Bebobijile Lusa
BASHABO ba John babatizhiwe ne kwikala Bakamonyi ba kwa Yehoba mu myaka ya mu ma 1950, saka bekala mu muzhi wa Gujarat, mu India. Ba John ne banyenga yabo basatu ne bankasabo babalume babiiji, kubikapotu ne bainabo bonse bajinga Bakatolika. Onkao mambo, bazhingijile bingi bashabo byo baikele Bakamonyi.
Juba jimo, ba John bebatumine ku bashabo amba batwale nkalata ku mulongo ye bapwilanga nanji. Pa jonkaja juba lukelo, ba John byo bashinkwilenga kikopo kikatampe, bekozhezhe ku munwe. Pano bino, na mambo a kukookela bashabo, ba John bakashilepo kisapi pa kilonda ne kutwala nkalata ko bebatumine.
Ba John byo bafikile ko bebatumine, bapele nkalata ku bakazhi ba yewa mulongo ye bebatumineko. Bakazhi ba uno mulongo bajinga Bakamonyi ba kwa Yehoba, kabiji byo batambwilenga nkalata, bamwene kuba’mba ba John bekozha ku munwe. Onkao mambo, batolele kabokoshi mo balaminanga michi ne kovwa pa kilonda na muchi, kepo bakashilepo ne kisapi. Byo bapwishishe, banengezhejile ba John makabekabe. Mo baubijilenga byonse bino, saka babena kwisamba ne ba John pa byanembwa mu Baibolo.
Pa kumona lusa lo bebobijile, ba John batendekele kupimpulako milanguluko yabo pa byo bamonanga Bakamonyi. Onkao mambo, baipwizhe uno nyenga pa bishinka bya mu Baibolo bibiji byo bapusenangamo bingi na bashabo. Baipwizhe umvwe kya kuba Yesu ye Lesa, kabiji umvwe bena Kilishitu bafwainwa kulomba kwi Maliya nangwa ne. Uno Kamonyi wayukile mulaka wa ba John wa Gujarati, onkao mambo, wakumbwile ano mepuzho na Baibolo ne kwibapa kabuku ka kuba’mba “This Good News of the Kingdom.”
Ba John byo batangile kano kabuku, bayukile’mba bataana bukine bwa mu Baibolo. Bayile ku ba pulishiti babo ne kwibepuzha mepuzho antutu amo. Ponkapotu, pulishiti wabo wazhingijile ne kwibasa Baibolo, ne kwibapaachila’mba: “Wi Satana! Mmweshe Baibolo po aamba’mba Yesu kechi Lesa ne. Mmweshe panembwa’mba kechi twafwainwa kulomba kwi Maliya ne. Mmweshe!” Ba John bakankamenetu pa kumona byaubile ba pulishiti, kabiji baambile’mba: “Kyapwa kechi nkanyantamo kulu kwami mu chechi wa Bakatolika ne.” Ne kine kechi banyanchilemo kulu jibiji ne.
Ba John batendekele kufunda Baibolo na Bakamonyi, kabiji bepaine kwi Yehoba ne kutendeka kumwingijila. Mu kuya kwa kimye, bakwabo ba mu kisemi nabo baikele Bakamonyi. Ne lelo jino, ba John bakiji na mukovu ku munwe wa ku kilujo ko bekozhezhe kala papita ne myaka 60. Bino bakivuluka lusa lo bebobijile ku mwina Kilishitu lwibalengejile kwiya mu bupopweshi bwa kine.—2 Ko. 6:4, 6.