Yosefwa wa ku Alimatea Wachinchikile
YOSEFWA WA KU ALIMATEA wayukile kuba’mba kechi kyapeelele kuya ku kitumbafumu mwina Loma ne. Pontiusa Pilato wajinga muntu witota bingi. Pano bino, kwakebewenga muntu wa kuya kwi Pilato nakulomba mubiji wa kwa Yesu kuba’mba bamuzhiike mu mushingi. Yosefwa wachinchikile ne kuya na kwisamba na uno kitumbafumu kuba’mba amupe mubiji wa kwa Yesu. Pilato waswishishe kumupana mubiji wa kwa Yesu byo ashiinwe na byamubuujile mukulumpe wa bashilikale kuba’mba Yesu wafwa. Nangwa kya kuba Yosefwa wajinga bingi na bulanda, wayile bukiji bukiji ku mpunzha ko baipaijile Yesu.—Mako 15:42-45.
-
Yosefwa wa ku Alimatea wajinga ñanyi?
-
Ñanyi bulunda bwajinga pakachi ka kwa Yesu ne Yosefwa ?
-
Mambo ka jishimikila ja kwa Yosefwa o janemena kwi anweba?
WA MU KIJE KYA SANIEDILINI
Mambo Awama a kwa Mako amutela Yosefwa amba “kinemanga wa mu Kije.” Kino kyajinga kije kya Saniedilini, kije kikatampe kya Bayudea. (Mako 15:1, 43) Yosefwa naye wajinga ntangi mu kino kije kabiji kyo kyamulengejile kukasuluka kuya na kwisamba na Kitumbafumu wa bena Loma. Yosefwa naye wajinga munonshi.—Mat. 27:57.
Nanchi muchinchika ne kumwesha patoka’mba Yesu ye Mfumu wenu nyi?
Ba mu kije kya Saniedilini bashikilwe bingi Yesu. Onkao mambo, baumvwañene kumwipaya. Pano bino, Yosefwa bamutela’mba “wajinga muntu wawama ne koloka.” (Luka 23:50) Kupusanako na bakwabo ba mu kije kya Saniedilini, aye wajinga na byubilo byawama kabiji wibikangako kukookela mikambizho ya Lesa mu bwikalo bwanji. “Wapembejilenga Bufumu bwa Lesa,” kabiji kyamweka kyo kyamulengejile kwikala mwana wa bwanga wa kwa Yesu. (Mako 15:43; Mat. 27:57) Yosefwa watemenwe byafunjishenga Yesu na mambo a kuba wanemekele bukine ne bololoke.
MWANA WA BWANGA WABUJILE KWISOLOLA PATOKA
Kinembelo kya Yoano 19:38 kyaamba amba Yosefwa “wajinga mwana wa bwanga wa kwa Yesu, bino wabujile kwisolola na mambo a kuchina Bayudea.” Mambo ka Yosefwa o achiinenga kwisolola? Yosefwa wayukile Bayudea byo bashikilwe Yesu kabiji baumvwañene kuba’mba yense ukamwitabila bakamupanga mu nshinagoga. (Yoa. 7:45-49; 9:22) Bantu bo bapanganga mu nshinagoga bebalengululanga, kuleka kupwanañana nabo ne kwibamona’mba kechi Bayudea ne. O ene mambo Yosefwa o akankazhamine kwitabila mwi Yesu. Mambo inge wamwitabijile, inge bamufumishe pa kifulo kyo ajingapo ne kuleka kumunemeka.
Yosefwa kechi ye yenka wakankazhaminenga kwisolola ne. Yoano 12:42 waamba’mba: “Bantu bavula ne bantangi bamwitabijile [Yesu], bino na mambo a Bafaliseo kechi bamwambilengapo ne, pa kuba’mba babule kwibapanga mu nshinagoga.” Muntu mukwabo wajinga na moyo wajinga Nikodema, kabiji naye wajinga kinemanga wa mu kije kya Saniedilini.—Yoa. 3:1-10; 7:50-52.
Nangwa kya kuba Yosefwa wajinga mwana wa bwanga, bino kechi wisolwele patoka ne. Kino kechi kyawamine ne, mambo Yesu waambile’mba: “Yense ungitaba pa meso a bantu, ne amiwa nkamwitaba ku meso a Batata ba mwiulu. Pakuba yense unkana pa meso a bantu, ne amiwa nkamukana ku meso a Batata ba mwiulu.” (Mat. 10:32, 33) Yosefwa kechi wakaine Yesu ne, bino wakankelwe kumwesha patoka’mba wamwitabila na mambo a kuchina bantu. Nanchi ne anweba byo byo muba nyi?
Baibolo waamba’mba Yosefwa kechi waitabizheko byafuukwilepo kije kya Saniedilini kuba’mba bepaye Yesu ne. (Luka 23:51) Kabiji bantu bamo bamba’mba Yosefwa kechi wataainweko kimye kyo batotolweshenga Yesu ne. Nangwa byonkabyo, Yosefwa waumvwine bingi bulanda pa nshiji yo bamubile Yesu, bino kafwako kyo akonsheshe kuba ne.
WASHINJILE MOYO
Kyamweka Yosefwa washinjile moyo kimye kyafwile Yesu, kabiji wafuukwilepo kwingijila pamo na baana ba bwanga ba kwa Yesu. Kino kyamwekela mu byambo biji pa Mako 15:43 bya kuba’mba: “Wachinchikile ne kuya kwi Pilato na kulomba mubiji wa kwa Yesu.”
Kyamweka Yosefwa wajingapo kimye Yesu kyo afwilenga. Wayukile’mba Yesu wafwa Pilato saka akyangye kuyuka. Onkao mambo, kimye Yosefwa kyo alombele mubiji wa kwa Yesu, Pilato patanshi “wakebele kuyuka umvwe [Yesu] wafwa kala nangwa ne.” (Mako 15:44) Nanchi kumonako Yesu byo afwilenga pa kichi kya lumanamo ko kwalengejile Yosefwa kulangulukapo bulongo ne kufuukulapo kwisolola patoka kuba’mba wajinga mwana wa bwanga nyi? Kyamweka kyo kyamulengejile. Yosefwa watundaikilwe kubapo kimo. Kufumatu kyokya kimye wisolwele patoka kuba’mba wajinga mwana wa bwanga wa kwa Yesu.
YOSEFWA WAZHIIKILE MUBIJI WA KWA YESU
Mizhilo ya Bayudea yaambile’mba inge muntu bamuzhachisha na mambo ne kumwipaya, bafwainwe kumuzhiika juba saka jikyangye kuzhika. (Mpitu. 21:22, 23) Pano bino, bena Loma inge baipaya mbanzhi, bamushanga pa kichi kuba’mba abolele ponka nangwa kumutaya mu kilende mo batayanga bantu bo balengulwile. Bino Yosefwa kechi walangulukilenga kuba bino ne. Yosefwa wajinga na kilende kyo basongele mu jibwe kubwipi na mpunzha ko baipayijile Yesu. Mu kino kilende kechi bakizhiikilemo muntu kala ne, kino kimwesha kuba’mba Yosefwa po po avilukiletu kufuma ku Alimatea * kuya ku Yelusalema, kabiji wapotele kino kilende kuba’mba bakazhiikengamo balongo banji. (Luka 23:53; Yoa. 19:41) Yosefwa waubile kintu kyanema bingi byo azhiikile Yesu mu kilende kyanji, kabiji kino kyafikizhe bungauzhi bwa kuba’mba Mesiasa bakamuzhiika “konka ko bazhiika banonshi.”—Isa. 53:5, 8, 9.
Nanchi kujipo bintu byo mwanemeka bingi kukila bulunda bwenu ne Yehoba nyi?
Mabuku onse ana a Mambo Awama aamba’mba mubiji wa kwa Yesu byo bamwikizhe pa kichi, Yosefwa wamupombele mu kisapi kyawama kya linenyi ne kumulaajika mu kilende kyo basongele mu jibwe. (Mat. 27:59-61; Mako 15:46, 47; Luka 23:53, 55; Yoa. 19:38-40) Baibolo watongolapotu muntu umo wakwashisheko Yosefwa. Uno muntu wajinga Nikodema, kabiji waletele binunka bulongo bya kushinga mubiji wa kwa Yesu. Na mambo a kuba Yosefwa ne Nikodema bajinga babinemanga, kyamweka kechi basendele mubiji bunke bwabo ne. Bafwainwa baingijishe bakalume babo kusenda mubiji ne kumuzhiika. Nangwa byonkabyo, mwingilo waingijile bano banabalume babiji wanemene bingi. Kala, muntu inge wakwata mubiji wa muntu wafwa, waikalanga wa muzhilo pa moba atanu na abiji, ne bintu byonse byo akwatanga byaikalanga bya muzhilo. (Bala. 19:11; Hagai 2:13) Inge muntu waikala wa muzhilo, waikalanga kwa bunke, ko kuba’mba kechi wakonsheshe kutaanwako ku Kijiilo kya Lupitailo nangwa kwivwangamo mu mingilo ya kunengezha kino kijiilo ne. (Bala. 9:6) Kunungapo, Yosefwa inge bamulengulwile ku bakwabo na mambo mwingilo ye aingijile wa kuzhiika Yesu. Nangwa byonkabyo, Yosefwa kechi waakaminwe bino byonse ne, wafuukwilepo kuzhiika Yesu mu jishinda jafwainwa ne kwisolola patoka kuba’mba wajinga mwananji wa bwanga.
MPELO YA JISHIMIKILA JA KWA YOSEFWA
Kufumatu kimye Yesu kyo bamuzhiikile, Baibolo kechi watongolapo Yosefwa wa ku Alimatea jibiji ne. Onkao mambo, twakonsha kwipuzha’mba: Ki ka kyamumwekejile? Kishinka ke kya kuba’mba kechi twayuka ne. Bino na mambo a byo twafunda pe aye, twaketekela kuba’mba wisolwele patoka’mba wajinga mwina Kilishitu. Twaketekela bino mambo mu kimye kya lweseko lukatampe, po po amwesheshe lwitabilo lukatampe ne kuchinchika. Kino kyamukwashishe ne kulutwe na lwendo.
Jino jishimikila jafwainwa kwitulengela kwiipuzha’mba: Nanchi twanemeka kifulo, nkito, bintu bya ku mubiji byo tuji nabyo, kutemwisha ba mu kisemi nangwa luusa lwetu lwa kwifuukwila bintu kukila byo twanemeka bulunda bwetu na Yehoba?
^ jifu. 18 Kyamweka Muzhi wa Alimatea ye muzhi watelwanga’mba Ramah, kabiji lelo jino utelwa’mba Rentis (Rantis). Uno ye wajinga muzhi mwaikalanga ngauzhi Samwela, kabiji palepele makilomita 35 kufuma ku Yelusalema.—1 Sam. 1:19, 20.