MUNTU wingila ku kipamo kitala pa byenda mwela watala pa kipikichala kyo bakopa na biñambañamba byabo. Wamona kuba’mba kubena kwiya kinkunkwila kikatampe pa mpunzha pekala bantu bavula. Na mambo a kuba’mba wata bantu muchima, waya na kwibajimunako pa kuba’mba bapuluke.

Kyo kimotu, Yehoba ubena kujimunako bantu pano pa ntanda ponse kuba’mba kubena kwiya “kinkunkwila” kikatampe bingi kyo bakyangye kumvwapo ku bipamo bitala pa byenda mwela. Ubena kwibajimunako byepi? Kabiji mambo ka o twakonsha kushiinwa’mba wapa bantu kimye kyabaya kya kumvwina luno lujimuno? Pa kuba’mba tukumbule ano mepuzho, patanshi twayai twisambe pe Yehoba byo ajimwineko bantu ba kala.

Kimye kyanembejilwengamo Baibolo, Yehoba wajimwineko bantu ku “binkunkwila” byapusana-pusana, nangwa’mba luzhachisho lo aletele pa bantu babulanga kukookela mikambizho yanji. (Maana 10:25; Yele. 30:23) Kimye kyonse saka akyangye kuleta luzhachisho, wajimwinanga jimo bantu saka kukiji kimye kyabaya ne kwibakambizha kupimpula byubilo pa kuba’mba bamukookelenga. (2 Mfu. 17:12-15; Ne. 9:29, 30) Pa kuba’mba akwashe bantu kupimpula byubilo byabo, waingijishanga bakalume banji ba kishinka bajinga pano pa ntanda kubijika kuba’mba ukaleta luzhachisho, ne kukwasha bantu kuyuka’mba bafwainwe kupimpula byubilo byabo bukiji bukiji.—Amo. 3:7.

Nowa ye kalume wa Lesa umo wa kishinka wajingako. Pa myaka yavula, Nowa kwa kubula moyo wajimwinengako bantu baubanga bulalelale ne bukapondo kuba’mba kukeya Muyulo. (Nte. 6:9-13, 17) Kabiji wibabuujile ne byo bafwainwe kuba’mba pa kuba’mba bapuluke, kabiji kino kyo kyalengejile Nowa kutelwa’mba “musapwishi wasapwilanga bololoke.”—2 Pe. 2:5.

Nangwa kya kuba Nowa waingijile na ngovu kujimuna bantu Muyulo saka akyangye kwiya, bino balengulwile byambo byafumine kwi Lesa. Bamwesheshe kuba’mba kechi bajinga na lwitabilo ne. Na mambo a kino, bafwile na Muyulo waishile “ne kwibalobeshatu bonse shata.” (Mat. 24:39; Hebe. 11:7) Mpelo yabo byo yafikile, kechi bakonsheshe kwamba’mba Lesa wakankelwe kwibajimunako ne.

Pa bimye bikwabo, Yehoba wajimwineko bantu umo umo saka akyangye kuleta “kinkunkwila” kya bunchibamambo bwanji. Nangwa byonkabyo, wibajimwinanga jimo saka kukiji kimye kyabaya pa kuba’mba bapimpule byubilo byabo. Saka akyangye kuleta Binkunka Jikumi pa bena Ijipita, Lesa wibajimwijile jimo saka kukiji kimye. Yehoba watumine Mosesa ne Alona kuya na kujimunako Felo ne bakalume banji pa kinkunka kya butanu na bubiji kya mvula mukatampe wa mabwe. Na mambo a kuba’mba mvula wanokele pa juba jalondejilepo kufuma kimye kyo apaine lujimuno, nanchi Lesa wibapele kimye kyabaya ne kumona mwa kufyama pa kuba’mba babule kufwa nyi? Baibolo waamba’mba: “Bakalume bonse ba kwa Felo baumvwijile byaambile Yehoba, batwezhezhe bakalume babo ne banyama babo mu mazubo, bino yense wabujile kumvwina byaambile Yehoba, washile bakalume banji ne banyama banji mungye.” (Lupu. 9:18-21) Yehoba wibapele kimye kyabaya, onkao mambo, aba baumvwijile lujimuno lwanji bapulukile kino kinkunka.

Felo ne bakalume banji bebajimwijile jimo ne pa kinkunka kya bujikumi. Pano bino, bakaine kumvwina lujimuno. (Lupu. 4:22, 23) Kyafuminemo, baana babo babeji bafwile. Kyajinga kya bulanda bingi. (Lupu. 11:4-10; 12:29) Nanchi bakonsheshe kumvwina lujimuno saka kukiji kimye nyi? Ee! Mosesa bukiji bukiji wajimwineko bena Isalela pa kinkunka kya bujikumi ne kwibabuulako byo bafwainwe kuba pa kuba’mba baana babo bapuluke. (Lupu. 12:21-28) Banga baumvwijile lujimuno?  Bishinka bimwesha kuba’mba bantu kukila pa 3 milyonyi, ko kuba’mba bena Isalela ne “jibumba ja bantu bapusana pusana” babujile bena Isalela ne bena Ijipita, bapulukile luzhachisho lwaletele Lesa ne kufumamo mu Ijipita.—Lupu. 12:38; tubyambo twa munshi.

Byonka byo twaambapo kala, Yehoba kimye kyonse wapanga bantu kimye kyabaya kuba’mba bomvwine lujimuno lwanji. (Mpitu. 32:4) Mambo ka Lesa o aubilanga bino? Mutumwa Petelo walumbulwile’mba Yehoba “kechi usaka muntu nangwa umo amba akafwe ne, bino ukeba’mba bonse balapile.” (2 Pe. 3:9) Kya kine, Lesa watemenwe bingi bantu. Wakebelenga’mba balapile ne kupimpula byubilo byabo bunchibamambo bwanji saka bukyangye kufika.—Isa. 48:17, 18; Loma 2:4.

Ne lelo jino, bantu bafwainwa kumvwina lujimuno lwanema bingi lubena kubijikwa ntanda yonse. Yesu byo ajinga pano pa ntanda, wapaine lujimuno lwa kuba’mba bintu biji mu ino ntanda bikonaunwa kimye kya “malwa akatampe.” (Mat. 24:21) Walumbulwile ne bishinka byavula pa bunchibamambo bukeya kulutwe kupichila mu kwamba bungauzhi bwalumbulula bintu baana banji ba bwanga byo bakamona ne byo bakapitamo bikamweshanga’mba kimye kya luzhachisho kyafwenya kala pepi. Yesu walumbulwile bintu byanema bibena kumweka mwaya ntanda yonse lelo jino.—Mat. 24:3-12; Luka 21:10-13.

Kwesakana na byaamba buno bungauzhi, Yehoba wapa bantu kimye kya kusalapo kumwingijila ne kumukookela. Ukeba’mba bantu ba lukookelo beyowenga bwikalo lonka luno ne kimye kya kulutwe mu ntanda ipya ya bololoke. (2 Pe. 3:13) Yehoba ukeba kukwasha bantu kwikala na lwitabilo mu milaye yanji. Wibakwasha kwikala na lwitabilo kupichila mu “mambo awama a Bufumu” Yesu o aambijile jimo amba “bakeasapwila pano pa ntanda ponse kwikala bukamonyi ku bisaka byonse bya bantu.” (Mat. 24:14) Lesa wafunjisha bapopweshi banji ba kine kuba’mba bashimunenga “bukamonyi,” nangwa’mba kusapwila byambo bya Lesa mu byalo kukila pa 240. Yehoba ukeba bantu bavula kumvwina lujimuno ne kukapuluka “kinkunkwila” kya bunchibamambo bwanji bwaoloka.—Zefwa. 1:14, 15; 2:2, 3.

Bwipuzho bwanema kwiipuzha ke bwa kuba’mba, nanchi Yehoba upa bantu kimye kyabaya pa kuba’mba bomvwine lujimuno lwanji nyi? Bishinka bimwesha’mba byo byo oba. Pano bwipuzho bukwabo bwanema ke buno: Nanchi bantu bakomvwina lujimuno lwa Lesa saka kukiji kimye nyi? Twayai atweba baluwe ba Lesa tutwajijile kukwasha bantu bavula pa kuba’mba bakapuluke mpelo ya buno bwikalo.