1. Ki ka kiketutekenesha inge twamona’mba tujitu bunke nangwa makatazho etuzembama? (Salamo 118:5-7)

NANCHI mwakyumvwapo kala amba mujitu bunke bwenu, kafwako wa kwimukwasha nyi? Bavula bakilangulukapo kala bino, kubikapotu ne bakalume ba Yehoba ba kishinka. (1 Mfu. 19:14) Inge kino kimumwekela, mwafwainwa kuvuluka uno mulaye wa Yehoba wa kuba’mba: “Kechi nkakusha ne, kabiji kechi nkakulekelela ne.” Onkao mambo, twakonsha kwamba saka twashiinwa amba: “Yehoba ye nkwasho wami; kechi nakonsha kuchina ne.” (Hebe. 13:5, 6) Mutumwa Paulo wanembejile bino byambo bakwabo bena Kilishitu bajinga mu Yudea nobe mu mwaka wa 61 C.E. Byambo byanji bituvululamo byambo byanembwa pa Salamo 118:5-7.—Tangai.

2. Tusakwisamba pa ka mu uno mutwe, kabiji mambo ka?

² Byonka byaubile nyimbi wa masalamo, Paulo naye wimwenejile Yehoba byo ajinga Nkwasho wanji. Myaka ibiji ya kunyuma saka akyangye kunemba nkalata ku Bahebelu, Paulo waendele lwendo na bwato pa kalunga ka mema pajinga bingi manyaki. (Byu. 27:4, 15, 20) Pa luno lwendo, ne pa myaka ikwabo ya kunyuma, Yehoba wamwesheshe’mba wajinga Nkwasho wa kwa Paulo mu mashinda avula. Mu uno mutwe, tusakwisambako pa mashinda asatu. Yehoba wakwashishe Paulo kupichila mwi Yesu ne bamalaika, bantu bajinga pa bifulo bikatampe, ne bena Kilishitu bakwabo. Kwisamba pa bino bintu byamwekele mu bwikalo bwa kwa Paulo kusakwitukwasha kuketekela mu mulaye wa Lesa wa kuba’mba ukakumbula inge twamulomba kuba’mba etukwashe.

3. Paulo wafwainwa walangulukilenga pa ka, kabiji mambo ka?

³ Paulo wakebewenga bukwasho. Nobe mu mwaka wa 56 C.E., jibumba jamutajangizhe kumulupula mu nzubo ya Lesa mu Yelusalema, kabiji bakebelenga kumwipaya. Juba jalondejilepo, Paulo byo bamuletele ku kije kya Sanihedrini, kwashajiletu pacheche kumutabaula ku balwanyi banji. (Byu. 21:30-32; 22:30; 23:6-10) Pa kyokya kimye, Paulo wafwainwa walangulukilenga’mba, ‘Nanchi nsakutwajijilatu na kuchinchika ano makatazho nyi?’

4. Yehoba wakwashishe byepi Paulo kupichila mwi Yesu?

⁴ Ñanyi bukwasho bwatambwile Paulo? Juba jalondejilepo bufuku kufuma kimye Paulo kyo bamukwachile, “Nkambo,” Yesu, waimene ko ajinga ne kumwambila’mba: “Chinchika! Mambo byonka byo ubena kunshimuna bulongo mu Yelusalema, byo byo ukanshimuna ne mu Loma.” (Byu. 23:11) Uno mulaye wamutundaikile bingi. Yesu watakaikile Paulo pa bukamonyi bo ashimwine mu Yelusalema. Kabiji walayile Paulo amba akafike ku Loma mu mutende ne kutwajijila kushimuna bukamonyi. Paulo byo aumvwine uno mulaye, kyamweka wayukile’mba wazhikijilwa byonkatu byumvwa mwana inge uji mu maboko a bashanji.

5. Yehoba wakwashishe byepi Paulo kupichila mwi malaika? (Monai kipikichala kya pa nkupiko.)

⁵ Ñanyi makatazho akwabo apichilemo Paulo? Byo papichile nobe myaka ibiji kufuma kimye kyo bamukwachile mu Yelusalema, Paulo wajinga mu bwato bwayilenga ku Italya kimye pa kalunga kyo paikele luvula mukatampe kabiji baendeshenga bwato ne bantu bajingamo balangulukilenga’mba basakufwa. Nangwa byonkabyo, Paulo kechi waakaminwe ne. Mambo ka? Wabuujile bonse bajinga mu bwato amba: “Bufuku bwa lelo, malaika wa Lesa wami ye ñingijila waji kwimana kwi amiwa, ne kuñambila’mba: ‘Paulo,kuchina ne, wafwainwa kukemana kwi Kesala, kabiji Lesa wakupa bonse bo uji nabo mu bwato.’” Yehoba waingijishe malaika kwamba jibiji mulaye ye amulayile kupichila mwi Yesu. Ne kya kine, Paulo wafikile ku Loma.—Byu. 27:20-25; 28:16.

6. Ñanyi mulaye wa kwa Yesu wakonsha kwitukosesha, kabiji mambo ka?

⁶ Ñanyi bukwasho bo tutambula? Yesu uketukwasha ne atweba byonkatu byo akwashishe Paulo. Yesu walaya baana banji ba bwanga bonse amba: “Nji nenu moba onse kukafikatu ne ku mpelo ya buno bwikalo.” (Mat. 28:20) Byambo bya kwa Yesu bitukosesha bingi. Mambo ka? Mambo moba amo kitukatazha bingi kuchinchika. Nabiji inge mulongo wetu wafwa, bulanda kechi bupwa bukiji ne, bwakonsha kupwisha myaka yavula. Bakwabo bekala na moba akatazha na mambo a kukota. Kabiji bakwabo bekala na moba amo o bekala na binyenge bikatampe.  Nangwa byonkabyo, tukosa ne kutwajijila kuchinchika mambo twayuka’mba Yesu uji ne atweba “moba onse,” kubikapotu ne moba akatazha bingi mu bwikalo bwetu.—Mat. 11:28-30.

7. Kwesakana na byaamba Lumwekesho 14:6, Yehoba witukwasha byepi ano moba?

⁷ Mambo a Lesa etulaya’mba Yehoba uketukwasha kupichila mu bamalaika banji. (Hebe. 1:7, 14) Bamalaika betukwasha ne kwitutangijila pa kusapwila “mambo awama a Bufumu” ku “bisaka bya bantu byonse ne ku mikoka yonse [ne] ku ba njimi yonse.”—Mat. 24:13, 14; tangai Lumwekesho 14:6.

8. Yehoba wakwashishe byepi Paulo kupichila mu mwine mukulumpe wa bashilikale?

⁸ Ñanyi bukwasho bwatambwile Paulo? Mu mwaka wa 56 C.E., Yesu wakwashishe Paulo kushiinwa’mba ukafika ku Loma. Pano bino, Bayudea bamo mu Yelusalema bafuukwilepo kulukuka Paulo ne kumwipaya. Mukulumpe wa bashilikale bena Loma aye Kaludiusa Lisiasa waumvwine kyo bafuukwilepo kuba, kabiji waishile na kupokolola Paulo. Bukiji bukiji, Kaludiusa watumine Paulo saka bamuzhikijila ku bashilikale ku Kesalea, kwalepele makilomita 105 kufuma ku Yelusalema. Byo bamufikizhe ku Kesalea, Kitumbafumu aye Felikisa wakambizhe’mba Paulo “bamusopenga mu kipango kya kwa Heloda.” Bayudea bakebelenga kwipaya Paulo kechi bakonsheshe kufikako kuno ne.—Byu. 23:12-35.

9. Kitumbafumu Fesatusa wakwashishe byepi Paulo?

⁹ Byo papichile myaka ibiji, Paulo wakijinga mu kaleya mu Kesalea. Fesatusa waswaine Felikisa pa bukitumbafumu. Bayudea basashijile Fesatusa kuba’mba Paulo bamubwezhe ku Yelusalema na kumutotolwesha, bino Fesatusa wakaine. Kampe uno kitumbafumu wayukile’mba Bayudea “bakebelenga kumubelamina Paulo ne kumwipayila mu jishinda.”—Byu. 24:27–25:5.

10. Kitumbafumu Fesatusa waubile byepi Paulo byo alombele’mba mambo anji beatwale kwi Kesala?

¹⁰ Mu kuya kwa kimye, mambo a kwa Paulo beatotolwejile mu Kesalea. Na mambo a kuba’mba Fesatusa wakebele “kutokesha Bayudea pa muchima,” waipwizhe Paulo amba: “Nanchi ubena kusaka kuya ku Yelusalema na kukuchibila mambo ku meso ami na mambo a bino bintu nyi?” Paulo wayukile’mba bakamwipayila mu Yelusalema, kabiji wayukile ne byo afwainwe kuba pa kuba’mba epulushe ne kuya na kufika ku Loma ne kutwajijila kusapwila. Waambile’mba: “Nalomba kutwala ano mambo kwi Kesala!” Fesatusa byo esambilepo na bamufundangako maana, wabuujile Paulo amba: “Byo ubena kukeba kutwala mambo obe kwi Kesala; kwi Kesala ko ko ukaya.” Fesatusa byo afuukwilepo kutuma Paulo kwi Kesala, wamupokolwele ku balwanyi banji. Palutwe kacheche, Paulo wafikile mu Loma kwalepele bingi na Bayudea bakebelenga kumwipaya.—Byu. 25:6-12.

11. Paulo wafwainwa walangulukile pa ñanyi byambo bya lutekenesho byaambile Isaya?

¹¹ Paulo byo apembejilenga kutendekako lwendo lwa kuya ku Italya, kyamweka walangulukilenga pa lujimuno ngauzhi Isaya lo ajimwineko boba balengulwilenga Yehoba. Isaya waambile’mba: “Umvwañanai byo mukeba kuba, pano bino kechi bikengila ne! Ambai bintu byonse byo mukeba, pano bino kechi bikobiwa ne!” (Isa. 8:10) Paulo wayukile’mba Lesa ukamukwasha, kabiji kino kyafwainwa kyamukwashishe bingi kuchinchika meseko o apichilemo kulutwe.

12. Julyasi wakwashishe byepi Paulo, kabiji kino kyalengejile Paulo kuyuka ñanyi kishinka?

¹² Mu 58 C.E., Paulo watendekeleko lwendo lwanji lwa kuya ku Italya. Na mambo a kuba wajinga kaili, bamusopelenga ku mushilikale mwina Loma wa jizhina ja Julyasi. Kufumatu kikye kimye, Julyasi wajinga na luusa lwa kuyanjisha Paulo nangwa kumulama bulongo. Waingijishe byepi luusa lwanji? Juba jalondejilepo, bafikile  ku kitulu, kabiji “Julyasi wamubijile lusa Paulo ne kumuswisha kuya nakumona balunda nanji.” Mu kuya kwa kimye, Julyasi wapokolwele Paulo mu kizumba. Wamupokolwele byepi? Bashilikale bakebelenga kwipaya bakaili bonse bajinga mu bwato, bino Julyasi wibakainye. Mambo ka? Mambo ‘wasakile kupulusha Paulo.’ Kyamweka Paulo wamwene’mba Yehoba waingijishe uno mushilikale wawamine muchima kumukwasha ne kumuzhikijila.—Byu. 27:1-3, 42-44.

13. Yehoba wakonsha kwingijisha byepi bantu baji pa bifulo bikatampe?

¹³ Ñanyi bukwasho bo tutambula? Umvwe kyo kyaswa muchima wanji, Yehoba wakonsha kwingijisha mupashi wanji wazhila kulengela bantu baji pa bifulo bikatampe kuba bintu byo asaka. Mfumu Solomone wanembele’mba: “Muchima wa mfumu uji nobe tukola twa mema tuji mu kuboko kwa Yehoba. Aye umwalulwila konse ko asaka.” (Maana 21:1) Kino kishimpi kilumbulula ka? Bantu bakonsha kupoya mufolo ne kusendwilamo mema a mu kakola kuba’mba ayenga ko bakeba. Ne Yehoba naye wakonsha kwingijisha mupashi wanji kwalulula milanguluko ya bandamabyalo kuba’mba bobe kyaswa muchima wanji. Kino inge kyaubiwa, bantu baji pa bifulo bikatampe bakonsha kufuukula bintu byafwainwa kukwasha bantu ba Lesa.—Esakanyaiko Ezela 7:21, 25, 26.

14. Kwesakana na byaamba Byubilo 12:5, bañanyi bo twakonsha kulombelako?

¹⁴ Twakonsha kuba byepi? Twakonsha kulombelako “bamfumu ne bonse baji pa bifulo bikatampe” inge kya kuba bano bantu babena kufuukula bintu byakunza bupopweshi bwetu ne mwingilo wa kusapwila. (1 Timo. 2:1, 2, tubyambo twa munshi; Ne. 1:11) Byonka byaubile bena Kilishitu batanshi, ne atweba tulombelako balongo ne banyenga baji mu kaleya. (Tangai Byubiloe 12:5; Heb. 13:3) Kabiji twakonsha kulombelako baota bo bapa luusa lwa kulama balongo ne banyenga baji mu kaleya. Twakonsha kusashijila Yehoba kwalulula milanguluko ya bano bantu pa kuba’mba balamenga bulongo bakwetu ba mu lwitabilo bo bakasa ne ‘kwibobila lusa.’—Byu. 27:3.

15-16. Yehoba wakwashishe byepi Paulo kupichila mwi Alisatakusa ne Luka?

¹⁵ Ñanyi bukwasho bwatambwile Paulo? Byo ajinga pa lwendo lwa kuya ku Loma, Paulo bimye byavula watambwijilenga bukwasho bwa Yehoba kupichila mu bakwabo ba mu lwitabilo. Twayai twisambeko pa bamo.

¹⁶ Balunda nanji babiji ba kishinka, abo ba Alisatakusa ne Luka, bafuukwilepo kuya nanji  Paulo ku Loma. * Babikile bumi bwabo mu kizumba na mambo a kwikala ne Paulo, nangwa kya kuba Yesu kechi wamwekelepo kwi abo ne kwibabuula’mba bakafika mu mutende ku Loma ne. Kimye bintu kyo byakatezhe pa kalunga ka mema, po po bayukile’mba kechi basakufwa ne. Onkao mambo, kimye Alisatakusa ne Luka kyo bakanjijile mu bwato mu Kesalea, Paulo wafwainwa walombele kwi Yehoba mulombelo wa kufuma panshi ya muchima. Wasanchijile Lesa pa kumukwasha kupichila mu kumupa bano bena Kilishitu babiji babujile moyo ba kumutundaika.—Byu. 27:1, 2, 20-25.

17. Yehoba wakwashishe byepi Paulo kupichila mu bakwabo ba mu lwitabilo?

¹⁷ Kimye kyo bayilenga, Paulo bamukwashishe ku bano bakwabo ba mu lwitabilo pa bimye byavula bingi. Kimye kyo bafikile ku kiito kya muzhi wa Shidona, Julyasi waswishishe Paulo “kuya na kumona balunda nanji kuba’mba bamukwashe.” Kabiji byo bafikile mu muzhi wa Mputeoli, Paulo ne balunda nanji ‘bataaineko balongo kabiji bebasashijile’mba bekale nabo pa moba atanu na abiji.’ Bena Kilishitu mu ano mapunzha byo bakwashishenga Paulo ne balunda nanji, Paulo wafwainwa wibasangajikile bingi pa kwibashimikizha bintu byawama byamwekelenga pa luno lwendo lwabo. (Esakanyaiko Byubilo 15:2, 3.) Ano moba o baikele na balongo na kwitundaika byo apwile, Paulo ne balunda nanji batwajijile na lwendo lwabo.—Byu. 27:3; 28:13, 14.

18. Ki ka kyalengejile Paulo kusanchila Lesa ne kukosa?

¹⁸ Paulo byo anangijilenga ku Loma, wafwainwa walangulukilenga pa byambo byo anembele mu nkalata myaka isatu ya kunyuma ku kipwilo kyajinga mu uno muzhi amba: “Mambo pa myaka yavula nakebeshanga bingi kwiya ko muji.” (Loma 15:23) Nangwa byonkabyo, kechi walangulukilengapo’mba ukafika mu uno muzhi saka aji kaili ne. Wafwainwa watundaikilwe bingi pa kutaana kuba’mba balongo mu muzhi wa Loma bamupembejilenga saka baimana kunsa ya mukwakwa ne kumwimuna. “Paulo byo ebamwene, wamusanchijile Lesa ne kukosa wakosele.” (Byu. 28:15) Mambo ka Paulo o asanchijile Lesa pa kumona balongo? Mambo wamwene  jikwabo kuba’mba Yehoba wamukwashishenga kupichila mu bakwabo ba mu lwitabilo.

19. Kwesakana na byaamba 1 Petelo 4:10, Yehoba wakonsha kwitwingijisha byepi kukwasha boba baji mu makatazho?

¹⁹ Twakonsha kuba byepi? Abya mwayukapo balongo ne banyenga mu kipwilo kyenu babena kumanama na mambo a kukolwa nangwa makatazhotu akwabo nyi? Nangwa kampe bafwisha mulongo wabo. Umvwe twaumvwa kuba’mba kuji mukwetu ubena kukebewa bukwasho, twakonsha kulomba kwi Yehoba kuba’mba etukwashe kwamba nangwa kubapo kimo kyakonsha kukwasha yeo muntu. Byambo ne byubilo byetu byakonsha kutundaika mulongo nangwa nyenga. (Tangai 1 Petelo 4:10.) * Inge twakwasha bakwetu, twakonsha kwibalengela kushiinwa kuba’mba mulaye wa Yehoba wa kuba’mba, “kechi nkakusha ne, kabiji kechi nkakulekelela ne” wingila ne kwi abo. Nanchi kino kechi kikemuletela lusekelo nenyi?

20. Mambo ka o twakonshesha kwamba saka twashiinwa’mba: “Yehoba ye nkwasho wami”?

²⁰ Byonkatu byo kyajinga kwi Paulo ne balunda nanji, bwikalo bwetu bujitu nobe lwendo lwa pa kalunga ka mema, kabiji tupita mu makatazho aji nobe luvula mukatampe. Kabiji pa kimye kimotu, twayuka kuba’mba twakonsha kukosa mambo Yehoba uji ne atweba. Witukwasha kupichila mwi Yesu ne bamalaika. Kabiji inge kyo kyaswa muchima wanji, Yehoba wakonsha kwitukwasha kupichila mu bantu baji pa bifulo bikatampe. Kabiji byonkatu byo twimwenapo kala atweba bonse pa muntu pa muntu, Yehoba wingijisha mupashi wanji wazhila kutundaika bakalume banji kukwasha balongo ne banyenga baji mu makatazho. Onkao mambo, ne atweba tuji na bishinka byafwainwa kwitulengela kwamba byonka byaambile Paulo amba: “Yehoba ye nkwasho wami; kechi nakonsha kuchina ne, muntu angube ka?”—Hebe. 13:6.