MUTWE WA KUFUNDA 44
LWIMBO 33 Twikai Yehoba Kisendwa Kyenu
Twajijilai Kwikala Bakishinka kwi Yehoba Inge Bemuba Byatama
“Kange muleke bubi bwimushindenga ne, bino shindainga bubi na byawama.”—LOMA 12:21.
BYO TUSAKWISAMBAPO
Byo twafwainwa kuba inge bantu betuba byatama.
1-2. Bañanyi bakonsha kwituba nshiji? Lumbululai
YESU waambile pa kishimpi kya mwanamukazhi wafwilwa watwajijile kusashijila mutonyi kuba’mba bamuchibile mambo bulongo ku wamubilenga nshiji. Kwa kubula nangwa kuzhinaukatu ne, jino jishimikila jalengejile baana ba bwanga ba kwa Yesu kuyuka byaumvwinenga ku muchima uno mwanamukazhi ye baubile nshiji mambo bantu bavula mu oa moba bebobanga bingi nshiji. (Luka 18:1-5) Ne atweba twayuka byaumvwinenga ku muchima uno mwanamukazhi ye baubile nshiji mambo ne atweba bonse bakitubapo nshiji pa bimye bimo.
2 Bantu bavula mu ntanda lelo jino, baji bingi na misalululo, lwiso ne kubula lusa. Onkao mambo, kechi tukumya inge kebetumanyike ne. (Sapwi. 5:8) Nangwa byonkabyo, twakonsha kulefulwa bingi inge kya kuba mulongo nangwa nyenga ye wituba nshiji. Pano bino kupusanako na bantu betumanyika, balongo ne banyenga abo kechi bakeba kwituba nshiji ne. Bumbulwakulumbuluka bwabo bo bwakonsha kwibalengela pa bimye bimo kuba bintu byakonsha kwitulefula. Tufunjilako byavula bingi ku byaubile Yesu ne bantutu bakwabo bo baubile nshiji ku bantu bebamanyikilenga. Inge kya kuba tutekenya bantu betuba nshiji, ko kuba’mba twafwainwa kutekenya bingi bena Kilishitu bakwetu. Yehoba umvwa byepi ku muchima inge balwanyi betu nangwa balongo ne banyenga mu kipwilo betuba nshiji? Nanchi wituta muchima inge bintu bya uno mutundu bitumwekela nyi?
3. Nanchi Yehoba umona inge bakalume banji beboba nshiji nyi kabiji mambo ka?
3 Yehoba umona inge babena kwituba nshiji. “Yehoba watemwa bunchibamambo bwaoloka.” (Sala. 37:28) Yesu witulaya kuba’mba Yehoba ‘ukapelawizha kwituchibila mambo’ inge kimye kyanji kyafika. (Luka 18:7, 8) Kabiji katatakatu akafumyepo buyanji ne nshiji yonse.—Sala. 72:1, 2.
4. Ñanyi bukwasho bwitupa Yehoba lelo jino?
4 Tubena kutengela kimye Yehoba kyo akafumyapo makatazho onse. Pano bino ne lunotu witukwasha kuchinchika inge bantu betuba nshiji. (2 Pe. 3:13) Witufunjisha byo twafwainwa kuba inge betuba nshiji. Jishinda jimo jo obilamo bino ke kwitubuula Yesu byo aubile. Kabiji Yehoba witubuula mu Baibolo bintu byafwainwa kwitukwasha inge betuba nshiji.
JIMUKAI NA BYO MUBA INGE BEMUBA NSHIJI
5. Mambo ka o twafwainwa kujimukila na byo tuba inge betuba nshiji?
5 Kitukola bingi ku muchima inge bantu betuba byatama. (Sapwi. 7:7) Ne bakalume ba kishinka nabiji Yoba ne Habakuka nabo byo byo baumvwine. (Yoba 6:2, 3; Ha. 1:1-3) Kijitu bulongo kumvwa bino, pano bino twafwainwa kujimuka bingi inge betuba nshiji pa kuba’mba tubule kulenga mambo.
6. Tufunjilako ka ku byaubile Abisalomo? (Monai ne kipikichala.)
6 Inge muntu wituba nshiji, tukebesha bingi kushinkanya. Mu kuba bino mufumatu byatama. Akilangulukai pa byaubile mwana wa Mfumu Davida aye Abisalomo. Wazhingijile bingi byo aumvwine kuba’mba nyenga yanji Tamala bamulaala kya kumukanjikizha kwi kolojanji Aminona. Kwesakana na byaambile Mizhilo ya Mosesa, Aminona bafwainwe kumwipaya na mambo a kino kyo aubile. (Levi 20:17) Nangwa kya kuba Abisalomo wazhingijile, pano bino kechi wajinga na luusa lwa kwipaya Aminona ne.—2 Sam. 13:20-23, 28, 29.
Abisalomo wazhingijile bingi na mambo a kintu kyatama kyo baubile nyenga yanji aye Tamala (Monai jifuka 6)
7. Nyimbi wa salamo waubile byepi patanshi byo amwene bintu byatama byaubilenga babi?
7 Inge bantu boba byatama bebatalatu kwa kubula kwibakambula, twakonsha kutendeka kulanguluka’mba kyawamatu ne kubula kuba byawama. Akilangulukai pa nyimbi wa Salamo wamwene kuba’mba bantu babi bekala bingi bulongo kukila bantu baoloka. Waambile’mba: “Bano bo babi babula kuyanda.” (Sala. 73:12) Kabiji wazhingijile bingi byo amwene bantu batama na kwikala bulongo kya kuba watendekele kulanguluka’mba watayilengatu kimye kwingijila Yehoba. Waambile’mba: “Byo nakebelenga kuyuka mo byatala, kyankatezhenga bingi.” (Sala. 73:14, 16) Kabiji waamba pa kyakebelenga kumumwekela’mba: “Amiwa, nashi nkasenduke; ne maulu ami ashi akatezhimuke.” (Sala. 73:2) Kintu kya uno mutundu kyo kyamwekejile ne mulongo Alberto.
8. Mulongo umo waubile byepi byo bamubepejile?
8 Mulongo bamubepejile’mba waiba mali a kipwilo. Na mambo a kino, bamufumishe pa bukulumpe mu kipwilo ne kumulengulula ku basapwishi mu kipwilo bayukile’mba waibile mali. Uvuluka’mba “kyankolele bingi ku muchima kabiji nalefwilwe.” Kino kyamulengejile kuleka kupwila kabiji walekele kusapwila pa myaka itanu. Kino kyamwekele kimwesha byakonsha kwitumwekela ne atweba inge twazhingila na mambo a kwituba nshiji.
LONDELAINGA YESU BYO ACHINCHIKILE NA NSHIJI
9. Ñanyi makatazho achinchikile Yesu? (Monai ne kipikichala.)
9 Twafwainwa kufunjila kwi Yesu byo achinchikile makatazho. Ba mu kisemi kyanji bamwambijilenga byatama ne bantutu bakwabo. Balongo banji babula kwitabila bamwambijilenga’mba wakonya, bantangi ba bupopweshi bamubepejilenga’mba wisamba na bandemona, bashilikale ba bena Loma bamwendelekelenga, kumupuma kabiji bamwipayile. (Mako 3:21, 22; 14:55; 15:16-20, 35-37) Nangwa byonkabyo, Yesu wachinchikile ano makatazho onse kwa kubula kushinkanya nabo. Ñanyi bintu byo twafwainwa kufunjilako?
Yesu witufunjishe byo twafwainwa kuchinchika inge betuba nshiji (Monai mafuka 9-10)
10. Yesu waubile byepi na makatazho o apichilengamo? (1 Petelo 2:21-23)
10 Tangai 1 Petelo 2:21-23. a Yesu witushijile mwa kulondela inge betuba nshiji. Wayukile kimye kya kuzhindama ne kimye kya kwamba. (Mat. 26:62-64) Kechi kimye kyonse kyo akumbulanga inge bantu baamba bya bubela pe aye ne. (Mat. 11:19) Pa kwibakumbula, Yesu kechi waambilanga mwenga bamumanyikanga nangwa kwibazakamisha ne. Yesu wikanyanga mambo “wipaine aye mwine ku yewa uchiba mambo mo aolokela.” Yesu wayukile’mba Yehoba wamwenenga byo bamubilenga nshiji. Waketekejile’mba Yehoba ukafumyapo nshiji yonse pa kimye kyafwainwa.
11. Mu ñanyi mashinda mo twakonsha kuyukila bya kwamba? (Monai ne Bipikichala.)
11 Inge muntu wituba byatama twafwainwa kulondela byaubile Yesu pa kumukumbula. Bimye bimo, twafwainwa kulubangakotu ku bintu bimo byo betwambila nangwa kwituba ku bakwetu. Nangwa twakonsha kuzhindamapotu kuchina’mba twakamba bintu byakonsha kulengela lukatazho kubaya. (Sapwi. 3:7; Yako. 1:19, 20) Pa bimye bikwabo, twakonsha kwambilako muntu ye babena kumanyika nangwa kwamba pa bintu byo twaitabilamo. (Byu. 6:1, 2) Inge twafuukulapo kwamba, twafwainwa kwamba na mushingi kabiji saka twatekanya.—1 Pe. 3:15. b
Inge bantu betuba nshiji, twafwainwa kuyuka byambo bya kwamba ne kimye kya kwibyambilapo byonka byaubile Yesu (Monai mafuka 11-12)
12. Twakonsha kwipana byepi atweba bene “ku yewa uchiba mambo mo aolokela”?
12 Kabiji tulondela byaubile Yesu inge twipana atweba bene “ku yewa uchiba mambo mo aolokela.” Inge bakwetu betubepela nangwa kwituba byatama, twafwainwa kuketekela’mba Yehoba wayuka byo tubena kupitamo. Kuyuka bino kwakonsha kwitukwasha kuchinchika bintu byatama byo betuba mambo twayuka kuba’mba Yehoba pa kimye kyanji mwine ukolola bintu. Inge twashiila byonse mu maboko a Yehoba, kechi tukatwajijila kuzhingijila bakwetu nangwa kwibashikwa ne. Kutwajijila kuzhingila kwakonsha kwitulengela kuba byatama, kwitupwishisha lusekelo ne konauna bulunda bwetu ne Yehoba.—Sala. 37:8.
13. Ñanyi bintu byakonsha kwitukwasha kuchinchika makatazho?
13 Nangwa byonkabyo, kechi twakonsha kuba bintu sukasuka byonka byaubile Yesu ne. Pa bimye bimo twakonsha kuba nangwa kwamba bintu bimo byo twakonsha kwilangulusha kulutwe. (Yako. 3:2) Kabiji bintu bimo byatama bituba bakwetu byakonsha kwitulefula nangwa kwitukozha ku muchima pa kimye kyabaya. Inge byo byo kiji ne kwi anweba, shiinwai kuba’mba Yehoba wayuka bintu byonse byo mubena kupitamo. Kabiji Yesu ye baubile nshiji wayuka byo kimukola ku muchima. (Hebe. 4:15, 16) Inge betuba nshiji, twafwainwa kufunjila kwi Yesu. Yehoba witupa ne mashinda akwabo aji mu Baibolo o twakonsha kulondela. Twayai twisambe pa byepelo bibiji biji mu buku wa bena Loma byakonsha kwitukwasha.
“BUKAJI BUSHILAI MPUNZHA”
14. Kilumbulula ka ‘kushiila bukaji mpunzha’? (Loma 12:19)
14 Tangai Loma 12:19. Mutumwa Paulo byo akambizhe bena Kilishitu ‘kushiila bukaji mpunzha,’ bukaji bwa bañanyi bo aambilengapo? Kwesakana na byo babena kwambapo mu kino kyepelo, waambilenga pa bukaji bwa Yehoba. Tushiila mpunzha bukaji bwa Yehoba inge twabula kushinkanya ne kupembelela kimye kyo akaleta bunchibamambo bwaoloka mu jishinda jo akebelamo ne mu kimye kyanji mwine. Mulongo John byo bamubile nshiji ku bakwabo, waambile’mba: “Nebikileko bingi pa kuba’mba mbule kushinkanya, pano bino kechi kyampelejile kuba bino ne. Kinembelo kya Loma 12:19 kyankwashishe kuba’mba nafwainwa kupembelela pe Yehoba.”
15. Mambo ka o kyawamina kupembelela pe Yehoba kuba’mba olole bintu?
15 Tumwenamo bingi inge twapembelela pe Yehoba kuba’mba olole bintu. Tukachinuzhuka makatazho ne bijikila biya na mambo a kukeba kupwisha lukatazho atweba bene. Yehoba witulaya kuba’mba uketukwasha. Kiji nobe ubena kwitwambila’mba: ‘Kange mwakamwe na nshiji yo bemuba ne; nsakwingijilapo.’ Yehoba witulaya’mba “amiwa nkashinkanya nabo.” Onkao mambo, twakonsha kushiila byonse mwi Yehoba ne kuketekela’mba ukengijilapo mu jishinda janji aye mwine. Kino kyo kyakwashishe ne mulongo John ye twaambapo kala. Waambile’mba: “Inge nashiila bintu mu maboko a Yehoba, aye ukengijilapo mu jishinda jawama.”
“SHINDAINGA BUBI NA BYAWAMA”
16-17. Kulomba kwakonsha kwitukwasha byepi kutwajijila ‘kushinda bubi na byawama’? (Loma 12:21)
16 Tangai Loma 12:21. Paulo watundaikile bena Kilishitu ‘kushinda bubi na byawama.’ Mu jashi janji ja pa Mutumba, Yesu waambile’mba: “Temwainga balwanyi benu ne kulombelako boba bemumanyika.” (Mat 5:44) Abino byo byo aubile. Kampe twavuluka Yesu byo amanamine ne kuchinchika byo bamupopele pa kichi ku bashilikale bena Loma. Twakonsha kufwanyikizha byo aumvwinenga kukola byo bamupopelenga pa kichi ne byo aumvwinenga kutama ku muchima pa kumuba mwenga ne nshiji.
17 Yesu watwajijile kwikala wa kishinka kwi Yehoba nangwa kya kuba bamubile nshiji. Mu kifulo kya kufinga bano bashilikale, wibalombejileko’mba: “Tata, balekelaiko mambo, mambo kechi bayuka kyo babena kuba ne.” (Luka 23:34) Inge ke tulombeleko bantu betuba byatama, kechi tukebashikwa ne kwibamona’mba balwanyi betu ne.
18. Kulomba kwakwashishe byepi mulongo Alberto ne John kuchinchika bintu byatama byo bebobile?
18 Kulomba kwakwashishe balongo babiji bo twaambapo mu uno mutwe kuchinchika makatazho o bapichilemo. Mulongo Alberto waambile’mba: “Nalombejileko balongo bangubile nshiji. Nalombele kwi Yehoba bimye byavula kuba’mba ankwashe kulubako ku byatama byo bangubile.” Lelo jino, Alberto watwajijila kwingijila Yehoba mu bukishinka. Mulongo John waambile’mba: “Pa bimye byavula, nalombelangako mulongo wankozhezhe ku muchima. Ino milombelo yankwashishe kubula kutwajijila kumuzhingijila ne kumuzhachisha. Kabiji na mambo a ino milombelo, naikele na mutende wa mu milanguluko.”
19. Ñanyi bintu byo twafwainwa kutwajijila kuba kufikatu ne ku mpelo ya buno bwikalo bwatama? (1 Petelo 3:8, 9)
19 Kechi twayuka makatazho o tukapitamo byo tubena kwikala mu ino ntanda yatama ne. Kechi na mambo a bintu byatama byo twakonsha kupitamo ne, twafwainwa kutwajijila kulomba kwi Yehoba kuba’mba etukwashe. Twafwainwa kulondela byaubile Yesu byo bamubile bintu byatama. Kabiji twafwainwa kutwajijila kwingijisha mafunde a mu Baibolo. Inge twauba bino, Yehoba uketupesha.—Tangai 1 Petelo 3:8, 9.
LWIMBO 38 Lesa Ukemukosesha
a Mu bitango 2 ne 3 biji mu nkalata itanshi yanembele mutumwa Petelo, walumbululamo bintu byatama bena Kilishitu ba mu myaka kitota kitanshi byo bebobile ku bankambo yabo bashinta nangwa ku bamwatawabo babula kwitabila.—1 Pe. 2:18-20; 3:1-6, 8, 9.
