1-2. (a) Bantangi ba pano pa ntanda bakabijika’mba ka katataka? (b) Ñanyi mepuzho o twafwainwa kukumbula?

FWANYIKIZHAI kuba’mba bisaka bya bantu popo byabijikatu kuba’mba “mutende ne luzhikijilo.” Bakonsha kutendeka kwitota amba baleta mutende ne luzhikijilo pa ntanda. Bisaka bya bantu bikakeba kuba’mba tulangulukenga’mba baji na bulume bwa kupwisha makatazho onse mu ntanda. Pano bino, kechi bakakonsha kukanya kintu kikalondelapo ne. Mambo ka? Bungauzhi bwa mu Baibolo bwaambijile jimo kuba’mba “ponkapotu lonaiko lukebasolomokela, . . . kabiji kechi bakapuluka ne.”—1 Tesa. 5:3.

² Kuji mepuzho anema o twafwainwa kukumbula: Ñanyi bintu bikamweka mu kimye kya “malwa akatampe”? Yehoba ukakeba’mba tukobe byepi pa kyo kya kimye? Kabiji twakonsha kwinengezha byepi luno pa kuba’mba tukatwajijile kwikala ba kishinka mu kimye kya malwa akatampe?—Mat. 24:21.

3. Kwesakana na byaamba Lumwekesho 17:5, 15-18, Lesa ukonauna byepi “Babilona Mukatampe”?

³ Tangai Lumwekesho 17:5, 15-18. “Babilona Mukatampe” bakamonauna! Byonka byo twaambapo kala, bisaka bya bantu kechi bikekala na bulume bwa kukanya kintu kikalondelapo ne. Mambo ka? Mambo “Lesa [ukabika] mu michima yabyo kuba kyaswa muchima wanji.” Ñanyi kintu kyonkakyo? Konauna bupopweshi bwa bubela  bonse, kubikapo ne Kilishitendomu. * Lesa ukabika kyaswa muchima wanji mu “nsengo jikumi” ya “lukinyama wachijisha.” Nsengo jikumi imenako makafulumende onse atundaika “lukinyama,” ko kuba’mba kipamo kya United Nations. (Lum. 17:3, 11-13; 18:8) Kimye makafulumende kyo akalukuka bupopweshi bwa bubela, yo ikekala ntendekelo ya malwa akatampe. Kino kintu kikobiwatu nobe mu kukopa kwa jiso kabiji kikaletela bingi moyo bantu bonse pano pa ntanda.

4. (a) Ñanyi bintu bikakonsha kwamba makafulumende amba kyo kikebalengela kulukuka bupopweshi bwa bubela? (b) Bantu baji mu bupopweshi bwa bubela bakoba byepi inge bupopweshi bwa bubela bebuzhiya?

⁴ Kechi twayuka kine kintu kikalengela makafulumende kulukuka Babilona Mukatampe ne. Bakakonsha kwamba’mba bupopweshi bubena kulengela makafulumende kukankalwa kuleta mutende ne kuba’mba bwivwanga mu bya bumulwila ntanda kimye kyonse. Nangwa kampe bakamba’mba mabumba a bupopweshi anonka bingi. (Lum. 18:3, 7) Pano bino, kyamweka kechi bantu bonse baya mu bupopweshi bwa bubela bakonaunwa ne. Bino kyamweka makafulumende akazhiyatu mabumba a bupopweshi. Inge ano mabumba aleka kwikalako, bantu bayanga mu ano machechi bakayuka’mba bantangi ba bupopweshi bakankalwa kwibazhikijila, onkao mambo, kyamweka bakatendeka kukana kuba’mba kechi bajinga mu ano mabumba ne.

5. Yehoba walaya’mba ka pa malwa akatampe, kabiji mambo ka?

⁵ Baibolo kechi waambapo kubaya kwa kimye kikapitapo pa konauna Babilona Mukatampe ne, bino twayuka kuba’mba kikobiwatu mu kimye kicheche. (Lum. 18:10, 21) Yehoba walaya kuba’mba moba a malwa akatampe ukeakepeshako pa kuba’mba bantu “bo asala” ne bupopweshi bwa kine bakabule konaunwa. (Mako 13:19, 20) Pano Yehoba ukeba’mba tukobenga byepi kimye kikatendeka malwa akatampe kufika kimye kikatendeka Amagedonyi?

6. Mambo ka o twafwainwa kubujilatu kupelela pa kubula kwivwanga mu bupopweshi bwa bubela?

⁶ Byonka byo twisambilepo mu mutwe wafumako, Yehoba waketekela bapopweshi banji  kubula kwivwanga mu Babilona Mukatampe. Pano bino, kino kechi kibena kulumbululatu kuleka kwivwanga mu bupopweshi bwa bubela ne. Pakuba, twafwainwa kutwajijila kukakachila ku bupopweshi bwa kine, ko kuba’mba kutwajijila kwingijila Yehoba. Twayai twisambeko pa mashinda abiji mo twakonsha kubila bino.

7. (a) Twakonsha kuba byepi pa kuba’mba tukookelenga mizhilo yaoloka ya Yehoba? (b) Kinembelo kya Bahebelu 10:24, 25 kikosesha byepi buneme bwa kupwila pamo na bakwetu kikatakata ano moba?

⁷ Kitanshi, twafwainwa kukosa ne kulondela mizhilo yaoloka ya Yehoba. Kechi twafwainwa kulondela byubilo byatama bya bantu ba mu ino ntanda ne. Kechi tuswisha byubilo na biji bulalelale, kubikapotu ne masongola a banabalume na banabalume bakwabo nangwa banabakazhi na banabakazhi bakwabo ne byubilotu bikwabo bincha ne. (Mat. 19:4, 5; Loma 1:26, 27) Kya bubiji, twafwainwa kutwajijila kupwilanga pamo na bena Kilishitu bakwetu. Tuba bino konse ko twakonsha kutanwa, mu Mazubo a Bufumu, mu mazubo a balongo nangwa mu bufyamfya. Nangwatu bintu bikatazhepotu byepi, kechi twakonsha kuleka kupwila pamo ne. Kino kyo kimye kyo twafwainwa kupwilanga pamo ‘byo tubena kumona aja juba saka jifwenya pepi.’—Tangai Bahebelu 10:24, 25.

8. Twayuka byepi kuba’mba byambo byo tusapwila bikapimpulwa kulutwe?

⁸ Mu kimye kya malwa akatampe, byambo byo tukasapwilanga bikapimpulwa. Lelo jino, tubena kusapwila mambo awama a Bufumu ne kwibikako kufunjisha bantu kwikala baana ba bwanga. Bino pa kyokya kimye, tukasapwilanga byambo biji nobe mvula wa mabwe akatampe. (Lum. 16:21) Kyamweka byambo byo tukasapwilanga bikekala bya kuba’mba ntanda yatama ya kwa Satana katatakatu beyonaune. Mu kuya kwa kimye, tukayuka byambo bine byo tukasapwilanga byo bikekala ne jishinda jo tukebyambilangamo. Nanchi tukengijishanga mashinda onka o twaingijisha pa myaka yavula pa kusapwila ne kufunjisha nyi? Inyi tukengijishanga mashinda apya? Kechi twayuka ne. Monse mo kikekela, kyamweka tukasapwilanga na kuchinchika byambo bya Yehoba bya luzhachisho.—Ezi. 2:3-5.

9. Bisaka bya bantu bikoba byepi pa kumvwa byambo byo tukasapwilanga, bino twashiinwa’mba ka?

⁹ Kwa kubula nangwa kuzhinaukatu ne, byambo byo tukasapwilanga bikazhingijisha bisaka bya bantu kabiji bakakebanga kwituzhindamikapo. Byonkatu byo tukinka manungo mwi Yehoba luno pa kusapwila, ne pa kyokya kimye napo tukaketekelatu mwi aye kwitukwasha. Twafwainwa kushiinwa kuba’mba Lesa uketupa bulume bwa kuba kyaswa muchima wanji.—Mika 3:8.

10. Kwesakana na byaambijile jimo Luka 21:25-28, bantu bavula bakoba byepi pa kumona bintu bikamwekanga mu kimye kya malwa akatampe?

¹⁰ Tangai Luka 21:25-28. Mu kimye kya malwa akatampe, bantu bakakankamanatu pa kumona bintu byonse byo baketekejile’mba bikekala myaka ne myaka byatendeka konaunwa. Kikekala kimye kya “lumanamo” kabiji bantu bakakamwa kuba’mba basakufwa pa kyokya kimye kya malwa. (Zefwa. 1:14, 15) Pa kyokya kimye, bwikalo bukakatazha bingi ne ku bantu ba Yehoba. Na mambo a kuba’mba kechi twi ba pano pa ntanda ne, ne atweba tukapita mu makatazho amo. Kampe tukekalanga kwa kubula bintu bimo byanema bikebewa mu bwikalo.

11. (a) Mambo ka bisaka bya bantu o bikazanzhila meso pa Bakamonyi ba kwa Yehoba? (b) Mambo ka o twafwainwa kubujila kuchina malwa akatampe?

¹¹ Mu kuya kwa kimye, bantu bo baonawijile bupopweshi bwabo bakazhingila pa kumona kuba’mba Bakamonyi ba kwa Yehoba batwajijila na bupopweshi bwabo. Fwanyikizhai kiwowo kikekalako na mambo a kino, kabiji bakasampanya bino byambo pa mwela ne pa Intaneti. Bisaka bya bantu ne kalama wabo aye Satana, baketushikwa na mambo a kuba’mba bupopweshi bwetu bo bonkatu bukashalapo. Kechi bakafikizha kikonkwanyi kyabo kya kuzhiya bupopweshi bonsetu pano pa  ntanda ne. Onkao mambo, meso abo akekalatu pe atweba. Pa kikye kimye bisaka bikakwatankana ne kwikala Gogi wa Magogi. * Bakakwatankana pamo ne kulukuka bantu ba Yehoba. (Ezi. 38:2, 14-16) Twakonsha kutendeka kwakamwa inge twalanguluka pa bikobiwa mu kimye kya malwa akatampe na mambo a kuba’mba kechi twayuka bishinka byonse ne. Nangwa byonkabyo, twashiinwa kuba’mba: Kechi twafwainwa kuchina malwa akatampe ne. Yehoba uketubuula bya kuba pa kuba’mba tukapuluke. (Sala. 34:19) Tukemana “ne kwinuna mitwe [yetu]” mambo tukayuka’mba “kupokololwa [kwetu] kuji pepi.” *

12. “Kalume wa kishinka kabiji wa maana” ubena kwitunengezha byepi ku bintu bikamweka kulutwe?

¹² “Kalume wa kishinka kabiji wa maana” ubena kwitunengezha bya kutwajijila kwikala ba kishinka mu kimye kya malwa akatampe. (Mat. 24:45) Kalume wauba kino mu mashinda avula bingi, bino akilangulukaipotu pa jishinda jimo: mutanchi wa kushonkena kutendeka mu mwaka wa 2016 kufika mu 2018. Majashi ajingako pa kuno kushonkena etutundaikile kukosesha byubilo bikebewa byo tubena kunangijila ku juba ja Yehoba. Twayai tupitulukemo pacheche mu bino byubilo.

13. Twakonsha kukosesha byepi bukishinka bwetu kwi Yehoba, kabiji mambo ka o twafwainwa kubila bino lonka luno?

¹³ Bukishinka: Kishina kya kushonkena kwa mu 2016 kyajinga kya kuba’mba “Twajijilai Kwikala ba Kishinka kwi Yehoba!” Uno mutanchi witufunjishe kuba’mba inge twaikala na bulunda bwakosa na Yehoba, tukatwajijila kwikala ba kishinka kwi aye. Betuvulwilemo kuba’mba twakonsha kufwenya kwipi ne Yehoba kupichila mu kulomba ne kufunda Mambo anji na mukoyo. Kuba bino kwitukwasha kwikala na bulume bwa kuchinchika makatazho akatampe. Ntanda ya kwa Satana byo ibena kunangijila ku mpelo, twafwainwa kuketekela kuba’mba tukapitanga mu makatazho akeseka bukishinka bwetu kwi Lesa ne ku Bufumu bwanji. Kabiji kyamweka bantu bakatwajijila kwitwendeleka. (2 Pe. 3:3, 4) Kintu kimo kikalengela bantu kwitwendeleka ke kya kuba’mba kechi twivwanga mu bya bumulwila ntanda ne. Twafwainwa kukosesha bukishinka bwetu lonka luno pa kuba’mba tukatwajijile kwikala ba kishinka mu kimye kya malwa akatampe.

14. (a) Ñanyi lupimpu lukobiwa ku balongo babena kwitutangijila pano pa ntanda? (b) Mambo ka o tukakebewanga kwikala ba kishinka pa kyo kya kimye?

¹⁴ Mu kimye kya malwa akatampe, kukekala lupimpu ku balongo betutangijila pano pa ntanda. Pa kimye kimo, bashingwa bonse bakatanwa pano pa ntanda pa kyokya kimye bakebakonkenya mwiulu pa kuba’mba bakevwangemo mu nkondo ya Amagedonyi. (Mat. 24:31; Lum. 2:26, 27) Kino kibena kulumbulula’mba Jibumba Jitangijila kechi jikatwajijila kwikala pano pa ntanda ne. Nangwa byonkabyo, jibumba jikatampe jikatwajijila kukwatankana ne kutambula mikambizho. Balongo bafikilamo ba mu mikooko ikwabo bo bakatangijilanga. Tukamwesha’mba twi ba kishinka kwi Yehoba kupichila mu kukookela mikambizho ya bano balongo ikafumanga kwi Lesa. Lupulukilo lwetu lukemena pa lukookelo.

15. Twakonsha kuba byepi pa kuba’mba tutwajijile kuchinchika, kabiji mambo ka o kyanemena kuba bino lonka luno?

¹⁵ Kuchinchika: Kishina kya kushonkena kwa mu 2017 kyajinga kya kuba’mba “Twajijilai Kuchinchika!” Majashi ajingako etukwashishe kwikala bakosa ne kuchinchika meseko.  Twafunjile kuba’mba kechi tuchinchikatu inge bintu byawama ne. Twakonsha kutwajijila kuchinchika kupichila mu kuketekela mwi Yehoba. (Loma 12:12) Twayai tuvulukenga mulaye wa kwa Yesu wa kuba’mba: “Awa uchinchika kufika ne ku mpelo, ye ukapuluka.” (Mat. 24:13, tubyambo twa munshi) Uno mulaye ulumbulula kuba’mba twafwainwa kutwajijila kwikala ba kishinka nangwatu tupite mu meseko a mutundu ka. Inge twatwajijila kuchinchika meseko luno, tukekala na lwitabilo lwakosa malwa akatampe saka akyangye kutendeka.

16. Kubula moyo kwaimena pa ka, kabiji twakonsha kuba byepi pa kuba’mba twikale babula moyo luno?

¹⁶ Kubula moyo: Kishina kya kushonkena kwa mu 2018 kyajinga kya kuba’mba ‘Kange Mube Moyo Ne!’ Majashi ajingako etuvulwilemo kuba’mba kubula moyo kechi kwaimena pa maana etu ne. Byonka byo kiji ku kuchinchika, kubula moyo kwaimena pa kuketekela mwi Yehoba. Twakonsha kuba byepi pa kuba’mba tuketekelenga mwi aye? Kupichila mu kutanga Mambo anji pa juba pa juba ne kulanguluka pa mashinda Yehoba o apokolwejilemo bantu banji ba kala. (Sala. 68:20; 2 Pe. 2:9) Kimye kyo baketulukuka ku bisaka bya bantu kimye kya malwa akatampe, tukakebewanga kwikala babula moyo ne kuketekela mwi Yehoba na muchima yense. (Sala. 112:7, 8; Hebe. 13:6) Inge twaketekela mwi Yehoba lelo jino, kechi tukekala na moyo kimye kyo baketulukuka kwi Gogi ne. *

17. Mambo ka o twafwainwa kubujila kuchina nkondo ya Amagedonyi? (Monai kipikichala kya pa nkupiko.)

¹⁷ Byonka byo twafunjile mu mutwe wafumako, atweba bavula twaikala bwikalo bwetu bonse mu moba a kupelako. Bino tuji ne na luketekelo lwa kupuluka malwa akatampe. Nkondo ya Amagedonyi yo ikekala mpelo ya buno bwikalo. Nangwa byonkabyo, kechi twafwainwa kuchina ne. Mambo ka? Mambo ino ikekala nkondo ya Lesa. (Maana 1:33; Ezi. 38:18-20; Zeka. 14:3) Kimye Yehoba kyo akakambizha, Yesu Kilishitu ukatangijila nzhita ya Lesa kuya na kulwa. Yesu ukengijila pamo na bashingwa bakasangulwa ne biumbi bya bamalaika. Bakalwa na Satana ne bandemona banji, kubikapo ne mazhita a pano pa ntanda.—Da. 12:1; Lum. 6:2; 17:14.

18. (a) Ñanyi mulaye witulaya Yehoba? (b) Kinembelo kya Lumwekesho 7:9, 13-17 kitulengela byepi kushiinwa’mba tukapuluka?

 ¹⁸ Yehoba witulaya’mba: “Kafwako kyela nangwa kimo kyo bakabunda kya kukulwishako kikengila ne.” (Isa. 54:17) “Jibumba jikatampe” ja bapopweshi ba Yehoba ba kishinka bakafuma “mu malwa akatampe” saka baji na bumi. Bakatwajijila kwingijila Lesa. (Tangai Lumwekesho 7:9, 13-17.) Baibolo witupa bishinka byavula bitulengela kushiinwa’mba tukapuluka. Twayuka kuba’mba “Yehoba uzhikijila bantu ba kishinka.” (Sala. 31:23) Bonse batemwa Yehoba kabiji bamupopwela bakasekela bingi pa kumona byo akabingisha jizhina janji jazhila.—Ezi. 38:23.

19. Ñanyi bintu byawama byo tubena kutengela kulutwe?

¹⁹ Akilangulukai pa byambo biji pa 2 Timoti 3:2-5 byo bakonsha kwibinembela mu jishinda ja kuba nobe kibena kulumbulula bantu bakekala mu ntanda ipya mukabula Satana. (Monai kakitenguluzha ka kuba’mba “ Bantu byo Bakekala pa kyo kya Kimye.”) Mulongo George Gangas, * wajinga mu Jibumba Jitangijila wikilumbulwile mu jino jishinda: “Ntanda ikawama bingi kimye bonse kyo bakekala balongo ne banyenga. Katatakatu mukekalenga mu ntanda ipya. Byonkatu Yehoba byo aji na bumi ne anweba mukekala na bumi. Tukekala myaka ne myaka.” Luno ke luketekelo lwawama bingi.