1, 2. (a) Ñanyi mwingilo Yesu ye atelepo bingi muchima, kabiji mambo ka? (b) Twafwainwa kuba byepi pa kuba’mba twingilenga mwingilo wetu bulongo byo tuji “ba mwingilo umo ne Lesa”?

YESU KILISHITU wajinga kalipentala kabiji wajinga wa mwingilo wa Lesa. (Mako 6:3; Loma 15:8) Wiiyukile bingi bulongo ino mingilo yonse ibiji. Byo ajinga kalipentala, wafunjile bya kwingijisha bingijisho pa kulenga bintu kwingijisha bichi. Kabiji byo ajinga mufunjishi wa mambo awama, waingijishanga bulongo Binembelo kukwasha bantu kumvwisha bukine bwa Mambo a Lesa. (Mat. 7:28; Luka 24:32, 45) Byo afikizhe myaka ya kusemwa 30, walekele mwingilo wa bukalipentala mambo wayukile’mba kwikala wa mwingilo wa Lesa ye wajinga mwingilo wanema bingi. Waambile’mba mwingilo wa kushimuna mambo awama a Bufumu bwa Lesa ye mwingilo umo Lesa ye amutumijile pano pa ntanda. (Mat. 20:28; Luka 3:23; 4:43) Yesu watele bingi muchima pa mwingilo wa kusapwila, kabiji wakebelenga ne bakwabo kwiya na kwingijila pamo ne aye uno mwingilo.—Mat. 9:35-38.

² Kampe kechi twi bakalipentala ne, bino twi ba mwingilo wa kusapwila mambo awama. Uno mwingilo wanema bingi kya kuba ne Lesa mwine wingilako; tutelwa’mba “ba mwingilo umo ne Lesa.” (1 Ko. 3:9; 2 Ko. 6:4) Tuswa kuba’mba “Kishina kya byambo [bya Yehoba] bo bukine.” (Sala. 119:159, 160) O ene mambo o twafwainwa kushiinwa kuba’mba ‘tufunjisha ne kulumbulula bulongo mambo a bukine.’ (Tangai 2 Timoti 2:15.) Na mambo a kino, twafwainwa kutwajijila kuwamishako  busendwe bwetu bwa kwingijisha Baibolo, mambo kyo kingijisho kikatampe kyo twingijisha pa kufunjisha bantu bukine pe Yehoba, ne Yesu ne pa Bufumu. Pa kuba’mba twingilenga bulongo mwingilo wetu, jibumba ja Yehoba jitunengezhezhe bingijisho byo twafwainwa kufunda bya kwibingijisha bulongo. Twibitela’mba Bingijisho byo Twingijisha pa Kufunjisha Bantu Bukine.

3. Twafwainwa kuta muchima pa kuba ka mu kino kimye kyashalako kya kusapwila, kabiji kinembelo kya Byubilo 13:48 kitukwasha byepi kuba bino?

³ Mwakonsha kwiipuzha ene mambo bino bingijisho o bitelelwa’mba Bingijisho byo Twingijisha pa Kufunjisha Bantu Bukine. “Kusapwila” kulumbulula kushimuna byambo; pakuba “kufunjisha” kulumbulula kukwasha muntu kukwatakanya byambo ne kwibilama mu muchima wanji pa kuba’mba ebingijishenga mu bwikalo bwanji. Kino kimye kyo twashala nakyo kya kusapwila, twafwainwa kuta muchima pa kutendeka kufunjisha bantu Baibolo ne kwibafunjisha bukine. Kino kibena kulumbulula’mba twafwainwa kwibikako kukeba bantu baji “na michima ya bukishinka ya kukeba bumi bwa myaka ne myaka.”—Tangai Byubilo 13:44-48.

4. Twakonsha kuyuka byepi bantu baji “na michima ya bukishinka ya kukeba bumi bwa myaka ne myaka,” kabiji twakonsha kwibataana byepi?

⁴ Twakonsha kuyuka byepi bantu baji “na michima ya bukishinka ya kukeba bumi bwa myaka ne myaka”? Byonkatu byo kyajinga mu moba a batumwa, kusapwila jo jishinda jimo jo tukebelamo bantu baji na michima ya kishinka. Onkao mambo, twafwainwa kulondela mukambizho wa kwa Yesu wa kuba’mba: “Mu muzhi yense mukatampe ne mucheche ye mukatwelamo, mukakebemo muntu wafwainwa.” (Mat. 10:11) Kechi twakonsha kuketekela bantu babula michima ya bukishinka, betota nangwa babula kukeba Lesa kuswa mambo awama ne. Tukeba bantu baji na michima ya bukishinka, bepelula kabiji baji na nzala ya kukeba bukine. Twakonsha kwesakanya uno mwingilo wa kukeba bantu ku mwingilo waingilanga Yesu wa bukalipentala. Wafwainwa wakebanga bichi byawama bya kulengela bipona, binzhilo, bikonkoji nangwa bintutu bikwabo. Inge wataana kichi kyafwainwa, watolanga bingijisho byanji ne kwingijisha busendwe bwanji kulenga byo akeba. Ne atweba byo byo twafwainwa kubanga pa kuba’mba tufunjishe bantu kwikala ke baana ba bwanga.—Mat. 28:19, 20.

5. Ñanyi kintu kyo twafwainwa kuyuka pa bintu byo twingijisha pa kufunjisha? Lumbululai. (Monai bipikichala bitanshi.)

⁵ Byonkatu biji bingijisho bya sendwe byonse, ne atweba kingijisho kyetu kyonse kingila mwingilo wakyo. Akilangulukai pe Yesu byo aingijishanga bingijisho bya bukalipentala. * Wajinga na bingijisho nabiji kya kupiminako, kya kuchibilako, kya kupokwelako, kya kusongelako, kya kwesakenyako ne bya kukashilako pamo bipimvwa bya mapulanga. Ne atweba twingijisha bingijisho byapusana pusana mu mingilo. Onkao mambo, twayai twisambe pa bingijisho byapusana pusana byo betupa ne kufunda bya kwibingijisha.

6, 7. (a) Mwingijisha byepi tubikachi? (b) Tupepala twa kwichilapo bantu ku kupwila twingila ñanyi mingilo ibiji?

⁶ Tubikachi. Tuno ke tubingijisho twakepa bingi to twakonsha kwingijisha pa kuba’mba bantu betuyuka bulongo ne kwibamwesha keyala wetu wa pa Intaneti. Bakonsha kwingijisha uno keyala kulomba kuba’mba bafundenga Baibolo. Onkao mambo, pa juba pa juba bantu kukila pa 400,000 bengijisha keyala wa jw.org kulomba kwibafunjisha Baibolo. Mwafwainwa kwikalanga na tubikachi pa kuba’mba mupengako bantu kimye kyo mubena kwingila mingilo yenu ya pa juba pa juba.

⁷ Tupepala Twakwichilapo Bantu. Tuno tupepala javula twitutela’mba twa kwichilapo bantu kwiya na kupwila kabiji twingila mbaji ibiji. Kano kapepala kaji na mutwe wa kuba’mba: “Tubena Kwimwita Kwiya na Kufunda Baibolo na Bakamonyi ba kwa Yehoba.” Kepo kabuula ne muntu kusalapo  kana kufunda Baibolo “pa kupwila kwetu kwa mvula bantu” “nangwa kufunda na kamonyi wa Yehoba.” Onkao mambo, kino kingijisho kechi kilumbulwilatu bantu atweba Bakamonyi byo tuji ne, bino kibuula ne bantu “baji na muchima wa kukeba kuyuka Lesa” kulomba kuba’mba twibafunjishenga Baibolo. (Mat. 5:3) Kabiji bantu bonse bakasuluka kwiya na kupwila, nangwa baswa bafunda Baibolo nangwa ne. Inge baiya na kupwila, bakamona ne kumvwa byo tufunjisha bukine bwa mu Baibolo.

8. Mambo ka o kyanemena kwita bantu kwiya na kupwila nangwa jimotu? Shimikizhaipo kyamwekele.

⁸ Kyanema bingi kutwajijila kwita bantu ku kupwila kwetu. Mambo ka? Bakamona lupusano lukatampe pa bintu byo tufunda mu Mambo a Lesa ne kipowe kya nzala ya ku mupashi kiji mu Babilona Mukatampe. (Isa. 65:13) Bamulume ne mukazhi abo Ray ne ba Linda ba ku United States bemwenejile kino myaka ya kunyuma kwe. Bafuukwilepo kuba’mba bayengapo mu chechi imo. Baitabijile mwi Lesa kabiji bajinga na kilaka kya kukeba kuyuka Lesa. Onkao mambo, batatwile kuya mu machechi apusana pusana ajinga mu muzhi mukatampe mo baikalanga. Mwajinga machechi avula bingi ne bupopweshi bwapusana pusana. Kufumatu kimye kyo batatwile kuya ku machechi, bano ba mulume ne mukazhi bebikijile bintu bibiji byo bafwainwe kutaana mu chechi. Kitanshi, bakebanga kufundapo kintu kimo kimye kya kupwila, kya bubiji, bantu ba mu chechi byubilo byabo byafwainwa kumwesha’mba bapopwela Lesa. Byo papichile myaka, bayile mu machechi onse aji mu uno muzhi, bino bapulwijilemotu mabula. Kafwako kyo bafunjilepo nangwa kimo ne, kabiji bantu bavula baya mu machechi kechi bamweka’mba bengijila Lesa ne. Byo bafumine mu chechi wapeleleko kuyamo pa mutanchi ye balengele, ba Linda bayile ku nkito, kabiji ba Ray babwelele ku nzubo. Ba Ray byo babwelelenga ku nzubo, bamwene Nzubo ya Bufumu kabiji baambile mu muchima amba, ‘Nkitwelemo mmone byo bapwila nabo.’ Bintu byo bamwene bibasangajikile bingi. Bonse pa Nzubo ya Bufumu bajinga bingi na lusekelo, bakasulukile kabiji bavwajile bivwalo bya mushingi. Ba Ray baikejile ku bipona bya kulutwe kabiji batemenwe bingi bintu byo bafunjile. Kyajingatu byonka byaambile mutumwa Paulo pa muntu wiya na kupwila na bena Kilishitu kimye kitanshi ne kwamba’mba: “Lesa kine muji nanji.” (1 Ko. 14:23-25) Kufumatu juba jitanshi jo bataainwe ku kupwila, batwajijile kwiya na kupwila pa Mulungu, ne kupwila kwa mukachi ka mulungu konse. Ba Linda nabo batendekele kupwila, kabiji nangwa kya kuba bajinga na myaka ya mu ma 70, baswile kufunda Baibolo ne kubatizhiwa.

9, 10. (a) Mambo ka matalakiti o apelela kwingijisha? (b) Lumbululai byo twafwainwa kwingijisha talakiti wa kuba’mba Bufumu bwa Lesa bo bu Ka?

⁹ Matalakiti. Tuji na matalakiti atanu na asatu apeela bingi kwingijisha pa kutendeka mwisambo. Kufumatu kimye kyo alupwilwe mu 2013, matalakiti 5 bilyonyi apulintwa. Buwame bwa ano matalakiti ke bwa kuba’mba inge mwafundatu bya kwingijishapo talakiti umo, ko kuba’mba mwayuka ne bya kwingijisha onse, mambo beanembatu kimo. Mwakonsha kwingijisha byepi talakiti kutendekelamo mwisambo na muntu?

¹⁰ Twambe’mba mwafuukulapo kwingijisha talakiti wa kuba’mba Bufumu bwa Lesa bo bu Ka? Mweshai muntu bwipuzho buji peulu ne kwipuzha’mba: “Mulanguluka’mba Bufumu bwa Lesa bo bu ka? Nanchi mwakonsha kukumbula’mba . . . ” Apa bino mwamwambila kusalapo pa mikumbu isatu iji panshi. Kwa kubula kumubuula’mba wasalapo mukumbu wa kine nangwa kechi wa kine ne, zhikulai mukachi ne kuya panembwa’mba “Baibolo Waamba’mba,” ne kwisamba nanji binembelo byo babikamo, Danyela 2:44 ne Isaya 9:6. Inge kyakonsheka, mwakonsha kutwajijila na mwisambo. Pa kupwisha, ipuzhai bwipuzho bo mukatendekelapo mwisambo pa kubwelako buji po banemba’mba “Kyo Mwakonsha Kulangulukangapo”: “Tukekalanga byepi kimye kikalamanga  Bufumu bwa Lesa?” Buno bo bwipuzho bo mukatendekelapo mwisambo kimye kikwabo. Inge mwabwelako, mwakonsha kuya pa lufunjisho 7 mu buloshuwa wa kuba’mba Mambo Awama Afuma kwi Lesa!, kabiji uno buloshuwa ke kingijisho kimo kyo tutendekelamo kufunjisha bantu Baibolo.

11. Magazini engila ñanyi mwingilo, bino ñanyi kintu kyo twafwainwa kuyuka pa magazini?

¹¹ Magazini. Kyamba kya Usopa ne Labainga! o magazini asampanyiwa ne kutuntululwa mu milaka yavula bingi ntanda yonse. Na mambo a kuba’mba anembelwa bantu ba mu byalo byapusana pusana, mutaanwa mitwe ikwasha bantu konse konse. Twafwainwa kwiengijishanga pa kuba’mba tulengelenga bantu kwikala na kilaka kya kukeba kufunda bintu byanema bingi mu bwikalo lelo jino. Pano bino, pa kuba’mba tupanenga ano magazini ku bantu bakonsha kwiatanga, twafwainwa kuyuka bantu bo banembela yewo magazini.

12. (a) Labainga! bamunembela bañanyi, kabiji mambo ka o anembelwa? (b) Ñanyi bintu byawama byo mwamwenamo mu kwingijisha kino kingijisho?

¹² Labainga! bamunembela bantu bayukakotu bicheche pa Baibolo ne babula kuyuka Baibolo, bantu bayukako mafunjisho amo a bwina Kilishitu, bino bazhinauka bupopweshi, nangwa babula kuyuka buneme bwa mafunde a mu Baibolo. Ene mambo Labainga! o bamunembela ke kukwasha bantu kuyuka’mba Lesa koaji. (Loma 1:20; Hebe. 11:6) Kabiji Labainga! ukwasha ne bantu kwitabila kuba’mba Baibolo “kine mambo a Lesa.” (1 Tesa. 2:13) Mitwe ya pa nkupiko ya magazini asatu a Labainga! wa mu 2018 ke ya kuba’mba: “Byakonsha Kwimuletela Lusekelo,” “Bintu 12 Bilengela Kisemi Kwikala Bulongo” ne “Byakonsha Kukwasha Bantu Baji na Bulanda.”

13. (a) Bañanyi bo banengezhezha Kyamba kya Usopa kya bena kengi? (b) Ñanyi bintu byawama byo mwamwenamo mu kwingijisha kino kingijisho?

¹³ Kyamba kya Usopa kya bena kengi, kikwasha bantu banemeka Lesa ne Mambo anji. Bano bantu bakonsha kuyuka mafunjisho amo a mu Baibolo, bino kechi baumvwisha bukine bujimo ne. (Loma 10:2; 1 Timo. 2:3, 4) Mitwe ya pa nkupiko ya magazini asatu a Kyamba kya Usopa kya mu 2018 yakumbula mepuzho a kuba’mba: “Nanchi Baibolo ne ano Moba Wingila Nyi?,” “Bintu Bikekala Byepi Kulutwe na Lwendo?,” ne “Ñanyi Ulengela Bantu Kuyanda?”

14. (a) Mavidyo engila byepi mu mwingilo? (b) Ñanyi bintu byawama byo mwamwenamo mu kwingijisha ano mavidyo?

¹⁴ Mavidyo. Yesu byo ajinga pano pa ntanda, bakalipentala baingijishangatu bingijisho bya kukwata na maboko pa kulenga bintu. Ano moba, bakalipentala bengijisha bingijisho bya malaichi, nabiji baso, bya kusabilako bichi, bya kulambishishako mapulanga, bya kupopelako misumali ne bikwabotu. Kununga pa kupulinta mabuku, luno tuji na mavidyo ana awama bingi o tutambisha bantu mu mwingilo. Ano mavidyo ke: Mambo ka a Kufunjila Baibolo?, Kikala Byepi pa Kufunda Baibolo?, Ñanyi Bintu Byubiwa pa Nzubo ya Bufumu?, ne wa Kizungu wa kuba’mba Jehovah’s Witnesses—Who Are We? Ano mavidyo kechi abaya kukila pa maminiti abiji ne, kabiji awama kwingijisha mu mwingilo pa kutendeka mwisambo kimye kitanshi. Mavidyo alepa mwakonsha kwiengijisha pa kubwelako ku bantu ne ku boba baji na kimye kyabaya. Bino bingijisho byakonsha kutundaika bantu kukeba kufunda Baibolo ne kutanwa ku kupwila.

15. Lumbululai bintu byawama bifuma mu kutambisha bantu mavidyo etu mu milaka yabo.

¹⁵ Nyenga umo byo asambakene mwanamukazhi wafumine ku Micronesia waambanga mulaka wa Yapese, wamutambishe vidyo mu mulaka wanji wa kuba’mba, Mambo ka a Kufunjila Baibolo? Byo atendekele kutamba vidyo, uno mwanamukazhi waambile’mba: “Nakumya bingi! Nayukilatu ku ñambilo yanji amba wafuma ku jikuji ko nafuma. Ubena kwamba mulaka wami.” Byo apwishishe kutamba uno vidyo, waambile’mba ukatanga ne kutamba byonse biji pa keyala wa jw.org mu mulaka  wanji. (Esakanyaiko Byubilo 2:8, 11.) Twayai twisambe pa kikwabo kyamwekele. Nyenga wa ku United States watumijile mwana wa mulume wa bakolojabo babalume waikalanga ku kyalo kingi vidyo ituntu imo mu mulaka wanji. Wiitambile kabiji uno mwana watumijile uno nyenga ne kumubuula’mba: “Lubaji lwa kuba’mba mubi ye ubena kulama ino ntanda lwamfikile bingi pa muchima. Kabiji nafuukulapo kulomba muntu wa kufunjisha Baibolo.” Uno mwana wikala mu kyalo mo bakanya mwingilo wetu.

16. Lumbululai ano mabuloshuwa byo engila: (a) Umvwainga Byamba Lesa Mukekale Myaka. (b) Mambo Awama Afuma kwi Lesa! (c) Bañanyi Babena Kuba Kyaswa Muchima wa Yehoba Lelo Jino?

¹⁶ Mabuloshuwa. Mwakonsha kufunjisha byepi bukine muntu waluba kutanga, nangwa wabula mabuku mu mulaka wanji? Twakonsha kwingijisha buloshuwa wa kuba’mba Umvwainga Byamba Lesa Mukekale Myaka. * Kabiji buloshuwa wa kuba’mba Mambo Awama Afuma kwi Lesa! ke kingijisho kyawama bingi kyo twakonsha kwingijisha pa kutendeka kufunda na bantu Baibolo. Mwakonsha kumwesha muntu mitwe 14 yo batanchika kunyuma ya uno buloshuwa ne kumubuula kusalapo ye atemwa. Apa bino mwatendeka kufunda nanji pa yenka mutwe ye asala. Nanchi mwakingijishapo jino jishinda nyi? Buloshuwa wa kuba’mba Bañanyi Babena Kuba Kyaswa Muchima wa Yehoba Lelo Jino? ke kingijisho kya busatu kyo twakonsha kwingijisha mu mwingilo. Bamunengezhezha kukwasha bantu bo tufunjisha Baibolo kuyuka biji jibumba ja Lesa. Pa kuba’mba muyuke bya kumwingijisha kimye kyo mubena kufunjisha muntu Baibolo, monai Mutanchi wa Kupwila kwa Bwikalo ne Mwingilo Wetu wa Bwina Kilishitu wa March 2017.

17. (a) Ñanyi mwingilo wingila mabuku o tufunjishamo bantu? (b) Ñanyi kintu kyafwainwa kuba bonse babatizhiwa, kabiji mambo ka?

¹⁷ Mabuku. Inge mwatendeka kufunjisha muntu Baibolo mu buloshuwa, mwakonsha kumona kimye kyo mwafwainwa kuleka ne kutendeka kumufunjisha mu buku wa Nanchi Baibolo Waamba’mba Ka?. Uno buku ukakwasha muntu kuyuka mafunjisho atanshi a mu Baibolo. Umvwe muntu wapwisha uno buku kabiji ubena kupimpula byubilo byanji, mwakonsha kutwajijila kumufunjisha mu buku wa kuba’mba Byo Twafwainwa Kwikala mu Butemwe bwa Lesa. Uno buku ukakwasha muntu kuyuka bya kwingijisha mafunde a mu Baibolo mu bwikalo bwanji. Yukai’mba, nangwatu muntu wabatizhiwa, wafwainwa kutwajijila kufunda ano mabuku abiji ne kwiapwisha. Kino kikebakwasha kwikala bashikimana mu bukine.—Tangai Kolose 2:6, 7.

18. (a) Kinembelo kya 1 Timoti 4:16, kitutundaika byepi byo tuji bafunjishi ba bukine, kabiji ñanyi bintu bifumamo? (b) Ñanyi kikonkwanyi kyo twafwainwa kwibikila pa kwingijisha Bingijisho byo Twingijisha pa Kufunjisha Bantu Bukine?

¹⁸ Byo tuji Bakamonyi ba kwa Yehoba, tuji na “byambo bya bukine bya mambo awama” byakonsha kulengela bantu kukekala na bumi bwa myaka ne myaka. (Kolo. 1:5; tangai 1 Timoti 4:16.) Pa kuba’mba twingilenga bulongo mwingilo wetu, Lesa witupa bingijisho bya kwingijisha mu mwingilo. (Monai ka kitenguluzha ka kuba’mba “ Bingijisho byo Twingijisha pa Kufunjisha Bantu Bukine.”) Twayai twingijishenga bino bingijisho mu mwingilo. Musapwishi yense wakonsha kusalapo buku ye akonsha kupa muntu pa kutendeka kufunda Baibolo ne kimye kya kuba bino. Pano bino, mwingilo wetu kechi wa kupanatu mabuku, nangwa kupa bantu babula kukeba kufunda bukine ne. Mwingilo wetu ke wa kufunjisha bantu ba kishinka, bepelula, baji na nzala ya kufunda bukine kabiji baji na “michima ya bukishinka ya kukeba bumi bwa myaka ne myaka” kwikala baana ba bwanga.—Byu. 13:48; Mat. 28:19, 20.