Kyamba kya Usopa kya January 1, 1918, kyatendekele na byambo bya kuba’mba: “Ñanyi bintu bisakumweka mu uno mwaka wa 1918?” Mu Europe mwakijinga Nkondo Ikatampe, bino bintu byamwekelenga ku ntendekelo ya uno mwaka byamwesheshenga’mba bintu bisakuwamina Bafunda Baibolo ne bantu bonse mwaya ntanda.

Pa 8 January, 1918, Ndamakyalo Woodrow Wilson, waambile pa bishinka 14 ku bantomesha ba mu nzubo ya mizhilo ya mu U.S., byo amwene’mba byakonsha kuleta “bunchibamambo bwaoloka ne mutende.” Waambile’mba pafwainwa kwikala lumvwañano pakachi ka byalo, kukepeshako kulenga bilwilo bya nkondo, ne kulenga bipamo byafwainwa kukwatankanya byalo pa kuba’mba mu “byalo bikatampe ne bicheche” mwikale mutende. Wakebelenga ne kuba’mba “Bishinka 14” byo aambile bakebingijishe pa kulenga kipamo kya League of Nations ne kwisamba pa kufwachika pepala wa mulaye wa kupwisha Nkondo Ikatampe.

Nangwa kya kuba kwajinga nkondo mwaka * wafumineko, bino Bafunda Baibolo bajinga na mutende, kino kyayukanyikijilwe ku bintu byamwekele pa kupwila kwa mwaka kwa ba Watch Tower Bible and Tract Society.

Pa kuno kupwila kwa mwaka kwajingako pa 5 January, 1918, balongo bavula bo bapangile pa Betele bakebelenga kuba’mba batendeke kutangijila jibumba. Mulongo Richard H. Barber wajinga kalama wa mwanzo ye washinkwile kuno kupwila na lulombelo. Byo batambwile sawakya wa mwingilo wa mwaka wafumineko, kwaikele bunsaji bwa kusala ba mu kavoto ka bakulumpe ba kipamo. Mulongo Barber wasajile Mulongo Joseph Rutherford ne bakwabo balongo batanu na umo. Bino mukulumpe wayuka mizhilo wakwatankene na bansatuki wasajile banabalume bakwabo batanu na babiji, wavwangilepo ne bo bapangile pa Betele. Bino bebashinjile. Bavula basajile Mulongo Rutherford ne balongo bakwabo batanu na umo kwikala ba mu kipamo.

Balongo bataainwe ku kuno kupwila baambile’mba “kuno kushonkena kawama bingi kukila kushonkena konse ko twataanwako kala.” Pano bino, lusekelo lo bajinga nalo kechi lwatwajijile ne.

Pa bañondo bavula, Bafunda Baibolo basampenyenga buku wa kuba’mba The Finished Mystery. Bantu ba bukishinka baumvwine bingi bulongo pa bukine bwa mu Baibolo bo batangile mu uno buku.

Mulongo E. F. Crist, wajinga kalama wa mwanzo mu Canada, washimikizhe pa ba mulume na mukazhi batangile buku wa The Finished Mystery kabiji bafunjile bukine mu milungutu itanu. Waambile’mba: “Bonse babiji ba mulume ne mukazhi bepaine kabiji batwajijile kuyilako palutwe.”

Mwanamulume umo watambwileko uno buku wapeleko ne balunda nanji. Byambo byo atangilemo byamufikile bingi pa muchima. Washimikizhe’mba: “Byo naendelenga munshi ya kishimikwa kyalepa kuji kyamponejile pa kipuzhi, naumvwinetu nobe jitafwali jamponena, bino nakuminyetu kutaana kuba’mba  wajinga buku wa ‘The Finished Mystery.’ Namusendele ku nzubo kabiji namutangiletu yense. . . . Nayukile’mba ntangi wa bupopweshi . . . ye watayile uno buku pa kipenze na mambo a bukaji . . . Uno buku ye atayile walengela bantu bavula kwikala na luketekelo lwa kukekala na bumi. . . . Na mambo a bukaji bwa uno ntangi wa bupopweshi luno tubena kutota Lesa.”

Byaubile uno ntangi wa bupopweshi byo byaubanga ne bantu bavula. Bantangi ba mu kafulumende mu kyalo kya Canada pa 12 February, 1918, babikileko muzhilo wakainye kusampanya uno buku mambo baambile’mba mu uno buku mwajinga byambo byatundaikilenga bantu kusatukila kafulumende ne kukanya bantu kulwa nkondo. Kabiji bantangi ba mu kafulumende wa United States nabo byobyo baubile. Ba mingilo ba mu kafulumende bapikichile Betele yense ne maofweshi a mu New York, Pennsylvania, ne mu California pa kuba’mba bataane bishinka bya kupelapo mambo batangijilenga jibumba. Pa 14 March, 1918, Kipamo Kitala pa Bunchibamambo mu U.S. kyakainye kusampanya buku wa The Finished Mystery, amba ubena kukanya bantu kulwa nkondo ne kuba’mba ubena kutundaika bantu kulala muzhilo wabikileko kafulumende wa kutwezha banabalume bonse bushilikale.

Pa 7 May, 1918, Kipamo Kitala pa Bunchibamambo kyaswishishe kukasa Ba Giovanni DeCecca, ba George Fisher, ba Alexander Macmillan, ba Robert Martin, ba Frederick Robison, ba Joseph Rutherford, ba William Van Amburgh ne ba Clayton Woodworth. Bebapelemo mambo a “kubula kulondela mizhilo, bumbanzhi, kulengulula bakulumpe ba mukafulumende ne kukana kutwela bushilikale mu United States.” Batendekele kutotolola ano mambo pa 3 June, 1918, bino bazhinaukilenga inge kya kuba bakonsheshe kwibazhachisha na mambo. Mambo ka?

Shabyambo wa mu United States waambile’mba bano bantu balajile “muzhilo wakanya kusampanya byambo byatama.” Pa 16 May, 1918, bantomesha ba mu nzubo ya mizhilo bakaine kupimpulako muzhilo wafwainwe kukwasha boba banembele bya kine, na milanguluko yawama, kabiji mwakonsheshe kufuma byawama nangwa kya kuba byo banembele byamwekelenga’mba kechi byawama ne. Buku wa The Finished Mystery ye bechochekelengapo bingi. Uno buku walengejile bantomesha ba mu nzubo ya mizhilo ba mu U.S. kwamba’mba: “Buku umo muji byambo byatama ke buku wa ‘The Finished Mystery’ . . . Uno buku wakonsha kulengela bashilikale kulengulula kafulumende ne kulengela bantu kukana kutwela bushilikale.”

Pa 20 June, 1918, kije kya mambo kyafwishishe balongo batanu na basatu na mambo. Juba jalondejilepo, mutonyi wabuulañene byo achibile mambo. Waambile’mba: “Bano bantu basampanya byambo byatama byatwala bantu mungi kukila ne byaabenejilemo bashilikale bena Germany. . . . Kabiji bafwainwa kwibamanyika bingi.” Byo papichile milungu ibiji, balongo batanu na basatu bebatayile mu kaleya ka Federal Penitentiary mu muzhi wa Atlanta, mu kibunji kya Georgia kabiji bebakashile kutendekela pa myaka 10 kufika ku myaka 20.

Pa kikye kimye, Bafunda Baibolo bebamanyikilenga bingi. Kipamo kikebakeba bishinka bya mambo kya Federal Bureau of Investigating (FBI) bapitulukile mu mingilo  yabo yonse kabiji banembele bintu byavula bingi. Kabiji byo banembele bimwesha kuba’mba balongo betu beyekele bingi na mwingilo wa kusapwila.

Mukulumpe utala pa ofweshi wa makalata mu muzhi wa Orlando, Florida watumijile nkalata kipamo kya FBI. Wanembele’mba: “Bafunda Baibolo batwajijila na kusapwila ku nzubo ku nzubo kabiji javula basapwila bufuku. . . . Batwajijila kwingila uno mwingilo wabo na mukoyo kabiji babena kuleta bufinda ku bantu.”

Mukulumpe wa bashilikale wanembejile nkalata kipamo kikeba keba bishinka ne kusampanya masawakya pa mingilo yaingijilenga ba Frederick W. Franz. Mu kuya kwa kimye, Mulongo Franz waikele mu Jibumba Jitangijila. Uno mukulumpe wa bashilikale wanembele’mba: “F.W.Franz . . . wiyeka na kupotesha mabuku avula a kuba’mba ‘Finished Mystery’.”

Ba Charles Fekel nabo bebamanyikile bingi. Mulongo Fekel naye mu kuya kwa kimye waikele mu Jibumba Jitangijila. Uno mulongo bamukashile na mambo a kusampanya buku wa The Finished Mystery kabiji bamulondalondanga kuba’mba bayuke bintu byo esambanga na bakwabo. Bamukashijile mu muzhi wa Baltimore, Maryland pa ñondo umo, kabiji bamutelelenga’mba “mwenyi wa ku Austria kabiji mulwanyi.” Byo asapwijilenga na kuchinchika ku bantu bamutebawizhenga, wavulukile byambo bya kwa Paulo biji pa 1 Kolinda 9:16 bya kuba’mba: “Malwa o ami umvwe nabula kusapwila mambo awama!” *

Kununga pa kusapwila na mukoyo, Bafunda Baibolo batwajijile kulomba kafulumende kuba’mba akasulule balongo bo bakashile mu kaleya ku Atlanta. Ba Anna K. Gardner bavuluka’mba: “Kechi twaikeletu ne, twaubangapo bimo. Balongo byo bajinga mu kaleya, mwingilo wetu wajinga wa kukeba ba kufwachika ku makalata a kulomba kafulumende kuba’mba akasulule balongo. Twayanga ku nzubo ku nzubo. Bantu bavula bingi bafwachikileko. Twabuujilenga bantu amba bano banabalume bo bakasa ke bena Kilishitu bakine, kabiji bebakasatu kya nshiji.”

Mu kikye kimye kya makatazho, jibumba ja Lesa janengezhezhe kushonkena bimye byavula pa kuba’mba bakoseshe balongo. Kyamba kya Usopa kyaambile’mba: “Banengezhezhe kushonkena kukila pa 40 . . . mu mwaka umo . . . Masawakya o twatambwila abena kumwesha kuba’mba bantu bataanwa ku kushonkena babena kuvujilakotu. Kala kushonkena konse kwaubiwanga mu bañondo babiji nangwa basatu mu mwaka; bino luno kubena kwikalako pa ñondo pa ñondo.”

Bantu bajinga na michima ya kukeba bukine batwajijile kuswa mambo awama. Pa kushonkena kumo kwajinga mu Cleveland, Ohio, kwataainwe bantu 1,200 kabiji bantu 42 babatizhiwe, kubikapotu ne mwanyike wamulume “wipaine kwi Lesa, kabiji kino kyafwainwa kyalengejile bavula babula lwitabilo bajinga mu jibumba bakoma kumvwa bumvu.”

Mwaka wa 1918 byo anangijilenga ku mpelo, Bafunda Baibolo kechi bayukile bintu byo bikekala kulutwe ne. Bishimikwa bimo byajinga mu Brooklyn bebipoteshe, kabiji ofweshi mukatampe bamuvilwijile ku Pittsburgh, Pennsylvania. Nangwa kya kuba batangijilanga mwingilo wa bantu ba Lesa pa kyokya kimye bakijinga mu kaleya, kwajinga lunengezho lwa kupwila kwa pa mwaka kwa bajinga mu bipamo pa 4 January, 1919. Pano ñanyi kintu kyamwekele?

Balongo batwajijile kwingila na mukoyo. Bashiinwe kuba’mba mu byo baubilenga mukafuma byawama kya kuba basajile kinembelo kya mwaka wa 1919 kya kuba’mba: “Kafwako kyela nangwa kimo kyo bakabunda kya kukulwishako obewa kikengila bulongo ne.” (Isa. 54:17, King James Version) Bintu byatendekele kupimpulwa byakoseshe bingi lwitabilo lwabo ne kwinengezha kwingila mingilo yanema yaishilenga.