1, 2. (a) Kupimpulwa kwa bintu kwa kubula kuketekala kwakonsha kulengela bwikalo bwa mwina Kilishitu kwikala byepi? (Monai kipikichala kitanshi.) (b) Byonka byaamba Salamo 131, ñanyi kintu kyakonsha kwitukwasha kutwajijila kwikala na mu mutende wa mu milanguluko?

KIMYE ba Lloyd ne ba Alexandra kyo bebabuujile’mba basakufuma pa Betele, baumvwine bulanda. Baingijile pa Betele pa myaka kukila pa 25. Ba Lloyd baambile’mba: “Kwingijila pa Betele bo bwajinga bwikalo bwami. Nanemekele luno lupimpu, pano bino, mu milungu ne bañondo balondejilepo naumvwinengatu nobe muntu wabula kunema. Kyankatezhe bingi mu milanguluko. Bimye bimo naikalanga na lusekelo kabiji bimye bikwabo na bulanda.”

² Umvwe bintu mu bwikalo byapimpulwa kwa kubula kuketekala, byakonsha kwitulengela kwikala na bijikila ne kupopomenwa mu bwikalo. (Maana 12:25) Kabiji kyakonsha kukatazha kuswa luno lupimpu. Umvwe kyaikala bino, twakonsha kuba byepi pa kuba’mba ‘tutekanye ne kuzhindamika’ muchima wetu? (Tangai Salamo 131:1-3.) Twayai tufunde pa bakalume ba Yehoba banembwa mu Baibolo ne ba mu ano  moba batwajijile kwikala na mutende wa mu milanguluko nangwa kya kuba bintu bibena kwaluka mu bwikalo.

3. Bwikalo bwa kwa Yosefwa bwapimpwilwe byepi?

³ Yosefwa wajinga na myaka 17 kimye bakolojanji babalume kyo bamupoteshe mu buzha na mambo a kichima. Pa baana bonse bajinga ne Yakoba, Yosefwa ye mwana ye atemenwe bingi. (Nte. 37:2-4, 23-28) Pa myaka nobe 13, Yosefwa wamanamine bingi mu Ijipita, patanshi wajinga muzha, kabiji mu kuya kwa kimye bamukashile. Bashanji bamutemenwe nabo bashajile kwalepa. Ñanyi kintu kyamukwashishe kutwajijila kuchinchika luno lumanamo?

4. (a) Kimye Yosefwa kyo ajinga mu kaleya, ñanyi kintu kyo atelepo muchima? (b) Yehoba wakumbwile byepi milombelo ya kwa Yosefwa?

⁴ Nangwa kya kuba Yosefwa wamanaminenga mu kaleya, bino watele muchima pe Yehoba byo amukwashishenga. (Nte. 39:21; Sala. 105:17-19) Kampe Yosefwa walangulukilenga pa kiloto kya bungauzhi kyo alotele saka akiji mwanyike kabiji kino kyafwainwa kyamulengejile kuketekela’mba Yehoba wajinga nanji. (Nte. 37:5-11) Wafwainwa walombanga kwi Yehoba kimye kyonse ne kumubuula byonse byajinga ku muchima wanji. (Sala. 145:18) Yehoba wakumbwile milombelo ya kwa Yosefwa, kino kyamulengejile kushiinwa’mba “Lesa wajinga nanji” kimye kyo apichilenga mu meseko.—Byu. 7:9, 10. *

5. “Mutende wa Lesa” wakonsha kwitukwasha byepi kifikizha bikonkwanyi byetu mu mwingilo wa Lesa?

⁵ Nangwa kya kuba tubena kupita mu makatazho lelo jino, ne atweba twakonsha kwikala na “mutende wa Lesa,” kabiji uno mutende ukalama milanguluko yetu. (Tangai Filipai 4:6, 7.) Onkao mambo, inge twalomba kwi Yehoba kimye kyo tuji na bijikila, mutende wa Lesa uketukwasha kufikizha bikonkwanyi byetu mu mwingilo wa Lesa ne kubula kubwela panyuma. Twayai twisambe pa balongo ne banyenga ba mu ano moba batwajijila kwingijila Lesa.

6, 7. Milombelo ya kushinkamika yakonsha kwitukwasha byepi kwikala na mutende wa mu muchima? Shimikizhai kyamwekele.

⁶ Ba Ryan ne ba Juliette byo bebabuujile’mba mwingilo wabo wa bupainiya bwiikajila bwa kimye kicheche usakupwa, baumvwine bingi kutama. Ba Ryan baambile’mba: “Twalombele kwi Yehoba. Twayukile kuba’mba twafwainwa kumwesha byo twaketekela mwi aye. Bavula mu kipwilo kechi babanjile mu bukine ne, onkao mambo, twalombele kwi Yehoba kuba’mba etukwashe kutwajijila kwikala na lwitabilo lwakosa pa kuba’mba bavula mu kipwilo bafunjileko.”

⁷ Yehoba wakumbwile byepi lulombelo lwabo? Ba Ryan baambile’mba: “Byo twalombeletu twalekele kwakamwa ne bijikila byapwile. Mutende wa Lesa walaminenga michima ne milanguluko yetu. Twayukile’mba Yehoba ukatwajijila kwitwingijisha umvwe twatwajijila kwingila na lusekelo.”

8-10. (a) Mupashi wa Lesa wakonsha kwitukwasha byepi kuchinchika makatazho? (b) Yehoba wakonsha kwitukwasha byepi inge twata muchima pa kumwingijila?

⁸ Mupashi wa Lesa wakonsha kwitukwasha kubula kubambisha michima, ne kutaana binembelo bya mu Baibolo byakonsha kwitukwasha kuyuka kintu kyanemesha mu bwikalo. (Tangai Yoano 14:26, 27.) Langulukai pa bamukazhi ne mulume ba Philip ne ba Mary, baingijile pa Betele pa myaka 25. Mu bañondo bana, bainabo ba Philip ne bainabo ba Mary bafwile kubikapotu ne mulongo wabo mukwabo. Onkao mambo, batendekele kulama bashabo ba Mary baji na kikola kya ku bongo.

⁹ Ba Philip baambile’mba: “Nalangulukilenga’mba mbena kubatu bulongo, bino kwajinga  byo babujilenga kuba. Nataaine kinembelo kya Kolose 1:11 mu lufunjisho lwa Kyamba kya Usopa. Ibyo kuba’mba nachinchikilenga, pano bino kechi nachinchikilenga kufikapo ne. Nafwainwe ‘kuchinchika saka natekanya mu bintu byonse ne kwikala na lusekelo.’ Kino kyepelo kyavulwilemo amba kwikala na lusekelo mu bwikalo kechi kwaimena pa bintu byo biji ne, bino kwaimena pa bukwasho bwa mupashi wa Lesa.”

¹⁰ Mambo a kuba’mba ba Philip ne ba Mary batwajijile kwingila mwingilo wa Yehoba, Lesa wibapesheshe bingi. Byo bafuminetu pa Betele, bataaine bantu bakebelenga kufunda Baibolo jibiji mu mulungu kabiji bayijilengako palutwe mu kuyuka bukine. Umvwe bavuluka, ba Mary baambile’mba: “Betulengejile kwikala na lusekelo kabiji ke jishinda Yehoba jo etumwesheshemo’mba bintu bikawama.”

11, 12. (a) Yosefwa waubile byepi pa kuba’mba Yehoba amupeshe? (b) Yosefwa bamupesheshe byepi?

¹¹ Umvwe kwaikala lupimpu mu bwikalo bwetu, twakonsha kwikala bingi na bijikila kya kuba twatatu muchima pa lukatazho. Kino kyo kyakonsheshe kumwekela ne Yosefwa. Pano bino, aye wateletu muchima pa kuba byawama, kino kyalengejile Yehoba kumupesha. Nangwa kya kuba wajinga mu kaleya, Yosefwa waingilanga na ngovu nkito yonse yo bamupanga ku mukulumpe wa kaleya, byonka byo aubanga byo ajinga mu nzubo ya kwa Potifwalo.—Nte. 39:21-23.

¹² Juba jimo, Yosefwa bamupele mwingilo wa kulama bakaili babiji baingijilanga mu kipango kya kwa Felo. Na mambo a kuba’mba Yosefwa wawamine bingi muchima, bano banabalume kibapelejile kumubula makatazho abo ne biloto byo balotele bufuku. (Nte. 40:5-8) Yosefwa kechi wayukile’mba mu uno mwisambo mukafuma byawama ne. Byo apwishishemo myaka ibiji mu kaleya, bamukasulwile ne kumupa kifulo kikatampe mu Ijipita, waikele wakibiji kwi Felo.—Nte. 41:1, 14-16, 39-41.

13. Twakonsha kuba byepi pa kuba’mba Yehoba etupeshe inge tubena kupita mu makatazho?

¹³ Byonkatu byo kyajinga kwi Yosefwa, ne atweba twakonsha kwikala na lukatazho lo twabula bulume bwa kwilupwisha. Pano bino, inge twatwajijila kwikala batekanya mu bimye byo uno mutundu ne kubako byo twakonsha kuba, Yehoba uketupesha. (Sala. 37:5) Ibyo kuba’mba, bimye bimo twakonsha kwikala ‘basusubala,’ pano bino byonkatu byaambile mutumwa Paulo, “kechi twashala kwa kubula luketekelo ne.” (2 Ko. 4:8; tubyambo twa munshi.) Bino byambo bya kwa Paulo bikekala bya kine kwi atweba, inge twata muchima pa mwingilo wa kusapwila.

14-16. Musapwishi Filipa watwajijile byepi kuta muchima pa mwingilo wa kusapwila nangwa kya kuba bwikalo bwapimpwilwe?

¹⁴ Aba bata muchima pa mwingilo wa kusapwila nangwa kya kuba babena kupita mu makatazho  bakonsha kufunjilako ku byaubile musapwishi Filipa. Mu Yelusalema bena Kilishitu batendekele kwibamanyika, kabiji kino kyalengejile ne kuba’mba Setepena bamwipaye. * Mu kuya kwa kimye, Filipa bamupele mwingilo mukwabo. (Byu. 6:1-6) Kimye bena Kilishitu kyo bapalañenejilemo, Filipa kechi waikeletu ne. Wayile na kusapwila mu Samaliya, muzhi mo babulanga kusapwila mambo awama pa kyokya kimye.—Mat. 10:5; Byu. 8:1, 5.

¹⁵ Filipa wipaine kuya konse kwamutangijilenga mupashi wa Lesa. Onkao mambo, Yehoba wamwingijishe kuya na kusapwila mu manyaunda mwajinga bantu babujile kumvwapo mambo awama. Bayudea bavula balengululanga bingi bena Samaliya. Pano na mambo a kuba’mba Filipa kechi wajinga na misalululo ne, bena Samaliya bamukasulukijile. O ene mambo mabumba o ‘atelejileko bingi muchima’ ku byaambilenga Filipa.—Byu. 8:6-8.

¹⁶ Kepo Filipa bamutangijile ku mupashi wa Lesa kuya ku Ashadoda ne ku Kesalea, mizhi yabayile bingi mwaikalanga bantu ba mu bisaka bikwabo bavula. (Byu. 8:39, 40) Byo papichile myaka 20 kufuma kimye kitanshi kyo asapwijile mu Samaliya, bwikalo bwa kwa Filipa bwapimpwilwe jikwabo. Na mambo a kuba’mba wajinga na kisemi, waikele mu nyaunda yonka yo asapwilangamo. Nangwa kya kuba bwikalo bwapimpwilwe, Filipa watwajijile kuta muchima pa mwingilo wa kusapwila, kabiji kyafuminemo, Yehoba wamupesheshe bingi aye ne kisemi kyanji.—Byu. 21:8, 9.

17, 18. Kuta muchima pa mwingilo wa kusapwila kwitukwasha byepi kubula kwikala na bijikila inge bwikalo bwapimpulwa?

¹⁷ Bavula baji mu mwingilo wa kimye kyonse bamba’mba kuta muchima pa mwingilo wa kusapwila kwibakwasha kutwajijila kwikala na lusekelo nangwatu inge bwikalo bwapimpulwa. Ba mulume ne mukazhi ba ku South Africa abo ba Osborne ne ba Polite byo bafumine pa Betele, balangulukile’mba kampe bakataana nkito ya kwingila moba acheche mu mulungu ne nzubo mwa kwikala. Pano bino, ba Osborne baambile’mba: “Papichile moba avula bingi pa kuba’mba nkito imweke.” Benakwabo abo ba Polite nabo bavuluka’mba: “Twaikele bañondo basatu kwa kubula kutaana nkito, kabiji kechi twajingapo na mali ne. Bwikalo bwakatezhe.”

¹⁸ Ñanyi kintu kibakwashishe kuchinchika luno lukatazho? Ba Osborne balumbulwile’mba: “Kusapwila pamo na balongo ne banyenga mu kipwilo kwitukwashishe bingi kuta muchima pa mwingilo wa Lesa ne kwikala na lusekelo. Twafuukwilepo kupayankana mu mwingilo wa kusapwila kukila kulanguluka pa makatazho, kabiji kuba bino kwituletejile  lusekelo lukatampe. Twaesekele papelela bulume bwetu kukeba nkito, kabiji mu kuya kwa kimye, nkito yamwekele.”

19-21. (a) Ñanyi kintu kiketukwasha kutwajijila kwikala na mutende wa mu milanguluko? (b) Ñanyi bintu byawama bifumamo mu kukookela inge kwaiya lupimpu?

¹⁹ Byonka byaubile balongo ne banyenga bo twaambapo, inge twata muchima pa mwingilo wa kusapwila ne kupembelela Yehoba kwitukwasha, tukatwajijila kwikala na mutende. (Tangai Mika 7:7.) Inge twafunda mwa kwikela umvwe bwikalo bwapimpulwa, tukakosesha bulunda bwetu ne Yehoba. Pa kwamba pa bintu byo bafunjilako ku byo bapitamo, ba Polite bo twaambapo kala baambile’mba: “Mwingilo wa katataka ye betupa wandengela kuyuka byo kilumbulula kuketekela mwi Yehoba nangwatu inge bintu byamweka kukatazha. Bulunda bwami ne Lesa bwakoselako.”

²⁰ Ba Mary bo twaambapo kala, batwajijila kwingila bupainiya saka babena kulama bashabo bakota. Baambile’mba: “Nafunda kuba’mba inge bijikila byamvujila, nafwainwa kulombapo ne kwikalapo na kimye kya kukookoloka. Kintu kyanema bingi kyo nafunda ke kya kuba’mba nafwainwa kushila byonse mu maboko a Yehoba, kabiji nkatwajijila kuba bino mu bwikalo bwami bonse.”

²¹ Ba Lloyd ne ba Alexandra bo twaambapo ku ntendekelo, baambile’mba kupimpulwa kwa bwikalo bwabo kwibalengejile kukosesha lwitabilo lwabo mu mashinda o babujilenga ne kuketekela. Bino baambile ne kuba’mba: “Meseko o twapichilemo etukwashishe kumona inge tuji na lwitabilo lwakosa lwakonsha kwitukwasha kuchinchika mu bimye byakatazha. Luno twayuka’mba tuji na lwitabilo lwakosa.

22. Ñanyi bintu byawama bikafumamo inge ke tube bintu kwesakana na papela bulume bwetu?

²² Mu buno bwikalo, bintu byakonsha kupimpulwa kwa kubula kuketekela. Bakonsha kwitupa mwingilo wa katataka mu jibumba ja Yehoba, twakonsha kukolwa, nangwa kwikala na mwingilo wa kulama ba mu kisemi kyetu. Umvwe kyaikala bino, mwafwainwa kuketekela mwi Yehoba kuba’mba wimuta muchima kabiji ukemukwasha pa kimye kyafwainwa. (Hebe. 4:16; 1 Pe. 5:6, 7) Bino pa kino kimye, ubaingapo byo mwakonsha kuba kwesakana na papelela bulume bwenu. Fwenyai kwipi na Shenu wa mwiulu kupichila mu lulombelo, kabiji muketekelai na muchima yense. Umvwe kemube bino, ne anweba mukatwajijila kwikala na mutende wa mu milanguluko nangwatu inge bintu byapimpulwa mu bwikalo.