Nanchi mukeba kumwenamo bingi pa kufunda Baibolo pa bunke bwenu nyi? Mwakonsha kweseka ano mashinda pa kuba’mba mufundenga Baibolo pa bunke bwenu kwakubula bya kwimuvulañanya:

• Salai mpunzha yawama. Salai mpunzha pabula bya kutulaika tulaika kabiji kange mwikale mu mfishi ne. Mwakonsha kwikala pa kipona nangwa kwingijisha tebulu nangwa mwakonsha kusala mpunzha yawama pangye.

• Ikalai Kwabengakana. Yesu wabuukile “ku makya” ne kuya na kulomba “kwa bunke” (Mako 1:35) Inge kechi kyakonsheka kwikala kwa bunke ne, mwakonsha kubuula ba mu kisemi kyenu nangwa bo mwikala nabo mutanchi wenu wa kufunda Baibolo byo aji pa kuba’mba babulenga kwimuvulañanya.

• Chinuzhukainga bintu byakonsha kwimuvulañanya. Inge mwingijisha foni nangwa tabuleti pa kufunda Baibolo pa bunke, ibikai pa kishinshi pa kuba’mba ibulenga kwimuletela bya kwimuvulañanya. Inge mubena kufunda Baibolo pa bunke bwenu mwavulukapo bintu bimo byo mukeba kuba kwikileka kutanga ne. Byo mwavuluka binembai pa kuba’mba mwiye mwingijilepo kimye kikwabo. Inge mwaleka kukwatakanya byo mubena kutanga imanako ne kwendaukako.