Kabiji luno luvwañano lwalengejile kulenga kipamo kitelwa’mba League of Nations. Balengele kino kipamo pa kuba’mba “pekale lumvwañano pakachi ka byalo ne kuleta mutende ne luzhikijilo.” Bupopweshi bwavula bwa Kilishitendomu bwatundaikilenga kipamo kya League of Nations. Kije kimenako machechi mu America (Federal Council of the Churches of Christ) kyatakaikile kipamo kya League of Nations kuba’mba “kibena kwimenako Bufumu bwa Lesa pano pa ntanda.” Kino kije kyatundaikile kino kipamo kya League of Nations kupichila mu kutuma bantu kuya na kutanwa ku mwisambo wa mutende wajinga mu muzhi wa Paris. Mwanamulume umo wajinga pa bantu bo batumine waambile’mba, uno mwisambo “yo yajinga ntendekelo ya bintu byawama pano pa ntanda.”

Ibyo yajinga ntendekelo ya bintu byawama, bino kechi yaikeleko na mambo a boba banabalume batainwe ku uno mwisambo ne. Mwaka wa 1919 yo yajinga ntendekelo ya mwingilo wa kusapwila kimye Yehoba kyo apele bantu banji bulume bwa kusapwila kukila byo kyajinga kala. Bino kino saka kikyangye kubiwa, kwafwainwe kubiwa lupimpu lwanema bingi ku Bafunda Baibolo.

Kusala ba kutangijila Kipamo kya Watch Tower Bible and Tract Society kwaubiwanga pa mwaka pa mwaka kwajingako pa Kibelushi pa 4 January, 1919. Pa kyo kya kimye, Mulongo Joseph F. Rutherford, watangijilanga bantu ba Yehoba, bamukashile kyashinji mu kaleya ka mu muzhi wa Atlanta, Georgia, U.S.A., pamo na bakwabo banabalume batanu na babiji. Balongo bafwainwe kufuukulapo kana kusala jibiji balongo batangijilanga kala bajinga mu kaleya nangwa kusala bakwabo.

Mulongo Rutherford byo ajinga mu kaleya, waakaminwe inge jibumba ja Lesa jikatwajijila. Wayukile kuba’mba balongo bamo balangulukilenga’mba kyakonsha kuwama kusala muntu mukwabo kwikala wa kutangijila. Na mambo a kino, watumine nkalata ku balongo bakonkene kwibabuula kuba’mba mulongo Evander J. Coward ye wakonsheshe kwikala wa kutangijila. Mulongo Rutherford walumbulwile byajinga mulongo Evander J. Coward amba ke muntu wa “wakooka muchima,” “wa milangwe,” kabiji “wa kishinka kwi Nkambo.” Pano bino, balongo bavula bajinga na mulanguluko wapusanako, bakebelenga’mba  papite bañondo batanu na umo bino bakekale na buno bunsaji. Bashabyambo baambijilengako balongo bajinga mu kaleya nabo baswile. Kimye kyo besambilenga pa bya kuba, balongo bamo bazhingijile.

Pano kwamwekele kintu kimo ba Richard H. Barber kyo balumbulwile’mba ‘kuzhindamika mema avundankana.’ Mulongo umo waambile’mba: “Amiwa kechi ne shabyambo ne, bino nayuka kwikala wa kishinka byo kulumbulula. Lesa ukeba bantu banji kwikala ba kishinka. Jishinda jawama jo twakonsha kumwesheshamo bukishinka kwi Lesa ke kusala jibiji Mulongo Rutherford kwikala wa kutangijila.”—Sala. 18:25.

Mulongo mukwabo wajinga mu kaleya aye A. H. Macmillan wavulukile kyamwekele pa juba jalondejilepo amba Mulongo Rutherford wayile na kukonkonsha mu kakibamba mo bamukashijile ne kumwambila’mba, “Lupula kuboko kobe.” Kepo Mulongo Rutherford amupele nkalata. Mulongo Macmillan wamwene byambo bicheche byajingapo kabiji ponkapo wayukile byo byalumbulwilenga. Bino byambo byanembelwe’mba: “RUTHERFORD WISE VAN BARBER ANDERSON BULLY NE SPILL MUTANSHI WA KUTANGIJILA BAKWABO BASATU BA MU KIPAMO TWIMUTEMWA ANWEBA BONSE.” Kino kyalumbulwilenga’mba bonse bajinga mu kipamo bebasajile jikwabo, kabiji ba Joseph Rutherford, ne ba William Van Amburgh bebabwezhezhe pa bifulo byabo. Onkao mambo, Mulongo Rutherford watwajijile kwikala wa kwibatangijila.

Balongo batanu na basatu byo bajinga mu kaleya, Bafunda Baibolo ba kishinka balombele bantu kuba’mba bafwachike pa pepala wa kulomba kafulumende kuba’mba akasulule bano balongo. Bano balongo ne banyenga bachinchikile pa kuba’mba balombe bantu babujile Bafunda Baibolo kuba’mba bafwachike pa uno pepala. Bantu kukila pa 700,000 bo bafwachikile ku uno pepala. Pa Kisatu, pa 26 March, 1919, balongo saka bakyangye kupana uno pepala ku kafulumende, Mulongo Rutherford ne balongo bakwabo bajinga mu kaleya bebakasulwile.

Mulongo Rutherford byo aambilenga ku bantu bamutambwijile, waambile’mba: “Nashiinwa kuba’mba bintu byo twapitamo atweba bonse bibena kwitunengezha ku makatazho aji kulutwe. . . . Kulwa kwenu kechi kwajinga kwa kuba’mba balongo benu bafume mu kaleya ne. Kechi kyo kine kintu kyo mwaingijilenga uno mwingilo ne. . . . Kulwa ko mwalwilenga kwajinga kwa kuleta lukumo kwi Yehoba, kabiji aba baingijileko uno mwingilo batambwila mapesho.”

Bintu byamwekelenga kimye balongo kyo bajinga mu makatazho bimwesha’mba Yehoba ye wibatangijilanga. Pa 14 May, 1919, kije ko batwajile mambo kyachibile’mba: “Aba bo balobejile bafwainwe kwibachibila mambo mo aolokela kabiji na mambo a kino kije kyakana mo kyachibijile ano mambo.” Balongo bebapelemo mambo akatampe, kya kuba mazhina abo inge atwajijile kwikala mu mabuku a baji na mambo akatampe inge kya kuba bebalekejilekotu mambo, nangwa inge bakepeshekotu myaka yo bebakashile. Kechi bebapelepo mambo akwabo ne. Kyafuminemo ke kya kuba’mba Mutonyi Rutherford watwajijile na mwingilo wanji wa kulwilako bantu ba Yehoba mu Kije Kikatampe kya mu United States,  mwingilo ye aingijile pa bimye byavula byo bamukasulwile mu kaleya. Mulongo Rutherford wajinga shabyambo kabiji mutonyi, o ene mambo o bamutelelanga’mba Mutonyi Rutherford.

Mulongo Macmillan wavulukile’mba: “Kechi twafwainwe kwikalatu na kupembelela Nkambo kwitutwala mwiulu ne. Twayukile’mba twafwainwa kubapo kimo pa kuba’mba tuyuke kyaswa muchima wa Nkambo.”

Bino balongo bajinga pa ofweshi mukatampe kechi bafikenejiletu kutendeka jibiji mwingilo ye baingijilenga pa myaka yavula ne. Mambo ka? Mambo kimye kyo bebakashile, mashinyi o baingijishanga pa kupulinta mabuku aonaikile. Kino kintu kibalefwile bingi kabiji balongo bamo balangulukilenga inge po papwijile mwingilo wa kusapwila.

Nanchi kwajingapo bantu bakebelenga kuteleka ku byambo bya Bufumu byasapwijilenga Bafunda Baibolo nyi? Pa kuba’mba bataane mukumbu, Mulongo Rutherford wafuukwilepo kwamba jashi. Baichile bantu kwiya na kuteleka ku jino jashi. Mulongo Macmillan waambile’mba: “Inge kya kuba kafwako usakwiya ku kuno kupwila ne, ko kuba’mba mwingilo wa kusapwila wapwa.”

Pajinga pa 4 May, 1919, nangwa kya kuba Mulongo Rutherford wakolelwe bingi, bino waambile jashi ja jinga na mutwe wa kuba’mba “Luketekelo lwa Bantu Babena Kumanama” mu muzhi wa Los Angeles, California. Kwatainwe bantu 3,500, kabiji bavula bebabwezhezhemotu mambo mpunzha ya kupwijilamo yakepele. Kabiji juba jalondejilepo, kwatainwe bantu bakwabo 1,500. Kino kyalengejile balongo kuyuka’mba kwajinga bantu bakebelenga kuyuka bukine.

Kintu kyalondejilepo kyaubile balongo kyo kilondela ne Bakamonyi ba kwa Yehoba pa kwingila mwingilo wa kusapwila kufikatu ne lelo jino.

Mu Kyamba kya Usopa kya August 1, 1919, mwajinga kya kubijika kya kuba’mba, ku ntendekelo ya ñondo wa September, kukekala kushonkena mu muzhi wa Cedar Point, Ohio. Ba Clarence B. Beaty bajinga pa jibumba ja Bafunda Baibolo saka bakijitu banyike  mu kibunji kya Missouri baambile’mba, “Bantu bonse bakebeshe kwiya na kutanwako.” Balongo ne banyenga kukila 6,000 batainweko ku kuno kushonkena, kabiji bakijile pa nambala ya bantu bo twaketekejilenga kutanwako. Kabiji kintu kikwabo kyalengejile kuno kushonkena kuwama ke kya kuba’mba, bantu kukila pa 200 babatizhiwe mu kizhiba kya Erie kyajinga kwipi.

Pa 5 September, 1919, pa juba ja butanu ja kushonkena, Mulongo Rutherford mu jashi janji jajinga na mutwe wa kuba’mba “Byambo ku Bakwetu ba Mingilo,” wabijikile kulupulwa kwa magazini wajinga na mutwe wa kuba’mba The Golden Age. * Mu uno magazini “mwajinga byambo byanema byalumbulwilenga bishinka bya mu Binembelo bimwesha ene mambo bino bintu bikatampe o byamwekejile.”

Bafunda Baibolo bonse bebatundaikile kusapwila na kuchinchika kupichila mu kwingijisha uno magazini. Nkalata yalumbulwile bya kunengezha uno mwingilo yaambile’mba: “Muntu yense wipana [wabatizhiwa] wafwainwa kuvulukanga kuba’mba ke munema mukatampe kwingila papelela bulume bwanji uno mwingilo wa kusapwila ubena kwingijiwa ntanda yonse.” Bavula baswile uno mwingilo wa kusapwila. Byo kyafikilenga mu December, basapwishi ba Bufumu ba mukoyo batambwile magazini avula bingi kukila pa 50,000.

Ku mpelo ya mwaka wa 1919, bantu ba Yehoba bebanengezhezhe bulongo bya kwingila mwingilo kabiji bebatundaikile bingi. Kunungapo, bungauzhi bwavula bwanema bwaamba pa moba a kupelako bwafikile. Kweseka ne kutokesha bantu ba Lesa kwaambijilwe jimo pa Malakai 3:1-4, kwapwile, bantu ba Yehoba bafumine mu buzha bwa kifwanyikizho mu “Babilona Mukatampe,” kabiji Yesu watongwele “kalume wa kishinka kabiji wa maana.” * (Lum. 18:2, 4; Mat. 24:45) Onkao mambo, Bafunda Baibolo benengezhezhe kwingila mwingilo Yehoba ye akebelenga’mba bengile.