1, 2. Ñanyi kintu kyaleta bingi makatazho ku bantu lelo jino, kabiji ñanyi wajinga mutanshi kuba kino kintu?

MAFONI, myotoka ne mafiliji, ke bintu bimo byalenga bantu byalengela bwikalo bwetu kuwama. Nangwa byonkabyo, bintu bimo byalenga bantu bibena kubika bumi bwa bantu mu kizumba, nabiji mapikwa, tupata, fwanka ne mabomba ashinta, kubala kukooka. Pano bino, kuji kintu kimo kyatendekele kala kyalengela bantu bavula kumanama. Ñanyi kintu kyonkakyo? Bubela. Bubela ke kwamba kintu kyo wayuka’mba kechi kya kine ne, pa kuba’mba ujimbaike muntu mukwabo. Ñanyi wajinga mutanshi kubepa bubela? Yesu Kilishitu walumbulwile’mba “Diabola” ye “shanja bubela.” (Tangai Yoano 8:44.) Ñanyi kimye kyo aambile bubela butanshi?

² Buno bubela wibwambile kala papita ne myaka yavula bingi mu bujimi bwa Edena. Ba mulume ne mukazhi batanshi, Adama ne Evwa, baikelenga bwikalo bwawama mu Paladisa ye bebanengezhejile ku Mulenga wabo. Diabola watendekele kukeba mashinda a kwibesekelamo. Wayukile’mba Lesa wakambizhe bano ba mulume ne mukazhi batanshi kubula kuja ku “kichi kya kuyuka byawama ne byatama” ne kuba’mba inge babula kukookela uno mukambizho bakafwa. Nangwa byonkabyo, kupichila mu muloolo, Satana wabuujile Evwa amba: “Kine kechi mukafwa ne.” Buno bo bwajinga bubela butanshi. Kabiji Satana wanungilepo’mba: “Mambo Lesa wayuka’mba mu juba jo mukajako ku kino  kichi, meso enu akalaba kabiji mukekala nobe Lesa mu kuyuka byawama ne byatama.”—Nte. 2:15-17; 3:1-5.

3. Mambo ka o twakonsha kwambila’mba bubela bwabepele Satana bwatamine bingi, kabiji ñanyi bintu byafumamo?

³ Bubela bwabepele Satana bwatama bingi mambo wayukishetu bulongo kuba’mba umvwe Evwa waja ku kino kipangwa ukafwa. Adama ne Evwa kechi bakookejile Yehoba ne, onkao mambo, bafwile. (Nte. 3:6; 5:5) Na mambo a bundengamambo, “lufu lwakumbene ku bantu bonse.” Kabiji “lufu lwalaminenga nobe mfumu . . . , nangwatu ku boba babujile kulenga mambo byonkatu Adama byo alengele mambo.” (Loma 5:12, 14) Luno bantu kechi babena kwikala bwikalo bwalumbuluka ne bumi bwa myaka ne myaka byonka byakebelenga Lesa ne, bino bekalatu “myaka 70, nangwa 80 inge kya kuba muntu wakosa.” Pano bino, ino myaka “yayulatu na makatazho ne bulanda.” (Sala. 90:10) Ano onse malwa aiyako na mambo a bubela bwabepele Satana.

4. (a) Ñanyi mepuzho o twafwainwa kukumbula? (b) Kwesakana na byaamba Salamo 15:1, 2, bañanyi bakonsha kwikala balunda ne Yehoba?

⁴ Pa kulumbulula byubilo bya kwa Diabola, Yesu waambile’mba: “Kechi watwajijile kwikala mu bukine ne, mambo bukine kechi buji mwi aye ne.” Bukine kechi bujipo mwi Satana ne, watwajijila na “kujimbaika bantu ba pano pa ntanda ponse” na bubela bwanji. (Lum 12:9) Kechi tukeba Diabola kwitujimbaika ne. Twayai twisambe pa ano mepuzho asatu: Satana ubena kujimbaika byepi bantu? Mambo ka bantu o babepela? Kabiji pa kuba’mba tubule konauna bulunda bwetu ne Yehoba byonka byaubile Adama ne Evwa, twakonsha kumwesha byepi kuba’mba ‘twamba bya kine’ kimye kyonse?—Tangai Salamo 15:1, 2.

5. Satana ujimbaika byepi bantu lelo jino?

⁵ Mutumwa Paulo wayukile’mba twafwainwa kujimuka pa kuba’mba “Satana abule kwitujimukila, mambo kechi twaluba bya bujimuku byanji ne.” (2 Ko. 2:11; tubyambo twa munshi.) Twayukishatu bulongo kuba’mba byonse bya pano pa ntanda, kubikapotu ne bupopweshi bwa bubela, bujimbijimbi bwa bamulwila ntanda, ne busulu bwa bujimbijimbi, byonse biji mu bulume bwa kwa Diabola. (1 Yoa. 5:19) Kechi tukumya pa kuyuka’mba Satana ne bandemona banji baji na bulume bwakonsha kulengela bantu baji pa bifulo bikatampe ‘kwamba bya bubela’ ne. (1 Timo. 4:1, 2) Abino byo byuba bantu baji na busulu bukatampe batundaika bantu kupota bintu byakonsha kubika bumi bwa bantu mu kizumba ne kujimbaika bantu kupichila mu kwingijisha bujimbijimbi pa kutentemesha bipe byabo.

6, 7. (a) Mambo ka bantangi ba bupopweshi bwa bubela o bazhachilwa na mambo? (b) Ñanyi byambo bya bubela byamba bantangi ba bupopweshi?

⁶ Bantangi ba bupopweshi bwa bubela bazhatwa mambo babena kubika mu kizumba bumi bwa bantu baitabila mu bintu byo bafunjisha. Inge muntu waswa mafunjisho a bubela ne kuba bintu byakanya Lesa, kyakonsha kumulengela kubula kukekala na bumi bwa myaka ne myaka. (Ho. 4:9) Yesu wayukile’mba bantangi ba bupopweshi bajingako mu moba o ajinga pano pa ntanda bazhachilwe mambo a byubilo byabo bya bujimbijimbi. Wibambijile kipasu amba: “Malwa enu anweba banembeshi ne Bafaliseo, bakamfutumfutu! mambo mulalankanya kalunga ka mema ne ntanda na kukeba muntu amba mumwalule ke Muyudea, kabiji umvwe waaluka, mumulengela kuya mu Ngehena [lonaiko lwa myaka ne myaka] bimye bibiji kukila anweba.” (Mat. 23:15; tubyambo twa munshi.) Yesu wibazhachishe bano bantangi ba bupopweshi bwa bubela. Kya kine, bafumine kwi ‘shabo Diabola, mbanzhi.’—Yoa. 8:44.

⁷ Bantangi ba bupopweshi bwa bubela basampukila ne pa katele lelo jino. Betela’mba bapashita, balabi, bafunjishi ne mazhinatu akwabo. Byonkatu byajinga Bafaliseo, bantangi ba bupopweshi lelo jino, “boba bintu byatama kuba’mba bakanye bantu kuyuka bukine” buji mu Mambo a Lesa kabiji babena ‘kupimpula bukine bwa Lesa  na bubela.’ (Loma 1:18, 25) Batundaika mafunjisho a bubela nabiji a kuba’mba “umvwe mwaitabila nkambo, kyapwa mwapuluka,” mweo wa muntu kechi ufwa ne, muntu inge wafwa usemekelwa mu kilengwa kikwabo, ne lufunjisho lwa kukosama lwa kuba’mba Lesa uswisha bantu kwisongola banabalume bonka bonka nangwa banabakazhi bonka bonka.

8. Ñanyi byambo bya bubela byo tubena kutengela bikamba bantangi ba bumulwila ntanda katataka, bino twafwainwa kuba byepi?

⁸ Bamulwila ntanda bengijisha bubela kutwala bantu mungi. Bubela bukatampe bo bakabepa kulutwe ke bwa kuba’mba bakabijika’mba baleta “mutende ne luzhikijilo!” Bino “ponkapotu lonaiko lukebasolomokela.” Kechi twafwainwa kujimbaikwa na byambo byabo bya mulambisha bya kuba’mba bintu bijitu bulongo pano pa ntanda ne. Kishinka ke kya kuba’mba ‘twayukishatu’mba juba ja Yehoba jikeya nobe ngivi bufuku.’—1 Tesa. 5:1-4.

9, 10. (a) Mambo ka bantu o babepela, kabiji ñanyi bintu bifumamo? (b) Twafwainwa kuvulukanga ka pe Yehoba?

⁹ Inge kintu kyo balenga katataka bantu bavula bekitemwa, kikumbana mu mapunzha avula. Byo biji ne bubela. Kusampanya bubela kwauba ne woo mu ntanda lelo jino, kabiji bantu baji pa bifulo bikatampe kechi bo bonkatu bajimbaika bakwabo ne. Kibaaba kyanembele ba Y. Bhattacharjee kya kuba’mba “Ene Mambo o Tubepela” kyaambile’mba: “Kwamba bubela ano moba kwaalukatu nobe kisela.” Bantu bamba bubela pa kuba’mba bezhikijile nangwa kukeba kuba’mba batumbalale. Bamba bubela kuba’mba bafye mambo o balenga nangwa kuba’mba banonke ne kumwenamo. Byonka byaamba kibaaba kyanembele ba Bhattacharjee, kuji bantu “bayuka bingi kubepa, bamba bubela mu bintu bicheche ne bikatampe, ku benyi, ku bo bengila nabo pa nkito, ku balunda nabo, ne ba mu kisemi kyabo.”

¹⁰ Ñanyi bintu bifumamo mu kwamba bubela? Bantu bakonsha kuleka kwituketekela ne bulunda na bakwetu bwakonsha kupwa. Akifwanyikizhai byo kikola ku muchima inge mwanamukazhi wasongolwa walaala na mwanamulume mukwabo ne kwamba bubela pa kuba’mba afye mambo o alenga. Nangwa mwanamulume wakanama uyanjisha nangwa kwambila mwinakwanji ne baana byatama inge baji kwa bunke bwabo, bino pa meso a bantu wibepekezha kwikala mutwe wa kisemi wawama. Nangwa byonkabyo, bano bantu ba bujimbijimbi kechi bakonsha kufyama kwi Yehoba ne, mambo “bintu byonse bijitu patoka kabiji byasololwa” kwi aye.—Hebe. 4:13.

11. Twakonsha kufunjilako ka ku kyamwekejile Ananyasa ne Safila? (Monai kipikichala kitanshi.)

¹¹ Akilangulukai pa kino: Baibolo witubuula’mba ‘Satana walengejile’ ba mulume ne mukazhi bena Kilishitu mu moba a batumwa kubepa kwi Lesa. Ananyasa ne Safila balangulukile mu michima yabo kubepa batumwa. Bapoteshe kintu kyo banonkele bino bafilepo mali amo, baletelekotu acheche ku batumwa. Abano ba mulume ne mukazhi bakebelenga kipwilo kwibamona’mba bauba bulongo, uba nobe bampanyi nanchi kechi byo byo bajinga ne. Bino Yehoba wamwene byo baubile kabiji wibakambwile.—Byu. 5:1-10.

12. Ki ka kikebamwekela bantu bonse bamba bubela babula kulapila, kabiji mambo ka?

¹² Yehoba umvwa byepi inge muntu wabepa? Satana ne bantu ba bubela babula kulapila bakebataya “mu kizhiba kya mujilo.” (Lum. 20:10; 21:8; Sala. 5:6) Mambo ka? Mambo Yehoba wibamona bonse bamba bya bubela amba bajitu pamo na bantu “boba bintu bya bunya ku meso a Lesa.”—Lum. 22:15, tubyambo twa munshi.

13. Ñanyi bintu byo twayuka pe Yehoba, kabiji kino kitutundaika kuba ka?

¹³ Twayuka’mba Yehoba “kechi uji nobe muntu wamba bubela ne.” Kabiji ke Lesa ‘ubula kubepa.’ (Bala. 23:19; Hebe. 6:18) “Yehoba . . . washikwa . . . lujimi wamba bya bubela.” (Maana 6:16, 17) Inge tukeba’mba Lesa etutemwe, twafwainwa kulondelanga mafunde anji aamba pa kwikala ba kishinka.  O ene mambo o tubujila ‘kwibepa atwe bene na bene ne.’—Kolo. 3:9.

14. (a) Tumwesha byepi amba twapusanako na bantu ba mu bupopweshi bwa bubela? (b) Lumbululai jifunde jiji pa Luka 6:45.

¹⁴ Bena Kilishitu ba kine bapusanako byepi na bantu baji mu bupopweshi bwa bubela? ‘Twamba bya kine’ (Tangai Zekaliya 8:16, 17.) Paulo walumbulwile’mba: “Twilumbulula kuba’mba twi ba mingilo ba Lesa, kupichila mu . . . kwamba bya kine.” (2 Ko. 6:4, 7) Yesu waambile pa muntu amba: “Kanwa kamba monka mwavujila biji mu muchima wanji.” (Luka 6:45) Inge muntu wayuzha mu muchima wanji byambo bya kine, byambo bya kine byo bikafumanga mu kanwa kanji. Ukambanga bya kine, mu bintu bicheche nangwa bikatampe, ku benyi, bakwabo mo bengijila nkito, balunda nanji, ne ku ba mu kisemi kyanji. Monai mashinda amo mo twakonsha kumweshesha’mba twibikako kwikala ba kishinka mu bintu byonse.

15. (a) Kyatamina ka kwikala bwikalo bwa bukakongolo mutoma kubiji? (b) Ñanyi kintu kyakonsha kukwasha banyike kuchinuzhuka kwikala na byubilo byatama bijipo na bakwabo? (Monai tubyambo twa munshi.)

¹⁵ Kampe mwi banyike kabiji mukeba kuba bintu byuba bakwenu. Mwafwainwa kumona kuba’mba kechi mubena kwikala bwikalo bwa bu kakongolo mutoma kubiji byonka bikala bakwenu ne. Bamweka nobe baji na byubilo byawama mu kisemi kyabo ne mu kipwilo bino bamwesha byubilo byapusanako inge baji na bakwabo ba ku ntanda nangwa inge babena kwingijisha makeyala a pa intaneti pa kwisamba na bantu. Kampe bengijisha ñambilo yatama, bavwala bivwalo byabula kufwainwa, bateleka ku nyimbo yatama, bapendwapendwa nangwa kwingijisha bizhima, kwikala na bakambwe, ne bintutu bikwabo byatama bingi. Abano bantu bebepekezha kwikala ba kishinka, kufya byubilo byabo ku bansemi, ku bakwabo ba mu lwitabilo ne kwi Lesa. (Sala. 26:4, 5) Yehoba uyuka umvwe ‘tubena kumunemekatu na byatunwa byetu, pakuba michima yetu iji kwalepa ne aye.’ (Mako 7:6) Kyawama bingi kulondela byambo bya maana bya kuba’mba: “Muchima wobe kange akumbwenga babi ne, bino wakamwenga Yehoba moba onse.”—Maana 23:17. *

16. Mambo ka bukishinka o bwanemena kimye kyo tubena kunemba pepala wa kwipwizhapo mwingilo wa kimye kyonse?

¹⁶ Kampe mulangulukapo kwingilako bupainiya bwa kimye kyonse nangwa mingilo ikwabo iji mu jibumba ja Lesa, nabiji kwingijila pa Betele. Kimye kyo mubena kukumbula mepuzho aji pa pepala wa kwipwizhapo mwingilo wa kimye kyonse, mwafwainwa kunemba bya kine pa kukumbula mepuzho nabiji aamba pa butuntulu bwenu  bwa mubiji, bya kisangajimbwe byo mwatemwa, ne byubilotu bikwabo. (Hebe. 13:18) Kyakonsha kwikala byepi inge mwalenga mambo akatampe bino mukyangye kwiasolola ku bakulumpe mu kipwilo? Lombai bukwasho bwabo pa kuba’mba mwingijilenga Lesa na jiwi ja mu muchima jatoka.—Loma 9:1; Nga. 6:1.

17. Twafwainwa kuba byepi inge balwanyi betu kebetutebawizhe’mba tusolole balongo betu?

¹⁷ Mwakonsha kuba byepi, inge bakulumpe ba kafulumende bakanya mwingilo wa kusapwila ku mpunzha ko mwikala, kabiji bemwita kuba’mba mwambe kuji balongo ne banyenga? Abya mwakonsha kwibabuula byonse byo mwayuka nyi? Nga Yesu waubilepo byepi byo bamukwachile ku kitumbafumu mwina Loma? Walondejile jifunde ja mu Binembelo ja kuba’mba kuji “Kimye kya kuzhindama ne kimye kya kwamba.” Onkao mambo, bimye bimo Yesu wazhindamangapotu. (Sapwi. 3:1, 7; Mat. 27:11-14) Mu bimye bya uno mutundu, twafwainwa kujimuka pa kukumbula pa kuba’mba tubule kubika bumi bwa balongo betu mu kizumba.—Maana 10:19; 11:12.

18. Twafwainwa kuba byepi inge bakulumpe mu kipwilo betwipuzha kulumbulula bishinka byo twayukapo pa mulongo nangwa nyenga walenga mambo?

¹⁸ Mwakonsha kuba byepi inge mulongo nangwa nyenga mu kipwilo walenga mambo akatampe, kabiji muji na bishinka? Bakulumpe mu kipwilo baji na mwingilo wa kulama kipwilo kwikala kya kyatoka. Bakonsha kwimwipuzha kwamba byo mwayukapo pa ano mambo. Mwakonsha kuba byepi, inge walenga mambo mulunda nenu nangwa mulongo wenu? Baibolo waamba’mba: “Kamonyi wa kishinka wamba bya kine.” (Maana 12:17; 21:28) Mwafwainwa kulumbulwila bakulumpe bishinka byonse byo mwayuka, kechi kupimpulako bimo ne. Bakulumpe baji na luusa lwa kuyuka bishinka byonse pa kuba’mba bamone mwa kukwashisha mulongo nangwa nyenga walenga mambo kuwamisha bulunda bwanji ne Yehoba.—Yako. 5:14, 15.

19. Ñanyi bintu byo tubena kutengela kufunda mu mutwe walondelapo?

¹⁹ Nyimbi wa masalamo Davida walombele kwi Yehoba amba: “Anweba musekela mu bukine buji mwine mukachi ka muchima.” (Sala. 51:6) Davida wayukile’mba bukishinka bwetu bufuma mukachi ka muchima. Mu bwikalo bwabo bonse, bena Kilishitu bafwainwa ‘kwambanga bya kine mu lwabo.’ Jishinda jikwabo mo twakonsha kumweshesha’mba twapusanako byo tuji ba mingilo ba Lesa ke kufunjisha bantu bukine. Mutwe walondelapo ukamba pa byo twakonsha kuba bino.