (Hebe. 6:10) Jino jishimikila janji janembwa mu Mambo a Lesa kuba’mba tufunjileko.

Mutumwa Paulo naye wipaine bingi, kwingijisha kimye kyanji ne kukwasha balongo. Byo anembele nkalata ku bena Kilishitu mu Kolinda, Paulo wibambijile’mba: “Mambo amiwa nkapana na lusekelo bintu byami byonse ne kwipana ami mwine na mambo a anweba.” (2 Ko. 12:15) Mu bintu byonse byo apichilemo, Paulo wafunjile kuba’mba kwipana kukwasha balongo kuleta lusekelo, kabiji kyakilamo kunema, kuleta mapesho a Yehoba.—Byu. 20:24, 35.

Yehoba usangalala bingi inge twipana kwingijisha kimye kyetu ne bulume bwetu mu kutundaika mingilo ya Bufumu ne kukwasha balongo. Bino nanchi kujipo mashinda akwabo mo twakonsha kutundaikila mwingilo wa kusapwila pa Bufumu nyi? Ee, koaji. Kununga pa mingilo yetu ya butemwe, twakonsha kunemeka Lesa kupichila mu kupana bya bupe. Buno bupe bukwasha kutwala palutwe mwingilo wa kusapwila, ne kukwasha mingilo ya bamishonale ne bakwabotu baji mu mwingilo wa kimye kyonse. Kunungapo, bupe bupana bantu bwa kwifuukwila bene bukwasha mwingilo wa kunengezha ne kutuntulula mabuku ne mavidyo, kukwasha baponenwa na bya malwa, ne kushimika Mazubo a Bufumu. Twashiinwa’mba “muntu upana bakamupesha.” Kabiji inge twapana bintu byetu bya buneme kwi Yehoba, ko kuba’mba tubena kumunemeka.—Maana 3:9; 22:9.